سنن الدارقطني

سیدنا ابوہریرہ رضی اللہ عنہ بیان کرتے ہیں: میں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”ایک مرتبہ ایک نبی لوگوں کے ساتھ نماز استسقاء ادا کرنے کے لیے نکلے، وہاں ایک چیونٹی بھی تھی، جس نے اپنے پاؤں (یعنی ہاتھ) آسمان کی طرف اٹھائے ہوئے تھے، تو اس نبی نے فرمایا: تم لوگ واپس چلے جاؤ، کیونکہ اس چیونٹی کی وجہ سے تمہاری دعا قبول کر لی گئی ہے۔“

امام جعفر صادق رضی اللہ عنہ اپنے والد (امام محمد الباقر رضی اللہ عنہ) کے حوالے سے یہ بات نقل کرتے ہیں: نبی کریم صلی اللہ علیہ وسلم نے بارش کی دعا مانگتے ہوئے اپنی چادر کو الٹا دیا تا کہ قحط سالی ختم ہو جائے۔

عباد بن تمیم اپنے چچا کا یہ بیان نقل کرتے ہیں: نبی کریم صلی اللہ علیہ وسلم عیدگاہ کی طرف تشریف لے گئے، تاکہ نماز استسقاء ادا کریں (دعا مانگتے ہوئے) آپ صلی اللہ علیہ وسلم نے قبلہ کی طرف رخ کیا، آپ نے اپنی چادر کو الٹا دیا اور دو رکعت (نماز استسقاء) ادا کی۔ سفیان نامی راوی کہتے ہیں: چادر کو الٹا کرتے ہوئے نبی کریم صلی اللہ علیہ وسلم نے اس کے دائیں حصے کو بائیں طرف اور بائیں حصے کو دائیں طرف کر دیا۔

طلحہ رحمہ اللہ بیان کرتے ہیں: مروان نے مجھے سیدنا عبداللہ بن عباس رضی اللہ عنہما کے پاس بھیجا تاکہ میں ان سے نماز استسقاء کا سنت طریقہ دریافت کر سکوں۔ تو سیدنا عبداللہ بن عباس رضی اللہ عنہما نے فرمایا: استسقاء (یعنی بارش کی دعا کے لیے) سنت یہ ہے کہ عیدگاہ میں نماز استسقاء ادا کی جائے۔ البتہ نبی کریم صلی اللہ علیہ وسلم نے اپنی چادر کو الٹا بھی کیا تھا۔ آپ صلی اللہ علیہ وسلم نے اس کے دائیں حصے کو بائیں طرف اور بائیں حصے کو دائیں طرف کر دیا تھا۔ آپ صلی اللہ علیہ وسلم نے دو رکعت نماز ادا کی تھی۔ آپ صلی اللہ علیہ وسلم نے پہلی رکعت میں سات مرتبہ تکبیر کہی تھی اور سورۃ الاعلیٰ کی تلاوت کی تھی، جبکہ دوسری رکعت میں سورۃ الغاشیہ کی تلاوت کی۔ آپ صلی اللہ علیہ وسلم نے دوسری رکعت میں پانچ مرتبہ تکبیر کہی تھی۔

عباد بن تمیم اپنے چچا کا یہ بیان نقل کرتے ہیں: نبی کریم صلی اللہ علیہ وسلم بارش کی دعا مانگنے لوگوں کے ساتھ نکلے، آپ نے وہاں لوگوں کو دو رکعات پڑھائیں جن میں آپ نے بلند آواز میں قراءت کی، نبی کریم صلی اللہ علیہ وسلم نے اپنی چادر کو الٹا دیا اور اپنے دونوں ہاتھ بلند کر کے دعا مانگی، آپ نے بارش کے نزول کی دعا کی، آپ کا رخ قبلہ کی طرف تھا۔

عباد بن تمیم اپنے چچا کا یہ بیان نقل کرتے ہیں: نبی کریم صلی اللہ علیہ وسلم بارش کی دعا مانگنے لوگوں کے ساتھ نکلے، آپ عیدگاہ تشریف لائے، وہاں آپ نے بارش کے لیے دعا مانگی، نبی کریم صلی اللہ علیہ وسلم نے کھڑے ہو کر اللہ سے دعا کی، قبلہ کی طرف رخ کیا اور اپنی چادر کو الٹا دیا، تو لوگوں کو سیراب کر دیا گیا (یعنی بارش نازل ہو گئی)۔

