سنن الدارقطني

سیدنا ابوکبشہ انماری رضی اللہ عنہ بیان کرتے ہیں کہ جب نبی کریم صلی اللہ علیہ وسلم نے مکہ کو فتح کیا (یعنی اس پر حملہ کیا)، تو سیدنا زبیر رضی اللہ عنہ بائیں حصے کے نگران تھے، جبکہ سیدنا مقداد رضی اللہ عنہ دائیں حصے کے نگران تھے، جب نبی کریم صلی اللہ علیہ وسلم مکہ تشریف لائے اور لوگوں کی رہنمائی کی، تو اسی دوران یہ دونوں حضرات اپنے سواروں کو ساتھ لے کر آئے، تو نبی کریم صلی اللہ علیہ وسلم کھڑے ہو گئے، آپ صلی اللہ علیہ وسلم نے ان دونوں سے غبار ہٹایا اور فرمایا: ”میں گھوڑے کے دو حصے اور سوار کے لیے ایک حصہ مقرر کرتا ہوں، جو شخص ان میں کمی کرے گا، اللہ تعالیٰ اسے کمی دے گا۔“

سیدنا ابورہم رضی اللہ عنہ بیان کرتے ہیں کہ میں نبی کریم صلی اللہ علیہ وسلم کے ساتھ ایک غزوہ میں شریک ہوا، میرے ساتھ میرا بھائی بھی تھا، ہمارے ساتھ دو گھوڑے تھے، تو آپ نے ہمیں چھ حصے ادا کیے، چار حصے ہم دونوں کے گھوڑوں کے لیے تھے اور دو حصے ہم دونوں کے لیے تھے، تو ہم نے دو جوان اونٹوں کے عوض میں اپنے حصے کو فروخت کر دیا۔

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے سوار اور اس کے گھوڑے کے لیے تین حصے مقرر کیے، ایک حصہ آدمی کا تھا اور دو حصے اس کے گھوڑے کے تھے۔

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے گھوڑے کے لیے دو حصے اور گھوڑے والے کے لیے ایک حصہ مقرر کیا۔

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے تقسیم کرتے ہوئے گھوڑے کے لیے دو حصے اور سوار کے لیے ایک حصہ مقرر کیا۔

یہی روایت ایک اور سند کے ہمراہ بھی منقول ہے۔

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے آدمی اور اس کے گھوڑے کو تین حصے دیے، ایک حصہ آدمی کا تھا اور دو حصے اس کے گھوڑے کے تھے۔

سیدنا مقداد رضی اللہ عنہ بیان کرتے ہیں کہ میں نبی کریم صلی اللہ علیہ وسلم کے ساتھ غزوہ بدر میں شریک ہوا ہوں، میں گھوڑے پر سوار تھا، جس کے ساتھ اس کی مونث بھی تھی، تو نبی کریم صلی اللہ علیہ وسلم نے مجھے ایک حصہ دیا اور میرے گھوڑے کو دو حصے دیے۔

سیدنا مقداد رضی اللہ عنہ بیان کرتے ہیں کہ نبی کریم صلی اللہ علیہ وسلم نے غزوہ خیبر کے موقع پر مجھے ایک حصہ دیا تھا اور میرے گھوڑے کو دو حصے دیے تھے۔

سیدنا مقداد بن عمرو رضی اللہ عنہ بیان کرتے ہیں کہ غزوہ بدر کے دن نبی کریم صلی اللہ علیہ وسلم نے ان کے گھوڑے کو دو حصے دیے تھے اور انہیں ایک حصہ دیا تھا۔

سیدنا عمر بن خطاب، سیدنا طلحہ بن عبیداللہ اور سیدنا زبیر بن عوام رضی اللہ عنہم بیان کرتے ہیں کہ نبی کریم صلی اللہ علیہ وسلم نے گھوڑے کو دو حصے دیے تھے اور آدمی کو ایک حصہ دیا تھا۔

یہی روایت ایک اور سند کے ہمراہ منقول ہے۔

سیدنا عبداللہ بن عباس رضی اللہ عنہما بیان کرتے ہیں کہ نبی کریم صلی اللہ علیہ وسلم نے غزوہ حنین کے موقع پر دو سو گھوڑوں کو دو، دو حصے دیے تھے۔

یہی روایت ایک اور سند کے ہمراہ منقول ہے، جس میں یہ الفاظ ہیں: ”ہر گھوڑے کے دو حصے تھے۔“

