سنن الدارقطني

سیدنا ابوہریرہ رضی اللہ عنہ بیان کرتے ہیں: سیدنا ابوالقاسم صلی اللہ علیہ وسلم نے مجھ سے فرمایا: ”جب کوئی شخص اپنے غلام پر زنا کا (جھوٹا) الزام لگائے اور وہ غلام اس سے بری ہو، جو اس شخص نے (الزام لگایا)، تو اس شخص کو قیامت کے دن حد کے طور پر کوڑے لگائے جائیں گے۔“

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے ارشاد فرمایا: ”شلل اور عرج میں قصاص نہیں ہو گا۔“

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے ارشاد فرمایا ہے: ”عورت کی دیت مرد کی دیت کے برابر ہو گی، جب تک وہ عورت کی دیت کے ایک تہائی تک نہ پہنچ جائے۔“

سلیمان بن بریدہ اپنے والد کا یہ بیان نقل کرتے ہیں: ماعز بن مالک نبی کریم صلی اللہ علیہ وسلم کی خدمت میں حاضر ہوئے، انہوں نے عرض کیا: ”یا رسول اللہ! مجھے پاک کر دیجیے۔“ نبی کریم صلی اللہ علیہ وسلم نے فرمایا: ”تمہارا ستیاناس ہو، تم واپس جاؤ، اللہ سے مغفرت طلب کرو، اس کی بارگاہ میں توبہ کرو۔“ راوی بیان کرتے ہیں: وہ واپس گئے اور تھوڑی دور جا کر پھر واپس آ گئے، انہوں نے عرض کی: ”یا رسول اللہ! مجھے پاک کر دیجیے۔“ نبی کریم صلی اللہ علیہ وسلم نے فرمایا: ”تمہارا ستیاناس ہو، تم واپس جاؤ، اللہ سے مغفرت طلب کرو اور اس کی بارگاہ میں توبہ کرو۔“ راوی بیان کرتے ہیں: وہ واپس گئے اور تھوڑی دور جا کر پھر واپس آ گئے، انہوں نے عرض کی: ”یا رسول اللہ! مجھے پاک کر دیجیے۔“ نبی کریم صلی اللہ علیہ وسلم نے پھر اسی کی مانند فرمایا، یہاں تک کہ چوتھی مرتبہ نبی کریم صلی اللہ علیہ وسلم نے ان سے دریافت فرمایا: ”میں کس چیز سے تمہیں پاک کروں؟“ انہوں نے عرض کی: زنا سے۔ نبی کریم صلی اللہ علیہ وسلم نے دریافت کیا: ”اسے کیا جنون لاحق ہے؟“ تو آپ کو بتایا گیا: یہ مجنون نہیں ہے۔ نبی کریم صلی اللہ علیہ وسلم نے دریافت کیا: ”کیا اس نے شراب پی رکھی ہے؟“ تو ایک شخص اٹھا، اس نے انہیں سونگھا، تو اسے شراب کی بو محسوس نہیں ہوئی۔ نبی کریم صلی اللہ علیہ وسلم نے دریافت کیا: ”تم شادی شدہ ہو؟“ انہوں نے عرض کیا: جی ہاں۔ تو نبی کریم صلی اللہ علیہ وسلم کے حکم کے تحت انہیں سنگسار کر دیا گیا۔ (راوی بیان کرتے ہیں:) ان کے بارے میں لوگوں کے دو گروہ ہو گئے، ایک گروہ کا یہ کہنا تھا: ماعز اپنے سب سے برے عمل کے ذریعے ہلاکت کا شکار ہوئے، ان کے گناہ نے انہیں گھیر لیا۔ دوسرے گروہ کا کہنا تھا: کیا ماعز کی توبہ سے افضل کوئی توبہ ہو سکتی ہے؟ وہ نبی کریم صلی اللہ علیہ وسلم کی خدمت میں حاضر ہوئے، انہوں نے اپنا ہاتھ نبی کریم صلی اللہ علیہ وسلم کے دست اقدس میں دیا اور عرض کی: آپ مجھے پتھروں کے ذریعے قتل کروا دیں۔ دو تین دن تک یہی صورت حال رہی، پھر نبی کریم صلی اللہ علیہ وسلم تشریف لائے، لوگ اس وقت بیٹھے ہوئے تھے، نبی کریم صلی اللہ علیہ وسلم نے سلام کیا، اور تشریف فرما ہوئے، پھر آپ نے فرمایا: ”ماعز بن مالک کے لیے دعائے مغفرت کرو، اللہ تعالیٰ ماعز بن مالک کی مغفرت کرے۔“ نبی کریم صلی اللہ علیہ وسلم نے فرمایا: ”اس نے ایسی توبہ کی ہے، اگر وہ ایک امت (اس سے مراد گروہ بھی ہو سکتا ہے) کے درمیان تقسیم کی جائے، تو ان سب کے لیے کافی ہو گی۔“ راوی بیان کرتے ہیں: پھر ازد قبیلے کی شاخ غامد قبیلہ سے تعلق رکھنے والی ایک خاتون نبی کریم صلی اللہ علیہ وسلم کی خدمت میں حاضر ہوئی، اس نے عرض کی: ”یا رسول اللہ! مجھے پاک کر دیجیے۔“ نبی کریم صلی اللہ علیہ وسلم نے فرمایا: ”تمہارا ستیاناس ہو، تم واپس جاؤ، اللہ سے مغفرت طلب کرو، اس کی بارگاہ میں توبہ کرو۔“ اس خاتون نے عرض کی: ”آپ صلی اللہ علیہ وسلم مجھے بھی اسی طرح واپس کرنا چاہتے ہو، جیسے آپ نے ماعز بن مالک کو واپس کیا تھا؟“ نبی کریم صلی اللہ علیہ وسلم نے فرمایا: ”وہ کیوں؟“ تو اس نے بتایا: وہ زنا کے نتیجے میں حاملہ ہو چکی ہے۔ نبی کریم صلی اللہ علیہ وسلم نے دریافت کیا: ”کیا تم شادی شدہ ہو؟“ اس نے عرض کی: جی ہاں۔ نبی کریم صلی اللہ علیہ وسلم نے فرمایا: ”پھر ہم تمہیں اس وقت تک سنگسار نہیں کریں گے، جب تک تم اپنے پیٹ میں موجود (بچے کو) جنم نہیں دیتی۔“ پھر ایک انصاری شخص اس عورت کا سرپرست مقرر ہوا، یہاں تک کہ اس عورت نے بچے کو جنم دیا۔ وہ انصاری نبی کریم صلی اللہ علیہ وسلم کی خدمت میں حاضر ہوا اور بتایا: اس غامدی عورت نے بچے کو جنم دے دیا ہے۔ نبی کریم صلی اللہ علیہ وسلم نے فرمایا: ”ابھی ہم اسے سنگسار نہیں کر سکتے، اور اس کے بچے کو ایسے نہیں چھوڑ سکتے، اسے دودھ پلانے کے لیے کوئی نہ ہو۔“ تو ایک انصاری نے عرض کی: ”اے اللہ کے نبی! اس بچے کی رضاعت میرے ذمے ہے۔“ تو نبی کریم صلی اللہ علیہ وسلم نے اس عورت کو سنگسار کروا دیا۔ یہ حدیث صحیح ہے، امام مسلم نے اسے ابوکریب کے حوالے سے، یحییٰ بن یعلی کے حوالے سے، ان کے والد کے حوالے سے غیلان سے نقل کیا ہے۔

