سنن الدارقطني

سیدنا عبداللہ بن عباس رضی اللہ عنہما فرماتے ہیں: ”جب کوئی شخص اپنی بیوی کو اپنے لیے حرام قرار دے دے، تو یہ قسم شمار ہو گی اور وہ شخص قسم کا کفارہ ادا کرے گا۔“ سیدنا ابن عباس رضی اللہ عنہما نے فرمایا: ”تمہارے لیے نبی کریم صلی اللہ علیہ وسلم کی سیرت میں بہترین نمونہ ہے۔“

سیدنا عبداللہ بن عباس رضی اللہ عنہما فرماتے ہیں: ”لفظ، حرام، استعمال کرنے پر قسم کا کفارہ ادا کرنا پڑے گا۔“ سیدنا ابن عباس رضی اللہ عنہما نے فرمایا: ”تمہارے لیے نبی کریم صلی اللہ علیہ وسلم کی سیرت میں بہترین نمونہ ہے۔“

سیدنا عبداللہ بن عباس رضی اللہ عنہما، سیدنا عمر رضی اللہ عنہ کے حوالے سے نبی کریم صلی اللہ علیہ وسلم کے بارے میں یہ بات نقل کرتے ہیں: ”آپ صلی اللہ علیہ وسلم نے لفظ، حرام، استعمال کرنے کو قسم قرار دیا تھا۔“

سیدنا عبداللہ بن عباس رضی اللہ عنہما فرماتے ہیں: ”لفظ، حرام، استعمال کرنا قسم ہے، جس کا کفارہ ادا کیا جائے گا۔“

سیدنا عبداللہ بن عباس رضی اللہ عنہما، سیدنا عمر رضی اللہ عنہ کا یہ بیان نقل کرتے ہیں: ایک مرتبہ نبی کریم صلی اللہ علیہ وسلم اپنی ام ولد، سیدہ ماریہ قبطیہ رضی اللہ عنہا کو ساتھ لے کر سیدہ حفصہ رضی اللہ عنہا کے گھر میں آئے، جب سیدہ حفصہ رضی اللہ عنہا نے نبی کریم صلی اللہ علیہ وسلم کے ہمراہ اس خاتون کو دیکھا تو انہوں نے نبی کریم صلی اللہ علیہ وسلم سے دریافت کیا: آپ اسے میرے گھر کے اندر لے آئے ہیں؟ آپ نے اپنی دیگر ازواج کو چھوڑ کر میرے ساتھ ایسا اس لیے کیا ہے، کیونکہ (آپ کے نزدیک میری کوئی حیثیت نہیں ہے)؟ نبی کریم صلی اللہ علیہ وسلم نے فرمایا: ”تم عائشہ کے سامنے اس کا ذکر نہیں کرنا، یہ (کنیز) میرے لیے حرام ہے کہ میں اس کے قریب جاؤں۔“ تو نبی کریم صلی اللہ علیہ وسلم نے یہ حلف اٹھایا کہ آپ اس (کنیز) کے قریب نہیں جائیں گے۔ نبی کریم صلی اللہ علیہ وسلم نے فرمایا: ”تم اس بات کا تذکرہ کسی سے نہیں کرنا۔“ لیکن سیدہ حفصہ نے سیدہ عائشہ رضی اللہ عنہا سے اس کا ذکر کر دیا تو نبی کریم صلی اللہ علیہ وسلم نے (اپنی ازواج) سے ایلاء کیا کہ آپ ایک ماہ تک اپنی ازواج کے پاس تشریف نہیں لے جائیں گے۔ آپ نے 29 دن تک اپنی ازواج سے علیحدگی اختیار کیے رکھی پھر اللہ نے یہ آیت نازل کی: ”تم اس چیز کو کیوں حرام قرار دیتے ہو جو اللہ نے تمہارے لیے حلال قرار دیا ہے۔“ راوی کہتے ہیں اس کے بعد طویل حدیث ہے۔

