سنن الدارقطني

سیدنا عبداللہ بن عباس رضی اللہ عنہما بیان کرتے ہیں: جبرائیل علیہ السلام نے سیدنا آدم علیہ السلام کی نماز جنازہ ادا کی تھی۔ انہوں نے سیدنا آدم علیہ السلام پر چار تکبیریں پڑھی تھیں۔ جبرائیل علیہ السلام نے فرشتوں کو اسی دن نماز پڑھائی تھی اور سیدنا آدم علیہ السلام کو ”مسجد خیف“ میں دفن کیا گیا۔ ان کا رخ قبلے کی طرف کیا گیا تھا اور ان کے لیے لحد بنائی تھی اور ان کی قبر پر چونا لگا دیا گیا تھا۔ اس روایت کا راوی عبدالرحمن بن مالک متروک ہے۔ دیگر راویوں نے اس روایت کے بعض حصے کو عروہ رحمہ اللہ کے کلام کے طور پر نقل کیا ہے۔

سیدنا ابی بن کعب رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”فرشتوں نے سیدنا آدم علیہ السلام کی نماز جنازہ ادا کی تھی، انہوں نے ان پر چار تکبیریں پڑھی تھیں، انہوں نے یہ کہا: اے اولاد آدم! تمہارا (نماز جنازہ ادا کرنے کا) یہ طریقہ ہے۔“

یہی روایت ایک اور سند کے ہمراہ سیدنا ابی رضی اللہ عنہ کے حوالے سے ”موقوف“ روایت کے طور پر منقول ہے۔

یہی روایت ایک اور سند کے ہمراہ سیدنا ابی بن کعب رضی اللہ عنہ کے حوالے سے نبی کریم صلی اللہ علیہ وسلم سے منقول ہے۔

سیدنا انس رضی اللہ عنہ بیان کرتے ہیں: فرشتوں نے سیدنا آدم علیہ السلام پر چار تکبیریں کہی تھیں، سیدنا ابوبکر رضی اللہ عنہ نے نبی کریم صلی اللہ علیہ وسلم پر چار تکبیریں کہی تھیں، سیدنا عمر رضی اللہ عنہ نے سیدنا ابوبکر رضی اللہ عنہ پر چار تکبیریں کہی تھیں، سیدنا صہیب رضی اللہ عنہ نے سیدنا عمر رضی اللہ عنہ پر چار تکبیریں کہی تھیں، سیدنا امام حسن رضی اللہ عنہ نے سیدنا علی رضی اللہ عنہ پر چار تکبیریں کہی تھیں، سیدنا امام حسین رضی اللہ عنہ نے سیدنا امام حسن رضی اللہ عنہ پر چار تکبیریں کہی تھیں۔ اس روایت کا راوی محمد بن ولید ضعیف ہے۔