سنن الدارقطني

عمرو بن شعیب بیان کرتے ہیں: جو مسلمان کسی اہل کتاب شخص کو قتل کر دے، نبی کریم صلی اللہ علیہ وسلم نے اس کے لیے چار ہزار درہم (بطور تاوان) ادائیگی کو لازم قرار دیا ہے، نبی کریم صلی اللہ علیہ وسلم نے اہل کتاب یہودی اور عیسائی کی دیت، مسلمان کی دیت کا نصف مقرر کی ہے۔

سیدنا ابن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے ارشاد فرمایا ہے: ”ذمی کی دیت مسلمان کی دیت جتنی ہو گی۔“ اس روایت کو ابوکرز کے علاوہ اور کسی نے بھی نافع کے حوالے سے نقل نہیں کیا، اور یہ شخص متروک ہے، اس کا نام عبداللہ بن عبدالملک فہری ہے۔

سیدنا اسامہ بن زید رضی اللہ عنہ بیان کرتے ہیں: نبی کریم صلی اللہ علیہ وسلم نے معاہد (ذمی) کی دیت مسلمان کی دیت کے برابر قرار دی ہے۔ عثمان نامی راوی وقاصی اور متروک الحدیث ہے۔

سیدنا ابن عمر رضی اللہ عنہما بیان کرتے ہیں: ایک مسلمان نے ایک ذمی کو قتل عمد کے طور پر قتل کر دیا، یہ مقدمہ سیدنا عثمان رضی اللہ عنہ کے سامنے پیش کیا گیا، تو انہوں نے اس (قاتل کو قصاص کے طور پر) قتل نہیں کروایا، اور اس (مقتول کی) دیت مغلظہ مقرر کی، جو مسلمان کی دیت جتنی تھی۔

سعید بن مسیب بیان کرتے ہیں: سیدنا عمر بن خطاب رضی اللہ عنہ نے یہودی اور عیسائی کی دیت چار ہزار درہم مقرر کی تھی، جب کہ مجوسی کی دیت آٹھ سو درہم مقرر کی تھی۔ شعبہ کہتے ہیں: میں نے اپنے استاد حکم سے دریافت کیا: ”کیا آپ نے خود سعید کی زبانی یہ حدیث سنی ہے؟“ انہوں نے جواب دیا: ”نہیں! ویسے اگر میں چاہتا، تو ان کی زبانی بھی اسے سن سکتا تھا، مجھے یہ حدیث ثابت حداد نے سنائی ہے۔“ شعبہ کہتے ہیں: پھر میں ثابت حداد سے ملا، تو انہوں نے مجھے یہ حدیث سنائی۔

سیدنا عمر رضی اللہ عنہ فرماتے ہیں: ”یہودی اور عیسائی کی دیت چار ہزار درہم ہو گی، جب کہ مجوسی کی دیت آٹھ سو درہم ہو گی۔“

یہی روایت ایک اور سند کے ہمراہ بھی منقول ہے۔

سیدنا ابن عباس رضی اللہ عنہما روایت کرتے ہیں: نبی کریم صلی اللہ علیہ وسلم نے ارشاد فرمایا ہے: ”کسی کو اللہ کا شریک سمجھنا، کسی (شخص) کو محصن نہیں بناتا۔“ اس حدیث کو مرفوع روایت کے طور پر نقل کرنے میں عفیف بن سالم نامی راوی کو وہم ہوا ہے، درست یہ ہے کہ یہ روایت سیدنا عبداللہ بن عمر رضی اللہ عنہما کے اپنے قول کے طور پر منقول ہے۔

سیدنا ابن عمر رضی اللہ عنہما فرماتے ہیں: ”جو شخص کسی کو اللہ کا شریک سمجھتا ہو، وہ محصن نہیں ہو گا۔“

