الفتح الربانی

سیدہ ام فضل رضی اللہ عنہا کہتی ہیں: میں نبی کریم صلی اللہ علیہ وسلم کے پاس گئی اور کہا: ”میں نے خواب میں اپنے گھر یا اپنے حجرے میں آپ کے اعضاء میں سے ایک عضو دیکھا ہے اور میں اس سے گھبرا گئی ہوں،“ لیکن آپ صلی اللہ علیہ وسلم نے فرمایا: ”اگر اللہ تعالیٰ نے چاہا تو سیدہ فاطمہ رضی اللہ عنہا بیٹا جنم دے گی اور تم اس کی کفالت کرو گی۔“ پس سیدہ فاطمہ رضی اللہ عنہا نے واقعی سیدنا حسن رضی اللہ عنہ کو جنم دیا اور ان کو سیدہ ام فضل کے سپرد کر دیا، انہوں نے ان کو سیدنا قثم رضی اللہ عنہ کے دودھ سے دودھ پلایا، ایک دن میں سیدنا حسن رضی اللہ عنہ کو لے کر نبی کریم صلی اللہ علیہ وسلم کی زیارت کرنے کے لیے آپ کے پاس آئی۔ آپ صلی اللہ علیہ وسلم نے ان کو پکڑا اور اپنے سینے پر رکھ دیا، پس بچے نے آپ صلی اللہ علیہ وسلم کے سینے پر پیشاب کر دیا اور وہ آپ صلی اللہ علیہ وسلم کے ازار تک پہنچ گیا، میں نے سیدنا حسن رضی اللہ عنہ کے کندھوں کے درمیان اپنے ہاتھ سے مارا، لیکن آپ صلی اللہ علیہ وسلم نے فرمایا: ”اللہ تعالیٰ تمہاری اصلاح کرے، تم نے میرے بیٹے کو تکلیف دی ہے۔“ یا آپ صلی اللہ علیہ وسلم نے فرمایا: ”اللہ تعالیٰ تجھ پر رحم کرے۔“ پھر میں نے کہا: ”آپ اپنا ازار مجھے دے دیں، تاکہ میں اس کو دھو دوں،“ لیکن آپ صلی اللہ علیہ وسلم نے فرمایا: ”صرف بچی کے پیشاب کو دھویا جاتا ہے اور بچے کے پیشاب پر پانی بہا دیا جاتا ہے۔“

(دوسری سند) سیدہ ام فضل رضی اللہ عنہا سے مروی ہے، وہ کہتی ہیں: پس سیدہ فاطمہ رضی اللہ عنہا نے سیدنا حسن رضی اللہ عنہ کو جنم دیا اور وہ میرے (سیدہ ام فضل رضی اللہ عنہا کے) حوالے کر دیا گیا، میں نے ان کو دودھ پلایا، یہاں تک کہ بچہ چلنے کا قابل ہو گیا یا (راوی نے کہا) میں نے دودھ چھڑوا دیا، بہرحال پھر میں اس بچے کو لے کر رسول اللہ صلی اللہ علیہ وسلم کے پاس آئی اور اس کو آپ صلی اللہ علیہ وسلم کی گود میں بٹھا دیا اور اس نے وہاں پیشاب کر دیا، میں نے اس کے کندھوں کے درمیان ضرب لگائی، لیکن آپ صلی اللہ علیہ وسلم نے فرمایا: ”اللہ تعالیٰ تجھ پر رحم کرے، میرے بچے کے ساتھ نرمی کرو۔“ اس حدیث میں یہ بھی ہے: آپ صلی اللہ علیہ وسلم نے فرمایا: ”صرف بچی کے پیشاب کو دھویا جاتا ہے اور بچے کے پیشاب پر چھینٹے مارے جاتے ہیں۔“

(تیسری سند) سیدہ ام فضل رضی اللہ عنہا سے مروی ہے کہ وہ سیدنا حسن رضی اللہ عنہ یا سیدنا حسین رضی اللہ عنہ کو دودھ پلاتی تھیں، وہ کہتی ہیں: رسول اللہ صلی اللہ علیہ وسلم تشریف لائے اور چھڑکاؤ کی ہوئی ایک جگہ پر بیٹھ گئے اور ان کو اپنے پیٹ پر رکھ دیا اور انہوں نے آپ صلی اللہ علیہ وسلم کے پیٹ پر پیشاب کر دیا، پس میں نے دیکھا کہ پیشاب آپ صلی اللہ علیہ وسلم کے پیٹ پر بہہ رہا تھا، میں ایک مشکیزے کی طرف گئی، تاکہ اس کا پانی آپ صلی اللہ علیہ وسلم پر بہاؤں، لیکن آپ صلی اللہ علیہ وسلم نے فرمایا: ”اے ام فضل! بچے کے پیشاب پر پانی بہا دیا جاتا ہے اور بچی کے پیشاب کو دھویا جاتا ہے۔“

