سنن الدارقطني

سیدہ عائشہ رضی اللہ عنہا فرماتی ہیں: ”کسی عورت کا حمل دو سال سے زیادہ پیٹ میں نہیں رہ سکتا، خواہ وہ کاتنے کی لکڑی کے سائے جتنا تبدیل ہو جائے۔“

سیدہ عائشہ رضی اللہ عنہا فرماتی ہیں: ”کسی عورت کا حمل دو سال سے زیادہ پیٹ میں نہیں رہ سکتا، خواہ وہ کاتنے کی لکڑی جتنا تبدیل ہو جائے۔“ جمیلہ بنت سعد نامی خاتون، عبید بن سعد کی بہن ہیں۔

ابوسفیان نامی راوی بیان کرتے ہیں: ہمارے کچھ بزرگوں نے یہ بات بیان کی ہے: ایک شخص سیدنا عمر بن خطاب رضی اللہ عنہ کی خدمت میں حاضر ہوا اور بولا: ”اے امیر المؤمنین! دو سال کے بعد اپنی بیوی کے پاس آیا، تو وہ حاملہ تھی۔“ سیدنا عمر رضی اللہ عنہ نے اس عورت کو سنگسار کرنے کے بارے میں لوگوں سے مشورہ کیا، تو سیدنا معاذ بن جبل رضی اللہ عنہ نے فرمایا: ”اے امیر المؤمنین! آپ اس عورت کو تو سزا دے سکتے ہیں، لیکن اس کے پیٹ میں موجود بچے کو سزا نہیں دے سکتے، اس لیے آپ اسے اس وقت تک چھوڑے رکھیں، جب تک وہ بچے کو جنم نہ دے۔“ سیدنا عمر رضی اللہ عنہ نے اسے چھوڑ دیا، اس نے ایک لڑکے کو جنم دیا، جس کے سامنے کے دانت باہر کی طرف نکلے ہوئے تھے، جس کے نتیجے میں اس شخص کو بچے کی اپنے ساتھ مشابہت کا پتہ چلا، وہ بولا: ”رب کعبہ کی قسم! یہ میرا بیٹا ہے۔“ تو سیدنا عمر رضی اللہ عنہ نے فرمایا: ”عورتیں اس بات سے عاجز آ گئی ہیں کہ وہ معاذ جیسے بچے کو جنم دیں، اگر معاذ نہ ہوتا، تو عمر ہلاکت کا شکار ہو جاتا۔“

ولید بن مسلم بیان کرتے ہیں: میں نے امام مالک سے کہا: مجھے سیدہ عائشہ رضی اللہ عنہا کے حوالے سے یہ بات بتائی گئی ہے کہ وہ یہ فرماتی ہیں: ”عورت کو زیادہ سے زیادہ دو سال تک حمل رہ سکتا ہے، جتنا چرخے کا سایہ ہوتا ہے۔“ تو امام مالک نے فرمایا: ”سبحان اللہ! کوئی شخص یہ بات کیسے کہہ سکتا ہے؟ یہ ہماری لڑکی، جو محمد بن عجلان کی بیوی ہے، یہ ایک نیک عورت ہے، اس کا شوہر بھی ایک نیک آدمی ہے، اس نے بارہ سال میں تین بچوں کو جنم دیا ہے، جن میں سے ہر ایک بچہ چار سال تک ماں کے پیٹ میں رہا ہے۔“

مبارک بن مجاہد بیان کرتے ہیں: ہمارے درمیان یہ بات مشہور ہے کہ محمد بن عجلان کی اہلیہ چار سال حاملہ رہنے کے بعد بچوں کو جنم دیتی تھیں، اس عورت کا نام ”حاملۃ الفیل“ رکھا گیا تھا۔

ہاشم بن یحییٰ بیان کرتے ہیں: ایک مرتبہ مالک بن دینار بیٹھے ہوئے تھے، ایک شخص ان کے پاس آیا اور بولا: ”اے ابویحییٰ! اس عورت کے لیے دعا کیجیے، جو چار سال سے حاملہ ہے اور شدید تکلیف میں ہے۔“ تو مالک بن دینار غصہ میں آ گئے، انہوں نے مصحف بند کیا اور بولے: ”یہ لوگ سمجھتے ہیں ہم انبیاء ہیں۔“ پھر انہوں نے کچھ تلاوت کی، پھر دعا کی اور بولے: ”اے اللہ! اگر عورت کے پیٹ میں ہوا ہے، تو اسے ابھی نکال دے اور اگر اس کے پیٹ میں لڑکی ہے، تو اسے لڑکے میں تبدیل کر دے، کیونکہ تو جسے چاہتا ہے مٹا سکتا ہے اور جسے چاہے برقرار رکھ سکتا ہے، ام الکتاب تیرے پاس ہے۔“ پھر مالک بن دینار نے ہاتھ اٹھائے، لوگوں نے بھی ہاتھ اٹھائے، اسی دوران ایک پیغام رساں اس شخص کے پاس آیا اور بولا: ”تم اپنی بیوی کے پاس پہنچو۔“ وہ شخص چلا گیا، ابھی مالک بن دینار نے ہاتھ نیچے نہیں کیے تھے کہ وہ شخص مسجد کے دروازے سے اندر آیا اور اس نے ایک بچے کو گود میں اٹھا رکھا تھا، جو گھنگریالے بالوں کا مالک تھا، وہ تقریباً چار سال کا تھا، اس کے دانت پورے تھے، لیکن اس کی نال نہیں کاٹی گئی تھی۔