سیدنا ابن عمر رضی اللہ عنہما نبی کریم صلی اللہ علیہ وسلم کا یہ فرمان نقل کرتے ہیں: ”جو شخص کسی کو اللہ کا شریک سمجھتا ہو، وہ محصن نہیں ہو گا۔“ اس روایت کو مرفوع حدیث کے طور پر صرف اسحاق نامی راوی نے نقل کیا ہے، ایک روایت کے مطابق انہوں نے بعد میں اس سے رجوع کر لیا تھا، درست یہ ہے کہ یہ روایت موقوف ہے۔

سیدنا علی رضی اللہ عنہ فرماتے ہیں: ”جس شخص کے لیے ہمارا ذمہ ہو، اس کا خون ہمارے خون کی طرح (قابل احترام) ہو گا۔“ ابان بن تغلب نے اس سے مختلف روایت نقل کی ہے، انہوں نے اپنی سند کے ہمراہ ابوجنوب کے حوالے سے نقل کیا ہے، ابوجنوب نامی راوی ضعیف الحدیث ہیں۔

سیدنا کعب بن مالک رضی اللہ عنہ بیان کرتے ہیں: انہوں نے ایک یہودی (راوی کو شک ہے، یا شاید) ایک عیسائی عورت کے ساتھ شادی کرنے کا ارادہ کیا، انہوں نے اس بارے میں نبی کریم صلی اللہ علیہ وسلم سے دریافت کیا، تو نبی کریم صلی اللہ علیہ وسلم نے اس عورت کے ساتھ شادی کرنے سے منع کر دیا، آپ صلی اللہ علیہ وسلم نے فرمایا: ”وہ عورت تمہیں محصن نہیں کرے گی۔“ اس روایت کا راوی ابوبکر بن ابومریم ضعیف ہے، جب کہ دوسرے راوی علی بن ابوطلحہ نے سیدنا کعب بن مالک رضی اللہ عنہ کا زمانہ نہیں پایا۔

سیدنا انس رضی اللہ عنہ بیان کرتے ہیں: ایک یہودی کو دھوکے سے قتل کر دیا گیا، تو سیدنا عمر رضی اللہ عنہ نے اس مقدمے میں بارہ ہزار درہم (بطور دیت) ادا کرنے کا حکم دیا۔

سیدنا ابن مسعود رضی اللہ عنہ فرماتے ہیں: ”ہر معاہد (ذمی) خواہ وہ مجوسی ہو یا کوئی اور ہو، اس کی دیت پوری ہو گی۔“ سیدنا ابن مسعود رضی اللہ عنہ فرماتے ہیں: ”معاہد کی دیت مسلمان کی دیت جتنی ہو گی۔“

سیدنا علی رضی اللہ عنہ نے بھی یہی بات ارشاد فرمائی ہے۔

سیدنا ابوہریرہ رضی اللہ عنہ بیان کرتے ہیں: انہیں نبی کریم صلی اللہ علیہ وسلم کے اس فرمان کا پتہ چلا ہے: ”جانور کا زخمی کرنا (یا اس کے نتیجے میں آدمی کا مرجانا) رائیگاں جائے گا، کنویں میں گر کر مرنا رائیگاں جائے گا، معدنیات کی کان میں گر کر مرنا رائیگاں جائے گا، اور رکاز میں خمس کی ادائیگی لازم ہو گی۔“ ایک شخص نے ان سے سوال کیا: ”اے ابومحمد، کیا ان کے ساتھ ابوسلمہ بھی تھے؟“ تو انہوں نے فرمایا: ”اگر وہ ان کے ساتھ ہوتے، تو ان کے ساتھ (ذکر بھی) ہوتے۔“

یہی روایت ایک اور سند کے ہمراہ بھی منقول ہے۔

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے ارشاد فرمایا ہے: ”جانور کا زخمی کرنا (یا اس کے نتیجے میں آدمی کا مرجانا) رائیگاں جائے گا، کنویں میں گر کر مرنا رائیگاں جائے گا، معدنیات کی کان میں گر کر مرنا رائیگاں جائے گا، اور رکاز میں خمس کی ادائیگی لازم ہو گی۔“ زبیدی اور جعفر بن برقان نے اس کی سند میں ابوسلمہ کا تذکرہ نہیں کیا۔