سیدنا عبداللہ بن عباس رضی اللہ عنہما بیان کرتے ہیں: سیدہ حفصہ رضی اللہ عنہا نے سیدہ عائشہ کے مخصوص دن میں نبی کریم صلی اللہ علیہ وسلم کو ام ابراہیم (یعنی سیدہ ماریہ قبطیہ رضی اللہ عنہا) کے ساتھ پایا تو یہ کہا: میں (سیدہ عائشہ کو) اس بارے میں ضرور بتاؤں گی۔ نبی کریم صلی اللہ علیہ وسلم نے فرمایا: ”یہ (یعنی ام ابراہیم) میرے لیے حرام ہے کہ میں اس کے قریب جاؤں۔“ سیدہ حفصہ رضی اللہ عنہا نے سیدہ عائشہ کو اس بارے میں بتا دیا تو اللہ نے اپنے رسول کو اس بارے میں بتا دیا، نبی کریم صلی اللہ علیہ وسلم نے سیدہ حفصہ کو ان کی بات کے بارے میں بتایا تو انہوں نے دریافت کیا: آپ کو کس نے بتایا؟ نبی کریم صلی اللہ علیہ وسلم نے فرمایا: ”مجھے علم اور خبر رکھنے والی ذات نے اطلاع دی ہے۔“ پھر نبی کریم صلی اللہ علیہ وسلم نے ایک ماہ کے لیے اپنی ازواج کے ساتھ ایلاء کر لیا تو اللہ تعالیٰ نے یہ آیت نازل کی: ”اگر تم دونوں اللہ کی بارگاہ میں توبہ کر لو (تو یہ مناسب ہو گا) کیونکہ تم دونوں کے دل ٹیڑھے ہو گئے تھے۔“ سیدنا ابن عباس رضی اللہ عنہما بیان کرتے ہیں: میں نے سیدنا عمر رضی اللہ عنہ سے دریافت کیا، وہ دو خواتین کون تھیں، جنہوں نے نبی کریم صلی اللہ علیہ وسلم کے (اس فعل کے حوالے سے) ایک دوسرے کا ساتھ دیا تھا؟ تو سیدنا عمر رضی اللہ عنہ نے فرمایا: عائشہ اور حفصہ۔

عطاء فرماتے ہیں: ”جو شخص اپنی بیوی سے یہ کہے: تم مجھ پر حرام ہو، تمہیں طلاق بتا ہے، تمہیں حرج والی طلاق ہے، جہاں تک اس کے یہ کہنے کا تعلق ہے: تم مجھ پر حرام ہو، تو یہ قسم ہے، جس کا وہ شخص کفارہ ادا کرے گا، (یہ طلاق نہیں ہے)، جہاں تک لفظ، طلاق بتا، یا طلاق حرج، استعمال کرنے کا تعلق ہے، تو اس بارے میں اس کی نیت کا اعتبار ہو گا۔“

سیدنا ابن عباس رضی اللہ عنہما کے بارے میں منقول ہے کہ ایک شخص ان کے پاس آیا اور بولا: میں نے اپنی بیوی کو اپنے پر حرام قرار دیا ہے۔ سیدنا ابن عباس رضی اللہ عنہما نے فرمایا: تم نے غلط کہا، وہ تم پر حرام نہیں ہوئی۔ پھر انہوں نے یہ آیت تلاوت کی: ”اے نبی! تم اس چیز کو کیوں حرام قرار دیتے ہو، جو اللہ نے تمہارے لیے حلال قرار دیا ہے۔“ (پھر سیدنا ابن عباس نے فرمایا) تم پر سب سے زیادہ سخت کفارہ عائد ہو گا یعنی غلام آزاد کرنا۔

