سنن الدارقطني

سیدنا عبداللہ رضی اللہ عنہ بیان کرتے ہیں: نبی کریم صلی اللہ علیہ وسلم نے پانچ درہم قیمت والی چیز (کی چوری پر) ہاتھ کٹوا دیا تھا۔

یہی روایت ایک اور سند کے ہمراہ بھی منقول ہے۔

سیدنا عمر رضی اللہ عنہ فرماتے ہیں: ”پانچ (انگلیاں یعنی ہاتھ) پانچ (درہم قیمت والی چیز کی چوری) پر کاٹا جائے گا۔“

سیدنا عمر رضی اللہ عنہ فرماتے ہیں: ”پانچ (انگلیاں یعنی ہاتھ) پانچ (درہم قیمت والی چیز کی چوری) پر کاٹا جائے گا۔“

سیدنا انس بن مالک رضی اللہ عنہ نبی کریم صلی اللہ علیہ وسلم کے بارے میں یہ بات نقل کرتے ہیں: آپ صلی اللہ علیہ وسلم نے ایک ایسی چیز (کی چوری) پر ہاتھ کٹوا دیا تھا، جس کی قیمت پانچ درہم تھی۔ ابوہلال نامی راوی بیان کرتے ہیں: بعض محدثین نے مجھے یہ بتایا: ابن ابوعروبہ نے اس روایت کو سیدنا انس رضی اللہ عنہ کے حوالے سے سیدنا ابوبکر رضی اللہ عنہ سے نقل کیا ہے، میری ملاقات بعد میں ہشام سے ہوئی، میں نے ان کے سامنے اس بات کا تذکرہ کیا، تو انہوں نے فرمایا: یہ قتادہ کے حوالے سے، سیدنا انس رضی اللہ عنہ کے حوالے سے، نبی کریم صلی اللہ علیہ وسلم سے منقول ہے۔ ابوہلال فرماتے ہیں: اگر یہ سیدنا انس رضی اللہ عنہ کے حوالے سے نبی کریم صلی اللہ علیہ وسلم سے منقول نہ ہو، تو یہ یا نبی کریم سے منقول ہے یا سیدنا ابوبکر صدیق رضی اللہ عنہ سے ہو گی۔

سیدنا جابر رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”خیانت کرنے والے، اچک لینے والے اور (سرعام) ڈاکہ ڈالنے والے شخص کا ہاتھ نہیں کاٹا جائے گا۔“

عبداللہ بن عمرو حضرمی بیان کرتے ہیں: میں سیدنا عمر بن خطاب رضی اللہ عنہ کے پاس اپنے غلام کو لے کر آیا، میں نے کہا: ”اے امیر المؤمنین! اس کا ہاتھ کٹوا دیں۔“ سیدنا عمر رضی اللہ عنہ نے دریافت کیا: ”اس نے کیا کیا ہے؟“ میں نے کہا: ”اس نے میری بیوی کا آئینہ چوری کیا ہے، جو ساٹھ درہم سے زیادہ قیمت کا تھا۔“ تو سیدنا عمر رضی اللہ عنہ نے فرمایا: ”تمہارے خادم نے تمہارا سامان چوری کیا ہے، اس کا ہاتھ نہیں کاٹا جائے گا۔“

سیدہ عائشہ رضی اللہ عنہا بیان کرتی ہیں: انہوں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”کسی مردہ شخص کی ہڈی کو توڑنا، زندہ شخص کی ہڈی توڑنے جتنا گناہ ہے۔“

سیدہ عائشہ رضی اللہ عنہا بیان کرتی ہیں: انہوں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”کسی مردہ مسلمان کی ہڈی کو توڑنا، زندہ شخص کی ہڈی کے توڑنے کی مانند ہے (راوی کہتے ہیں: یعنی اس جتنا گناہ ہے)۔“

سیدہ عائشہ رضی اللہ عنہا روایت کرتی ہیں: نبی کریم صلی اللہ علیہ وسلم نے ارشاد فرمایا: ”کسی مردہ شخص کی ہڈی کو توڑنا، زندہ شخص کی ہڈی توڑنے کی مانند ہے۔“