عبدالجبار بن وائل نے اپنے والد کا یہ بیان نقل کیا ہے: نبی کریم صلی اللہ علیہ وسلم کے زمانہ اقدس میں ایک عورت کے ساتھ زبردستی زنا کیا گیا، تو آپ نے اس عورت پر حد جاری نہیں کی، البتہ اس کے ساتھ زیادتی کرنے والے پر حد جاری کی۔ راوی بیان کرتے ہیں: اس میں یہ بات مذکور نہیں ہے کہ نبی کریم صلی اللہ علیہ وسلم نے اس عورت کو مہر دلوایا۔

طاؤس بیان کرتے ہیں: نبی کریم صلی اللہ علیہ وسلم نے ارشاد فرمایا ہے: ”جو شخص مارا جائے (اس کے بعد کے الفاظ اگلی حدیث میں ہیں)۔“

طاؤس، سیدنا ابن عباس رضی اللہ عنہما کا بیان نقل کرتے ہیں: نبی کریم صلی اللہ علیہ وسلم نے ارشاد فرمایا ہے: ”جو شخص غلطی سے مارا جائے، یا (انجانے) تیر سے مارا جائے، وہ قتل خطاء شمار ہو گا، اور اس کی دیت قتل خطاء کی دیت ہو گی، اور جس شخص کو قتل عمد کے طور پر قتل کیا گیا ہو، اس کا قصاص دینا لازم ہو گا، جو شخص اس میں رکاوٹ بننے کی کوشش کرے گا، اس شخص پر اللہ، اس کے فرشتوں اور تمام لوگوں کی لعنت ہو گی۔“

طاؤس، سیدنا ابن عباس رضی اللہ عنہما سے بیان کرتے ہیں: نبی کریم صلی اللہ علیہ وسلم نے ارشاد فرمایا ہے: ”جو شخص غلطی سے مارا جائے، یا پتھر سے مارا جائے، یا عصا یا لاٹھی کے ذریعے مارا جائے، تو اس کی دیت قتل خطاء کی دیت ہو گی، اور جس شخص کو قتل عمد کے طور پر قتل کیا جائے، اس کا قصاص ہو گا، اس شخص اور اس کے قاتل کے درمیان حائل نہیں ہوا جائے گا، جو اس شخص اور اس کے قاتل کے درمیان حائل ہو گا، اس پر اللہ تعالیٰ، اس کے فرشتوں اور تمام انسانوں کی لعنت ہو گی، ایسے شخص کی کوئی فرض یا نفلی عبادت قبول نہیں ہو گی۔“