سیدنا رافع بن سنان رضی اللہ عنہ کے بارے میں منقول ہے: انہوں نے اسلام قبول کیا، لیکن ان کی اہلیہ نے اسلام قبول کرنے سے انکار کر دیا، ان کی ایک چھوٹی بچی تھی، جو دودھ چھڑانے کی عمر تک پہنچ چکی تھی، وہ دونوں اپنا مقدمہ لے کر نبی کریم صلی اللہ علیہ وسلم کی خدمت میں حاضر ہوئے، نبی کریم صلی اللہ علیہ وسلم نے فرمایا: ”اسے تم اپنے درمیان رکھو، اور پھر تم دونوں اسے بلاؤ۔“ انہوں نے ایسا ہی کیا، تو وہ بچی اپنی والدہ کی طرف مائل ہوئی، نبی کریم صلی اللہ علیہ وسلم نے دعا کی: ”اے اللہ! اسے ہدایت نصیب کر۔“ تو وہ بچی اپنے والد کی طرف مائل ہو گئی، تو سیدنا رافع رضی اللہ عنہ نے اسے حاصل کر لیا۔

سیدنا رافع بن سنان رضی اللہ عنہ کے بارے میں منقول ہے: انہوں نے اسلام قبول کر لیا، ان کی بیوی نے اسلام قبول کرنے سے انکار کر دیا، ان دونوں کی ایک بیٹی تھی، جس کا نام عمیرہ تھا، اس عورت نے اس بچی کا مطالبہ کیا، تو سیدنا رافع رضی اللہ عنہ نے انکار کر دیا، وہ دونوں نبی کریم صلی اللہ علیہ وسلم کی خدمت میں حاضر ہوئے، نبی کریم صلی اللہ علیہ وسلم نے اس خاتون سے فرمایا: ”تم یہاں بیٹھ جاؤ۔“ آپ نے سیدنا رافع سے فرمایا: ”تم یہاں بیٹھ جاؤ۔“ پھر آپ نے فرمایا: ”اب تم دونوں اس بچی کو بلاؤ۔“ ان دونوں نے بلایا، وہ بچی اپنی والدہ کی طرف مائل ہونے لگی، تو نبی کریم صلی اللہ علیہ وسلم نے دعا کی: ”اے اللہ! اسے ہدایت عطا کر۔“ تو وہ بچی اپنے والد کی طرف مائل ہو گئی، تو انہوں نے اسے حاصل کر لیا، اور اپنے ساتھ لے گئے۔

طاؤس بیان کرتے ہیں: ابوصہباء سیدنا ابن عباس رضی اللہ عنہما کے پاس آیا، تو سیدنا ابن عباس رضی اللہ عنہما نے اس سے فرمایا: ”اپنا موقف (یا سوال) اور جو کچھ تمہارے ذہن میں ہے اور جو کچھ تم نے اکٹھا کیا ہے، اسے پیش کرو۔“ تو ابوصہباء نے ان سے کہا: ”کیا آپ جانتے ہیں؟ نبی کریم صلی اللہ علیہ وسلم کے زمانہ اقدس میں تین طلاقیں ایک شمار ہوتی تھیں۔“ تو سیدنا عبداللہ بن عباس رضی اللہ عنہما نے جواب دیا: ”جی ہاں، نبی کریم صلی اللہ علیہ وسلم کے زمانہ، سیدنا ابوبکر رضی اللہ عنہ کے عہد خلافت اور سیدنا عمر رضی اللہ عنہ کے عہد خلافت کے ابتدائی دور میں تین طلاقیں ایک ہی شمار ہوتی تھیں، لیکن جب سیدنا عمر رضی اللہ عنہ کے عہد میں طلاق کے مقدمات زیادہ آنے لگے، تو سیدنا عمر بن خطاب رضی اللہ عنہ نے انہیں تین قرار دینا (شروع کر دیا)۔“

سیدنا معاذ بن جبل رضی اللہ عنہ بیان کرتے ہیں: میں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”اے معاذ! جو شخص بدعت (یعنی خلاف سنت) طریقے سے اپنی بیوی کو ایک، دو، یا تین طلاقیں دے گا، ہم اس کی بدعت کو اس پر لازم کر دیں گے۔“

سیدنا معاذ بن جبل رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”اے معاذ! جو شخص بدعت طریقے سے اپنی بیوی کو ایک، دو یا تین طلاقیں دے گا، ہم اس کی بدعت کو اس پر لازم کر دیں گے۔“