سیدہ عائشہ رضی اللہ عنہا روایت کرتی ہیں: نبی کریم صلی اللہ علیہ وسلم نے ارشاد فرمایا: ”ڈھال کی قیمت سے کم قیمتی چیز کی چوری پر چور کا ہاتھ نہیں کاٹا جائے گا۔“ سیدہ عائشہ رضی اللہ عنہا سے دریافت کیا گیا: ڈھال کی قیمت کیا ہوتی ہے؟ تو انہوں نے جواب دیا: ”ایک چوتھائی دینار۔“ ایک اور سند کے حوالے سے سیدہ عائشہ کا یہ بیان منقول ہے: ”میں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ایک چوتھائی دینار یا اس سے زیادہ قیمت والی چیز کی چوری پر چور کا ہاتھ کاٹا جائے گا۔“

سیدہ عائشہ رضی اللہ عنہا روایت کرتی ہیں: نبی کریم صلی اللہ علیہ وسلم نے فرمایا: ”ایک چوتھائی دینار یا اس سے زیادہ قیمت والی چیز کی چوری پر چور کا ہاتھ کاٹا جائے گا۔“

سیدہ عائشہ رضی اللہ عنہا نبی کریم صلی اللہ علیہ وسلم کا یہ فرمان نقل کرتی ہیں: ”ڈھال یا اس کی قیمت جتنی قیمتی چیز کی چوری پر ہاتھ کاٹا جائے گا۔“ عروہ بیان کرتے ہیں: ڈھال کی قیمت چار درہم ہوتی ہے۔ سلیمان بن یسار فرماتے ہیں: ”چوتھائی دینار یا اس سے زیادہ (قیمت والی چیز کی چوری) پر ہاتھ کاٹا جائے گا۔“

سیدنا ابن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے ایک ڈھال چوری کرنے پر ہاتھ کٹوا دیا، جس کی قیمت تین درہم تھی۔

سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم کے زمانہ اقدس میں ایک شخص نے ایک ڈھال چوری کر لی، جس کی قیمت پانچ درہم تھی، تو نبی کریم صلی اللہ علیہ وسلم نے اس کا ہاتھ کٹوا دیا۔

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم کے زمانہ اقدس میں ڈھال کی قیمت دس درہم ہوتی تھی۔

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: ان دنوں ڈھال کی قیمت دس درہم ہوتی تھی۔ عطاء فرماتے ہیں: ان دنوں ڈھال کی قیمت دس درہم ہوتی تھی۔

ولید بیان کرتے ہیں کہ مجھے عطاء رحمہ اللہ سے سننے والے نے بتایا کہ ان دنوں ڈھال کی قیمت دس درہم ہوا کرتی تھی۔

سیدنا ابن عباس رضی اللہ عنہما فرماتے ہیں: نبی کریم صلی اللہ علیہ وسلم کے زمانہ اقدس میں ڈھال کی قیمت دس درہم ہوتی تھی۔

سیدنا ابن عباس رضی اللہ عنہما فرماتے ہیں: نبی کریم صلی اللہ علیہ وسلم کے زمانہ اقدس میں ڈھال کی قیمت دس درہم ہوتی تھی۔

سیدنا ابن عباس رضی اللہ عنہما فرماتے ہیں: نبی کریم صلی اللہ علیہ وسلم کے زمانہ اقدس میں ڈھال کی قیمت دس درہم ہوتی تھی۔

سیدنا ابن عباس رضی اللہ عنہما فرماتے ہیں: ان دنوں ڈھال کی قیمت دس درہم ہوتی تھی۔

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے ارشاد فرمایا ہے: ”(کم از کم) دس درہم کی چوری پر، چور کا ہاتھ کاٹا جائے گا۔“

ایک اور سند کے ہمراہ یہ منقول ہے: ”ڈھال کی قیمت سے کم (قیمت والی چیز) کی چوری پر ہاتھ نہیں کاٹا جائے گا۔“ (راوی کہتے ہیں) ڈھال کی قیمت دس درہم تھی۔

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم کے زمانہ اقدس میں ڈھال کی قیمت دس درہم ہوتی تھی۔

یہی روایت ایک اور سند کے ہمراہ بھی منقول ہے۔

سیدنا عبداللہ بن مسعود رضی اللہ عنہ فرماتے ہیں: ”دس درہم سے کم قیمت والی چیز پر ہاتھ نہیں کاٹا جائے گا۔“

یہی روایت ایک سند کے ہمراہ بھی منقول ہے، ایک سند کے حوالے سے یہ منقول ہے: سیدنا عبداللہ بن مسعود رضی اللہ عنہ فرماتے ہیں: نبی کریم صلی اللہ علیہ وسلم نے پانچ درہم (قیمت والی چیز کی) چوری پر ہاتھ کٹوا دیا تھا۔

