سنن الدارقطني

سیدنا مغیرہ بن شعبہ رضی اللہ عنہ بیان کرتے ہیں: ہذیل قبیلے سے تعلق رکھنے والے ایک شخص کی دو بیویاں تھیں، ان میں سے ایک نے دوسری کو پتھر مار کر یا شاید خیمہ کی لکڑی مار کر اس کے پیٹ میں موجود بچے کو ضائع کر دیا، یہ مقدمہ نبی کریم صلی اللہ علیہ وسلم کی خدمت میں پیش کیا گیا، تو آپ نے اس میں تاوان کی ادائیگی کا حکم دیا، تو اس (قاتل عورت) کے سرپرست نے کہا: ”کیا ہم اس کا تاوان ادا کریں گے؟ جو چیخ مار کر رویا نہیں (یعنی پیدا نہیں ہوا)، جس نے کچھ پیا نہیں، کچھ کھایا نہیں؟“ یا اس کی مانند الفاظ نقل کیے، تو نبی کریم صلی اللہ علیہ وسلم نے ارشاد فرمایا: ”کیا تم دیہاتیوں کی طرح مقفع مسجع گفتگو کر رہے ہو؟“ راوی کہتے ہیں: نبی کریم صلی اللہ علیہ وسلم نے اس عورت کے رشتہ داروں پر تاوان کی ادائیگی کو لازم قرار دیا۔

سیدنا ابن عباس رضی اللہ عنہما بیان کرتے ہیں: (مدینہ منورہ میں) بنو قریظہ اور بنو نضیر دو قبیلے تھے۔ بنو نضیر، بنو قریظہ سے زیادہ معزز سمجھے جاتے تھے۔ جب بنو نضیر کا کوئی شخص بنو قریظہ کے کسی شخص کو قتل کر دیتا، تو وہ کھجور کے ایک سو وسق دیت کے طور پر ادا کرتے تھے۔ جب بنو قریظہ کا کوئی شخص بنو نضیر کے کسی شخص کو قتل کر دیتا، تو دیت وصول نہ کی جاتی بلکہ قصاص لیا جاتا تھا۔ جب نبی کریم صلی اللہ علیہ وسلم کو مبعوث کیا گیا، یعنی آپ صلی اللہ علیہ وسلم مدینہ منورہ تشریف لائے، تو بنو نضیر کے ایک شخص نے بنو قریظہ کے ایک شخص کو قتل کر دیا۔ بنو قریظہ نے کہا: اسے ہمارے حوالے کر دو، تاکہ ہم اسے بھی (قصاص کے طور پر) قتل کر دیں۔ تو انہوں نے کہا: نبی کریم صلی اللہ علیہ وسلم ہمارے اور تمہارے درمیان ہیں، فیصلہ کریں گے۔ وہ لوگ نبی کریم صلی اللہ علیہ وسلم کی خدمت میں حاضر ہوئے، تو اس بارے میں یہ آیت نازل ہوئی: ”جب تم نے فیصلہ کرنا ہو تو انصاف کے ساتھ ان کے درمیان فیصلہ کرو، جان کا بدلہ جان ہے۔“ کیا وہ لوگ زمانہ جاہلیت کے رواج کے مطابق فیصلہ چاہتے ہیں؟

سیدنا ابن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے مکاتب کے بارے میں یہ فیصلہ دیا ہے: ”اس نے کتابت کے معاہدے میں سے جس شرح کے ساتھ ادائیگی کی ہو گی، اسی حساب سے اس کی دیت آزاد شخص کی دیت ہو گی اور جتنی ادائیگی اس کے ذمے باقی ہو گی، اسی حساب سے اس کی دیت غلام کی دیت جتنی ہو گی۔“

سیدنا ابن عباس رضی اللہ عنہما نبی کریم صلی اللہ علیہ وسلم کا یہ فرمان نقل کرتے ہیں: ”مکاتب شخص کا جتنا حصہ آزاد ہو گا، اس اعتبار سے اس کی دیت آزاد شخص کی دیت ہو گی، اور جتنا حصہ غلام ہو گا، اس اعتبار سے اس کی دیت غلام کی دیت ہو گی۔“