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے گھڑسوار کو ایک حصہ دیا تھا اور گھوڑے کو دو حصے دیے تھے۔ ایک اور روایت میں اس کے برعکس روایت منقول ہے، جس میں یہ الفاظ ہیں: ”گھڑسوار کو دو حصے دیے تھے اور پیادہ شخص کو ایک حصہ دیا تھا۔“

بشیر بن عمرو بیان کرتے ہیں کہ نبی کریم صلی اللہ علیہ وسلم نے میرے گھوڑے کو چار حصے دیے تھے اور مجھے ایک حصہ دیا تھا، تو مجھے پانچ حصے ملے تھے۔

سیدنا جابر رضی اللہ عنہ بیان کرتے ہیں کہ میں نبی کریم صلی اللہ علیہ وسلم کے ساتھ ایک جنگ میں شریک ہوا، نبی کریم صلی اللہ علیہ وسلم نے سواروں کو تین حصے دیے اور پیادہ شخص کو ایک حصہ دیا۔

سیدنا مجمع بن جاریہ رضی اللہ عنہ بیان کرتے ہیں کہ غزوہ حدیبیہ کے موقع پر میں نبی کریم صلی اللہ علیہ وسلم کے ساتھ شریک تھا، جب ہم وہاں سے واپس ہوئے تو لوگ اپنے اونٹوں کو دوڑانے لگے۔ بعض لوگوں نے دوسروں سے دریافت کیا: ان لوگوں کو کیا ہوا ہے، یہ نبی کریم صلی اللہ علیہ وسلم کی طرف جا رہے ہیں؟ ہم نکلے، ہم نے نبی کریم صلی اللہ علیہ وسلم کو کراع الغمیم کے مقام پر ٹھہرے ہوئے پایا، آپ کی طرف جانے والے کچھ لوگ جب وہاں اکٹھے ہو گئے تو آپ صلی اللہ علیہ وسلم نے یہ آیت تلاوت کی: ”بیشک ہم نے تمہیں واضح فتح عطا کی ہے۔“ راوی بیان کرتے ہیں: تو نبی کریم صلی اللہ علیہ وسلم کے اصحاب میں سے ایک صاحب نے یہ دریافت کیا: کیا یہ فتح ہے؟ تو نبی کریم صلی اللہ علیہ وسلم نے فرمایا: ”جی ہاں! اس ذات کی قسم! جس کے ہاتھ میں میری جان ہے! یہ فتح ہے۔“ راوی بیان کرتے ہیں: پھر غزوہ حدیبیہ میں شریک ہونے والوں میں غزوہ خیبر کا مال تقسیم کیا گیا۔ اس کے اٹھارہ حصے کیے گئے، لشکر کی تعداد پندرہ سو تھی، جن میں سے تین سو گھڑسوار تھے تو گھڑسواروں کو دو، دو حصے دیے گئے اور پیادہ لوگوں کو ایک، ایک حصہ دیا گیا۔

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے گھڑسوار کے لیے دو حصے اور پیادہ شخص کے لیے ایک حصہ مقرر کیا ہے۔ رمادی بیان کرتے ہیں: ابن نمیر نامی راوی نے اسی طرح بیان کیا ہے، لیکن میرے نزدیک یہ ابن ابی شیبہ نامی راوی کی طرف سے وہم ہے، یا رمادی نامی راوی کی طرف سے وہم ہے، کیونکہ دیگر راویوں نے اسے اس نمیر کے حوالے سے اس کے برخلاف نقل کیا ہے اور ان کے حوالے سے نقل کردہ روایت کو ہم اس سے پہلے ذکر کر چکے ہیں۔

سیدنا عبداللہ بن عمر رضی اللہ عنہما، نبی کریم صلی اللہ علیہ وسلم کے بارے میں یہ بات نقل کرتے ہیں کہ آپ صلی اللہ علیہ وسلم نے گھڑسوار کو دو حصے دیے تھے اور پیادہ شخص کو ایک حصہ دیا تھا۔

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے گھڑسوار کو دو حصے دیے تھے اور پیادہ شخص کو ایک حصہ دیا تھا۔ یہی روایت ایک اور سند کے ہمراہ بھی منقول ہے، تاہم ایک لفظ کے بارے میں راوی کو شک ہے کہ وہ لفظ گھوڑا ہے یا گھڑسوار ہے۔