سیدنا ابو لیلی رضی اللہ عنہ سے مروی ہے، وہ کہتے ہیں: ہم نبی کریم صلی اللہ علیہ وسلم کے پاس تھے، سیدنا حسن بن علی رضی اللہ عنہ گھسٹتے ہوئے آئے اور آپ صلی اللہ علیہ وسلم کے سینے پر چڑھ گئے اور آپ صلی اللہ علیہ وسلم پر پیشاب کر دیا، میں نے پیشاب کو آپ صلی اللہ علیہ وسلم کے پیٹ پر دیکھا، پس ہم ان کو پکڑنے کے لیے رسول اللہ صلی اللہ علیہ وسلم کی طرف لپکے، لیکن نبی کریم صلی اللہ علیہ وسلم نے فرمایا: ”میرا بیٹا، میرا بیٹا۔“ ایک روایت میں ہے: ”میرے بیٹے کو چھوڑ دو اور اس کو مت گھبراہٹ میں ڈالو، یہاں تک کہ یہ پیشاب پورا کر لے۔“ پھر آپ صلی اللہ علیہ وسلم نے پانی منگوایا اور اس پر بہا دیا۔

سیدہ عائشہ رضی اللہ عنہا سے مروی ہے، وہ کہتی ہیں کہ رسول اللہ صلی اللہ علیہ وسلم کے پاس بچے لائے جاتے تھے اور آپ صلی اللہ علیہ وسلم ان کے لیے برکت کی دعا کرتے تھے، ایک دفعہ ایک بچے کو لایا گیا اور اس نے آپ صلی اللہ علیہ وسلم پر پیشاب کر دیا، پس رسول اللہ صلی اللہ علیہ وسلم نے فرمایا: ”اس پر پانی بہا دو۔“

(دوسری سند) نبی کریم صلی اللہ علیہ وسلم کے پاس ایک بچے کو اس لیے لایا گیا تاکہ آپ صلی اللہ علیہ وسلم اس کو گڑتی دیں، پس آپ صلی اللہ علیہ وسلم نے اس کو اپنی گود میں بٹھا دیا اور اس نے آپ صلی اللہ علیہ وسلم پر پیشاب کر دیا، سو آپ صلی اللہ علیہ وسلم نے پانی منگوایا اور اس کے پیچھے لگا دیا، وکیع رحمہ اللہ راوی نے کہا: پس آپ صلی اللہ علیہ وسلم نے پانی کو اس کے پیچھے لگایا اور دھویا نہیں۔

سیدہ ام قیس بنت محصن رضی اللہ عنہا سے مروی ہے، وہ کہتی ہیں: میں ایک بچہ لے کر نبی کریم صلی اللہ علیہ وسلم کے پاس گئی، وہ بچہ ابھی تک کھانا نہیں کھاتا تھا، اس نے آپ صلی اللہ علیہ وسلم پر پیشاب کر دیا، آپ صلی اللہ علیہ وسلم نے پانی منگوایا اور اس پر چھینٹے مار دیے۔

(دوسری سند) اسی طرح کی روایت ہے، البتہ اس میں ہے: پس آپ صلی اللہ علیہ وسلم نے اس بچے کو اپنی گود میں رکھا اور اس نے آپ صلی اللہ علیہ وسلم پر پیشاب کر دیا، آپ صلی اللہ علیہ وسلم نے پانی منگوا کر اس پر چھینٹے مار دیے، یہ بچہ ابھی تک کھانا کھانے کی عمر تک نہیں پہنچا تھا۔ امام زہری رحمہ اللہ نے کہا: یہی نبوی طریقہ نافذ ہو گیا کہ بچے کے پیشاب پر چھینٹے مارے جائیں گے اور بچی کے پیشاب کو دھویا جائے گا۔

سیدنا علی رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”بچے کے پیشاب پر چھینٹے مارے جائیں گے اور بچی کے پیشاب کو دھویا جائے گا۔“ امام قتادہ رحمہ اللہ نے کہا: یہ فرق اس وقت تک ہے، جب تک وہ کھانا نہیں کھاتے، جب کھانا کھانا شروع کر دیں گے تو دونوں کے پیشاب کو دھویا جائے گا۔

سیدہ ام کرز خزاعیہ رضی اللہ عنہا بیان کرتی ہیں کہ ایک بچے کو نبی کریم صلی اللہ علیہ وسلم کے پاس لایا گیا، اس نے آپ صلی اللہ علیہ وسلم پر پیشاب کر دیا اور آپ صلی اللہ علیہ وسلم نے حکم دیا کہ ”اس پر چھینٹے مار دیے جائیں،“ پھر ایک بچی کو لایا گیا، اس نے بھی آپ صلی اللہ علیہ وسلم پر پیشاب کر دیا، اس کے بارے میں آپ صلی اللہ علیہ وسلم نے حکم دیا کہ (اس کو دھویا جائے)، پس اسے دھو دیا گیا۔

سیدنا عبداللہ بن عباس رضی اللہ عنہما سے روایت ہے کہ سیدہ ام فضل بنت حارث رضی اللہ عنہا، سیدہ ام حبیبہ بنت عباس رضی اللہ عنہا کو لے کر آئیں اور اسے رسول اللہ صلی اللہ علیہ وسلم کی گود میں رکھ دیا، پس اس نے پیشاب کر دیا، انہوں نے اس کو کھینچا اور اس کے کندھوں کے درمیان مکا مارا اور پھر اس کو کھینچا، رسول اللہ صلی اللہ علیہ وسلم نے فرمایا: ”مجھے پانی کا پیالہ دو۔“ پس آپ صلی اللہ علیہ وسلم نے پیشاب کی جگہ پر اس کو بہا دیا اور فرمایا: ”پیشاب کی جگہ پر پانی بہا دیا کرو۔“