سیدنا کعب رضی اللہ عنہ بیان کرتے ہیں: ”جو شخص اچھی طرح وضو کرنے کے بعد عشاء کی نماز ادا کرے اور اس کے بعد چار رکعت (نوافل) ادا کرے، جن میں رکوع اور سجدے مکمل ادا کرے اور وہ یہ جانتا ہو کہ وہ ان میں کیا پڑھ رہا ہے، تو اس کو شب قدر میں یہ رکعات ادا کرنے کا ثواب ملے گا۔“ اس روایت کو عطاء نے ایمن کے حوالے سے، سیع یاتبیع کے حوالے سے نقل کیا ہے، ایمن نامی راوی وہی ہیں، جنہوں نے نبی کریم صلی اللہ علیہ وسلم کے بارے میں یہ بات نقل کی ہے: (آپ صلی اللہ علیہ وسلم کے زمانہ اقدس میں) ڈھال کی قیمت ایک دینار تھی، یہ تابعین کے طبقہ سے تعلق رکھتے ہیں، انہوں نے نبی کریم صلی اللہ علیہ وسلم اور آپ صلی اللہ علیہ وسلم کے بعد آنے والے خلفاء کا زمانہ نہیں پایا۔

عبدالواحد بن ایمن اپنے والد کے حوالے سے اسے ذکر کیا ہے، عطاء اور مجاہد دونوں نے ان کے والد کے حوالے سے احادیث روایت کی ہیں:...

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم سے ایسی چیز کے بارے میں دریافت کیا گیا، جو کسی رہائشی جگہ یا عام گزرگاہ سے ملتی ہے، تو آپ نے فرمایا: ”تم ایک سال تک اس کا اعلان کرتے رہو، اگر اس کا مالک آ جائے، تو ٹھیک ہے، ورنہ وہ تمہاری ہو گی۔“ نبی کریم صلی اللہ علیہ وسلم سے اس چیز کے بارے میں دریافت کیا گیا، جو دشمن کی سرزمین سے ملتی ہے، تو آپ نے فرمایا: ”اس میں اور رکاز میں سے پانچویں حصے کی (بیت المال) کو ادائیگی لازم ہے۔“ راوی بیان کرتے ہیں: نبی کریم صلی اللہ علیہ وسلم سے گمشدہ بکری کے بارے میں دریافت کیا گیا، تو آپ نے فرمایا: ”تم اسے پکڑو، کیونکہ وہ یا تو تمہیں ملے گی، یا تمہارے کسی بھائی کو مل جائے گی، یا پھر بھیڑیے کو ملے گی۔“ نبی کریم صلی اللہ علیہ وسلم سے گمشدہ اونٹ کے بارے میں دریافت کیا گیا، تو آپ صلی اللہ علیہ وسلم نے فرمایا: ”اسے چھوڑ دو، اس کے پاؤں اور اس کا پیٹ اس کے ساتھ ہیں، وہ خود ہی پانی تک پہنچ جائے گا اور درخت (کے پتے) کھا لے گا۔“ (راوی کہتے ہیں) نبی کریم صلی اللہ علیہ وسلم سے پہاڑ سے چوری کرنے والے کے بارے میں دریافت کیا گیا، تو آپ نے فرمایا: ”اس کی اچھی طرح پٹائی کی جائے اور اس سے دگنا تاوان لیا جائے۔“ اگر مویشیوں کی حفاظت کی جگہ سے جانور چرایا گیا ہے اور اس کی قیمت ڈھال کی قیمت جتنی یعنی ایک دینار ہو، تو اس میں ہاتھ کاٹا جائے گا، آپ سے شگوفے میں سے پھل چوری کرنے کے بارے میں دریافت کیا گیا، تو آپ نے فرمایا: ”اسی چور کی پٹائی کی جائے گی اور اس سے دگنا تاوان وصول کیا جائے گا۔“ آپ نے فرمایا: ”اگر کھجوریں خشک کرنے کی جگہ سے چوری کی جائیں، اور چوری شدہ سامان کی قیمت ڈھال جتنی ہو، تو اس میں ہاتھ کاٹا جائے گا اور اگر اس سے کم ہو، تو (چور کی) پٹائی کی جائے گی اور اس سے دگنا تاوان وصول کیا جائے گا۔“

سیدنا علی رضی اللہ عنہ فرماتے ہیں: نبی کریم صلی اللہ علیہ وسلم نے لوہے کے ایک خود (کی چوری) پر ہاتھ کٹوا دیا تھا، جس کی قیمت اکیس درہم تھی۔