سیدنا عبداللہ بن عمر رضی اللہ عنہما سے بیان کرتے ہیں: ”جو شخص اپنی بیوی کو اس کے حیض کے دوران تین طلاقیں دے دے، تو وہ عورت اس سے بائنہ ہو جائے گی، تاہم اس شخص نے اپنے پروردگار کی نافرمانی کی اور سنت کی خلاف ورزی کی۔“

یہی روایت ایک اور سند کے ہمراہ منقول ہے۔

ابان بن تغلب بیان کرتے ہیں: میں نے امام جعفر صادق سے ایسے شخص کے بارے میں دریافت کیا، جو اپنی بیوی کو تین طلاقیں دے دیتا ہے، امام جعفر صادق نے فرمایا: ”وہ عورت اس شخص سے بائنہ ہو جائے گی اور اس کے لیے اس وقت تک حلال نہیں ہو گی، جب تک دوسری شادی کر کے (بیوہ یا مطلقہ) نہیں ہو جاتی۔“ میں نے ان سے دریافت کیا: ”کیا میں لوگوں کو اس کے مطابق فتوی دے دوں؟“ تو انہوں نے جواب دیا: ”جی ہاں۔“

سیدنا عبداللہ بن عباس رضی اللہ عنہما بیان کرتے ہیں: ”نبی کریم صلی اللہ علیہ وسلم نے خلع کو ایک بائنہ طلاق قرار دیا تھا۔“

سیدنا عبداللہ بن عباس رضی اللہ عنہما بیان کرتے ہیں: سیدنا ثابت بن قیس رضی اللہ عنہ کی اہلیہ نے ان سے خلع لے لیا تھا، تو نبی کریم صلی اللہ علیہ وسلم نے اس خاتون کو یہ ہدایت کی کہ وہ ایک حیض عدت گزارے۔

عکرمہ بیان کرتے ہیں: ثابت کی اہلیہ (اس کے بعد حسب سابق حدیث ہے)، انہوں نے (اس کی سند میں) سیدنا ابن عباس رضی اللہ عنہما کا ذکر کیا ہے۔

سیدنا عبداللہ بن عباس رضی اللہ عنہما فرماتے ہیں: ”نبی کریم صلی اللہ علیہ وسلم کے زمانہ اقدس، سیدنا ابوبکر رضی اللہ عنہ کے عہد خلافت اور سیدنا عمر رضی اللہ عنہ کے عہد خلافت کے ابتدائی دو سالوں میں، تین (طلاقیں) ایک ہی شمار ہوتی تھیں۔“ سیدنا عمر رضی اللہ عنہ نے فرمایا: ”لوگوں کو جس بارے میں سہولت دی گئی تھی، انہوں نے اس معاملے میں جلد بازی کرنا شروع کر دی ہے، اگر ہم ان (تین طلاقوں کو تین کی صورت میں) جاری رہنے دیں (تو یہی مناسب ہو گا)۔“ تو سیدنا عمر رضی اللہ عنہ نے (تین طلاقوں کو تین کی شکل میں) جاری رہنے دیا۔

طاؤس بیان کرتے ہیں: ابوصہباء نے سیدنا عبداللہ بن عباس رضی اللہ عنہما سے کہا: ”کیا آپ یہ بات جانتے ہیں، نبی کریم صلی اللہ علیہ وسلم کے زمانہ اقدس میں، سیدنا ابوبکر رضی اللہ عنہ کے عہد خلافت میں اور سیدنا عمر رضی اللہ عنہ کے زمانہ کے (ابتدائی) تین سالوں میں تین (طلاقیں) ایک ہی شمار ہوتی تھیں۔“ سیدنا ابن عباس رضی اللہ عنہما نے جواب دیا: ”جی ہاں۔“

