سنن الدارقطني

شعبی بیان کرتے ہیں کہ ایک شخص نے سیدنا علی رضی اللہ عنہ کے برتن میں سے نبیذ پی لی، یہ صفین کے مقام کی بات ہے، اسے نشہ ہو گیا تو سیدنا علی رضی اللہ عنہ نے اس پر حد جاری کی۔

عامر بیان کرتے ہیں کہ ایک دیہاتی نے پرانے مشکیزے سے نبیذ پی تو اسے نشہ ہو گیا، تو سیدنا عمر رضی اللہ عنہ نے اسے حد لگائی۔ یہ مرسل ہے اور یہ دونوں روایتیں ثابت نہیں ہیں۔

سیدنا مطلب بن ابووداعہ سہمی رضی اللہ عنہ بیان کرتے ہیں کہ ایک سخت گرمی کے دن نبی کریم صلی اللہ علیہ وسلم نے بیت اللہ کا طواف کیا، آپ نے قریش کے کچھ لوگوں سے پینے کے لیے پانی مانگا، آپ نے فرمایا: ”کیا تمہارے پاس کوئی مشروب ہے، اگر ہے، تو وہ میرے گھر بھجوا دیں؟“ تو ان میں سے ایک شخص نے آپ کے گھر اسے بھجوا دیا، ایک کنیز آئی، اس کے پاس برتن تھا، جس میں کشمش کی بنی ہوئی نبیذ موجود تھی۔ جب نبی کریم صلی اللہ علیہ وسلم نے اسے ملاحظہ فرمایا تو دریافت کیا: ”تم نے اسے ڈھانپا کیوں نہیں! خواہ کسی لکڑی کے ذریعے ہی اس کو ڈھانپ دیتی۔“ جب اس نے اس برتن کو آپ کے قریب کیا تو آپ کو اس میں سے تیز بو محسوس ہوئی، آپ صلی اللہ علیہ وسلم نے اسے واپس کر دیا، اس شخص نے عرض کی: یا رسول اللہ! اگر یہ حرام ہے، تو آپ اسے نہ پییں۔ نبی کریم صلی اللہ علیہ وسلم نے اس برتن کو دوبارہ منگوایا اور اس کے ساتھ یہی طرز عمل اختیار کیا، اس شخص نے پھر یہی عرض کی تو نبی کریم صلی اللہ علیہ وسلم نے آپ زم زم کا ایک ڈول منگوایا اور اس برتن میں ڈال دی اور ارشاد فرمایا: ”جب تمہارا مشروب تیز ہو جائے تو تم اس کے ساتھ یہ کر لو۔“

سیدنا مطلب بن ابووداعہ بیان کرتے ہیں کہ ایک مرتبہ نبی کریم صلی اللہ علیہ وسلم نے بیت اللہ کا طواف کرنے کے بعد ارشاد فرمایا: ”مجھے کچھ پینے کے لیے دو!“ تو آپ کی خدمت میں کشمش کی نبیذ لائی گئی، آپ نے اسے کچھ پیا اور پھر اسے واپس کر دیا، میں نے عرض کی: اے اللہ کے نبی! کیا یہ حرام ہے؟ اللہ کی قسم! یہ تو ایک مشروب ہے۔ تو نبی کریم صلی اللہ علیہ وسلم خاموش رہے، انہوں نے دوبارہ آپ سے یہ سوال کیا تو نبی کریم صلی اللہ علیہ وسلم پھر خاموش رہے، انہوں نے عرض کی: یا رسول اللہ! کیا یہ حرام ہے؟ اللہ کی قسم! یہ تو اہل مکہ کا مخصوص مشروب ہے۔ نبی کریم صلی اللہ علیہ وسلم نے فرمایا: ”اسے واپس میرے پاس لے آؤ!“ پھر آپ نے لوگوں کو حکم دیا کہ وہ اس میں پانی ملا دیں، تو نبی کریم صلی اللہ علیہ وسلم اسے گھونٹ گھونٹ بھر کے پینے لگے۔ آپ یہ ارشاد فرماتے رہے: ”تھوڑا سا پانی اور ڈال دو۔“ آپ صلی اللہ علیہ وسلم بار بار یہی ارشاد فرماتے رہے، یہاں تک کہ وہ پینے کے قابل ہو گیا، آپ نے فرمایا: ”تم اس کے ساتھ اس طرح کر لیا کرو۔“

