سنن الدارقطني

سیدنا عبداللہ بن عباس رضی اللہ عنہما بیان کرتے ہیں: ایک شخص عرفہ کے دن صبح کے وقت اپنی سواری سے گر گیا اور وہ حالت احرام میں تھا، اس کا انتقال ہو گیا، اس بات کا تذکرہ نبی کریم صلی اللہ علیہ وسلم سے کیا گیا، تو آپ نے ارشاد فرمایا: ”اسے پانی اور بیری کے پتوں کے ذریعے غسل دو اور اسے ان کے انہی دو کپڑوں میں کفن دو اور اس کے چہرے کو ڈھانپنا نہیں، کیونکہ یہ قیامت کے دن تلبیہ پڑھتے ہوئے زندہ ہو گا۔“

یہی روایت ایک اور سند کے ہمراہ منقول ہے، تاہم اس میں یہ الفاظ ہیں: اس کے سر کو ڈھانپنا نہیں۔

سیدنا عبداللہ بن عباس رضی اللہ عنہما بیان کرتے ہیں: ہم نبی کریم صلی اللہ علیہ وسلم کے ساتھ سفر میں شریک تھے، ایک شخص اپنے اونٹ سے گرا اور فوت ہو گیا، وہ شخص حالت احرام میں تھا، نبی کریم صلی اللہ علیہ وسلم نے ارشاد فرمایا: ”اسے پانی اور بیری کے پتوں کے ذریعے غسل دو اور اس کو انہی دو کپڑوں میں دفن کر دو اور تم اس کے سر کو ڈھانپنا نہیں، کیونکہ قیامت کے دن اللہ جب اسے زندہ کرے گا، تو یہ تلبیہ پڑھ رہا ہو گا۔“

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے حالت احرام میں فوت ہو جانے والے شخص کے بارے میں یہ بات ارشاد فرمائی ہے: ”تم اسے ڈھانپ دو اور یہودیوں کے ساتھ مشابہت اختیار نہ کرو۔“

یہی روایت ایک اور سند کے ہمراہ بھی منقول ہے۔

سیدنا عبداللہ بن عباس رضی اللہ عنہما بیان کرتے ہیں: ایک شخص حالت احرام میں نبی کریم صلی اللہ علیہ وسلم کے ساتھ آ رہا تھا اور وہ اپنے اونٹ سے گر گیا، اس کی گردن کی ہڈی ٹوٹ گئی اور وہ فوت ہو گیا، نبی کریم صلی اللہ علیہ وسلم نے ارشاد فرمایا: ”اسے پانی اور بیری کے پتوں کے ذریعے غسل دو اور اسے اس کے یہی دو کپڑوں (یعنی احرام کے دو کپڑوں) میں پہنا دو، اس کے سر کو ڈھانپنا نہیں، کیونکہ یہ قیامت کے دن تلبیہ پڑھتے ہوئے آئے گا۔“ ابن جریج نامی راوی بیان کرتے ہیں: میں نے اپنے استاد سے دریافت کیا: ”کیا سعید بن جبیر نے آپ کو یہ بات بتائی تھی کہ وہ شخص کون سی جگہ پر گرا تھا؟“ تو انہوں نے جواب دیا: ”جی نہیں!“

یہی روایت بعض دیگر اسناد کے ہمراہ بھی منقول ہے۔

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”اپنے مردوں کے چہرے ڈھانپ دیا کرو اور یہودیوں کے ساتھ مشابہت اختیار نہ کرو۔“

سیدنا عبداللہ بن عباس رضی اللہ عنہما بیان کرتے ہیں: ایک شخص حالت احرام میں نبی کریم صلی اللہ علیہ وسلم کے پیچھے آ رہا تھا، وہ اپنے اونٹ سے گر گیا، اس کی گردن کی ہڈی ٹوٹ گئی، اس کا انتقال ہو گیا، نبی کریم صلی اللہ علیہ وسلم نے ارشاد فرمایا: ”اسے پانی اور بیری کے پتوں کے ذریعے غسل دو اور اس کو اس کے یہی دو کپڑوں (کفن کے طور پر) میں پہنا دو، اس کا سر ڈھانپنا نہیں، یہ قیامت کے دن تلبیہ پڑھتے ہوئے آئے گا۔“

یہی روایت ایک اور سند کے ہمراہ بھی منقول ہے۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جو بھی حاجی یا عمرہ کرنے والا شخص اس حالت میں (یعنی حالت احرام) میں فوت ہو جائے گا، تو اس کی پیشی نہیں ہو گی اور اس سے حساب نہیں لیا جائے گا، اور اس سے کہا جائے گا: تم جنت میں داخل ہو جاؤ۔“