الفتح الربانی

فوائد: … دودھ اس امت کے لیے کیسے نقصان دہ ہے؟ درج ذیل حدیث کے مختلف الفاظ پر غور کریں: سیدنا عقبہ بن عامر رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ((إِنَّمَا أَخَافُ عَلَی أُمَّتِی الْکِتَابَ وَاللَّبَنَ۔)) قَالَ: قِیلَ: یَا رَسُولَ اللَّہِ! مَا بَالُ الْکِتَابِ؟ قَالَ: ((یَتَعَلَّمُہُ الْمُنَافِقُونَ ثُمَّ یُجَادِلُونَ بِہِ الَّذِینَ آمَنُوا۔)) فَقِیلَ: وَمَا بَالُ اللَّبَنِ؟ قَالَ: ((أُنَاسٌ یُحِبُّونَ اللَّبَنَ فَیَخْرُجُونَ مِنْ الْجَمَاعَاتِ
وَیَتْرُکُونَ الْجُمُعَاتِ۔)) … ’’مجھے اپنی امت پر سب سے زیادہ ڈر قرآن مجید اور دودھ کے معاملے میں ہے۔‘‘ کسی نے کہا: اے اللہ کے رسول! کتاب کی کیا وجہ ہے؟ آپ صلی اللہ علیہ وسلم نے فرمایا: ’’منافق اس کی تعلیم حاصل کر کے مومنوں سے مجادلہ کریں گے۔‘‘ پھر کسی نے کہا: دودھ کی کیا وجہ ہے؟ آپ صلی اللہ علیہ وسلم نے فرمایا: ’’لوگ دودھ کو پسند کریں گے، پھر وہ جماعتوں سے نکل جائیں گے اور جمعہ کی نمازوں کو ترک کر دیں گے۔‘‘ (مسند احمد: ۴/ ۱۴۶، ۱۷۳۱۸)
ایک روایت میں ہے: ((یَتَعَلَّمُونَ الْقُرْآنَ فَیَتَأَوَّلُونَہُ عَلٰی غَیْرِ مَا أَنْزَلَ اللَّہُ عَزَّ وَجَلَّ وَیُحِبُّونَ اللَّبَنَ فَیَدَعُونَ الْجَمَاعَاتِ وَالْجُمَعَ وَیَبْدُونَ۔)) … ’’قرآن کی تعلیم حاصل کر کے اس کی ایسی تاویل کریں گے، جس کے لیے اللہ تعالی نے قرآن مجید کو نازل نہیں کیا، اور دودھ کو پسند کریں گے، پھر (اس کی تلاش میں) جماعتوں اور جمعوں کو چھوڑ کر جنگلوں میں چلے جائیں گے۔‘‘ (مسند احمد: ۴/ ۱۵۵)
ایک روایت کے الفاظ یہ ہیں: ((أَمَّا اللَّبَنُ فَیَبْتَغُونَ الرِّیفَ وَیَتَّبِعُونَ الشَّہَوَاتِ وَیَتْرُکُونَ الصَّلَوَاتِ وَأَمَّا الْقُرْآنُ فَیَتَعَلَّمُہُ الْمُنَافِقُونَ فَیُجَادِلُونَ بِہِ الْمُؤْمِنِینَ۔)) … ’’رہا مسئلہ دودھ کا تو لوگ میدانوں (اور سرسبززمینوں) کو تلاش کریں اور اپنی خواہشات کی پیروی کریں گے اور نمازوں کا ترک کر دیں گے اور رہا مسئلہ قرآن مجید کا، اس کی تفصیلیہ ہے کہ منافق اس کی تعلیم حاصل کر کے اس کے ذریعے مومنوں سے مجادلہ کریں گے۔‘‘ (مسند احمد: ۴/ ۱۵۷)