سنن الدارقطني

سیدنا ابی بن کعب رضی اللہ عنہ بیان کرتے ہیں: نبی کریم صلی اللہ علیہ وسلم تین رکعت وتر ادا کرتے تھے، جن میں ”سورۃ الاعلیٰ“، ”سورۃ الکافرون“ اور ”سورۃ الاخلاص“ کی تلاوت کیا کرتے تھے۔ آپ رکوع میں جانے سے پہلے دعائے قنوت پڑھا کرتے تھے۔ جب آپ سلام پھیر دیتے تھے، تو یہ دعا پڑھتے تھے: ”پاک ہے وہ بادشاہ جو ہر عیب سے پاک ہے۔“ آپ صلی اللہ علیہ وسلم دو مرتبہ یہ الفاظ پست آواز میں پڑھتے تھے اور تیسری مرتبہ بلند آواز میں کھینچ کر ادا کرتے تھے۔

سیدنا ابی بن کعب رضی اللہ عنہ بیان کرتے ہیں: نبی کریم صلی اللہ علیہ وسلم وتر کی تین رکعت میں ”سورۃ الاعلیٰ“، ”سورۃ الکافرون“، ”سورۃ الاخلاص“ کی تلاوت کرتے تھے اور رکوع میں جانے سے پہلے دعائے قنوت پڑھتے تھے۔ پھر جب آپ سلام پھیرتے تھے، تو ”سبحان الملك القدوس“ پڑھتے تھے اور آخری مرتبہ میں آواز کو بلند کرتے تھے اور یہ فرماتے تھے: ”رب الملائكۃ والروح“، یعنی ”فرشتوں اور روح کا پروردگار۔“

سیدنا ابی بن کعب رضی اللہ عنہ بیان کرتے ہیں: نبی کریم صلی اللہ علیہ وسلم وتر کی نماز میں ”سورۃ الاعلیٰ“، ”سورۃ الکافرون“ اور ”سورۃ الاخلاص“ کی تلاوت کرتے تھے۔ یہی روایت ایک اور سند کے ہمراہ بھی منقول ہے۔

سیدنا عبداللہ رضی اللہ عنہ بیان کرتے ہیں: ایک رات میں نبی کریم صلی اللہ علیہ وسلم کے ہمراہ ٹھہر گیا، تاکہ اس بات کا جائزہ لوں کہ وتر کی نماز میں دعائے قنوت کب پڑھتے ہیں، آپ صلی اللہ علیہ وسلم نے رکوع سے پہلے دعائے قنوت پڑھی، پھر میں نے اپنی والدہ سیدہ ام عبد کو بھیجا اور ان سے کہا کہ آپ نبی کریم صلی اللہ علیہ وسلم کی زوجہ محترمہ کے ہاں ٹھہریں اور اس بات کا جائزہ لیں کہ نبی کریم صلی اللہ علیہ وسلم وتر کی نماز میں دعائے قنوت کیسے پڑھتے ہیں، تو میری والدہ نے آ کر مجھے یہ بتایا: نبی کریم صلی اللہ علیہ وسلم نے رکوع سے پہلے دعائے قنوت پڑھی تھی۔ اس روایت کا ایک راوی ابان متروک ہے۔

سیدنا عبداللہ رضی اللہ عنہ بیان کرتے ہیں: نبی کریم صلی اللہ علیہ وسلم وتر کی نماز میں رکوع میں جانے سے پہلے دعائے قنوت پڑھتے تھے، سیدنا عبداللہ رضی اللہ عنہ نے فرمایا: اگلے دن میں نے اپنی والدہ کو بھیجا، تو انہوں نے بھی ایسا ہی فرمایا۔

سیدنا سوید بن غفلہ رضی اللہ عنہ بیان کرتے ہیں: میں نے سیدنا ابوبکر، سیدنا عمر، سیدنا عثمان، سیدنا علی رضی اللہ عنہم کو یہ بیان کرتے ہوئے سنا ہے: نبی کریم صلی اللہ علیہ وسلم وتر کے آخر میں دعائے قنوت پڑھتے تھے، یہ صحابہ کرام بھی ایسا ہی کیا کرتے تھے۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم وتر کی دو رکعت ادا کرنے کے بعد سلام نہیں پھیرتے تھے۔

محمد بن سیرین بیان کرتے ہیں: میں نے سیدنا انس بن مالک رضی اللہ عنہ سے دعائے قنوت کے بارے میں دریافت کیا، تو انہوں نے جواب دیا: نبی کریم صلی اللہ علیہ وسلم نے رکوع کے بعد دعائے قنوت پڑھی تھی۔

محمد بن سیرین بیان کرتے ہیں: میں نے سیدنا انس رضی اللہ عنہ سے دریافت کیا کہ نبی کریم صلی اللہ علیہ وسلم نے صبح کی نماز میں دعائے قنوت پڑھی؟ انہوں نے جواب دیا: ”جی ہاں! (پڑھی ہے)۔“ راوی بیان کرتے ہیں: پھر اس بارے میں سوال کیا گیا: کیا نبی کریم صلی اللہ علیہ وسلم نے فجر کی نماز میں دعائے قنوت پڑھی ہے؟ تو انہوں نے جواب دیا: ”جی ہاں! رکوع کے تھوڑا بعد میں پڑھی ہے۔“

