سنن الدارقطني

امام شعبی بیان کرتے ہیں: نبی کریم صلی اللہ علیہ وسلم ایک قبر کے پاس سے گزرے، جس کے صاحب قبر کو کچھ عرصہ پہلے دفن کیا گیا تھا، نبی کریم صلی اللہ علیہ وسلم نے اس کی نماز جنازہ ادا کی اور آپ صلی اللہ علیہ وسلم نے نماز جنازہ میں چار مرتبہ تکبیر کہی۔ راوی بیان کرتے ہیں: میں نے امام شعبی سے پوچھا: آپ کو یہ حدیث کس نے سنائی ہے؟ انہوں نے جواب دیا: ”ایک قابل اعتماد شخصیت نے سنائی ہے، جو اس موقع پر موجود تھے، وہ سیدنا عبداللہ بن عباس رضی اللہ عنہما ہیں۔“

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم ایک قبر کے پاس سے گزرے، جو الگ تھلگ تھی، آپ صلی اللہ علیہ وسلم نے اس کی (نماز جنازہ ادا کرتے ہوئے) چار مرتبہ تکبیر کہی۔ یہی روایت بعض دیگر اسناد کے ہمراہ بھی منقول ہے اور ان سب راویوں نے یہی بات نقل کی ہے کہ نبی کریم صلی اللہ علیہ وسلم نے چار مرتبہ تکبیر کہی تھی۔

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے ایک شخص کی نماز جنازہ پڑھائی، آپ صلی اللہ علیہ وسلم نے اس میں چار مرتبہ تکبیر کہی اور ایک مرتبہ سلام پھیرا۔

سیدنا انس رضی اللہ عنہ بیان کرتے ہیں: ایک شخص مسجد (نبوی) کی صفائی کیا کرتا تھا، اس کا انتقال ہو گیا اور اسے رات میں دفن کر دیا گیا، جب نبی کریم صلی اللہ علیہ وسلم کو اس بارے میں بتایا گیا، تو آپ صلی اللہ علیہ وسلم نے فرمایا: ”اس کی قبر کی طرف چلو!“ پھر نبی کریم صلی اللہ علیہ وسلم اور آپ کے ساتھ دوسرے لوگ اس شخص کی قبر پر تشریف لے گئے، نبی کریم صلی اللہ علیہ وسلم نے ارشاد فرمایا: ”یہ قبریں اپنے اہل (یعنی مردوں) کے لیے تاریکی سے بھرپور ہوتی ہیں اور اللہ تعالیٰ میرے ان لوگوں کی نماز جنازہ ادا کرنے کی وجہ سے ان کی قبروں کو ان کے لیے روشن کر دیتا ہے۔“ پھر نبی کریم صلی اللہ علیہ وسلم اس شخص کی قبر پر تشریف لائے اور آپ صلی اللہ علیہ وسلم نے اس کی نماز جنازہ ادا کی۔ روایت کے یہ الفاظ علی بن مسلم نامی راوی کے ہیں۔

سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم ایک شخص کے دفن ہو جانے کے بعد اس کی قبر پر تشریف لائے۔ ایک روایت میں یہ الفاظ ہیں: نبی کریم صلی اللہ علیہ وسلم نے ایک خاتون کی قبر پر (اس کی نماز جنازہ) ادا کی تھی، اس خاتون کے دفن ہو جانے کے بعد (آپ صلی اللہ علیہ وسلم نے نماز جنازہ ادا کی تھی)۔

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے ایک نئی بنی ہوئی قبر دیکھی، تو دریافت کیا: ”تم نے مجھے اس کے بارے میں کیوں نہیں بتایا؟“ لوگوں نے عرض کی: ”آپ صلی اللہ علیہ وسلم اس وقت سوئے ہوئے تھے، ہمیں یہ اچھا نہیں لگا کہ ہم آپ کو بیدار کریں۔“ (راوی بیان کرتے ہیں) پھر نبی کریم صلی اللہ علیہ وسلم نے وہاں اس کی نماز جنازہ ادا کی، میں آپ صلی اللہ علیہ وسلم کے بائیں طرف کھڑا ہوا، تو آپ صلی اللہ علیہ وسلم نے مجھے دائیں طرف کر لیا۔ بعض راویوں نے اس میں کچھ اضافی الفاظ اور مفہوم نقل کیا ہے، تاہم اس کا مطلب ایک ہی ہے۔