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے ارشاد فرمایا: ”جو شخص کسی کا علاج کرے اور وہ معالج نہ ہو (اور اس کے علاج کی وجہ سے مریض کو نقصان ہو)، تو وہ شخص تاوان ادا کرے گا۔“

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے ارشاد فرمایا ہے: ”جو شخص کسی کا علاج کرے اور وہ معالج نہ ہو (اور اس کے علاج کی وجہ سے مریض کو) جانی یا اس سے کم نقصان ہو، تو وہ شخص تاوان ادا کرے گا۔“ یہی روایت ایک اور سند کے حوالے سے، مرسل، روایت کے طور پر منقول ہے۔

سیدنا براء رضی اللہ عنہ بیان کرتے ہیں: میری اپنے ماموں سے ملاقات ہوئی، میں نے دریافت کیا: ”آپ کہاں جا رہے ہیں؟“ انہوں نے فرمایا: ”نبی کریم صلی اللہ علیہ وسلم نے مجھے ایک ایسے شخص کی طرف بھیجا ہے، جس نے اپنے باپ کی بیوی کے ساتھ شادی کر لی ہے، نبی کریم صلی اللہ علیہ وسلم نے مجھے یہ ہدایت کی ہے کہ میں اس کی گردن اڑا دوں۔“ حفص نامی راوی نے یہ الفاظ نقل کیے ہیں: ”میں اس کا سر لے کر نبی کی خدمت میں آؤں۔“

سیدنا براء رضی اللہ عنہ بیان کرتے ہیں: نبی کریم صلی اللہ علیہ وسلم نے ایک شخص کو ایک ایسے فرد کی طرف بھیجا، جس نے اپنے باپ کی بیوی کے ساتھ شادی کر لی تھی، تاکہ اس شخص کی گردن اڑا دی جائے۔

سیدنا ابوہریرہ رضی اللہ عنہ بیان کرتے ہیں: اسلم قبیلے سے تعلق رکھنے والا شخص نبی کریم صلی اللہ علیہ وسلم کی خدمت میں حاضر ہوا، اس نے چار مرتبہ اپنے بارے میں یہ گواہی دی کہ اس نے ایک عورت کے ساتھ ناجائز تعلق قائم کیا ہے، ہر مرتبہ نبی کریم صلی اللہ علیہ وسلم نے اس سے منہ پھیر لیا، جب وہ پانچویں مرتبہ آیا، تو نبی کریم صلی اللہ علیہ وسلم نے دریافت کیا: ”کیا تم نے اس کے ساتھ صحبت کی ہے؟“ اس نے عرض کی: ”جی ہاں۔“ نبی کریم صلی اللہ علیہ وسلم نے دریافت کیا: ”(اس طرح سے کہ) تمہاری شرمگاہ اس کی شرمگاہ میں یوں داخل ہو گئی، جیسے سلائی سرمہ دانی کے اندر چلی جاتی ہے، یا ڈول کنویں کے اندر چلا جاتا ہے؟“ اس نے عرض کی: ”جی ہاں۔“ نبی کریم صلی اللہ علیہ وسلم نے دریافت کیا: ”کیا تم جانتے ہو زنا کسے کہتے ہیں؟“ اس نے جواب دیا: ”جی ہاں، میں نے اس عورت کے ساتھ حرام طریقے سے وہ عمل کیا ہے، جو کوئی شخص اپنی بیوی کے ساتھ حلال طور پر کرتا ہے۔“ نبی کریم صلی اللہ علیہ وسلم نے دریافت کیا: ”تم اس بات کے ذریعے کیا چاہتے ہو؟“ اس نے جواب دیا: ”میں یہ چاہتا ہوں کہ آپ صلی اللہ علیہ وسلم مجھے پاک کر دیں۔“ تو نبی کریم صلی اللہ علیہ وسلم کے حکم کے تحت اسے سنگسار کر دیا گیا۔ نبی کریم صلی اللہ علیہ وسلم نے اپنے اصحاب میں دو آدمیوں کو گفتگو کرتے ہوئے سنا، ان میں سے ایک نے دوسرے سے یہ کہا: ”بھلا اس شخص کو دیکھو، اللہ نے اس کا پردہ رکھا، لیکن اس نے خود اسے نہیں رہنے دیا اور اسے کتے کی طرح سنگسار کر دیا گیا۔“ تو نبی کریم صلی اللہ علیہ وسلم خاموش رہے، کچھ دیر کے بعد آپ صلی اللہ علیہ وسلم کا گزر ایک مردار گدھے کے پاس سے ہوا، جس کی ایک ٹانگ اوپر کی طرف اٹھی ہوئی تھی، نبی کریم صلی اللہ علیہ وسلم نے دریافت کیا: ”فلاں اور فلاں کہاں ہیں؟“ ان دونوں نے عرض کی: ”یا رسول اللہ! ہم یہاں ہیں۔“ نبی کریم صلی اللہ علیہ وسلم نے فرمایا: ”تم دونوں یہاں اترو، تم دونوں نے اس مردار گدھے میں سے اپنے حصے کا گوشت لینا ہے۔“ ان دونوں نے عرض کی: ”اے اللہ کی نبی! اللہ آپ کی مغفرت کرے، اس کا گوشت کون کھائے گا؟“ نبی کریم صلی اللہ علیہ وسلم نے فرمایا: ”تم نے ابھی تھوڑی دیر پہلے اپنے بھائی کی عزت پر جو حملہ کیا ہے، وہ مردار کھانے سے زیادہ شدید ہے، اس ذات کی قسم جس کے دست قدرت میں میری جان ہے، وہ شخص اس وقت جنت کی نہروں میں ڈبکیاں لگا رہا ہے۔“

