سنن الدارقطني

سیدہ عائشہ رضی اللہ عنہا بیان کرتی ہیں کہ نبی کریم صلی اللہ علیہ وسلم نے فرمایا: ”تمام شہر، اللہ کے شہر ہیں، تمام بندے اللہ کے بندے ہیں، جو شخص کسی بنجر زمین کو آباد کرتا ہے وہ اسے مل جائے گی اور کوئی شخص ظلم کے طور پر اس پر قبضہ نہیں کر سکتا۔“

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”ثبوت پیش کرنا اس شخص پر لازم ہو گا جو دعویٰ کرتا ہے اور جو اس کا انکار کر دیتا ہے اس پر قسم اٹھانا لازم ہو گا، البتہ قسامت کا حکم مختلف ہے۔“

عمرو بن شعیب اپنے والد کے حوالے سے، اپنے دادا کا یہ بیان نقل کرتے ہیں کہ نبی کریم صلی اللہ علیہ وسلم نے فرمایا: ”دعویٰ کرنے والے شخص پر ثبوت پیش کرنا لازم ہے اور انکار کرنے والے شخص پر قسم اٹھانا لازم ہو گا، البتہ قسامت کا حکم مختلف ہے۔“

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں کہ نبی کریم صلی اللہ علیہ وسلم نے فرمایا: ”دعویٰ کرنے والے شخص پر ثبوت پیش کرنا لازم ہے، اور جس شخص کے خلاف دعویٰ کیا گیا ہو، اس پر قسم اٹھانا لازم ہے۔“

سیدنا عمر رضی اللہ عنہ، نبی کریم صلی اللہ علیہ وسلم کا یہ بیان نقل کرتے ہیں کہ ”جو شخص دعویٰ کرتا ہے اس پر ثبوت پیش کرنا لازم ہے اور جس شخص کے خلاف دعویٰ کیا گیا ہو، اس پر صرف قسم اٹھانا لازم ہو گا۔“

سیدنا عبداللہ بن عمر رضی اللہ عنہما نے یہ بات ارشاد فرمائی ہے کہ جس شخص کے خلاف دعویٰ کیا گیا ہو، وہ اس بات کا حق دار ہو گا کہ صرف قسم اٹھا لے، البتہ اگر ثبوت پیش ہو جائے (تو حکم مختلف ہو گا)۔

سیدنا عمران بن حصین رضی اللہ عنہ بیان کرتے ہیں کہ نبی کریم صلی اللہ علیہ وسلم نے دعویٰ کرنے والے کو حکم دیا تھا کہ وہ دو گواہ پیش کرے اور جس شخص کے خلاف دعویٰ کیا گیا تھا اسے قسم اٹھانے کی ہدایت کی تھی۔

سیدنا زید رضی اللہ عنہ بیان کرتے ہیں کہ جو شخص ثبوت کے بغیر اپنے بھائی سے کچھ حاصل کرتا ہے، تو جس شخص کے خلاف مقدمہ ہے، اس شخص کے لیے قسم اٹھانا ضروری ہو گا۔

سیدنا ابوہریرہ رضی اللہ عنہ بیان کرتے ہیں کہ انہوں نے نبی کریم صلی اللہ علیہ وسلم کو فرمایا: ”کسی بھی دیہاتی شخص کی گواہی شہر میں رہنے والے شخص کے خلاف درست نہیں ہو گی۔“

سیدنا ابوہریرہ رضی اللہ عنہ، نبی کریم صلی اللہ علیہ وسلم کا یہ فرمان نقل کرتے ہیں کہ ”شہری شخص کے خلاف کسی دیہاتی شخص کی گواہی قبول نہیں کی جائے گی۔“

محمد بن ابوبکر اپنے والد سیدنا ابوبکر صدیق رضی اللہ عنہ کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: ”اسی وراثت کو تقسیم کیا جاتا ہے، جسے تقسیم کیا جا سکتا ہو۔“