یہی روایت ایک اور سند کے ہمراہ بھی منقول ہے۔

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے گھڑسوار کو دو حصے دیے تھے اور پیادہ کو ایک حصہ دیا تھا۔ یہی روایت ایک اور سند کے ہمراہ بھی منقول ہے۔

ایک اور سند کے ساتھ نبی کریم صلی اللہ علیہ وسلم کے بارے میں یہ بات منقول ہے کہ آپ صلی اللہ علیہ وسلم نے فرمایا ہے: ”گھڑسوار کے لیے تین حصے ہوں گے اور پیادہ شخص کے لیے ایک حصہ ہو گا۔“

سیدنا عبداللہ بن عمر رضی اللہ عنہما بیان کرتے ہیں کہ جب نبی کریم صلی اللہ علیہ وسلم نے خیبر فتح کیا، تو اس (مال غنیمت) کے اٹھارہ حصے ہوئے، آپ صلی اللہ علیہ وسلم نے تمام مہاجرین کو جمع کیا، جن میں سے ہر ایک ساتھ سو آدمی تھے، تو ان سب لوگوں کی مجموعی تعداد ایک ہزار آٹھ سو تھی۔

سیدنا عبداللہ بن زبیر، سیدنا زبیر رضی اللہ عنہ کا یہ بیان نقل کرتے ہیں کہ نبی کریم صلی اللہ علیہ وسلم نے غزوہ بدر کے دن مجھے چار حصے عطا کیے تھے، دو حصے میرے گھوڑے کے تھے، ایک حصہ میرا تھا اور ایک حصہ میری والدہ کے لیے تھا، جو ذوی القربیٰ میں شامل تھیں۔

سیدنا زبیر بن عوام رضی اللہ عنہ بیان کرتے ہیں کہ نبی کریم صلی اللہ علیہ وسلم نے انہیں چار حصے دیے تھے، دو حصے ان کے گھوڑے کے تھے، ایک حصہ ان کا تھا اور ایک حصہ ان کی والدہ کے لیے تھا، جو ذوی القربی میں شامل تھیں۔

سیدنا عبداللہ بن زبیر رضی اللہ عنہ اپنے والد کے حوالے سے یہ بات نقل کرتے ہیں، وہ فرماتے ہیں: نبی کریم صلی اللہ علیہ وسلم نے غزوہ خیبر کے دن سیدنا زبیر بن عوام رضی اللہ عنہ کو چار حصے دیے تھے، ایک حصہ ان کا تھا، ایک حصہ ذوی القربی کا تھا، جو صفیہ بنت عبدالمطلب تھیں (یعنی جو نبی کریم صلی اللہ علیہ وسلم کی پھوپھی تھیں) اور دو حصے ان کے (یعنی سیدنا زبیر رضی اللہ عنہ کے) گھوڑے کے تھے۔

سیدنا عبداللہ بن زبیر رضی اللہ عنہ بیان کرتے ہیں کہ نبی کریم صلی اللہ علیہ وسلم نے سیدنا زبیر رضی اللہ عنہ کو چار حصے دیے تھے، ایک حصہ ان کی والدہ کے لیے ان کی قرابت داری کی وجہ سے تھا، ایک حصہ سیدنا زبیر رضی اللہ عنہ کے لیے تھا اور دو حصے ان کے گھوڑے کے لیے تھے۔

یہی روایت ایک اور سند کے ہمراہ بھی منقول ہے۔

محمد بن یحییٰ اپنے والد کے حوالے سے اپنے دادا کا یہ بیان نقل کرتے ہیں، وہ غزوہ حنین میں نبی کریم صلی اللہ علیہ وسلم کے ساتھ شریک ہوئے تھے، تو نبی کریم صلی اللہ علیہ وسلم نے ان کے گھوڑے کو دو حصے دیے تھے اور ان کو ایک حصہ دیا تھا۔

سیدنا جابر بن عبداللہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے گھوڑے کو دو حصے دیے تھے اور گھوڑے والے شخص کو ایک حصہ دیا تھا۔

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے گھوڑے کو دو حصے دیے تھے اور گھوڑے والے کو ایک حصہ دیا تھا۔