سیدنا ابوہریرہ رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”جانور کا زخمی کرنا (یا اس کے نتیجے میں آدمی کا مرجانا) رائیگاں جائے گا، کنویں میں گر کر مرنا رائیگاں جائے گا، معدنیات کی کان میں گر کر مرنا رائیگاں جائے گا، اور رکاز میں خمس کی ادائیگی لازم ہو گی۔“ ابن شہاب بیان کرتے ہیں: اس حدیث میں استعمال ہونے والے لفظ، الجبار، کا مطلب ہے اس کا خون رائیگاں جائے گا اور لفظ العجماء کا مطلب جانور ہے۔ شیخ ابوبکر نیشاپوری فرماتے ہیں: میرے علم کے مطابق یونس بن یزید کے علاوہ اور کسی بھی راوی نے اس کی سند میں عبیداللہ بن عبداللہ سے منقول ہونے کا ذکر نہیں کیا۔

سیدنا ابوہریرہ رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”(جانور کے) پاؤں (مارنے سے) مرنا رائیگاں جائے گا۔“

یہی روایت ایک اور سند کے ہمراہ بھی منقول ہے، تاہم اس میں یہ الفاظ نہیں ہیں: ”(جانور کے) پاؤں (مارنے سے) مرنا رائیگاں جائے گا۔“

یہی روایت ایک اور سند کے ہمراہ بھی منقول ہے، تاہم اس میں یہ الفاظ ہیں: ”آگ میں جل کر مرنا رائیگاں جائے گا۔“

امام احمد بن حنبل رحمہ اللہ تعالیٰ امام عبدالرزاق رحمہ اللہ تعالیٰ کے حوالے سے سیدنا ابوہریرہ رضی اللہ عنہ سے منقول اس روایت، ”آگ میں جل کر مرنا رائیگاں جائے گا“، کے بارے میں فرماتے ہیں: اس کی کوئی حیثیت نہیں ہے اور یہ روایت درست نہیں ہے۔

سیدنا ابوہریرہ رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”آگ میں گر کر مرنا رائیگاں جائے گا۔“ یہی روایت بعض دیگر اسناد کے ہمراہ منقول ہے، جس میں کچھ لفظی اختلافات پائے جاتے ہیں۔

ہزیل روایت کرتے ہیں: نبی کریم صلی اللہ علیہ وسلم نے ارشاد فرمایا: ”معدنیات کی کان میں گر کر مرنا رائیگاں جائے گا، کنویں میں گر کر مرنا رائیگاں جائے گا، جانور (کے مارنے کے نتیجے میں آدمی کا مرجانا) رائیگاں جائے گا، (جانور کے) پاؤں (مارنے سے) مرنا رائیگاں جائے گا، اور رکاز میں خمس کی ادائیگی لازم ہو گی۔“

ہزیل، سیدنا عبداللہ رضی اللہ عنہ کے حوالے سے نقل کرتے ہیں: میرا خیال ہے، انہوں نے مرفوع حدیث کے طور پر ہی نقل کیا ہے: ”جانور (کے مارنے کے نتیجے میں آدمی کا مرجانا) رائیگاں جائے گا، کنویں میں گر کر مرنا رائیگاں جائے گا، معدنیات کی کان میں گر کر مرنا رائیگاں جائے گا، اور رکاز میں خمس کی ادائیگی لازم ہو گی۔“

سیدنا ابوہریرہ رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”جانور کا زخمی کرنا (یا اس کے نتیجے میں آدمی کا مرجانا) رائیگاں جائے گا، (جانور کے) پاؤں مارنے کے نتیجے میں مرنا رائیگاں جائے گا، کنویں میں گر کر مرنا رائیگاں جائے گا، معدنیات کی کان میں گر کر مرنا رائیگاں جائے گا، اور رکاز میں خمس کی ادائیگی لازم ہو گی۔“