سیدنا ابن عباس رضی اللہ عنہما فرماتے ہیں: بنی اسرائیل میں قصاص کا حکم تھا، ان میں دیت کا حکم نہیں تھا۔ تو اللہ نے اس امت سے یہ فرمایا: ”مقتولین کے بارے میں تم پر قصاص کا حکم مقرر کیا گیا ہے، آزاد کے بدلے میں آزاد کو، غلام کے بدلے میں غلام کو، عورت کے بدلے میں عورت کو قتل کر دیا جائے گا، اور جس شخص کو اس کے بھائی کی طرف سے معاف کر دیا جائے۔“ یہاں معاف کرنے سے مراد یہ ہے کہ دوسرا شخص قتل عمد کے مقدمے میں دیت قبول کرنے پر تیار ہو جائے۔ ارشاد باری تعالیٰ ہے: ”یہ تمہارے پروردگار کی طرف سے تخفیف ہے۔“ یعنی یہ اس حکم کے مقابلے میں تخفیف ہے جو تم سے پہلے لوگوں پر عائد کیا گیا تھا۔ تو اللہ تعالیٰ نے تمہیں اس کے حوالے سے تخفیف عطا کی ہے۔ تمہارے پروردگار کی طرف سے تمہیں یہ تخفیف ملی ہے۔ تم قتل عمد کے مقدمے میں دیت لے لو۔ (اس نے فرمایا) تو تم مناسب طریقے سے پیروی کرو، یعنی مناسب طریقے سے اس کے پیچھے جاؤ اور احسان کے ساتھ اسے ادا کرو۔

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے ارشاد فرمایا ہے: ”جب کوئی شخص کسی سے اجازت لیے بغیر اس کے گھر میں جھانک کر دیکھے اور وہ (گھر کا مالک) اس (جھانکنے والے) شخص کی آنکھ میں کوئی چیز مار کر اسے پھوڑ دے، تو اس کی کوئی دیت یا کوئی قصاص نہیں ہو گا۔“

سیدنا علی رضی اللہ عنہ فرماتے ہیں: ”دس درہم (قیمت والی چیز کی چوری) پر ہاتھ کاٹا جائے گا اور دس درہم سے کم مہر نہیں ہو گا۔“

معاویہ بن قرعہ اپنے والد کا یہ بیان نقل کرتے ہیں: نبی کریم صلی اللہ علیہ وسلم نے ایک شخص کو ایسے شخص کی طرف بھیجا، جس نے اپنے باپ کی بیوی کے ساتھ شادی کر لی تھی، تاکہ اس کی گردن اڑا دے۔

سیدنا علی رضی اللہ عنہ فرماتے ہیں: ”مرتد ہونے والی عورت کو مہلت دی جائے گی اور اسے قتل نہیں کیا جائے گا۔“ خلاس نامی راوی نے سیدنا علی رضی اللہ عنہ کے حوالے سے جو روایات نقل کی ہیں، انہیں دلیل کے طور پر پیش نہیں کیا جا سکتا، کیونکہ وہ راوی ضعیف ہے۔

سیدنا عبداللہ بن عباس رضی اللہ عنہما مرتد ہونے والی عورت کے بارے میں فرماتے ہیں: ”اسے زندہ رکھا جائے گا۔“

ابن ابی خیثمہ بیان کرتے ہیں: یحییٰ بن معین فرماتے ہیں: سفیان ثوری ایک حدیث کی وجہ سے امام ابوحنیفہ پر اعتراض کیا کرتے تھے، جسے امام ابوحنیفہ نے عاصم کے حوالے سے ابورزین سے نقل کیا ہے اور اسے امام ابوحنیفہ کے علاوہ اور کسی نے بھی نقل نہیں کیا۔

سیدنا عبداللہ بن عباس رضی اللہ عنہما مرتد ہونے والی عورت کے بارے میں فرماتے ہیں: ”اسے قید کیا جائے گا اور قتل نہیں کیا جائے گا۔“

