سنن الدارقطني

سیدنا علی رضی اللہ عنہ فرماتے ہیں: ”تم لوگ قراءت کرتے ہوئے وصیت کا حکم قرض کی ادائیگی سے پہلے پڑھتے ہو، لیکن نبی کریم صلی اللہ علیہ وسلم نے یہ فرمایا ہے: (میت کی) وصیت پوری کیے جانے سے پہلے اس کا قرض ادا کیا جائے گا اور ماں کی طرف سے بہن بھائی ایک دوسرے کے وارث بنیں گے، جبکہ باپ کی طرف سے شریک بہن بھائی ایک دوسرے کے وارث نہیں بنیں گے۔“

حارث بیان کرتے ہیں کہ سیدنا علی رضی اللہ عنہ کے پاس ایک مقدمہ آیا، جو چچا زاد بھائیوں کے بارے میں تھا، جن میں سے ایک ماں کی طرف سے شریک بھائی بھی تھا، سیدنا علی رضی اللہ عنہ کو بتایا گیا، سیدنا عبداللہ بن مسعود رضی اللہ عنہ نے ماں کی طرف سے شریک بھائی کو سارا مال ادا کرنے کا حکم دیا ہے، باقی قریبی رشتہ داروں کو اس بارے میں کوئی ادائیگی کرنے کا حکم نہیں دیا، تو سیدنا علی رضی اللہ عنہ نے فرمایا: ”اللہ تعالیٰ، عبداللہ بن مسعود رضی اللہ عنہ پر رحم کرے، وہ سمجھدار آدمی ہیں، اگر میں ان کی جگہ پر ہوتا، تو میں اسے چھٹا حصہ دیتا اور باقی رہ جانے والا مال ان (دوسرے چچا زاد بھائیوں) میں تقسیم کر دیتا۔“

مسعود بن حکم ثقفی بیان کرتے ہیں کہ سیدنا عمر بن خطاب رضی اللہ عنہ کے پاس ایک مقدمہ آیا، جو ایک خاتون کے بارے میں تھا، جس نے پس ماندگان میں اپنا شوہر، اپنی والدہ، ماں کی طرف سے شریک بہن بھائی اور باپ کی طرف سے شریک بہن بھائی چھوڑے تھے، تو سیدنا عمر رضی اللہ عنہ نے ماں کی طرف سے شریک بہن بھائی اور سگے بہن بھائیوں کو ایک دوسرے کے ساتھ برابر کا حصہ دار بنایا، جو ایک تہائی حصے کے بارے میں تھا، تو ایک شخص نے ان سے کہا: ”آپ نے فلاں سال تو انہیں ایک دوسرے کا حصہ دار نہیں بنایا تھا۔“ تو سیدنا عمر رضی اللہ عنہ نے فرمایا: ”اس وقت ہم نے جو فیصلہ دیا تھا، وہ اس وقت کا تھا، آج کا ہمارا فیصلہ وہ ہے، جو ہم نے اب دے دیا ہے۔“

سیدنا عبداللہ بن عباس رضی اللہ عنہما بیان کرتے ہیں کہ نبی کریم صلی اللہ علیہ وسلم نے اپنے اصحاب کو ایک دوسرے کا بھائی بنا دیا تو وہ لوگ ایک دوسرے کے وارث بھی بنا کرتے تھے، یہاں تک کہ یہ آیت نازل ہوئی: ”صرف (نسبی) رشتے دار ایک دوسرے کے وارث ہوں گے۔“ اس کے بعد نسب کے اعتبار سے لوگ ایک دوسرے کے وارث بننے لگے۔

سیدنا واثلہ بن اسقع رضی اللہ عنہ بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”عورت تین لوگوں سے وراثت حاصل کرتی ہے، اپنے آزاد کیے ہوئے (غلام یا کنیز) کی طرف سے، اپنی اولاد کی طرف سے اور اپنے اس بچے کی طرف سے، جس کی وجہ سے اس نے لعان کیا تھا۔“

سیدنا واثلہ بن اسقع رضی اللہ عنہ بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”عورت تین اعتبار سے وراثت حاصل کرتی ہے، اپنے آزاد کیے ہوئے (غلام یا کنیز) کی وراثت، جس کو اس نے اٹھایا (یعنی لاوارث بچے کو پالا پوسا)، اس کی وراثت اور جس کی وجہ سے اس نے لعان کیا۔“ یہی روایت ایک اور سند کے ہمراہ بھی منقول ہے۔

یہی روایت ایک اور سند کے ہمراہ سیدنا واثلہ رضی اللہ عنہ کے حوالے سے نبی کریم صلی اللہ علیہ وسلم سے منقول ہے۔