مالک بن ثقفی بیان کرتے ہیں کہ میں نے سیدنا عبداللہ بن عمر رضی اللہ عنہما سے تیز نبیذ کے بارے میں دریافت کیا تو انہوں نے فرمایا: ایک مرتبہ نبی کریم صلی اللہ علیہ وسلم ایک محفل میں بیٹھے ہوئے تھے، آپ کو ایک شخص سے نبیذ کی بو محسوس ہوئی، آپ نے دریافت کیا: ”یہ کس چیز کی بو ہے؟“ اس نے عرض کی: یہ نبیذ کی بو ہے۔ تو نبی کریم صلی اللہ علیہ وسلم کے حکم کے تحت وہ نبیذ منگوائی گئی، اس شخص نے وہ نبیذ بھجوائی، وہ آپ صلی اللہ علیہ وسلم کی خدمت میں لائی گئی، نبی کریم صلی اللہ علیہ وسلم اپنا چہرہ مبارک اس کے پاس لے گئے اور اسے سونگھا، پھر آپ چہرہ واپس لے آئے اور اس کو واپس کر دیا۔ جب وہ شخص بطحا سے جا چکا تھا تو وہ شخص پھر واپس آیا اور اس نے دریافت کیا: کیا یہ حرام ہے یا حلال ہے؟ تو نبی کریم صلی اللہ علیہ وسلم نے اپنا سر مبارک پھر اس کے قریب کیا اور اس کی تیز بو کو محسوس کر کے اس میں پانی ملا دیا، پھر اسے پی لیا، آپ نے فرمایا: ”جب تمہارے مشکیزوں میں جوش پیدا ہو جائے تو اسے پانی کے ذریعے ختم کرو۔“ یہ روایت اسی طرح منقول ہے، تاہم سیدنا عبداللہ بن عمر رضی اللہ عنہما کے حوالے سے نبی کریم صلی اللہ علیہ وسلم سے مستند طور پر یہ بات منقول ہے: ”جس چیز کی زیادہ مقدار نشہ پیدا کرے، اس کی تھوڑی مقدار بھی حرام ہوتی ہے۔“ یہ روایت پہلے گزر چکی ہے۔

سیدنا ابومسعود انصاری رضی اللہ عنہ بیان کرتے ہیں کہ ایک مرتبہ نبی کریم صلی اللہ علیہ وسلم کو خانہ کعبہ کے پاس پیاس محسوس ہوئی، آپ صلی اللہ علیہ وسلم نے پینے کے لیے کچھ مانگا تو آپ کی خدمت میں مشکیزے میں سے نبیذ لائی گئی، نبی کریم صلی اللہ علیہ وسلم نے اسے سونگھا، پھر آپ نے فرمایا: ”میرے پاس زم زم کا ایک ڈول لے کے آؤ!“ نبی کریم صلی اللہ علیہ وسلم نے وہ پانی اس میں ملا دیا، پھر اسے پی لیا، ایک شخص نے عرض کی: یا رسول اللہ! کیا یہ حرام ہے؟ نبی کریم صلی اللہ علیہ وسلم نے فرمایا: ”جی نہیں!“۔

سیدنا ابومسعود انصاری رضی اللہ عنہ بیان کرتے ہیں کہ ایک مرتبہ نبی کریم صلی اللہ علیہ وسلم کو پیاس محسوس ہوئی، آپ اس وقت خانہ کعبہ کا طواف کر رہے تھے، تو آپ کی خدمت میں نبیذ کا مشکیزہ لایا گیا۔ نبی کریم صلی اللہ علیہ وسلم نے اسے قبول نہیں کیا۔ ایک شخص نے آپ کی خدمت میں عرض کی: یا رسول اللہ! کیا یہ حرام ہے؟ آپ صلی اللہ علیہ وسلم نے فرمایا: ”نہیں! تم میرے پاس آپ زم زم کا ڈول لے کے آؤ۔“ پھر نبی کریم صلی اللہ علیہ وسلم نے وہ پانی اس میں ملا دیا اور اسے پی لیا اور پھر آپ طواف کرنے لگے۔

سیدنا ابومسعود انصاری رضی اللہ عنہ بیان کرتے ہیں کہ مجھے نبی کریم صلی اللہ علیہ وسلم کے بارے میں یاد ہے کہ آپ صلی اللہ علیہ وسلم کی خدمت میں ایک برتن لایا گیا، جس میں نبیذ موجود تھی، نبی کریم صلی اللہ علیہ وسلم نے اسے پکڑا اور ناراضگی کا اظہار کر کے اسے واپس کر دیا، ایک شخص آپ صلی اللہ علیہ وسلم کے پیچھے آیا، اس نے عرض کی: یا رسول اللہ! کیا یہ حرام ہے؟ نبی کریم صلی اللہ علیہ وسلم نے اس برتن کو پکڑا، پھر آپ نے آپ زم زم کا ایک ڈول منگوایا اور اس میں وہ پانی ملا دیا، پھر اس مشروب کو پی لیا، پھر آپ نے فرمایا: ”جب تمہاری نبیذ تیز ہو جائے تو اس کی تیزی کو پانی کے ذریعے ختم کر دو۔“

سیدنا ابومسعود انصاری رضی اللہ عنہ بیان کرتے ہیں کہ نبی کریم صلی اللہ علیہ وسلم سے نبیذ کے بارے میں دریافت کیا گیا: کیا یہ حلال ہے یا حرام ہے؟ تو نبی کریم صلی اللہ علیہ وسلم نے فرمایا: ”یہ حلال ہے۔“

سیدنا عبداللہ بن عمر رضی اللہ عنہما، نبی کریم صلی اللہ علیہ وسلم کے بارے میں یہ بات نقل کرتے ہیں: ایک شخص کو (آپ کے پاس) لایا گیا جسے کھجور کی نبیذ پینے کی وجہ سے نشہ ہو گیا تھا تو نبی کریم صلی اللہ علیہ وسلم نے اسے کوڑے لگوائے۔

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم کی خدمت میں ایک شخص کو لایا گیا، جسے نبیذ پینے کی وجہ سے نشہ ہو گیا تھا تو نبی کریم صلی اللہ علیہ وسلم نے اسے کوڑے لگوائے۔