سیدنا عبداللہ بن عباس رضی اللہ عنہما فرماتے ہیں: ”جب خواتین مرتد ہو جائیں، تو انہیں قتل نہیں کیا جائے گا۔“

سیدنا عبداللہ بن عباس رضی اللہ عنہما مرتد ہونے والی عورت کے بارے میں فرماتے ہیں کہ: ”اسے زندہ رکھا جائے گا۔“ ابوعاصم فرماتے ہیں: امام ابوحنیفہ نے عاصم کے حوالے سے اس روایت کو نقل کیا ہے، لیکن میں نے اسے نوٹ نہیں کیا، میں نے کہا: یہ روایت سفیان کے حوالے سے ہمیں سنائی جا چکی ہے، وہی ہمارے لیے کافی ہے۔ ابوعاصم فرماتے ہیں: ہمارا یہ خیال ہے سفیان ثوری نے امام ابوحنیفہ سے اس کے مقتول ہونے میں تدلیس کی ہے، اس لیے میں نے ان دونوں کے حوالے سے اسے نوٹ کر لیا ہے۔

سیدنا زید بن ثابت رضی اللہ عنہ فرماتے ہیں: ”دامیہ، میں ایک اونٹ کی ادائیگی لازم ہو گی، باضعہ، میں دو اونٹوں کی ادائیگی لازم ہو گی، متلاحمہ، میں تین اونٹوں کی ادائیگی لازم ہو گی، سمحاق، میں چار اونٹوں کی ادائیگی لازم ہو گی، موضحہ، میں پانچ اونٹوں کی ادائیگی لازم ہو گی، ہاشمہ، میں دس اونٹوں کی ادائیگی لازم ہو گی، منقلہ، میں پندرہ اونٹوں کی ادائیگی لازم ہو گی، مامومہ، میں (جان کی دیت کے) تہائی حصے کی ادائیگی لازم ہو گی۔ جب کسی شخص کو مارنے کے نتیجے میں اس کی عقل رخصت ہو جائے، تو اس میں مکمل دیت کی ادائیگی لازم ہو گی، جب کسی شخص کو مارنے کے نتیجے میں اس کی یہ حالت ہو کہ وہ ناک سے آواز نکال کر یوں بولتا ہو کہ اس کی بات کی سمجھ نہ آتی ہو، تو اس میں مکمل دیت کی ادائیگی لازم ہو گی۔ اگر (اس ضرب کے نتیجے میں) وہ کھانس کر (یا ہچکی لے کر) یوں بولتا ہو کہ اس کی بات سمجھ نہ آتی ہو، تو اس صورت میں مکمل دیت کی ادائیگی لازم ہو گی۔ آنکھ کا پپوٹا زخمی کرنے کی صورت میں ایک چوتھائی دیت کی ادائیگی لازم ہو گی۔ پستان کا سرا زخمی کرنے کی صورت میں ایک چوتھائی دیت کی ادائیگی لازم ہو گی۔“

عبدالرحمن بن حرملہ بیان کرتے ہیں: انہوں نے جذام قبیلے کے ایک فرد کو یہ بیان کرتے ہوئے سنا، اس نے اپنے قبیلے کے ایک فرد عدی کے حوالے سے یہ بات نقل کی: سیدنا عدی رضی اللہ عنہ نے اپنی بیوی کو پتھر مارا، جس کے نتیجے میں وہ عورت فوت ہو گئی، سیدنا عدی رضی اللہ عنہ نبی کریم صلی اللہ علیہ وسلم کے پیچھے تبوک گئے اور آپ صلی اللہ علیہ وسلم کو اس بارے میں بتایا، تو نبی کریم صلی اللہ علیہ وسلم نے ان سے فرمایا: ”تم اس عورت کی دیت ادا کرو گے اور تم اس کے وارث نہیں بنو گے۔“