عباد بن تمیم اپنے چچا، جو غزوہ بدر میں شریک ہوئے ہیں، کا یہ بیان نقل کرتے ہیں: نبی کریم صلی اللہ علیہ وسلم نے ارشاد فرمایا ہے: ”جب کوئی کنیز زنا کا ارتکاب کرے، تو اسے کوڑے مارو، اگر وہ دوبارہ زنا کا ارتکاب کرے، تو اسے کوڑے مارو، اگر وہ پھر اس کا ارتکاب کرے، تو اسے کوڑے مارو، اور پھر اسے فروخت کرو، خواہ ایک رسی (کے عوض میں فروخت کرو)۔“

سیدنا مغیرہ بن شعبہ رضی اللہ عنہ بیان کرتے ہیں: ایک عورت نے اپنی سوکن کو خیمہ کی لکڑی کے ذریعے ضرب لگائی، وہ دوسری عورت حاملہ تھی، راوی بیان کرتے ہیں: ان دونوں میں سے ایک عورت کا تعلق بنو لحیان سے تھا، تو نبی کریم صلی اللہ علیہ وسلم نے مقتول عورت کی دیت کی ادائیگی قاتل عورت کے خاندان پر عائد کی اور اس مقتول کے پیٹ میں موجود بچے کے تاوان کی ادائیگی کا حکم دیا، تو قاتل عورت کے خاندان میں سے ایک شخص بولا: ”کیا ہم اس بچے کا تاوان ادا کریں؟ جس نے کچھ کھایا نہیں، کچھ پیا نہیں، جو رویا نہیں (یعنی پیدا نہیں ہوا)، اس طرح کا خون رائیگاں جاتا ہے۔“ تو نبی کریم صلی اللہ علیہ وسلم نے فرمایا: ”کیا تم دیہاتیوں کی طرح مقفع و مسجع گفتگو کر رہے ہو؟“ راوی کہتے ہیں: نبی کریم صلی اللہ علیہ وسلم نے اس پر دیت کی ادائیگی لازم قرار دی۔

سیدنا مغیرہ بن شعبہ رضی اللہ عنہ بیان کرتے ہیں: دو عورتیں تھیں، ان میں سے ایک نے دوسری کو خیمہ کی لکڑی مار کر قتل کر دیا، تو نبی کریم صلی اللہ علیہ وسلم نے اس مقتول عورت کی دیت کی ادائیگی، قاتل عورت کے خاندان پر عائد کی اور اس مقتول عورت کے پیٹ میں موجود بچے کے تاوان کی ادائیگی کا حکم دیا، تو ایک دیہاتی بولا: ”کیا میں اس کا تاوان ادا کروں؟ جس نے کچھ کھایا پیا نہیں، وہ چیخ مار کر رویا نہیں، اس طرح کا خون رائیگاں جاتا ہے۔“ تو نبی کریم صلی اللہ علیہ وسلم نے فرمایا: ”تم دیہاتیوں کی طرح مقفع مسجع گفتگو کر رہے ہو۔“ نبی کریم صلی اللہ علیہ وسلم نے اس عورت کے پیٹ میں موجود بچے کے تاوان کی ادائیگی کو لازم قرار دیا۔