سنن الدارقطني

سیدنا عبدالرحمن بن یزید رضی اللہ عنہ بیان کرتے ہیں کہ نبی کریم صلی اللہ علیہ وسلم نے تین دادیوں اور نانیوں کو چھٹا حصہ ادا کرنے کا حکم دیا تھا، ان میں سے دو باپ کی طرف سے تھیں اور ایک ماں کی طرف سے تھی (یعنی دو دادیاں تھیں اور ایک نانی تھی)۔

قاسم بن محمد بیان کرتے ہیں کہ دو دادیاں (یا نانیاں یا دادی اور نانی) سیدنا ابوبکر رضی اللہ عنہ کے پاس آئیں، تو سیدنا ابوبکر رضی اللہ عنہ نے دادی کی بجائے نانی کو وارث قرار دیا، تو عبدالرحمن بن سہل رضی اللہ عنہ نے ان سے کہا: یہ غزوہ بدر میں شریک ہو چکے ہیں (راوی نے ایک مرتبہ یہ الفاظ نقل کیے ہیں)، بنو حارثہ سے تعلق رکھنے والے ایک صاحب نے یہ کہا: ”اے سیدنا ابوبکر! اے خلیفہ رسول! آپ نے وراثت اسے دے دی ہے کہ اگر یہ مر جاتی، تو (مرحومہ عورت) اس کی وارث نہ بنتی۔“ تو سیدنا ابوبکر رضی اللہ عنہ نے ان دونوں (دادی اور نانی) کو (مرحومہ عورت کا) وارث قرار دیا۔

قاسم بن محمد بیان کرتے ہیں کہ ایک دادی اور ایک نانی سیدنا ابوبکر رضی اللہ عنہ کی خدمت میں آئیں، ایک نانی تھی اور ایک دادی تھی، تو سیدنا ابوبکر رضی اللہ عنہ نے نانی کو وراثت ادا کرنے کا حکم دیا، دادی کے لیے حکم نہیں دیا، تو عبدالرحمن بن سہل، جو بنو حارثہ سے تعلق رکھتے تھے، ان سے کہا: ”اے خلیفہ رسول! آپ نے اسے ادائیگی کرنے کا حکم دیا ہے کہ اگر یہ مر جاتی، تو وہ مرحومہ اس کی وارث نہ بنتی۔“ تو سیدنا ابوبکر رضی اللہ عنہ نے ان دونوں کو ادائیگی کرنے کا حکم دیا (راوی کہتے ہیں:) یعنی چھٹے حصے کی ادائیگی کا حکم دیا۔

عبداللہ بن بریدہ اپنے والد کے حوالے سے نبی کریم صلی اللہ علیہ وسلم کے بارے میں یہ بات نقل کرتے ہیں کہ آپ نے نانی کو چھٹا حصہ ادا کرنے کا حکم دیا تھا، جبکہ اس سے نیچے کے مرتبے میں کوئی ماں موجود نہ ہو۔

سیدنا معقل بن یسار رضی اللہ عنہ بیان کرتے ہیں کہ نبی کریم صلی اللہ علیہ وسلم نے نانی (یا دادی) کو چھٹا حصہ عطا کیا تھا۔

ابراہیم بن یزید بیان کرتے ہیں کہ نبی کریم صلی اللہ علیہ وسلم نے تین جدات کو وارث قرار دیا تھا، ان میں سے دو باپ کی طرف سے تھیں اور ایک ماں کی طرف سے تھی (یعنی دو دادیاں تھیں اور ایک نانی تھی)۔

خارجہ بن زید اپنے والد سیدنا زید بن ثابت رضی اللہ عنہ کے بارے میں یہ بات نقل کرتے ہیں: انہوں نے تین دادیوں، نانیوں کو وارث قرار دیا تھا، جبکہ وہ ایک ہی مرتبے کی تھیں، ان میں سے دو باپ کی طرف سے تھیں اور ایک ماں کی طرف سے تھی۔

سیدنا زید بن ثابت رضی اللہ عنہ کے بارے میں یہ بات منقول ہے کہ انہوں نے تین دادیوں اور نانیوں کو وارث قرار دیا تھا، جن میں سے دو ماں کی طرف سے تھیں اور ایک باپ کی طرف سے تھی۔

سیدنا عثمان غنی رضی اللہ عنہ فرماتے ہیں: ”میں سیدنا ابوبکر صدیق رضی اللہ عنہ کے بارے میں یہ بات گواہی دے کر کہتا ہوں کہ انہوں نے دادا کو باپ کا درجہ دیا ہے۔“