طاؤس، سیدنا ابوہریرہ رضی اللہ عنہ کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: ”جس شخص کو غلطی سے قتل کر دیا جائے، یا اسے پتھر یا عصا مارا جائے، (اور وہ مر جائے)، تو یہ قتل خطاء ہو گا، اور اس کی دیت قتل خطاء کی دیت ہو گی، لیکن جس شخص کو قتل عمد کے طور پر قتل کیا جائے، اس کا قصاص ہو گا، جو شخص قصاص میں رکاوٹ بنے گا، اس پر اللہ اور اس کے فرشتوں اور تمام انسانوں کی لعنت ہو گی۔“ حسین نامی راوی نے یہ الفاظ زائد نقل کیے ہیں: ”اللہ تعالیٰ اس کی کوئی فرض یا نفلی عبادت قبول نہیں کرے گا۔“

سیدنا ابوہریرہ رضی اللہ عنہ کے حوالے سے اسی کی مانند روایت منقول ہے، راوی نے اس کی سند میں حمزہ کا ذکر نہیں کیا۔ بعض راویوں نے اسے طاؤس کے حوالے سے سیدنا ابن عباس رضی اللہ عنہما سے نقل کیا ہے۔

سیدنا عبداللہ بن عباس رضی اللہ عنہما فرماتے ہیں: نبی کریم صلی اللہ علیہ وسلم نے ارشاد فرمایا ہے: ”قتل عمد کا قصاص ہو گا، البتہ اگر مقتول کا ولی چاہے، تو معاف کر سکتا ہے۔“

سیدنا عبداللہ بن عباس رضی اللہ عنہما فرماتے ہیں: نبی کریم صلی اللہ علیہ وسلم نے ارشاد فرمایا ہے: ”جس شخص کو انجانے میں پتھر، عصا یا لاٹھی مار کر قتل کر دیا جائے، اس کی دیت قتل خطاء کی دیت ہو گی۔“ یہ حماد بن زید کے بیان کی مانند ہے۔

سیدنا عبداللہ بن عباس رضی اللہ عنہما فرماتے ہیں: نبی کریم صلی اللہ علیہ وسلم نے ارشاد فرمایا ہے: ”قتل عمد میں قصاص ہو گا، اور قتل خطاء میں دیت ہو گی، اس میں قصاص نہیں ہو گا، جس شخص کو پتھر یا عصا لاٹھی کے ذریعے غلطی سے قتل کر دیا جائے، اس کی دیت مغلظہ ہو گی، جو مختلف عمر کے اونٹوں (کی شکل میں ہو گی)۔“

سیدنا ابوہریرہ رضی اللہ عنہ، نبی کریم صلی اللہ علیہ وسلم کا یہ فرمان نقل کرتے ہیں: ”جس شخص کو پتھر (راوی کو شک ہے شاید یہ الفاظ ہیں) یا لاٹھی مار کر غلطی سے قتل کر دیا جائے، اس کی دیت قتل خطاء کی دیت ہو گی، اور جس شخص کو قتل عمد کے طور پر قتل کیا جائے، اس کا قصاص ہو گا، جو شخص قصاص میں رکاوٹ بنے گا، اس پر اللہ تعالیٰ کی لعنت ہو گی۔“

سیدنا عبداللہ بن عباس رضی اللہ عنہما، مرفوع حدیث کے طور پر نقل کرتے ہیں: (نبی کریم صلی اللہ علیہ وسلم نے ارشاد فرمایا:) ”جو شخص غلطی سے مارا جائے، یا اسے پتھر یا لاٹھی سے مار کر قتل کر دیا جائے، تو اس کی دیت قتل خطاء کی دیت ہو گی، اور جس شخص کو عمداً قتل کیا جائے، اس کا قصاص لیا جائے گا، جو شخص اس قصاص میں رکاوٹ بنے گا، اس پر اللہ تعالیٰ، اس کے فرشتوں اور تمام لوگوں کی لعنت ہو گی، ایسے شخص کی کوئی فرض یا نفل عبادت قبول نہیں کی جائے گی۔“

طاؤس بیان کرتے ہیں: لڑائی کے دوران جس شخص کو عصا، لاٹھی، یا پتھر مار کر قتل کر دیا جائے، اس کی دیت ادا کی جائے گی، اس کے بدلے میں قتل نہیں کیا جائے گا، کیونکہ یہ پتہ نہیں ہے کہ اس کا قاتل کون ہے؟ میں یہ کہتا ہوں: کیا تم نے ہذیل قبیلے سے تعلق رکھنے والی دو خواتین کے مقدمے میں نبی کریم صلی اللہ علیہ وسلم کا فیصلہ ملاحظہ نہیں کیا، ان دو میں سے ایک خاتون نے دوسری کو لاٹھی مار کر قتل کر دیا تھا، تو نبی کریم صلی اللہ علیہ وسلم نے اس مقتول عورت کے بدلے میں قتل کرنے والی عورت کو قتل نہیں کروایا تھا، بلکہ آپ نے مقتول عورت اور اس کے پیٹ میں موجود بچے کی دیت دلوائی تھی۔ یہ حدیث طاؤس کے صاحبزادے نے اپنے والد کے حوالے سے نقل کی ہے۔