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے ایک شخص کے انتقال کے تین دن کے بعد اس کی نماز جنازہ ادا کی۔

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے ایک شخص (دفن ہو جانے کے) ایک ماہ کے بعد اس کی قبر پر نماز جنازہ ادا کی۔ ابوعاصم نامی راوی کے حوالے سے نقل کرنے میں بشر بن آدم نامی راوی منفرد ہیں۔

سیدنا ابومالک رضی اللہ عنہ بیان کرتے ہیں: غزوہ احد میں شریک ہونے والے نو افراد کو لایا گیا، ان کے ساتھ دسویں سیدنا حمزہ رضی اللہ عنہ تھے، نبی کریم صلی اللہ علیہ وسلم نے ان سب کی نماز جنازہ ادا کی، پھر ان نو افراد کو دفن کر دیا گیا اور سیدنا حمزہ رضی اللہ عنہ کو دفن نہیں کیا گیا، پھر نو مزید افراد کو لایا گیا، ان کے ساتھ دسویں سیدنا حمزہ رضی اللہ عنہ ہو گئے، نبی کریم صلی اللہ علیہ وسلم نے ان سب کی بھی نماز جنازہ ادا کی، پھر ان نو افراد کو دفن کر دیا گیا اور سیدنا حمزہ رضی اللہ عنہ کو دفن نہیں کیا گیا (یعنی نبی کریم صلی اللہ علیہ وسلم نے سیدنا حمزہ رضی اللہ عنہ کی نماز جنازہ بار بار ادا کی)۔

سیدنا عقبہ بن عامر رضی اللہ عنہ بیان کرتے ہیں: نبی کریم صلی اللہ علیہ وسلم نے غزوہ احد میں شہید ہونے والوں کی نماز جنازہ آٹھ سال بعد ادا کی تھی۔

سیدنا عبداللہ بن جعفر رضی اللہ عنہ بیان کرتے ہیں: جب سیدنا جعفر طیار رضی اللہ عنہ کے انتقال کی خبر آئی، تو نبی کریم صلی اللہ علیہ وسلم نے ارشاد فرمایا: ”جعفر کے گھر والوں کے لیے کھانا تیار کرو، کیونکہ انہیں ایک ایسی صورت حال لاحق ہو گئی ہے، جس نے انہیں مشغول کر دیا ہے۔“ (یہاں ایک لفظ کے بارے میں راوی کو شک ہے)۔

سیدہ اسماء بنت عمیس رضی اللہ عنہا بیان کرتی ہیں: سیدہ فاطمہ رضی اللہ عنہا نے یہ وصیت کی تھی کہ انہیں ان کے شوہر سیدنا علی رضی اللہ عنہ اور اسماء (بنت عمیس) غسل دیں گے، تو ان دونوں نے ہی انہیں غسل دیا۔

نافع بیان کرتے ہیں: سیدنا عبداللہ بن عمر رضی اللہ عنہما نے سات افراد کی نماز جنازہ ایک ساتھ پڑھائی، جن میں مرد بھی تھے اور خواتین بھی، تو آپ نے مردوں کو اپنے آگے رکھا اور خواتین کو قبلہ والی سمت میں رکھا، آپ نے ان سب کے لیے ایک ہی صف بنائی۔ راوی بیان کرتے ہیں: سیدنا عمر بن خطاب رضی اللہ عنہ کی اہلیہ اور سیدنا علی رضی اللہ عنہ کی صاحبزادی سیدہ ام کلثوم رضی اللہ عنہا اور ان کے صاحبزادے کی میت رکھی گئی۔ ان صاحبزادے کا نام زید بن عمر تھا۔ ان دنوں سیدنا سعید بن العاص گورنر تھے اور حاضرین میں سیدنا عبداللہ بن عباس، ابوہریرہ، سیدنا ابوسعید خدری اور سیدنا قتادہ رضی اللہ عنہ تھے۔ میں نے دریافت کیا: یہ کیا طریقہ ہے؟ انہوں نے بتایا: ”یہ سنت ہے۔“