عروہ بیان کرتے ہیں: جب مروان بن حکم مدینہ منورہ کا گورنر تھا، اس کے سامنے ایک ایسے شخص کو لایا گیا، جو بچے کو اٹھا کر لے جاتا تھا اور کسی دوسری جگہ پر انہیں فروخت کر دیتا تھا، اس شخص کے بارے میں مروان نے لوگوں سے مشورہ کیا، تو عروہ بن زبیر نے سیدہ عائشہ رضی اللہ عنہا کے حوالے سے یہ بات بتائی: نبی کریم صلی اللہ علیہ وسلم کی خدمت میں ایک ایسے شخص کو لایا گیا، جو بچے کو اٹھا کر لے جاتا تھا اور انہیں دوسری جگہ فروخت کر دیتا تھا، تو نبی کریم صلی اللہ علیہ وسلم کے حکم کے تحت اس کا ہاتھ کاٹا گیا۔ بچے چوری کرنے والے کے بارے میں مروان نے بھی یہی حکم دیا اور اس شخص کا ہاتھ بھی کاٹ دیا گیا، عبداللہ بن محمد اس روایت کو ہشام سے نقل کرنے میں منفرد ہیں اور انہوں نے ہشام کے حوالے سے (روایات نقل کرنے میں) بہت غلطیاں کی ہیں، یہ منکر الحدیث ہیں۔

سعید بن مسیب فرماتے ہیں: ایک شخص کو (یمن شہر) صنعاء میں قتل کر دیا گیا، تو سیدنا عمر رضی اللہ عنہ نے اس کے بدلے میں (قتل میں شریک) سات افراد کو قتل کروا دیا اور فرمایا: ”اگر اس شخص کے قتل میں صنعاء کے رہنے والے تمام لوگ شریک ہوتے، تو میں اس شخص کے بدلے میں ان سب کو قتل کروا دیتا۔“

عبیداللہ بن عمیرہ بیان کرتے ہیں: صنعاء کا رہنے والا ایک شخص تھا، جو ہر سال لوگوں سے پہلے (گھر واپس) آیا کرتا تھا، ایک دن وہ اپنے گھر واپس آیا، تو اس نے اپنی کنیز (یا بیوی) کے ساتھ سات آدمیوں کو شراب پیتے ہوئے پایا، ان ساتوں نے اسے پکڑ کر قتل کر کے ایک کنویں میں پھینک دیا، جب اس کے بعد والا شخص آیا اور اس نے پہلے والے شخص کے بارے میں دریافت کیا، تو ان لوگوں نے بتایا کہ وہ پہلے ہی جا چکا ہے، پھر وہ (بعد میں آنے والا) شخص قضائے حاجت کے لیے گیا، تو اس نے دیکھا کنویں کی چکی میں سے کچھ مکھیاں آ جا رہی ہیں، جس سے اسے اندازہ ہوا کہ اس میں گوشت موجود ہے، اس نے اس چکی کو اٹھایا اور (مقتول) شخص کے خاندان والوں کو بلوایا، انہیں اس بارے میں بتایا، سیدنا عمر رضی اللہ عنہ نے اسے خط لکھا: ”ان سب افراد کی گردنیں اڑا دو اور ان کے ساتھ اس عورت کو بھی قتل کر دو، اگر صنعاء کے رہنے والے سب لوگ اس کے قتل میں شریک ہوتے، تو میں سب کو قتل کروا دیتا۔“

سیدنا صفوان بن امیہ رضی اللہ عنہ بیان کرتے ہیں: میں مسجد میں اپنی چادر پر سویا ہوا تھا، اس چادر کی قیمت تیس درہم تھی، ایک شخص آیا، اس نے میرے نیچے سے اسے نکال لیا (اور چوری کرنے کی کوشش کی)، اسے پکڑ لیا گیا اور نبی کریم صلی اللہ علیہ وسلم کی خدمت میں پیش کیا گیا، نبی کریم صلی اللہ علیہ وسلم نے اس کا ہاتھ کاٹنے کا حکم دیا، میں آپ صلی اللہ علیہ وسلم کی خدمت میں حاضر ہوا اور عرض کی: ”کیا آپ تیس درہم کی وجہ سے اس کا ہاتھ کاٹ دیں گے، میں یہ اسے فروخت کرتا ہوں اور اس کی قیمت کا ادھار کر لیتا ہوں (یعنی وہ بعد میں وصول کروں گا)؟“ نبی کریم صلی اللہ علیہ وسلم نے فرمایا: ”تم نے اسے میرے پاس لانے سے پہلے ایسا کیوں نہیں کیا؟“