طاؤس کے صاحبزادے اپنے والد کے بارے میں یہ بات نقل کرتے ہیں: میرے والد کے پاس ایک تحریر تھی، جس میں مختلف اقسام کی دیت کے احکام تھے، جو وحی کے ذریعے نبی کریم صلی اللہ علیہ وسلم کو بتائے گئے تھے، نبی کریم صلی اللہ علیہ وسلم نے دیت اور صدقے کے بارے میں جو بھی فیصلے دیے، وہ سب وحی کے مطابق تھے، اس کتاب میں یہ تحریر تھا، جو نبی کریم صلی اللہ علیہ وسلم کے بارے میں تھا: (آپ صلی اللہ علیہ وسلم نے یہ فرمایا ہے:) ”غلطی سے قتل کیے جانے کی دیت قتل خطاء کی دیت ہو گی، جیسے پتھر، عصا، یا لاٹھی کے ذریعے (کوئی قتل ہو جائے)، جبکہ قاتل نے ہتھیار نہ اٹھایا ہو۔“

طاؤس کے صاحبزادے اپنے والد کا یہ بیان نقل کرتے ہیں: جس شخص کو غلطی سے پتھر یا لاٹھی کے ذریعے قتل کر دیا جائے، اس کی دیت مغلظہ ہو گی۔

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے فرمایا ہے: ”شبہ عمد کی دیت بھی قتل عمد کی دیت کی طرح ہے، البتہ شبہ عمد (کی صورت میں) قاتل کو قتل نہیں کیا جائے گا۔“

سیدنا ابوشریح کعبی رضی اللہ عنہ بیان کرتے ہیں: (نبی کریم صلی اللہ علیہ وسلم فرماتے ہیں:) ”نبی کریم صلی اللہ علیہ وسلم نے مکہ کو حرم قرار دیا ہے، اللہ اور آخرت کے دن پر ایمان رکھنے والا کوئی بھی شخص اس میں خون نہ بہائے اور یہاں کے درخت نہ کاٹے، اگر کوئی شخص عذر پیش کرتے ہوئے یہ کہے کہ اللہ کے رسول کے لیے اسے حلال قرار دیا گیا تھا، تو اللہ نے اسے میرے لیے تھوڑے سے وقت کے لیے حلال قرار دیا تھا، اسے دوسرے لوگوں کے لیے حلال قرار نہیں دیا، میرے لیے بھی یہ تھوڑی سی دیر کے لیے حلال قرار دیا گیا، پھر قیامت قائم ہونے تک یہ حرم رہے گا، اے خزاعہ قبیلے کے لوگو! تم نے ہذیل قبیلے کے ایک شخص کو قتل کر دیا تھا، میں اس کی دیت دوں گا، میرے اس بیان کے بعد جن لوگوں کا کوئی شخص قتل ہو جائے، انہیں دو میں سے ایک بات کا اختیار ہو گا، یا تو وہ دیت وصول کر لیں (یا قصاص کے طور پر قاتل کو) قتل کر دیں۔“

یہی روایت ایک اور سند کے ہمراہ منقول ہے، تاہم اس میں یہ الفاظ ہیں: ”اے خزاعہ قبیلے کے لوگو! تم لوگوں نے ہذیل قبیلے کے ایک شخص کو قتل کر دیا تھا، میں اس کی دیت ادا کروں گا، اس کے بعد جو شخص قتل ہو گا، تو مقتول کے پسماندگان کو دو میں سے ایک بات کا اختیار ہو گا، اگر وہ پسند کریں، تو (قصاص کے طور پر قاتل کو) قتل کر دیں گے، اور اگر وہ پسند کریں، تو دیت وصول کر لیں۔“

سیدنا ابوشریح خزاعی رضی اللہ عنہ بیان کرتے ہیں: میں نے نبی کریم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص قتل ہو جائے یا اسے خبل لاحق ہو، (راوی کہتے ہیں) خبل سے مراد عرج (یعنی لنگڑا ہو جانا) ہے، تو اسے تین میں سے ایک بات کا اختیار ہو گا، اگر وہ کوئی چوتھی صورت چاہے، تو اس کے ہاتھ پکڑ لو (وہ تین صورتیں یہ ہیں:) وہ قصاص لے، یا معاف کر دے، یا دیت وصول کر لے، اگر وہ ان میں سے کوئی ایک صورت اختیار کر لے، تو پھر اس کے بعد زیادتی کرے، تو وہ جہنم میں جائے گا، جہاں وہ ہمیشہ ہمیشہ رہے گا۔“

