سنن الدارقطني

عبداللہ بن شداد بیان کرتے ہیں: ہم لوگ سیدہ عائشہ رضی اللہ عنہا کی خدمت میں حاضر ہوئے، انہوں نے فرمایا: ایک مرتبہ نبی کریم صلی اللہ علیہ وسلم میرے پاس تشریف لائے، تو آپ صلی اللہ علیہ وسلم نے میرے ہاتھ میں چاندی کے کنگن دیکھے، آپ صلی اللہ علیہ وسلم نے دریافت کیا: ”اے عائشہ! یہ کہاں سے آئے ہیں؟“ میں نے عرض کی: ”انہیں میں نے بنایا ہے، تاکہ انہیں پہن کر آپ صلی اللہ علیہ وسلم کے سامنے آؤں، یا رسول اللہ!“ نبی کریم صلی اللہ علیہ وسلم نے دریافت کیا: ”کیا تم نے ان کی زکوٰۃ ادا کی ہے؟“ میں نے عرض کیا: ”نہیں! (یا جو بھی اللہ نے چاہا)۔“ تو نبی کریم صلی اللہ علیہ وسلم نے فرمایا: ”یہ تمہارے جہنم (میں عذاب ہونے) کے لیے کافی ہیں۔“ محمد بن عطاء نامی راوی مجہول ہے۔

امام شعبی بیان کرتے ہیں: میں نے سیدہ فاطمہ بنت قیس رضی اللہ عنہا کو یہ بیان کرتے ہوئے سنا ہے: میں نبی کریم صلی اللہ علیہ وسلم کی خدمت میں ایک زنجیر لے کر آئی، جس میں ستر مثقال سونا تھا، میں نے عرض کی: ”یا رسول اللہ! آپ اس میں سے زکوٰۃ وصول کر لیں۔“ تو نبی کریم صلی اللہ علیہ وسلم نے اس میں سے ایک مثقال اور تین چوتھائی مثقال وصول کر لیا۔ اس روایت کا ایک راوی ابوبکر ہذلی متروک ہے اور اس روایت کو اس کے علاوہ اور کسی نے نقل نہیں کیا۔

یہ روایت ایک اور سند کے ہمراہ بھی منقول ہے، تاہم اس میں یہ الفاظ زائد ہیں: میں نے عرض کی: یا رسول اللہ! کیا مال میں زکوٰۃ کے علاوہ بھی کوئی حق ہوتا ہے؟ نبی کریم صلی اللہ علیہ وسلم نے ارشاد فرمایا: ”ہاں!“ پھر آپ نے یہ آیت تلاوت کی: ”اور وہ اپنی ہی پسند کے ساتھ اپنا مال دیتا ہے۔“

سیدہ فاطمہ بنت قیس رضی اللہ عنہا، نبی کریم صلی اللہ علیہ وسلم کا یہ فرمان نقل کرتی ہیں: ”زیورات میں زکوٰۃ ہوتی ہے۔“

سیدنا جابر بن عبداللہ رضی اللہ عنہ بتاتے ہیں: ”زیورات میں زکوٰۃ نہیں ہوتی۔“ اس روایت کا راوی ابوحمزہ، اس کا نام میمون ہے اور یہ ضعیف الحدیث ہے۔

سیدہ عائشہ رضی اللہ عنہا فرماتی ہیں: ”زیورات پہننے میں کوئی حرج نہیں ہے، جب ان کی زکوٰۃ ادا کر دی جائے۔“

عمرو بن شعیب اپنے والد کے حوالے سے، اپنے دادا کا یہ بیان نقل کرتے ہیں: انہوں نے اپنے منشی سالم کو یہ خط لکھا کہ ان کی صاحبزادیوں کے زیورات کی ہر سال زکوٰۃ ادا کر دیا کریں۔

سیدنا عبداللہ بن مسعود رضی اللہ عنہ بیان کرتے ہیں: ایک خاتون نبی کریم صلی اللہ علیہ وسلم کی خدمت میں حاضر ہوئی، اس نے عرض کی: ”میرے پاس کچھ زیورات ہیں اور میرے شوہر غریب آدمی ہیں، میرے کچھ بھتیجے بھی ہیں، تو کیا میرے لیے یہ بات جائز ہو گی کہ میں ان زیورات کی زکوٰۃ ان لوگوں پر خرچ کر دوں؟“ تو نبی کریم صلی اللہ علیہ وسلم نے ارشاد فرمایا: ”جی ہاں!“ یہ روایت وہم ہے، درست یہ ہے: یہ روایت ابراہیم کے حوالے سے، سیدنا عبداللہ سے مرسل اور موقوف روایت پر منقول ہے۔

علقمہ بیان کرتے ہیں: سیدنا عبداللہ بن مسعود رضی اللہ عنہ کی اہلیہ نے ان سے اپنے زیورات کے بارے میں دریافت کیا، تو انہوں نے فرمایا: ”جب وہ دو سو (درہم جتنے قیمتی) ہوں، تو ان میں زکوٰۃ کی ادائیگی لازم ہو گی۔“ اس خاتون نے کہا: ”میرے بھتیجے میرے زیر پرورش ہیں، کیا میں اسے ان پر خرچ کر دوں؟“ تو سیدنا عبداللہ نے جواب دیا: ”جی ہاں!“ یہ روایت ’موقوف‘ ہے۔