طاؤس بیان کرتے ہیں: ابوصہباء نے سیدنا عبداللہ بن عباس رضی اللہ عنہما سے سوال کیا: ”میں آپ کو اللہ کا واسطہ دے کر دریافت کرتا ہوں، کیا آپ یہ بات جانتے ہیں؟ نبی کریم صلی اللہ علیہ وسلم کے زمانہ اقدس میں، سیدنا ابوبکر اور سیدنا عمر رضی اللہ عنہ کے عہد خلافت کے ابتدائی دور میں تین (طلاقیں) ایک شمار ہوتی تھیں۔“ تو سیدنا ابن عباس رضی اللہ عنہما نے جواب دیا: ”جی ہاں۔“

طاؤس بیان کرتے ہیں: ابوصہباء نے سیدنا عبداللہ بن عباس رضی اللہ عنہما سے سوال کیا: ”میں آپ کو اللہ کا واسطہ دے کر دریافت کرتا ہوں، کیا آپ یہ بات جانتے ہیں؟ نبی کریم صلی اللہ علیہ وسلم کے زمانہ اقدس میں، سیدنا ابوبکر اور سیدنا عمر رضی اللہ عنہ کے عہد خلافت کے ابتدائی دور میں تین (طلاقیں) ایک شمار ہوتی تھیں۔“ تو سیدنا ابن عباس رضی اللہ عنہما نے جواب دیا: ”جی ہاں۔“

ابن ابوملیکہ بیان کرتے ہیں: ابوجوزاء نے سیدنا ابن عباس رضی اللہ عنہما سے کہا: ”کیا آپ یہ بات جانتے ہیں کہ نبی کریم صلی اللہ علیہ وسلم کے زمانہ اقدس میں (سیدنا ابوبکر کے عہد خلافت میں) اور سیدنا عمر رضی اللہ عنہ کے عہد خلافت کے ابتدائی دور میں تین طلاقیں ایک شمار ہوتی تھیں۔“ تو (ابن عباس رضی اللہ عنہما نے) جواب دیا: ”جی ہاں۔“

ابن ابوملیکہ بیان کرتے ہیں: ابوجوزاء نے سیدنا ابن عباس رضی اللہ عنہما سے کہا: ”کیا آپ یہ بات جانتے ہیں کہ نبی کریم صلی اللہ علیہ وسلم کے زمانہ اقدس میں (سیدنا ابوبکر کے عہد خلافت میں) اور سیدنا عمر رضی اللہ عنہ کے عہد خلافت کے ابتدائی دور میں تین طلاقیں ایک شمار ہوتی تھیں۔“ تو (ابن عباس رضی اللہ عنہما نے) جواب دیا: ”جی ہاں۔“

مجاہد بیان کرتے ہیں: ایک دن میں سیدنا عبداللہ بن عباس رضی اللہ عنہما کے ساتھ بیٹھا ہوا تھا۔ ایک شخص ان کے پاس آیا اور بولا: اے ابوعباس! میں نے اپنی بیوی کو تین طلاقیں دے دی ہیں؟ سیدنا ابن عباس رضی اللہ عنہما نے فرمایا: تم نے اپنے پروردگار کی نافرمانی کی اور تمہاری بیوی تمہارے لیے حرام ہو گئی۔ تم اللہ سے ڈرتے نہیں ورنہ اس نے تمہارے لیے کوئی گنجائش بنا دیتی۔ تم نے طلاق دیتے وقت حماقت کا مظاہرہ کیا اور اب تم کہتے ہو اے ابوعباس۔ اللہ تعالیٰ نے فرمایا: ”اے نبی! جب تم عورتوں کو طلاق دو تو ان کی عدت (کے حساب سے) دو یعنی ان کی عدت سے پہلے دو۔“ یہی روایت ایک اور سند کے ہمراہ بھی منقول ہے۔

مجاہد بیان کرتے ہیں: ایک شخص نے سیدنا ابن عباس سے سوال کیا، اس نے کہا: ”اس نے اپنی بیوی کو تین طلاقیں دے دی ہیں۔“ (اس کے بعد حسب سابق حدیث ہے)۔