عبدالرحمن بن ابوبکر رضی اللہ عنہ اپنے والد کے حوالے سے اسی طرح نقل کرتے ہیں جس میں یہ بات منقول ہے کہ نبی کریم صلی اللہ علیہ وسلم نے فرمایا: ”اسی وراثت کو تقسیم کیا جا سکتا ہے، جسے تقسیم کیا جا سکے۔“

سیدنا عبداللہ بن عباس رضی اللہ عنہما بیان کرتے ہیں: ایک انصاری خیبر میں یہودیوں کے کنویں کے پاس مقتول پایا گیا، ان لوگوں نے اس بات کا تذکرہ نبی کریم صلی اللہ علیہ وسلم سے کیا۔ نبی کریم صلی اللہ علیہ وسلم نے ان لوگوں کو پیغام بھجوایا کہ وہ لوگ 50 افراد کو لیں، جن میں سے ہر ایک شخص کا نام لے کر قسم اٹھائے کہ ”میں نے اسے قتل نہیں کیا، نہ ہی میں قاتل کے بارے میں کچھ جانتا ہوں۔“ پھر نبی کریم صلی اللہ علیہ وسلم نے ان پر دیت کی ادائیگی لازم قرار دی۔ تو انہوں نے کہا: ان صاحب نے وہی فیصلہ دیا ہے جو سیدنا موسیٰ علیہ السلام کی شریعت میں تھا۔

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”جنگل میں موجود کنویں کے آس پاس 25 ہاتھ تک کی جگہ حفاظتی ہوتی ہے اور آبادی میں موجود کنویں کے آس پاس کے 50 ہاتھ تک کی جگہ حفاظتی ہوتی ہے، کھلی جگہ پر بہنے والے چشمے کے آس پاس تین سو ہاتھ تک کی جگہ حفاظتی ہوتی ہے، جبکہ کھیتی باڑی کے پاس بہنے والے چشمے کی چھ سو ہاتھ کی جگہ حفاظتی ہوتی ہے۔“

سیدنا ابیض بن حمال رضی اللہ عنہ بیان کرتے ہیں کہ انہوں نے نبی کریم صلی اللہ علیہ وسلم سے درخواست کی کہ آپ ”مآرب“ کے مقام پر موجود ”ملح شذا“ نام کا (قطعہ اراضی) انہیں عطا کر دیں۔ نبی کریم صلی اللہ علیہ وسلم نے وہ جگہ انہیں عطا کر دی، اس کے بعد اقرع بن حابس تمیمی نے نبی کریم صلی اللہ علیہ وسلم کی خدمت میں عرض کی: یا رسول اللہ! میں زمانہ جاہلیت میں اس مقام تک پہنچ گیا تھا، یہ وہ جگہ تھی جہاں پانی کا نام و نشان نہیں تھا۔ جو شخص وہاں پہنچ جاتا تھا وہ وہاں قبضہ کر لیتا تھا، اس کی مثال بہتے ہوئے پانی کی تھی۔ تو نبی کریم صلی اللہ علیہ وسلم نے سیدنا ابیض بن حمال سے وہ جگہ واپس لے لی۔ تو سیدنا ابیض نے عرض کی کہ میں یہ اس شرط پر واپس کر رہا ہوں کہ یہ میری طرف سے صدقہ شمار ہو گی۔ تو نبی کریم صلی اللہ علیہ وسلم نے فرمایا: ”یہ تمہاری طرف سے صدقہ شمار ہو گی لیکن اس کی مثال بہتے ہوئے پانی کی سی ہے، جو شخص اس تک پہنچ جائے گا وہ اسے حاصل کر لے گا۔“ فرخ نامی راوی نے یہ بات بیان کی ہے کہ وہ جگہ آج بھی اسی طرح ہے جو شخص وہاں پہنچ جاتا ہے وہ اسے حاصل کر لیتا ہے۔ پھر نبی کریم صلی اللہ علیہ وسلم نے سیدنا ابیض بن حمال کو ”جرف“ کے مقام پر جو ”جرف مراد“ ہے، وہاں نبی کریم صلی اللہ علیہ وسلم نے ان کو کھجوروں کا باغ عنایت کیا، یہ اس پہلی زمین کے بدلے میں تھا۔

