سنن الدارقطني

سلیمان تیمی کہتے ہیں: نبیذ پینے میں کوئی حرج نہیں ہے، مسلمان کے لیے یہ مناسب نہیں ہے کہ وہ اس حوالے سے اپنے دین (کے حکم) میں کسی غلط فہمی کا شکار ہو۔

سیدنا انس رضی اللہ عنہ بیان کرتے ہیں کہ سیدنا ابوطلحہ رضی اللہ عنہ، نبی کریم صلی اللہ علیہ وسلم کی خدمت میں حاضر ہوئے، انہوں نے عرض کی: میں نے اپنے زیر پرورش یتیم بچوں کے لیے کچھ شراب خریدی ہے، نبی کریم صلی اللہ علیہ وسلم نے فرمایا: ”شراب کو بہا دو اور اس کے برتن کو توڑ دو۔“ آپ صلی اللہ علیہ وسلم نے یہ بات تین مرتبہ دہرائی۔

علقمہ بن وائل اپنے والد کا یہ بیان نقل کرتے ہیں: ایک شخص جس کا نام سوید بن طارق تھا، اس نے نبی کریم صلی اللہ علیہ وسلم سے شراب کے بارے میں سوال کیا تو آپ صلی اللہ علیہ وسلم نے اس شخص کو اس شراب سے منع کر دیا۔ وہ شخص بولا: میں اسے دوا کے لیے تیار کرتا ہوں، تو نبی کریم صلی اللہ علیہ وسلم نے فرمایا: ”یہ بیماری ہے، یہ دوا نہیں ہے۔“