عقیل بن خالد بیان کرتے ہیں: سعید بن سلیمان نے اپنے والد کے حوالے سے اپنے دادا سیدنا زید بن ثابت رضی اللہ عنہ کے بارے میں یہ بات نقل کی ہے کہ ایک مرتبہ سیدنا عمر رضی اللہ عنہ نے ان کے ہاں اندر آنے کی اجازت مانگی، انہیں اجازت مل گئی (وہ اندر آئے، تو دیکھا) ان کا سر ایک کنیز کے ہاتھ میں ہے، جو ان کے بالوں کو کنگھی کر رہی ہے، سیدنا زید رضی اللہ عنہ نے اپنا سر الگ کیا، تو سیدنا عمر رضی اللہ عنہ نے فرمایا: ”اسے کنگھی کرنے دو۔“ سیدنا زید رضی اللہ عنہ نے عرض کی: ”اے امیر المؤمنین! آپ مجھے پیغام بھجوا دیتے، میں آپ کے پاس آ جاتا۔“ تو سیدنا عمر رضی اللہ عنہ نے فرمایا: ”میں ایک کام سے آپ کے پاس آیا ہوں، میں دادا کے بارے میں حکم دریافت کرنے کے لیے آیا ہوں۔“ تو سیدنا زید رضی اللہ عنہ نے کہا: ”نہیں! اللہ کی قسم! آپ کی اس بارے میں کیا رائے ہے؟“ تو سیدنا عمر رضی اللہ عنہ نے فرمایا: ”اس بارے میں کوئی وحی کا حکم تو ہے نہیں کہ ہم کسی اضافے یا کمی کے مرتکب ہوں، یہ تو ایک ایسا معاملہ ہے، جس میں تم نے اپنی رائے دینی ہے، اگر میں اس کے بارے میں یہ سمجھوں گا کہ تمہاری رائے میری رائے کے مطابق ہے، تو میں اس کو مان لوں گا، ورنہ تم پر اس بارے میں کوئی الزام نہیں ہو گا۔“ لیکن سیدنا زید رضی اللہ عنہ نے اس بات کو تسلیم نہیں کیا، تو سیدنا عمر رضی اللہ عنہ غصے کے عالم میں تشریف لے گئے، آپ نے فرمایا: ”میں تو یہاں اس لیے آیا تھا کہ تم میرا مسئلہ حل کر دو گے۔“ اس کے بعد سیدنا عمر رضی اللہ عنہ دوبارہ سیدنا زید رضی اللہ عنہ کے پاس اسی وقت آئے، جس وقت وہ پہلے دن آئے تھے اور ان کے ساتھ اس بارے میں گفت و شنید کرتے رہے، تو سیدنا زید رضی اللہ عنہ نے کہا: ”میں اس بارے میں آپ کو کچھ لکھ کر دے دیتا ہوں۔“ تو انہوں نے پالان کے ٹکڑے کے اوپر تحریر کر کے دیا اور اسے ایک مثال کے ذریعے واضح کیا، اس کی مثال ایک درخت کی طرح ہے، جو ایک ہی تنے کے اوپر اگتا ہے، اس میں سے ایک ٹہنی نکلتی ہے، پھر اس میں سے ایک اور ٹہنی نکلتی ہے، وہ تنا اس ٹہنی تک پانی کو پہنچاتا ہے، اگر پہلی ٹہنی کو کاٹ دیا جائے، تو پانی اس ٹہنی کی طرف آ جائے گا اور اگر دوسری کو کاٹ دیا جائے، تو پانی پہلی والی ٹہنی کی طرف چلا جائے گا۔ سیدنا عمر رضی اللہ عنہ اسے لے کر آ گئے، تو انہوں نے لوگوں سے خطاب کیا اور انہیں اس ٹکڑے پر لکھی ہوئی تحریر سنائی، پھر ارشاد فرمایا: ”زید نے دادا کے بارے میں جو بات کہی ہے، میں اسے लागو کرتا ہوں۔“ راوی بیان کرتے ہیں: سیدنا عمر رضی اللہ عنہ وہ پہلے دادا تھے، جن کے ساتھ یہ صورت حال پیش آئی، انہوں نے اس کا سارا مال لے لیا، یعنی اپنے پوتے کا مال لے لیا اور اس کی بہنوں کا (یعنی پوتیوں کا) مال نہیں لیا، سیدنا عمر رضی اللہ عنہ نے اس کے بعد اس مال کو تقسیم کروا دیا تھا۔

سیدنا عمر رضی اللہ عنہ کے بارے میں یہ بات منقول ہے کہ انہوں نے یہ فیصلہ دیا تھا کہ (میت کے) سگے بہن بھائیوں کی موجودگی میں دادا بھی حصہ دار ہو گا، خواہ سگے بہن بھائیوں کی تعداد کتنی ہی کیوں نہ ہو۔

یونس بن یزید بیان کرتے ہیں کہ میں نے زہری سے ایسے شخص کی وراثت کے بارے میں دریافت کیا، جس کے پس ماندگان میں ایک دادا اور سگے بہن بھائی ہوتے ہیں۔ زہری نے بتایا: سعید بن مسیب، عبیداللہ بن عبداللہ اور قبیصہ بن ذؤیب نے یہ بات بیان کی ہے کہ سیدنا عمر رضی اللہ عنہ نے یہ فیصلہ دیا تھا، دادا سگے بہن بھائیوں اور باپ کی طرف سے شریک بہن بھائیوں کے ساتھ حصہ دار ہو گا، جبکہ ایک تہائی مال میں سے مقاسمہ اس کے حق میں بہتر ہو، اگر بہن بھائیوں کی تعداد زیادہ ہو، تو دادا کو ایک تہائی حصہ دے دیا جائے گا اور باقی سب بہن بھائیوں کو ایک مذکر کا حصہ دو مؤنث کے برابر کے حساب سے دیا جائے گا، انہوں نے یہ فیصلہ بھی دیا تھا، سگے بہن بھائی صرف باپ کی طرف سے شریک بہن بھائیوں سے زیادہ حق رکھتے ہیں، خواہ وہ مذکر ہوں یا مؤنث ہوں، البتہ اگر باپ کی طرف سے شریک بہن بھائی، سگے بہن بھائیوں کے ساتھ موجود ہوں، تو انہیں بھی ان کا حصہ ملے گا، البتہ باپ کی طرف سے شریک بہن بھائی سگے بہن بھائیوں کے ہمراہ کچھ حاصل نہیں کریں، ماسوائے اس صورت کے جب باپ کی طرف سے شریک بھائی سگی بہنوں کی طرف (وراثت کو) لوٹا دیں اور سگی بہنوں کے فرض حصے کے بعد اگر کچھ باقی رہ جائے گا، تو وہ باپ کی طرف سے شریک بھائیوں کو ایک مذکر کے لیے دو مؤنث کے برابر حصے کے اصول کے تحت مل جائے گا۔