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم عیدین اور استسقاء کی نماز میں بلند آواز میں قراءت کرتے تھے۔

عباد بن تمیم اپنے چچا سیدنا عبداللہ بن زید رضی اللہ عنہ کا یہ بیان نقل کرتے ہیں: نبی کریم صلی اللہ علیہ وسلم بارش کی دعا مانگنے کے لیے تشریف لائے، آپ نے لوگوں کو خطبہ دیا، جب آپ دعا مانگنے لگے، تو آپ صلی اللہ علیہ وسلم نے اپنا رخ قبلہ کی طرف کیا اور اپنی چادر کو الٹا دیا۔

یہی روایت بعض دیگر اسناد کے ہمراہ عبداللہ بن زید رضی اللہ عنہ کے حوالے سے نبی کریم صلی اللہ علیہ وسلم سے اسی کی مثل منقول ہے۔

اسحق بن عبداللہ بیان کرتے ہیں: مدینہ منورہ کے گورنر ولید بن عتبہ نے انہیں عبداللہ بن عباس رضی اللہ عنہما کے پاس بھیجا، اس نے کہا: ”اے میرے بھتیجے! تم ان سے یہ دریافت کرنا کہ نبی کریم صلی اللہ علیہ وسلم نے بارش کی دعا کے سلسلے میں کیا کیا تھا۔“ جب آپ نے لوگوں کے لیے بارش کی دعا مانگی تھی، تو سیدنا عبداللہ بن عباس رضی اللہ عنہما نے جواب دیا: ”جی ہاں! نبی کریم صلی اللہ علیہ وسلم خشوع و خضوع کی کیفیت کے ساتھ تشریف لے گئے تھے، آپ نے وہاں اسی طرح کیا تھا، جس طرح عید الفطر اور عید الاضحی کی نماز میں کرتے ہیں۔“ یہاں پر ایک لفظ نقل کرنے میں راوی نے اختلاف کیا ہے۔

ہشام بن اسحق اپنے والد کا یہ بیان نقل کرتے ہیں: ایک امیر نے مجھے سیدنا عبداللہ بن عباس رضی اللہ عنہما کے پاس بھیجا تاکہ میں ان سے نماز استسقاء کے بارے میں دریافت کروں، ہارون اور یوسف نامی راوی نے یہ الفاظ نقل کیے ہیں: تاکہ میں ان سے بارش کی دعا کے سلسلے میں پڑھی جانے والی نماز کے بارے میں دریافت کر سکوں، تو سیدنا عبداللہ بن عباس رضی اللہ عنہما نے فرمایا: ”اس نے خود مجھ سے کیوں نہیں دریافت کیا؟“ (پھر انہوں نے بتایا) نبی کریم صلی اللہ علیہ وسلم خشوع و خضوع کے عالم میں گریہ و زاری کی کیفیت میں (عیدگاہ) تشریف لے گئے تھے اور آپ صلی اللہ علیہ وسلم نے دو رکعت اس طرح ادا کی تھی، جس طرح آپ عید کی نماز میں ادا کرتے ہیں، نبی کریم صلی اللہ علیہ وسلم نے تم لوگوں کی طرح خطبہ نہیں دیا تھا۔

سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم نے صرف بارش کی دعا مانگتے ہوئے دعا کے دوران ہاتھ اٹھائے ہیں، آپ صلی اللہ علیہ وسلم نے اس دوران اتنے ہاتھ بلند کیے تھے کہ آپ کی بغلوں کی سفیدی نظر آنے لگی تھی۔ ایک اور سند کے ہمراہ یہ الفاظ منقول ہیں: سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم نے دعا مانگتے ہوئے کبھی ہاتھ بلند نہیں کیے، صرف بارش کی دعا مانگتے ہوئے آپ صلی اللہ علیہ وسلم نے ایسا کیا تھا اور ہاتھوں کو اتنا بلند کیا تھا، آپ کی بغلوں کی سفیدی نظر آنے لگی تھی۔