یہی روایت ایک اور سند کے ہمراہ بھی منقول ہے۔

سیدنا علی رضی اللہ عنہ، ایلاء کے بارے میں فرماتے ہیں: ”چار ماہ کے بعد یہ (مرد کی مرضی پر) موقوف ہو گا، یا تو وہ رجوع کر لے یا طلاق دے دے۔“

یہی روایت ایک اور سند کے ہمراہ بھی منقول ہے۔

سہیل بن ابوصالح اپنے والد کا یہ بیان نقل کرتے ہیں: ”میں نے 12 صحابہ کرام سے ایسے شخص کے بارے میں دریافت کیا، جو ایلاء کر لیتا ہے، تو ان حضرات نے یہی جواب دیا: اس پر اس وقت تک کوئی چیز عائد نہیں ہو گی، جب تک چار ماہ نہیں گزر جاتے، پھر (مرد کی مرضی) پر موقوف ہو گا، اگر وہ رجوع کر لے تو (ٹھیک)، ورنہ طلاق دے دے۔“

سلیمان بن یسار بیان کرتے ہیں: ”میں نے دس صحابہ کرام رضی اللہ عنہم کو پایا، وہ سب ایلاء کرنے والے کی مرضی پر موقوف قرار دیتے ہیں۔“

طاؤس روایت کرتے ہیں کہ سیدنا عثمان رضی اللہ عنہ ایلاء کرنے والے سے پوچھ گچھ کیا کرتے تھے۔

سیدنا عثمان بن عفان رضی اللہ عنہ، ایلاء میں کوئی چیز نہیں سمجھتے تھے (یعنی طلاق نہیں ہوتی)، خواہ چار ماہ گزر جائیں (طلاق کا معاملہ مرد کی مرضی پر) موقوف ہو گا۔

سیدنا زید بن ثابت رضی اللہ عنہ اور سیدنا عثمان غنی رضی اللہ عنہ فرماتے ہیں: ”جب چار ماہ گزر جائیں، تو یہ ایک طلاق شمار ہو گی۔“

سیدنا عثمان غنی رضی اللہ عنہ اور سیدنا زید بن ثابت رضی اللہ عنہ فرماتے ہیں: ”جب چار ماہ گزر جائیں، یہ ایک طلاق شمار ہو گی۔“

میمونی بیان کرتے ہیں: میں نے امام احمد بن حنبل کے سامنے عطاء خراسانی کی ابوسلمہ کے حوالے سے، سیدنا عثمان رضی اللہ عنہ سے نقل کردہ روایت کا ذکر کیا، تو انہوں نے فرمایا: ”مجھے معلوم نہیں یہ کیا ہے؟ سیدنا عثمان رضی اللہ عنہ کے حوالے سے اس کے برخلاف نقل کیا گیا ہے۔“ ان سے دریافت کیا گیا: ”کس نے اسے نقل کیا ہے؟“ انہوں نے جواب دیا: ”ابوعبداللہ یا حبیب بن ابوثابت نے طاؤس کے حوالے سے سیدنا عثمان رضی اللہ عنہ کی یہ رائے نقل کی ہے: ایلاء کرنے والے کی مرضی پر موقوف ہو گا۔“

سیدنا عمر بن خطاب رضی اللہ عنہ فرماتے ہیں: ”(ایلاء میں) جب چار ماہ گزر جائیں، تو یہ ایک طلاق شمار ہو گی اور جب تک عورت کی عدت پوری نہیں ہوتی، مرد کو اس سے رجوع کرنے کا اختیار ہو گا۔“

ایوب بیان کرتے ہیں: میں نے سعید بن جبیر سے دریافت کیا: کیا سیدنا عبداللہ بن عباس رضی اللہ عنہما یہ فرماتے تھے: ”جب چار ماہ گزر جائیں، تو یہ ایک بائنہ طلاق شمار ہو گی اور عورت پر عدت لازم نہیں ہو گی، اگر وہ چاہے تو (فوراً بعد دوسری) شادی کر سکتی ہے۔“ تو سعید نے جواب دیا: ”جی ہاں۔“