اوزاعی فرماتے ہیں: ہمارے ہاں ایک عورت ہے، جسے صبح حیض آتا ہے اور شام کے وقت وہ پاک ہو جاتی ہے۔

عبادہ بن عباد مہلبی بیان کرتے ہیں: ہمارے مہلب قبیلے میں ایک عورت ہے، جو اٹھارہ سال کی عمر میں نانی بن گئی، اس نے نو برس کی عمر میں بچی کو جنم دیا، اس کی بیٹی نے بھی نو برس کی عمر میں اپنی بیٹی کو جنم دیا، وہ عورت اٹھارہ برس کی عمر میں نانی بن گئی۔

بحریہ بنت ہانی بن قبیصہ بیان کرتی ہیں: میں نے قعقاع بن سور کے ساتھ شادی کر لی، وہ ایک رات میرے ساتھ رہے، پھر میرے والد، جو دیہاتی آدمی تھے، انہوں نے سیدنا علی رضی اللہ عنہ کی خدمت میں مقدمہ پیش کر دیا، سیدنا علی رضی اللہ عنہ کے قاصد آئے اور انہیں اپنے ساتھ سیدنا علی رضی اللہ عنہ کے پاس لے گئے، سیدنا علی رضی اللہ عنہ نے دریافت کیا: ”کیا تم اس عورت کے ساتھ صحبت کر چکے ہو؟“ اس نے جواب دیا: ”جی ہاں۔“ سیدنا علی رضی اللہ عنہ نے اس نکاح کو برقرار رکھا۔

بحریہ بنت ہانی بن قبیصہ بیان کرتی ہیں: ان کے والد نے ان کی شادی ایک ایسے شخص کے ساتھ کر دی، جو عیسائی تھا، اس عورت نے خود قعقاع بن سور کے ساتھ شادی کر لی، اس لڑکی کا والد سیدنا علی رضی اللہ عنہ کے پاس آیا، سیدنا علی رضی اللہ عنہ نے قعقاع کو بلایا، اس وقت وہ اس عورت کے ساتھ صحبت کرنے کے بعد غسل بھی کر چکے تھے، انہیں سیدنا علی رضی اللہ عنہ کی خدمت میں لایا گیا، تو ان پر زرد رنگ کا نشان موجود تھا، لڑکی کے باپ نے کہا: ”تم نے مجھے رسوائی کا شکار کیا، میں یہ نہیں چاہتا تھا۔“ تو قعقاع بولے: ”کیا تم یہ سمجھتے ہو کہ میں نے چھپ کر شادی کی ہے؟“ ان لوگوں نے اپنا مقدمہ سیدنا علی رضی اللہ عنہ کے سامنے پیش کیا، تو سیدنا علی رضی اللہ عنہ نے دریافت کیا: ”کیا تم اس عورت کے ساتھ صحبت کر چکے ہو؟“ انہوں نے جواب دیا: ”جی ہاں۔“ تو سیدنا علی رضی اللہ عنہ نے اس عورت کو اپنی شادی خود کر لینے کو درست قرار دیا۔ بحریہ نامی عورت مجہول ہے۔

سیدنا ابن عمر رضی اللہ عنہما فرماتے ہیں: ”جب کسی عورت کا ولی ضرر رساں ہو اور وہ عورت کسی دوسرے شخص کو اپنا ولی مقرر کر دے اور وہ اس عورت کا نکاح کروا دے، تو اس کا کروایا نکاح درست ہو گا۔“

شیبانی بیان کرتے ہیں: ہمارے (محلہ یا قبیلہ میں) ایک عورت تھی، جس کا نام بحریہ تھا، اس کی ماں نے اس کی شادی کر دی، اس کا باپ اس وقت وہاں موجود نہ تھا، جب اس کا باپ آیا، تو اس نے اس رشتے سے انکار کر دیا، اس نے یہ معاملہ سیدنا علی رضی اللہ عنہ کے سامنے پیش کیا، تو سیدنا علی رضی اللہ عنہ نے اس نکاح کو برقرار رکھا۔

ابوقیس بیان کرتے ہیں: سیدنا علی رضی اللہ عنہ نے اس بارے میں یہ فیصلہ دیا تھا۔

ہزیل بیان کرتے ہیں: سیدنا علی رضی اللہ عنہ نے اس کے مطابق فیصلہ دیا تھا۔