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”جو شخص ایک گھوڑے کو دو گھوڑوں میں شامل کر دے گا اور اس کو اس بات کا یقین نہ ہو کہ وہ آگے نکل جائے گا، تو اس میں کوئی حرج نہیں ہے اور جو شخص ایک گھوڑے کو دو گھوڑوں میں شامل کر دے اور اسے اس بات کا یقین ہو کہ وہ آگے نکل جائے گا، تو یہ جوا ہو گا۔“

سیدنا ابوسعید خدری رضی اللہ عنہ بیان کرتے ہیں کہ جنگ اوطاس کے موقع پر ہمیں کچھ قیدی عورتیں ملیں، تو نبی کریم صلی اللہ علیہ وسلم نے ارشاد فرمایا: ”کوئی بھی شخص کسی حاملہ عورت کے ساتھ صحبت نہ کرے، جب تک وہ اپنے حمل کو جنم نہیں دیتی اور جو عورت حاملہ نہیں ہے، اس کے ساتھ اس وقت تک صحبت نہ کرے، جب تک اسے ایک مرتبہ حیض نہ آ جائے۔“

سیدنا عبداللہ بن عباس رضی اللہ عنہما بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”جب کوئی غلام اپنے آقا سے پہلے مشرکین کی سلطنت چھوڑ کر نکل آئے، تو وہ آزاد سمجھا جائے گا اور اگر وہ اپنے آقا کے بعد نکلتا ہے، تو وہ آقا کو واپس کر دیا جائے گا، اسی طرح اگر کوئی عورت اپنے شوہر سے پہلے مشرکین کی سلطنت سے نکل آتی ہے، تو وہ عورت جس کے ساتھ چاہے شادی کر سکتی ہے، لیکن اگر وہ اپنے شوہر کے بعد وہاں سے نکل کر آتی ہے، تو وہ اپنے شوہر کو واپس مل جائے گی۔“

سالم بن عبداللہ اپنے والد کا یہ بیان نقل کرتے ہیں کہ میں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص مال غنیمت کی تقسیم سے پہلے مال غنیمت میں اپنے (سابقہ) مال کو پالے، تو وہ اسے ملے گا اور جو شخص مال غنیمت کی تقسیم کے بعد اسے پائے گا، تو اسے کوئی چیز نہیں ملے گا۔“ اسحاق نامی راوی، اسحاق بن ابوفروہ ہے اور یہ متروک ہے۔

سیدنا عمر بن خطاب رضی اللہ عنہ فرماتے ہیں: ”مشرک لوگ مسلمانوں کا جو مال حاصل کر لیتے ہیں اور پھر مسلمان ان لوگوں پر غالب آ جاتے ہیں، پھر ہم میں سے کوئی شخص اپنا مال بعینہ ان کے پاس پاتا ہے، تو وہ اس مال کا کسی بھی دوسرے شخص سے زیادہ حق دار ہو گا، لیکن جب اس مال غنیمت کو تقسیم کر لیا جائے اور پھر مسلمان اس پر قابوپائیں، تو اب اس شخص کو کچھ نہیں ملے گا، وہ ان (مسلمانوں) کا ایک عام فرد تصور ہو گا۔“ ابوسہل نے یہ بات بیان کی ہے کہ قیمت کے بدلے میں اس مال کو حاصل کرنے کا وہ زیادہ حق دار ہو گا، یہ روایت ”مرسل“ ہے۔

سالم اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”دشمن جو مال اپنے قبضے میں لے اور پھر (مال غنیمت میں) تقسیم ہونے سے پہلے اس مال کا مالک اس مال کو پالے، تو وہ اسے ملے گا۔“ اس روایت کا راوی ”رشدین“ ضعیف ہے۔

سیدنا عبداللہ بن عباس رضی اللہ عنہما، نبی کریم صلی اللہ علیہ وسلم کا یہ فرمان نقل کرتے ہیں: ”دشمن جس مال کو قبضے میں لیتا ہے اور پھر مسلمان اس سے وہ مال حاصل کر لیتے ہیں، تو تقسیم ہو جانے سے پہلے اس مال کا اصل مالک اسے لے سکتا ہے، وہ اس کا زیادہ حق دار ہو گا، لیکن اگر تقسیم ہو جانے کے بعد وہ اسے پاتا ہے، تو اگر وہ چاہے، تو اس کی قیمت کے عوض میں اسے حاصل کر سکتا ہے۔“ اس روایت کا ایک راوی حسن بن عمارہ متروک ہے۔