سیدنا ابیض بن حمال رضی اللہ عنہ بیان کرتے ہیں کہ میں نے نبی کریم صلی اللہ علیہ وسلم کی خدمت میں عرض کیا: میں نے آپ سے ”ملح“ نامی جگہ مانگی، آپ نے وہ مجھے عطا کر دی، جب میں وہاں سے اٹھ کر واپس جانے لگا تو ایک شخص نے عرض کی: یا رسول اللہ! کیا آپ کو پتا ہے کہ آپ نے اس کو کون سی جگہ دی ہے، آپ نے اسے بہتا ہوا پانی دے دیا ہے۔ تو نبی کریم صلی اللہ علیہ وسلم نے ان سے وہ جگہ واپس لے لی۔

سیدنا صفوان بن یعلیٰ اپنے والد کا یہ بیان نقل کرتے ہیں: میں نبی کریم صلی اللہ علیہ وسلم کے ساتھ غزوہ تبوک میں شریک ہوا، میں یہ سمجھتا ہوں کہ یہ میری سب سے بڑی نیکی تھی۔ میرے ساتھ میرا ایک مزدور بھی تھا، اس کی ایک شخص کے ساتھ لڑائی ہو گئی، ان دونوں میں سے کسی ایک نے دوسرے شخص کی انگلی چبا لی (راوی کہتے ہیں:) سیدنا سفیان نے اس بات کا تذکرہ کیا تھا کہ کس نے کس کی انگلی چبائی تھی، مجھے یہ بات بھول گئی ہے۔ دوسرے شخص نے اپنا ہاتھ کھینچا تو چبانے والے شخص کے سامنے کے دانت ٹوٹ گئے۔ یہ مقدمہ نبی کریم صلی اللہ علیہ وسلم کی بارگاہ میں پیش ہوا تو آپ نے ان دانتوں کو رائیگاں قرار دیا اور فرمایا: ”کیا یہ شخص اپنا ہاتھ تمہارے منہ میں رہنے دیتا تا کہ تم اس کا ہاتھ چبا ڈالتے۔“ (راوی کہتے ہیں: میرا خیال ہے کہ روایت میں یہ مثال ہے) ”تم سانڈ کی طرح چبا لیتے۔“

سفیان بن عبداللہ اپنے دو چچاؤں سیدنا یعلیٰ اور سیدنا سلمہ کا بیان نقل کرتے ہیں کہ ہم لوگ نبی کریم صلی اللہ علیہ وسلم کے ساتھ غزوہ تبوک میں شریک ہوئے، ہمارے ساتھ مکہ میں رہنے والا ایک شخص بھی تھا، اس کی ایک شخص کے ساتھ لڑائی ہو گئی، اس نے دوسرے کے بازو پر زور سے کاٹا، دوسرے شخص نے اس کے منہ سے اپنا ہاتھ کھینچا تو اس کے سامنے والے دو دانت ٹوٹ گئے۔ وہ نبی کریم صلی اللہ علیہ وسلم کی خدمت میں حاضر ہوا تا کہ وہ اس کی دیت دلوائیں، تو نبی کریم صلی اللہ علیہ وسلم نے فرمایا: ”کوئی شخص اپنے بھائی کی طرف جا کر اسے سانڈ کی طرح کاٹ لیتا ہے اور پھر وہ آ جاتا ہے تا کہ اس بارے میں مطالبہ کرے، تمہیں کوئی حق نہیں ملے گا۔“ راوی کہتے ہیں کہ نبی کریم صلی اللہ علیہ وسلم نے اسے چھوڑ دیا۔

یہی روایت ایک اور سند کے ہمراہ منقول ہے، اس میں یہ الفاظ ہیں کہ نبی کریم صلی اللہ علیہ وسلم نے فرمایا: ”اس کی کوئی دیت نہیں ہو گی۔“ تو نبی کریم صلی اللہ علیہ وسلم نے اسے ایسے ہی چھوڑ دیا۔