سیدنا ابوشریح خزاعی رضی اللہ عنہ بیان کرتے ہیں: نبی کریم صلی اللہ علیہ وسلم نے ارشاد فرمایا: ”اللہ تعالیٰ کے نزدیک اس کی مخلوق میں سب سے زیادہ ناپسندیدہ وہ شخص ہے جو کسی کو ناحق قتل کر دے، اور وہ شخص ہے جو زمانہ جاہلیت کے خون (کے بدلے) کا طلب گار ہے، اور وہ شخص ہے جو اپنی آنکھوں کو نیند میں وہ چیز دکھائے جو انہوں نے نہیں دیکھی (یعنی جھوٹا خواب بیان کرے)۔“

سیدنا ابوہریرہ رضی اللہ عنہ بیان کرتے ہیں: جب نبی کریم صلی اللہ علیہ وسلم نے مکہ فتح کیا، تو آپ لوگوں کے درمیان خطبہ دینے کے لیے کھڑے ہوئے، آپ نے اللہ کی حمد و ثناء بیان کرنے کے بعد ارشاد فرمایا: ”بیشک اللہ تعالیٰ نے مکہ میں ہاتھیوں کو داخل نہیں ہونے دیا، لیکن اس نے اپنے رسول اور اہل ایمان کو اس پر تسلط عطا کیا، یہ مجھ سے پہلے کسی کے لیے بھی حلال نہیں تھا، اور میرے لیے بھی دن کے کسی ایک مخصوص حصے میں حلال قرار دیا گیا، اور میرے بعد یہ کسی کے لیے حلال نہیں ہو گا، یہاں کے شکار کو بھگایا نہیں جائے گا، یہاں کے درخت کو کاٹا نہیں جائے گا، یہاں کی گری ہوئی چیز کو اٹھایا نہیں جائے گا، البتہ اعلان کرنے کے لیے اٹھایا جا سکتا ہے، جس شخص کا کوئی عزیز قتل ہو جائے، اسے دو میں سے ایک بات کا اختیار ہو گا، یا تو اسے دیت ادا کر دی جائے، یا (قصاص کے طور پر قاتل کو) قتل کر دیا جائے۔“ تو سیدنا عباس رضی اللہ عنہ کھڑے ہوئے، انہوں نے عرض کی: ”یا رسول اللہ! اذخر (نامی گھاس کاٹنے کی اجازت دیجیے)، کیونکہ ہم اسے اپنے گھروں اور قبروں میں استعمال کرتے ہیں۔“ تو نبی کریم صلی اللہ علیہ وسلم نے ارشاد فرمایا: ”اذخر (کاٹنے کی اجازت ہے)۔“ ابوشاہ نامی ایک صاحب جو یمن سے تعلق رکھتے تھے، انہوں نے عرض کی: ”یا رسول اللہ! یہ مجھے لکھوا دیں۔“ تو نبی کریم صلی اللہ علیہ وسلم نے فرمایا: ”ابوشاہ کو لکھ کر دے دو۔“ ولید نامی راوی بیان کرتے ہیں: میں نے امام اوزاعی سے دریافت کیا: (سیدنا ابوشاہ کے) اس جملے سے مراد کیا ہے؟ یہ مجھے لکھوا دیں! تو انہوں نے فرمایا: یعنی وہ خطبہ جو انہوں نے نبی کریم صلی اللہ علیہ وسلم کی زبانی سنا تھا۔

یہی روایت ایک اور سند کے ہمراہ امام اوزاعی سے منقول ہے۔

سیدنا ابوہریرہ رضی اللہ عنہ بیان کرتے ہیں: خزاعہ قبیلے کے لوگوں نے فتح مکہ کے سال اپنے ایک مقتول کے بدلے میں بنو لیث کے ایک فرد کو قتل کر دیا، نبی کریم صلی اللہ علیہ وسلم کو اس بارے میں بتایا گیا، تو آپ اپنی سواری پر سوار ہوئے اور آپ صلی اللہ علیہ وسلم نے خطبہ دیتے ہوئے ارشاد فرمایا: ”اللہ تعالیٰ نے ہاتھیوں کو مکہ میں داخل نہیں ہونے دیا، لیکن اس نے اپنے رسول اور اہل ایمان کو اس پر تسلط عطا کیا، یاد رکھنا! یہ مجھ سے پہلے کسی کے لیے حلال نہیں تھا، اور میرے بعد کسی کے لیے حلال نہیں ہو گا، یاد رکھنا! یہ میرے لیے بھی دن کے ایک مخصوص حصے تک حلال ہوا، اب اس وقت یہ حرم ہے، یہاں کے کانٹے کو توڑا نہیں جا سکتا، یہاں کے درخت کو کاٹا نہیں جا سکتا، یہاں کی گری ہوئی چیز کو اٹھایا نہیں جا سکتا، البتہ اعلان کرنے کے لیے اٹھایا جا سکتا ہے، اگر کسی شخص کا کوئی عزیز قتل ہو جائے، تو اسے دو باتوں میں سے ایک کا اختیار ہو گا، یا تو (قاتل کو قصاص میں) قتل کر دیا جائے، یا مقتول کے لواحقین کو دیت ادا کر دی جائے۔“ (راوی بیان کرتے ہیں:) یمن سے تعلق رکھنے والے ایک صاحب آئے اور انہوں نے عرض کی: ”یا رسول اللہ! یہ مجھے لکھوا دیں۔“ تو نبی نے فرمایا: ”ابوفلان کو لکھ کر دے دو۔“ قریش سے تعلق رکھنے والے ایک شخص نے عرض کی: ”یا رسول اللہ! آپ اذخر (کاٹنے کی اجازت دیں)، کیونکہ ہم اسے اپنے گھروں اور قبروں میں استعمال کرتے ہیں۔“ نبی کریم صلی اللہ علیہ وسلم نے ارشاد فرمایا: ”اذخر (کاٹنے کی اجازت ہے)۔“