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: سیدنا صفوان بن امیہ رضی اللہ عنہ مسجد میں سوئے ہوئے تھے، ان کی چادر ان کے سر کے نیچے تھی، ایک چور آیا، اس نے وہ چادر نکال لی، پھر اس چور کو نبی کریم صلی اللہ علیہ وسلم کی خدمت میں لایا گیا، اس نے جرم کا اقرار کیا، تو نبی کریم صلی اللہ علیہ وسلم نے اس کا ہاتھ کاٹنے کا حکم دیا، سیدنا صفوان نے عرض کی: ”یا رسول اللہ! کیا میرے کپڑے کی وجہ سے ایک عربی کا ہاتھ کاٹا جائے گا؟“ نبی کریم صلی اللہ علیہ وسلم نے فرمایا: ”یہ تم نے اسے میرے پاس لانے سے پہلے کیوں نہیں سوچا؟“ پھر نبی کریم صلی اللہ علیہ وسلم نے فرمایا: ”اس وقت تک مجرم کو معاف کرنے کی سفارش کرو، جب تک معاملہ حاکم یا قاضی تک نہیں پہنچتا، جب وہ حاکم تک پہنچ جائے اور حاکم اسے معاف کر دے، تو اللہ اس حاکم کو معاف نہیں کرے گا۔“ پھر نبی کریم صلی اللہ علیہ وسلم نے اس کا ہاتھ جوڑ کے پاس سے کاٹنے کا حکم دیا۔

ہشام بن عروہ اپنے والد کا یہ بیان نقل کرتے ہیں: سیدنا زبیر نے ایک چور کے بارے میں سفارش کی، تو کسی نے کہا: ”پہلے یہ مقدمہ قاضی کے سامنے پیش ہونے دیں، پھر سفارش کر دیجیے گا۔“ تو سیدنا زبیر نے فرمایا: ”جب یہ قاضی تک پہنچ گیا، تو پھر اللہ سفارش کرنے والے پر بھی لعنت کرے گا اور جس سے سفارش کی جائے گی (یعنی جو اسے قبول کرے گا) اس پر بھی لعنت کرے گا۔“ جیسا کہ اللہ کے رسول صلی اللہ علیہ وسلم نے ارشاد فرمایا ہے۔

فرافصہ حنفی بیان کرتے ہیں: کچھ لوگ ایک چور کو ساتھ لے کر سیدنا زبیر رضی اللہ عنہ کے پاس سے گزرے، سیدنا زبیر رضی اللہ عنہ نے اسے چھوڑنے کے لیے کہا، تو ان لوگوں نے کہا: ”اے ابوعبداللہ! آپ ایک چور کی سفارش کر رہے ہیں؟“ انہوں نے فرمایا: ”اس میں کوئی حرج نہیں ہے، جب تک معاملہ قاضی کے سامنے پیش نہ ہو جائے، جب یہ قاضی کے سامنے پیش ہو جائے گا، تو اللہ اسے معاف نہیں کرے گا، خواہ قاضی اسے معاف کر بھی دے۔“

سیدنا ابن عباس رضی اللہ عنہما بیان کرتے ہیں: سیدنا صفوان بن امیہ رضی اللہ عنہ ایک شخص کو لے کر نبی کریم صلی اللہ علیہ وسلم کی خدمت میں حاضر ہوئے، جس نے ان کا حلہ چوری کیا تھا (نبی کریم صلی اللہ علیہ وسلم نے سزا کا فیصلہ سنایا)، تو انہوں نے عرض کی: ”یا رسول اللہ! آپ (وہ حلہ میری طرف سے) اسے ہبہ شمار کریں (اور یہ سزا نہ دیں)۔“ تو نبی کریم صلی اللہ علیہ وسلم نے ارشاد فرمایا: ”تم نے اسے ہمارے پاس لانے سے پہلے ایسا کیوں نہیں کیا؟“