ابوعثمان بیان کرتے ہیں: سیدنا ابوبکر اور سیدنا عمر رضی اللہ عنہم صبح کی نماز میں رکوع کے بعد دعائے قنوت پڑھتے تھے۔

قیس بن ابوحازم بیان کرتے ہیں: میں نے سیدنا سعد رضی اللہ عنہ کو عشاء کی نماز کے بعد ایک رکعت ادا کرتے ہوئے دیکھا، تو دریافت کیا: ”یہ کون سی نماز ہے؟“ تو انہوں نے بتایا: ”میں نے نبی کریم صلی اللہ علیہ وسلم کو ایک رکعت وتر ادا کرتے ہوئے دیکھا ہے۔“

محمد بن عبدالرحمن بیان کرتے ہیں: سیدنا سعد بن ابی وقاص رضی اللہ عنہ نے عشاء کی نماز ادا کی، پھر ایک رکعت وتر ادا کیے، تو ایک شخص نے ان سے دریافت کیا: ”اے ابواسحاق! کیا میں نے آپ کو ایک رکعت وتر ادا کرتے ہوئے نہیں دیکھا؟“ تو انہوں نے دریافت کیا، سیدنا سعد نے فرمایا: ”اے اندھے! کیا تم مجھے میرے دین کی تعلیم دو گے؟“

یہی روایت ایک اور سند کے ہمراہ بھی منقول ہے، تاہم اس میں یہ الفاظ ہیں: ”کیا تم مجھے میری نماز کا طریقہ سکھاؤ گے؟“

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم ایک رکعت وتر ادا کرتے تھے۔

عبدالرحمن بن عثمان بیان کرتے ہیں: ایک دفعہ میں نے سوچا کہ آج رات مجھے کوئی مقام ابراہیم سے الگ نہ کر سکے گا، ایک شخص آیا، اس نے میرے دونوں کندھوں کے درمیان ہاتھ رکھا، میں نے مڑ کر دیکھا، تو وہ امیر المؤمنین سیدنا عثمان غنی رضی اللہ عنہ تھے، میں پیچھے ہٹ گیا، انہوں نے قرآن کی تلاوت شروع کی اور ایک رکعت میں اسے پڑھ لیا، میں نے عرض کی: ”اے امیر المؤمنین! آپ نے ایک رکعت ادا کی،“ تو انہوں نے جواب دیا: ”یہ میرے وتر تھے۔“

ابن ابی ملیکہ بیان کرتے ہیں: ایک شخص نے سیدنا عبداللہ بن عباس رضی اللہ عنہما سے کہا: ”کیا آپ کو سیدنا معاویہ رضی اللہ عنہ پر حیرت نہیں ہوتی، وہ ایک رکعت وتر ادا کرتے ہیں؟“ تو سیدنا عبداللہ بن عباس رضی اللہ عنہما نے فرمایا: ”ٹھیک ہے، وہ فقیہ ہیں۔“

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم کی پہلی جن دو رکعت کے بعد والی رکعت وتر ہوتی تھی، ان میں آپ ”سورۃ الاعلیٰ“ اور ”سورۃ الکافرون“ کی تلاوت کرتے تھے اور پھر وتر والی رکعت میں ”سورۃ الاخلاص“، ”سورۃ الفلق“ اور ”سورۃ الناس“ کی تلاوت کرتے تھے۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم تین رکعت وتر ادا کرتے تھے، پہلی رکعت میں ”سورۃ الاعلیٰ“ اور دوسری رکعت میں ”سورۃ الکافرون“ پڑھتے اور تیسری میں ”سورۃ الاخلاص“، ”سورۃ الفلق“ اور ”سورۃ الناس“ پڑھتے تھے۔

سیدنا عبداللہ بن عمر رضی اللہ عنہما بیان کرتے ہیں: کسی شخص نے نبی کریم صلی اللہ علیہ وسلم سے وتر کے بارے میں دریافت کیا، تو آپ صلی اللہ علیہ وسلم نے ارشاد فرمایا: ”دو رکعت اور ایک رکعت کے درمیان سلام کے ذریعے فاصلہ کر دیا کرو۔“

سیدنا عبداللہ بن عمر رضی اللہ عنہما سے یہی روایت ایک اور سند کے ہمراہ منقول ہے، تاہم اس میں یہ الفاظ ہیں: ”وتر ایک رکعت ہے، تم دو اور ایک کے درمیان فصل پیدا کرو۔“

سالم اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں: نبی کریم صلی اللہ علیہ وسلم اپنی سواری کے اوپر نفل ادا کر لیتے تھے، خواہ اس کا رخ کسی بھی سمت ہو، آپ پر وتر بھی ادا کر لیتے تھے، البتہ آپ سواری پر فرض نماز ادا نہیں کرتے تھے۔

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم اپنی سواری پر وتر کی نماز ادا کر لیتے تھے۔