مالک اشتر بیان کرتے ہیں: میں سیدنا علی رضی اللہ عنہ کی خدمت میں حاضر ہوا، میں نے کہا: ”اے امیر المؤمنین! جب ہم آپ کے پاس سے اٹھ کر گئے، تو ہم نے کچھ باتیں سنی ہیں، کیا نبی کریم صلی اللہ علیہ وسلم نے قرآن کے علاوہ کوئی اور چیز بطور خاص آپ کو دی؟“ تو سیدنا علی رضی اللہ عنہ نے فرمایا: ”نہیں، صرف یہ صحیفہ ہے جو میری تلوار کے دستے میں ہے۔“ پھر سیدنا علی رضی اللہ عنہ نے کنیز کو بلایا، تو وہ اس صحیفے کو لے کر آئی (اس میں یہ تحریر تھا کہ نبی کریم صلی اللہ علیہ وسلم نے ارشاد فرمایا ہے): ”بیشک سیدنا ابراہیم علیہ السلام نے مکہ کو حرم قرار دیا تھا، اور میں مدینہ کو حرم قرار دیتا ہوں، دونوں طرف کی سنگلاخ زمین کے درمیان موجود (مدینہ منورہ) حرم ہے، یہاں کے کانٹے کو توڑا نہیں جا سکتا، یہاں کے شکار کو بھگایا نہیں جا سکتا، جو شخص یہاں کوئی بدعت ایجاد کرے یا کسی بدعتی کو پناہ دے، تو اس پر اللہ، اس کے فرشتوں اور تمام لوگوں کی لعنت ہو گی، دوسروں کے مقابلے میں تمام اہل ایمان ایک ہاتھ کی مانند ہیں، ان کے خون یکساں اہمیت کے حامل ہیں، ان کے کسی عام فرد کی دی ہوئی پناہ کو تسلیم کیا جائے گا، اور کسی مسلمان کو کسی کافر کے بدلے میں قتل نہیں کیا جا سکتا۔“

ابوحجیفہ نے سیدنا علی رضی اللہ عنہ کے حوالے سے اسی کی مانند نقل کیا ہے، اس کے الفاظ کچھ مختلف ہیں، تاہم مفہوم ایک ہی ہے۔

موسیٰ بن علی بیان کرتے ہیں: میں نے اپنے والد کو سنا ہے، سیدنا عمر رضی اللہ عنہ کے عہد خلافت میں حج کے موقع پر ایک شخص بلند آواز میں (یہ اشعار پڑھ رہا تھا): ”اے لوگو! ایک غلط صورت حال میرے سامنے آئی ہے، کیا ایک اندھا شخص ایک صحیح دیکھنے والے شخص کی دیت ادا کرے گا، جب کہ وہ دونوں ایک ساتھ گرے تھے اور دونوں زخمی ہوئے تھے۔“ اس کی صورت یوں ہوئی کہ ایک بینا شخص اس اندھے کو ساتھ لے کر جا رہا تھا، وہ دونوں ایک کنویں میں گر گئے، تو وہ نابینا شخص اس بینا شخص کے اوپر گرا، جس کے نتیجے میں وہ بینا شخص فوت ہو گیا، تو سیدنا عمر رضی اللہ عنہ نے یہ فیصلہ دیا: وہ نابینا اس بینا شخص کی دیت ادا کرے گا۔

سیدنا سہل بن سعد رضی اللہ عنہ بیان کرتے ہیں: ایک شخص نبی کریم صلی اللہ علیہ وسلم کی خدمت میں حاضر ہوا، اس نے عرض کی: ”یا رسول اللہ! اس نے فلاں عورت کے ساتھ زنا کا ارتکاب کیا ہے۔“ اس نے اس خاتون کا نام بھی لیا، نبی کریم صلی اللہ علیہ وسلم نے اس خاتون کے پاس آدمی بھیجا، جس نے اس سے (اس الزام کے) بارے میں دریافت کیا، اس خاتون نے انکار کر دیا، تو نبی کریم صلی اللہ علیہ وسلم نے اس مرد کو سنگسار کروا دیا اور اس خاتون کو ترک کر دیا (یعنی اسے سزا نہیں دی)۔