حرام بن محیصہ اپنے والد کے حوالے سے نقل کرتے ہیں: سیدنا براء بن عازب رضی اللہ عنہ کی ایک اونٹنی کسی کے باغ میں داخل ہوئی اور وہاں کچھ چیزوں کو نقصان پہنچایا، تو نبی کریم صلی اللہ علیہ وسلم نے اس بارے میں یہ فیصلہ دیا: ”اموال (یعنی زمین اور باغات) کی دن کے وقت حفاظت ان کے مالکان کے ذمے ہے اور جانوروں کی رات کے وقت حفاظت ان (جانوروں) کے مالکان کے ذمے ہے۔“ وہیب اور ابومسعود زجاج نے معمر کے حوالے سے نقل کرنے میں کچھ اختلاف کیا ہے، انہوں نے اسے ان کے والد کے حوالے سے منقول ذکر نہیں کیا۔

سیدنا براء بن عازب رضی اللہ عنہ بیان کرتے ہیں: ایک انصاری کی اونٹنی ایک باغ میں داخل ہوئی اور وہاں نقصان پہنچایا، تو نبی کریم صلی اللہ علیہ وسلم نے یہ فیصلہ دیا: ”باغات کے مالکان دن کے وقت ان کی حفاظت کے ذمے دار ہیں، جب کہ مویشیوں کے مالکان اس بات کے ذمے دار ہوں گے جو ان کے جانور رات کے وقت نقصان پہنچاتے ہیں۔“ یونس بیان کرتے ہیں: شافعی نے اس روایت کو ایوب سے سنا ہے، لیکن انہوں نے اسے زہری کے حوالے سے، حرام کے حوالے سے، سیدنا براء رضی اللہ عنہ سے نقل کیا ہے۔

حرام بن محیصہ اپنے والد کے حوالے سے نقل کرتے ہیں: سیدنا براء بن عازب رضی اللہ عنہ فرماتے ہیں: سیدنا براء رضی اللہ عنہ کی اونٹنی ایک باغ میں داخل ہوگئی، اس کے بعد حسب سابق حدیث ہے۔

حرام بن محیصہ، سیدنا براء بن عازب رضی اللہ عنہ کے حوالے سے نقل کرتے ہیں: ان کی ایک اونٹنی تھی، اس نے (کسی کے باغ) کو نقصان پہنچایا۔ اس کے بعد انہوں نے نبی کریم صلی اللہ علیہ وسلم کے حوالے سے حسب سابق حدیث ذکر کی ہے۔ یہاں راوی نے حرام کے حوالے سے سیدنا براء رضی اللہ عنہ سے اس روایت کو نقل کیا ہے۔ فریابی، ایوب بن خالد، اور دیگر محدثین نے امام اوزاعی کے حوالے سے اسے نقل کرنے میں اختلاف کیا ہے، ان حضرات نے یہ بات نقل کی ہے: حرام بیان کرتے ہیں، سیدنا براء رضی اللہ عنہ کی ایک اونٹنی تھی۔

حرام بن محیصہ، سیدنا براء بن عازب رضی اللہ عنہ کے حوالے سے نقل کرتے ہیں: سیدنا براء رضی اللہ عنہ کے خاندان کی اونٹنی نے کسی چیز کو نقصان پہنچایا، تو نبی کریم صلی اللہ علیہ وسلم نے یہ فیصلہ دیا: ”پھلوں (یعنی باغات اور پیداوار) کی دن کے وقت حفاظت کرنا ان کے مالکان کے ذمے ہے اور مویشیوں کے مالکان اس چیز کا تاوان ادا کریں گے جو نقصان دہ مویشی رات کے وقت کسی چیز کو پہنچاتے ہیں۔“

حرام بن محیصہ، سیدنا براء بن عازب رضی اللہ عنہ کے حوالے سے نقل کرتے ہیں: ان لوگوں کی اونٹنی۔