حصین بن منذر بیان کرتے ہیں: میں سیدنا عثمان غنی رضی اللہ عنہ کے پاس موجود تھا، ان کے سامنے ولید بن عقبہ کو لایا گیا، حمران نے اور ایک دوسرے شخص نے ولید کے خلاف گواہی دی، ان میں سے ایک نے کہا: ”اس نے ولید کو شراب پیتے ہوئے دیکھا ہے۔“ اور دوسرے نے یہ کہا: ”اس نے ولید کو (شراب پینے کے بعد) قے کرتے ہوئے دیکھا ہے۔“ تو سیدنا عثمان رضی اللہ عنہ نے فرمایا: ”یہ قے اسی وقت کرے گا، جب اس نے شراب پی رکھی ہو گی۔“ سیدنا عثمان رضی اللہ عنہ نے سیدنا علی رضی اللہ عنہ سے کہا: ”آپ اس پر حد جاری کر دیں۔“ سیدنا علی رضی اللہ عنہ نے سیدنا حسن رضی اللہ عنہ سے فرمایا: ”تم اس پر حد جاری کرو۔“ تو سیدنا حسن رضی اللہ عنہ نے فرمایا: ”یہ کام وہ کرے، جس کی یہ ذمہ داری ہے۔“ انہوں نے عبداللہ بن جعفر سے کہا: ”تم اس پر حد جاری کرو۔“ عبداللہ بن جعفر نے کوڑا پکڑا اور اسے کوڑے مارنے لگے، سیدنا علی رضی اللہ عنہ گنتی کرتے رہے، جب چالیس کوڑے ہو گئے، تو سیدنا علی رضی اللہ عنہ نے فرمایا: ”اب رک جاؤ۔“ کیونکہ نبی کریم صلی اللہ علیہ وسلم نے (شراب پینے والے کو) چالیس کوڑے لگوائے تھے۔ عبدالعزیز نامی راوی نے اپنی روایت میں یہ الفاظ نقل کیے ہیں: ”سیدنا ابوبکر رضی اللہ عنہ نے اور سیدنا عمر رضی اللہ عنہ نے اسی کوڑے لگوائے تھے، ان میں سے ہر ایک سنت ہے (یعنی قابل عمل ہے)، البتہ میں اسے (چالیس کوڑوں کی سزا کو) پسند کرتا ہوں۔“

نافع بیان کرتے ہیں: سیدنا ابن عمر رضی اللہ عنہما کا ایک غلام بھاگ گیا، اس کا گزر سیدہ عائشہ رضی اللہ عنہا کے کچھ غلاموں کے پاس ہوا، اس نے ان غلاموں کی ایک تھیلی چوری کر لی، جس میں کھجوریں موجود تھیں، پھر وہ ان غلاموں کے گدھے پر سوار ہوا اور بھاگ گیا، پھر اسے پکڑ کر سیدنا عبداللہ بن عمر کے پاس لایا گیا، تو سیدنا عبداللہ بن عمر نے اسے سعید بن العاص کے پاس بھیج دیا، جو ان دنوں مدینہ منورہ کے گورنر تھے، سعید نے کہا: ”میں مفرور غلام کا ہاتھ نہیں کاٹوں گا۔“ پھر سیدہ عائشہ رضی اللہ عنہا نے (ابن عمر رضی اللہ عنہما) کو پیغام بھیجا: ”میرے غلام بھی آپ کے غلام ہیں، وہ غلام بھوکا تھا (اس لیے اس نے کھجوروں کی تھیلی چوری کر لی)، وہ گدھے پر اس لیے سوار ہوا، تاکہ وہاں سے فرار ہو جائے، اس لیے آپ اس کا ہاتھ نہ کاٹیں۔“ لیکن سیدنا عبداللہ بن عمر رضی اللہ عنہما نے اس کا ہاتھ کٹوا دیا۔

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: فتح مکہ کے موقع پر نبی کریم صلی اللہ علیہ وسلم نے اپنے خطبہ میں یہ ارشاد فرمایا: ”موضحہ زخم کی دیت پانچ، پانچ (اونٹ) ہو گی۔“