سیدنا سہل بن سعد رضی اللہ عنہ بیان کرتے ہیں: نبی کریم صلی اللہ علیہ وسلم کے زمانہ اقدس میں ایک لڑکی زنا کے نتیجے میں حاملہ ہو گئی، اس سے پوچھا گیا: ”تمہیں کس نے حاملہ کیا ہے؟“ اس نے بتایا: مجھے المقعد (نامی صاحب) نے حاملہ کیا ہے۔ ان صاحب سے اس بارے میں دریافت کیا گیا، تو انہوں نے اپنے جرم کا اعتراف کیا، نبی کریم صلی اللہ علیہ وسلم نے فرمایا: ”یہ کوڑے برداشت نہیں کر سکے گا۔“ تو نبی کریم صلی اللہ علیہ وسلم کے حکم کے تحت 100 ٹہنیاں لے کر ان کے ذریعے اس شخص کو ایک ہی ضرب لگائی گئی۔ راوی نے اسی طرح بیان کیا ہے، لیکن درست یہ ہے کہ یہ ابوحازم کے حوالے سے، سیدنا ابوامامہ بن سہل رضی اللہ عنہ کے حوالے سے نبی کریم صلی اللہ علیہ وسلم سے منقول ہے۔

سیدنا ابوامامہ بن سہل رضی اللہ عنہ، سیدنا ابوسعید خدری رضی اللہ عنہ کے حوالے سے یہ بات نقل کرتے ہیں: مقعد نامی صاحب، سیدنا سعد رضی اللہ عنہ کے گھر کے پاس رہتے تھے، انہوں نے ایک خاتون کے ساتھ زنا کیا، جب ان سے اس بارے میں دریافت کیا گیا، تو انہوں نے اپنے جرم کا اعتراف کر لیا، تو نبی کریم صلی اللہ علیہ وسلم کے حکم کے تحت، انہیں کھجور کی شاخیں ماری گئیں۔ امام دار قطنی فرماتے ہیں: (اس روایت میں لفظ اکثال استعمال ہوا ہے)، لیکن درست لفظ اثکال (یعنی کھجور کی شاخیں) ہے۔

سیدنا ابوامامہ رضی اللہ عنہ، سیدنا ابوسعید خدری رضی اللہ عنہ کا یہ بیان نقل کرتے ہیں: مقعد نامی صاحب کا پیٹ کچھ بڑھا ہوا تھا، وہ ام سعد کے گھر کے پاس رہتے تھے، ایک لڑکی حاملہ ہو گئی، اس سے اس بارے میں دریافت کیا گیا، تو اس نے بتایا وہ ان (مقعد نامی صاحب) سے حاملہ ہوئی ہے، ان صاحب نے بھی اعتراف کر لیا، تو نبی کریم صلی اللہ علیہ وسلم کے حکم کے تحت انہیں کھجوروں کی شاخوں کے ذریعے سزا دی گئی۔

سیدنا ابوامامہ بن سہل رضی اللہ عنہ اپنے والد کا یہ بیان نقل کرتے ہیں: بنو ساعدہ کی ایک کنیز زنا کے نتیجے میں حاملہ ہو گئی، جب اس نے بچے کو جنم دے دیا، تو اس سے پوچھا گیا: ”تمہارا بچہ کس کی اولاد ہے؟“ اس نے جواب دیا: فلاں کی۔ وہ (ملزم) ایک نحیف اور کمزور شخص تھا، کمزوری کی وجہ سے اس کی جلد سانپ کی طرح تھی، اس سے اس بارے میں دریافت کیا گیا، تو وہ بولا: ”اس نے سچ کہا ہے، وہ بچہ میری اولاد ہے۔“ یہ معاملہ نبی کریم صلی اللہ علیہ وسلم کی خدمت میں پیش کیا گیا اور نبی کریم صلی اللہ علیہ وسلم کو اس کی حالت کے بارے میں بتایا گیا کہ اسے مارا نہیں جا سکتا، تو نبی کریم صلی اللہ علیہ وسلم نے ارشاد فرمایا: ”اس کے لیے شاخیں لو، جس میں سو ٹہنیاں ہوں اور وہ ایک مرتبہ اسے مار دو۔“ تو لوگوں نے ایسا ہی کیا۔

