سنن الدارقطني

عمرو بن شعیب اپنے والد کے حوالے سے اپنے دادا کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: ”جب عورت یہ دعویٰ کرے کہ اس کے شوہر نے اسے طلاق دے دی ہے اور وہ اس پر ایک عادل گواہ بھی پیش کر دے، تو شوہر سے حلف لیا جائے گا، اگر وہ حلف اٹھا لیتا ہے، تو گواہ کی گواہی کالعدم قرار دی جائے گی اور اگر وہ (حلف اٹھانے سے) انکار کر دیتا ہے، تو اس کا انکار دوسرے گواہ کا قائم مقام ہو گا اور طلاق جائز (یعنی واقع) شمار ہو گی۔“

عبداللہ بن ابوملیکہ بیان کرتے ہیں: میں نے سیدنا عبداللہ بن زبیر رضی اللہ عنہما سے ایسے شخص کے بارے میں دریافت کیا، جو اپنی بیوی کو طلاق بائنہ دے دیتا ہے، پھر اس عورت کی عدت کے دوران ہی اسی شخص کا انتقال ہو جاتا ہے۔ تو سیدنا عبداللہ بن زبیر رضی اللہ عنہما نے بتایا: سیدنا عبدالرحمن بن عوف نے اپنی اہلیہ تماضر بنت اصبغ کلبی کو طلاق دے دی، پھر اس خاتون کی عدت کے دوران ہی سیدنا عبدالرحمن بن عوف رضی اللہ عنہ کا انتقال ہو گیا، تو سیدنا عثمان رضی اللہ عنہ نے اس خاتون کو وارث قرار دیا تھا۔

ابن ابوملیکہ کہتے ہیں: میری ملاقات سیدنا عبداللہ بن زبیر سے ہوئی، وہ اس وقت قعیقعان سے خچر پر سوار ہو کر آئے تھے، میں نے دریافت کیا: ”ایسے شخص کے بارے میں آپ کی کیا رائے ہے، جو اپنی بیوی کو تین طلاقیں دے دے؟“ تو انہوں نے فرمایا: ”سیدنا عثمان رضی اللہ عنہ نے ایسی عورت کو وارث قرار دیا ہے۔“

طلحہ بن عبداللہ بیان کرتے ہیں: سیدنا عثمان رضی اللہ عنہ نے تماضر بنت اصبغ کو سیدنا عبدالرحمن بن عوف رضی اللہ عنہ کا وارث قرار دیا تھا، حالانکہ سیدنا عبدالرحمن رضی اللہ عنہ نے اس خاتون کو طلاق دے دی تھی، انہوں نے اپنی بیماری کے دوران اسے طلاق دی تھی۔

سیدنا عبداللہ بن عمرو رضی اللہ عنہما بیان کرتے ہیں: لوگوں نے سیدنا عمر رضی اللہ عنہ کے مکتوب میں یہ بات پائی: ”جب کوئی عبث کرے، تو اس کا ولی اس کی طرف سے طلاق دے دے۔“ ان کی مراد یہ تھی کہ جب کوئی پاگل ہو جائے۔

عمرو بن شعیب بیان کرتے ہیں: ہم نے سیدنا عبداللہ بن عمرو رضی اللہ عنہما کے مکتوب میں یہ بات پائی ہے: ”جب پاگل اپنی بیوی کے ساتھ عبث (حرکت کرنے لگے)، تو اس کا ولی اس کی طرف سے طلاق دے دے۔“

سیدنا عمر بن خطاب رضی اللہ عنہ فرماتے ہیں: ”جب کوئی پاگل اپنی بیوی کے ساتھ عبث حرکت کرے، تو اس کے ولی کو یہ حکم دیا جائے گا کہ وہ طلاق دے دے۔“

صرف سند کا بیان ہے۔

سعید بن مسیب بیان کرتے ہیں: کسی عرب کی کنیز مفرور ہو گئی، وہ وادی قریٰ پہنچ گئی، وہ اس قبیلے تک پہنچ گئی، جن سے بھاگی تھی، بنو عذرہ سے تعلق رکھنے والے ایک شخص نے اس کے ساتھ شادی کر لی، اس کے ہاں بہت سے بچے پیدا ہوئے، پھر اس کنیز کا آقا اس تک پہنچ گیا، اس نے اس کنیز اور اس کے بچوں کو اپنی تحویل میں لینا چاہا، تو سیدنا عمر رضی اللہ عنہ نے اس مقدمہ میں یہ فیصلہ دیا: عذرہ قبیلے سے تعلق رکھنے والا شخص اپنی اولاد کے عوض میں تاوان کے طور پر غلام (یا کنیز) ادا کرے، لڑکے کے بدلے میں غلام اور لڑکی کے بدلے میں کنیز ادا کرے گا، اگر یہ دستیاب نہ ہوں، شہر کے رہنے والے ایک غلام کے عوض میں 60 دینار یا 700 درہم ادا کریں گے اور دیہاتیوں پر چھ فرائض عائد ہوں گے۔

سیدہ عائشہ رضی اللہ عنہا حرام (قرار دینے) کے بارے میں فرماتی ہیں: ”یہ قسم ہے، جس کا کفارہ دینا ہو گا۔“

سعید بن مسیب، عطاء، طاؤس، سلیمان بن یسار، اور سعید بن جبیر فرماتے ہیں: ”حرام (قرار دینا) قسم ہے، جس کا کفارہ ادا کیا جائے گا۔“