سیدہ عائشہ رضی اللہ عنہا روایت کرتی ہیں: نبی کریم صلی اللہ علیہ وسلم نے ارشاد فرمایا: ”(معاشرتی اعتبار سے) صاحب حیثیت لوگوں کی کوتاہیوں سے درگزر کیا کرو، البتہ حدود کا حکم مختلف ہے (ان پر حد جاری ہو گی)۔“

سیدنا ابوبردہ بن نیار رضی اللہ عنہ بیان کرتے ہیں: میں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”دس سے زیادہ کوڑے صرف حدود میں مارے جائیں۔“

ابن محیریز بیان کرتے ہیں: میں نے فضالہ بن عبید سے دریافت کیا: ”آپ کا کیا خیال ہے کہ چور کے ساتھ اس کی گردن میں لٹکانا، کیا یہ سنت ہے؟“ انہوں نے جواب دیا: ”جی ہاں، نبی کریم صلی اللہ علیہ وسلم کی خدمت میں ایک چور کو لایا گیا، آپ صلی اللہ علیہ وسلم کے حکم کے تحت اس کا ہاتھ کاٹ دیا گیا، پھر آپ صلی اللہ علیہ وسلم کے حکم کے تحت وہ ہاتھ اس کی گردن میں لٹکا دیا گیا۔“

حمزہ بن عبداللہ اپنے والد کا یہ بیان نقل کرتے ہیں: سیدنا عمر بن خطاب رضی اللہ عنہ تعریض کے طور پر (زنا کا الزام لگانے) پر کوڑے مارا کرتے تھے۔

سیدنا عبداللہ بن عمر رضی اللہ عنہما بیان کرتے ہیں: سیدنا عمر بن خطاب تعریض کے طور پر (زنا کا الزام لگانے) پر مکمل حد جاری کرتے تھے۔

معاویہ بن قرہ بیان کرتے ہیں: ایک شخص نے دوسرے شخص سے کہا: ”اے مرد کی شرمگاہ سونگھنے والی عورت (یعنی زنا کرنے والی عورت) کے بیٹے!“ تو سیدنا عثمان رضی اللہ عنہ نے اسے پکڑ لیا، اس نے کہا: ”میں اس کے ذریعے یہ معنی مراد لیے ہیں۔“ تو سیدنا عثمان کے حکم کے تحت اسے کوڑے لگائے گئے۔

عمرہ بیان کرتی ہیں: دو آدمیوں کے درمیان گالی گلوچ ہو گئی، تو ان میں سے ایک نے کہا: ”میری ماں زانیہ نہیں تھی، میرا باپ بھی زانی نہیں تھا۔“ سیدنا عمر رضی اللہ عنہ نے اس بارے میں لوگوں سے مشورہ کیا، تو انہوں نے کہا: ”اس شخص نے اپنے والد اور والدہ کی تعریف کی ہے (کہ وہ زانی نہیں تھے)۔“ تو سیدنا عمر رضی اللہ عنہ نے فرمایا: ”تعریف کرنے کے لیے ان دونوں میں اور بھی خوبیاں تھیں۔“ پھر سیدنا عمر رضی اللہ عنہ نے اس شخص کو (کوڑے) لگوائے۔

ابوبکر بن محمد بیان کرتے ہیں: جب نبی کریم صلی اللہ علیہ وسلم نے سیدنا عمرو بن حزم رضی اللہ عنہ کو نجران بھیجا، تو آپ کے مکتوب میں یہ بھی تحریر تھا: ”ہر دانت کی دیت پانچ اونٹ ہو گی، سب انگلیوں کی دیت دس، دس اونٹ ہو گی، کان کی دیت پچاس اونٹ ہو گی، آنکھ کی دیت پچاس اونٹ ہو گی، پاؤں کی دیت پچاس اونٹ ہو گی، اگر ناک کو ہان سے (یعنی پورے ناک کو) کاٹ دیا جائے، تو اس میں مکمل دیت ہو گی، مامومہ زخم میں جان کی دیت کا تہائی حصہ دینا ہو گا، اور جائفہ کی دیت میں جان کی دیت کا تہائی حصہ دینا ہو گا۔“

