الفتح الربانی

فوائد: … ابوداود کی روایت میں آخری جملے سے پہلے وَلَا یَعِزُّ مَنْ عَادَیْتَ (اور وہ شخص عزت نہیں پا سکتا جس سے تو دشمنی کرے۔)کے الفاظ کا بھی ذکر ہے، عام لوگوں کو ان الفاظ سمیتیہ دعا یاد ہے۔ قنوت وتر میں اَللّٰھُمَّ اِنَّا نَسْتَعِیْنُکَ وَنَسْتَغْفِرُکَ … … پڑھنا کیسا ہے؟ کسی صحیح اور مرفوع روایت سے اس دعا کو قنوتِ وتر میں پڑھنا ثابت نہیں ہوتا، سنن بیہقی کے مطابق آپ صلی اللہ علیہ وآلہ وسلم کو اس دعا کو قنوت نازلہ میں پڑھنے کی تعلیم دی گئی، لیکنیہ حدیث مرسل ہے اور سیدنا عمر رضی اللہ عنہ سے یہ دعا ثابت ہے، لیکن وہ بھی اس کو رکوع کے بعد والی قنوت نازلہ میں پڑھتے تھے، یہ بھی سنن بیہقی کی روایت ہے۔ رکوع سے پہلے قنوت وتر پڑھنی چاہیے: سیدنا ابی بن کعب رضی اللہ عنہ کہتے ہیں: رسول اللہ صلی اللہ علیہ وآلہ وسلم تین رکعت وتر پڑھتے تھے، پہلی رکعت میں سورۂ اعلی، دوسری میں سورۂ کافرون اور تیسری میں سورۂ اخلاص کی تلاوت کرتے تھے اور رکوع سے پہلے قنوت کرتے تھے۔ (نسائی: ۱۶۹۹) سیدنا ابی بن کعب رضی اللہ عنہ ہی سے مروی ہے، وہ کہتے ہیں: اِنَّ رَسُوْلَ اللّٰہِ صلی اللہ علیہ وآلہ وسلم کَانَ یُوْتِرُ فَیَقْنُتُ قَبْلَ الرُّکُوْعِ۔ یعنی: رسول اللہ صلی اللہ علیہ وآلہ وسلم وتر پڑھتے تھے اور رکوع سے پہلے دعائے قنوت پڑھتے تھے۔(ابن ماجہ: ۱۱۸۲)