حرام بن سعد بن محیصہ نقل کرتے ہیں: سیدنا براء رضی اللہ عنہ کی اونٹنی ایک باغ میں داخل ہوئی اور وہاں (پیداوار کو) نقصان پہنچایا، اس بارے میں نبی کریم صلی اللہ علیہ وسلم سے شکایت کی گئی، تو آپ صلی اللہ علیہ وسلم نے یہ فیصلہ دیا: ”باغات کی دن کے وقت حفاظت کرنا ان کے مالکان کے ذمے ہے اور مویشی رات کے وقت جو نقصان پہنچاتے ہیں، اس کا تاوان ادا کرنا ان مویشیوں کے مالکان کے ذمے ہو گا۔“ یہی روایت بعض دیگر اسناد کے ہمراہ بھی منقول ہے۔

سیدنا عبدالرحمن بن ازہر رضی اللہ عنہ بیان کرتے ہیں: غزوہ حنین کے موقع پر میں نے نبی کریم صلی اللہ علیہ وسلم کو دیکھا، آپ لوگوں کے درمیان سے گزرتے ہوئے سیدنا خالد بن ولید رضی اللہ عنہ کی جائے قیام کے بارے میں دریافت کر رہے تھے، آپ صلی اللہ علیہ وسلم کے سامنے نشے میں مدہوش ایک شخص کو لایا گیا، تو آپ کے حکم کے تحت آپ کے آس پاس موجود لوگوں نے اپنے ہاتھوں کے ذریعے اس شخص کی پٹائی کی، نبی کریم صلی اللہ علیہ وسلم نے خود اس پر مٹی پھینکی۔ پھر سیدنا ابوبکر رضی اللہ عنہ (کے عہد خلافت میں ان کے سامنے) ایک مدہوش شخص کو لایا گیا، تو انہوں نے اسے سزا دیتے ہوئے چالیس کوڑے لگوائے۔

یہی روایت ایک اور سند کے ہمراہ بھی منقول ہے۔

یہی روایت ایک اور سند کے ہمراہ بھی منقول ہے۔

سیدنا عبدالرحمن بن ازہر رضی اللہ عنہ بیان کرتے ہیں: غزوہ حنین کے موقع پر نبی کریم صلی اللہ علیہ وسلم کے سامنے ایک شخص کو لایا گیا، جس نے شراب پی تھی، تو نبی کریم صلی اللہ علیہ وسلم نے لوگوں سے فرمایا: ”اس کی پٹائی کرو۔“ تو لوگ اکٹھے ہوئے اور انہوں نے اپنے جوتوں کے ذریعے اس کی پٹائی کی۔

عبداللہ بن عبدالرحمن بن ازہر اپنے والد کا یہ بیان نقل کرتے ہیں: نبی کریم صلی اللہ علیہ وسلم کی خدمت میں ایک شخص کو لایا گیا، جس نے شراب پی تھی، نبی کریم صلی اللہ علیہ وسلم اس وقت حنین میں موجود تھے، آپ نے اس کے چہرے پر مٹی پھینکی اور اپنے ساتھیوں کو حکم دیا کہ وہ اپنے جوتوں اور ہاتھ میں جو چیز بھی ہے، اس کے ذریعے اس شخص کی پٹائی کریں، یہاں تک کہ (کچھ دیر کے بعد) نبی کریم صلی اللہ علیہ وسلم نے ان سے فرمایا: ”اب بس کرو۔“ تو وہ لوگ رک گئے۔ نبی کریم صلی اللہ علیہ وسلم کے وصال تک (شرابی کو سزا دینے کا) یہی طریقہ رہا، اس کے بعد سیدنا ابوبکر رضی اللہ عنہ نے شراب پینے کی سزا میں چالیس کوڑے لگوائے، سیدنا عمر رضی اللہ عنہ نے اپنے عہد خلافت کے ابتدائی حصے میں چالیس کوڑے لگوائے اور آخری حصے میں اسی کوڑے لگوانا شروع کر دیے، پھر سیدنا عثمان رضی اللہ عنہ نے (اپنے عہد خلافت میں) دونوں طرح کی سزا دی، لیکن سیدنا معاویہ رضی اللہ عنہ نے (اپنے عہد خلافت میں) اسی کوڑوں کو برقرار رکھا۔