ابوبکر بن محمد اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے جب انہیں یمن بھیجا، تو انہیں مکتوب میں یہ لکھا تھا: ”جب ناک کو ہان سے کاٹ دیا جائے، تو اس میں مکمل دیت کی ادائیگی لازم ہو گی، آنکھ (ضائع کرنے پر) نصف دیت کی ادائیگی لازم ہو گی، پاؤں میں نصف دیت کی ادائیگی لازم ہو گی، جائفہ زخم میں ایک تہائی دیت کی ادائیگی لازم ہو گی، مامومہ زخم میں ایک تہائی دیت کی ادائیگی لازم ہو گی، منقلہ زخم میں پندرہ اونٹوں کی ادائیگی لازم ہو گی، موضحہ زخم میں پندرہ اونٹوں کی ادائیگی لازم ہو گی، یہاں سے لے کر وہاں تک (تمام انگلیوں میں سے ہر ایک) کی دیت دس اونٹ ہو گی۔“

عبداللہ بن ابوبکر اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے انہیں (خط تحریر کروا کر دیا): ”موضحہ زخم میں پانچ اونٹوں کی ادائیگی لازم ہو گی، مامومہ میں ایک تہائی دیت لازم ہو گی، منقلہ میں پندرہ اونٹوں کی ادائیگی لازم ہو گی، آنکھ میں پچاس اونٹوں کی ادائیگی لازم ہو گی، جب ناک کو ہان سے کاٹ دیا جائے، تو اس میں مکمل دیت کی ادائیگی لازم ہو گی، دانت کی دیت پانچ اونٹ ہو گی، پاؤں کی پچاس اونٹ ہو گی، ہاتھ اور پاؤں کی تمام انگلیوں میں سے ہر ایک کی دیت دس، دس اونٹ ہو گی۔“

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے موضحہ زخموں میں پانچ پانچ اونٹوں کی ادائیگی کا فیصلہ دیا تھا، جبکہ دانتوں (کی دیت میں) پانچ پانچ اونٹوں کی ادائیگی اور انگلیوں میں سے ہر ایک انگلی کی دیت دس دس اونٹ کی ادائیگی کا فیصلہ دیا تھا۔

سیدنا ابوموسیٰ اشعری رضی اللہ عنہ بیان کرتے ہیں: نبی کریم صلی اللہ علیہ وسلم نے انگلیوں میں دیت دس دس کی ادائیگی کا فیصلہ دیا تھا۔ نضر نامی راوی نے اپنی روایت میں یہ الفاظ نقل کیے ہیں: نبی کریم صلی اللہ علیہ وسلم نے انگلیوں میں دس دس اونٹوں کی ادائیگی کا فیصلہ دیا تھا۔ سعید نے غالب کے حوالے سے حمید سے اسی طرح نقل کیا ہے۔ شعبہ نے اسماعیل، علی اور خالد نے اس سے مختلف نقل کیا ہے، انہوں نے غالب کے حوالے سے، مسروق کے حوالے سے سیدنا ابوموسیٰ اشعری رضی اللہ عنہ کے حوالے سے نبی کریم صلی اللہ علیہ وسلم سے حدیث نقل کی ہے، انہوں نے حمید نامی راوی کا ذکر نہیں کیا۔ شعبہ نے اس میں یہ ذکر کیا ہے کہ غالب نے مسروق سے احادیث کا سماع کیا ہے۔

سیدنا ابوموسیٰ اشعری رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”تمام انگلیاں برابر کی حیثیت رکھتی ہیں۔“ شعبہ نامی راوی بیان کرتے ہیں: میں نے دریافت کیا: ”(ان میں سے ہر ایک کی دیت) دس دس اونٹ ہو گی؟“ انہوں نے جواب دیا: ”جی ہاں۔“ ابونعیم، عفان، مسلم اور دیگر راویوں نے اسے اسی طرح نقل کیا ہے۔ وکیع، وہب بن جریر، ابونضر نے شعبہ کے حوالے سے نقل کیا ہے، انہیں ایک راوی کے نام کے بارے میں شک ہے، اس کا نام مسروق بن اوس ہے، یا اوس بن مسروق ہے۔