سیدنا عمران بن حصین رضی اللہ عنہ بیان کرتے ہیں: ایک خاتون نبی کریم صلی اللہ علیہ وسلم کی خدمت میں حاضر ہوئی جو زنا کے نتیجے میں حاملہ ہو گئی تھی، اس نے عرض کی: ”یا رسول اللہ! میں نے قابل حد جرم کا ارتکاب کیا ہے، آپ مجھ پر حد قائم کریں۔“ نبی کریم صلی اللہ علیہ وسلم نے اس کے سرپرست کو بلایا اور ہدایت کی: ”تم اس کا خیال رکھو، جب یہ بچے کو جنم دے، تو اسے میرے پاس لے آنا۔“ اس شخص نے ایسا ہی کیا، نبی کریم صلی اللہ علیہ وسلم کے حکم کے تحت اس کے جسم پر لباس کو اچھی طرح باندھ دیا گیا، پھر اسے سنگسار کر دیا گیا، پھر نبی کریم صلی اللہ علیہ وسلم نے اس کی نماز جنازہ ادا کی، تو آپ کی خدمت میں عرض کی گئی: ”پہلے آپ نے اسے سنگسار کر دیا اور پھر اس کی نماز جنازہ بھی ادا کر لی ہے؟“ نبی کریم صلی اللہ علیہ وسلم نے فرمایا: ”اس ذات کی قسم جس کے دست قدرت میں میری جان ہے، اس عورت نے ایسی توبہ کی ہے کہ اگر 70 گناہ گار توبہ کرتے، تو ان کے لیے کافی ہوتی، کیا تمہیں اس سے افضل کوئی شخص مل سکتا ہے؟ جو اپنے آپ کو (اللہ کے حکم کی فرمانبرداری میں) قربان کر دے۔“

یہی روایت ایک اور سند کے ہمراہ بھی منقول ہے، تاہم اس میں یہ الفاظ ہیں: سیدنا عمر رضی اللہ عنہ نے آپ کی خدمت میں عرض کی: ”آپ نے اسے سنگسار کر دیا، (اور اب نماز جنازہ بھی ادا کر لی)؟“ تو نبی کریم صلی اللہ علیہ وسلم نے فرمایا: ”اگر مدینہ کے تمام افراد یہ توبہ کرتے، تو یہ ان سب کے لیے کافی ہوتی، کیا تمہیں اس سے افضل کوئی شخص مل سکتا ہے، جو اللہ کے لیے اپنی جان دے دے؟“

سیدنا عمران بن حصین رضی اللہ عنہ بیان کرتے ہیں: جہینہ قبیلے سے تعلق رکھنے والی ایک خاتون، نبی کریم صلی اللہ علیہ وسلم کی خدمت میں حاضر ہوئی (اس کے بعد انہوں نے حسب سابق حدیث نقل کی ہے)۔

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم کی خدمت میں ایک چور کو لایا گیا، جس نے چادر چوری کی تھی، لوگوں نے عرض کی: ”یا رسول اللہ! اس نے چوری کی ہے۔“ نبی کریم صلی اللہ علیہ وسلم نے فرمایا: ”کیا واقعی اس نے چوری کی ہے؟“ چور نے عرض کی: ”یا رسول اللہ! جی ہاں۔“ نبی کریم صلی اللہ علیہ وسلم نے فرمایا: ”اسے لے جاؤ اور اس کا ہاتھ کاٹ دو، پھر اسے داغ لگاؤ (تاکہ خون بہنا بند ہو جائے)، پھر اسے میرے پاس لاؤ۔“ اس چور کا ہاتھ کاٹ دیا گیا اور اسے نبی کریم صلی اللہ علیہ وسلم کے پاس لایا گیا، تو آپ نے ارشاد فرمایا: ”اللہ کی بارگاہ میں توبہ کرو۔“ وہ بولا: ”میں اللہ کی بارگاہ میں توبہ کرتا ہوں۔“ نبی کریم صلی اللہ علیہ وسلم نے فرمایا: ”اللہ نے تمہاری توبہ قبول کی۔“

محمد بن عبدالرحمن بیان کرتے ہیں: نبی کریم صلی اللہ علیہ وسلم کی خدمت میں ایک چور کو لایا گیا، جس نے چادر چوری کی تھی، نبی کریم صلی اللہ علیہ وسلم نے فرمایا: ”کیا تم نے واقعی چوری کی ہے؟“ اس نے عرض کی: ”جی ہاں۔“ نبی کریم صلی اللہ علیہ وسلم نے فرمایا: ”اس کا ہاتھ کاٹ دو، پھر اسے داغ لگاؤ۔“ لوگوں نے اس کا ہاتھ کاٹ دیا، پھر اسے داغ لگایا، نبی کریم صلی اللہ علیہ وسلم نے اس سے فرمایا: ”تم توبہ کرو۔“ وہ بولا: ”میں اللہ کی بارگاہ میں توبہ کرتا ہوں۔“ نبی کریم صلی اللہ علیہ وسلم نے دعا کی: ”اے اللہ! اس کی توبہ قبول کر لے۔“

محمد بن عبدالرحمن نے سیدنا ابوہریرہ رضی اللہ عنہ کے حوالے سے نبی کریم صلی اللہ علیہ وسلم سے اسی کی مانند روایت نقل کی ہے۔