سنن الدارقطني

ہمام نامی راوی بیان کرتے ہیں کہ سیدنا جریر رضی اللہ عنہ نے پیشاب کیا، پھر وضو کرتے ہوئے موزوں پر مسح کر لیا۔ تو ان سے کہا گیا کہ آپ نے ایسا کیوں کیا ہے، آپ پہلے پیشاب کر چکے ہیں؟ انہوں نے جواب دیا کہ: ”میں نے نبی کریم صلی اللہ علیہ وسلم کو دیکھا، آپ صلی اللہ علیہ وسلم نے پہلے پیشاب کیا، پھر اس کے بعد آپ نے وضو کیا اور دونوں موزوں پر مسح کیا۔“ اعمش نامی راوی بیان کرتے ہیں کہ ابراہیم فرماتے ہیں کہ ان لوگوں کو یہ حدیث بہت پسند تھی، اس کی وجہ یہ ہے کہ سیدنا جریر رضی اللہ عنہ نے سورہ مائدہ نازل ہونے کے بعد اسلام قبول کیا تھا۔ عیسیٰ بن یونس نامی راوی نے اپنی روایت میں یہ نقل کیا ہے کہ ان سے کہا گیا: ”اے ابوعمرو! آپ ایسا کر رہے ہیں، آپ نے پہلے پیشاب کیا ہے؟“ تو انہوں نے جواب دیا کہ: ”مجھے اس بات سے کون سی چیز منع کرے گی جب کہ میں نے نبی کریم صلی اللہ علیہ وسلم کو اپنے موزوں پر مسح کرتے ہوئے دیکھا ہے۔“ سیدنا عبداللہ بن مسعود رضی اللہ عنہ کے شاگردوں کو یہ روایت بہت پسند تھی کیونکہ سیدنا جریر رضی اللہ عنہ نے سورہ مائدہ کے نازل ہونے کے بعد اسلام قبول کیا تھا۔

ہمام بن حارث بیان کرتے ہیں کہ میں نے سیدنا جریر رضی اللہ عنہ کو دیکھا، انہوں نے وضو کے برتن سے وضو کیا اور پھر اپنے موزوں پر مسح کر لیا۔ ان سے دریافت کیا گیا کہ: ”آپ اپنے موزوں پر مسح کر رہے ہیں؟“ تو انہوں نے جواب دیا کہ: ”میں نے نبی کریم صلی اللہ علیہ وسلم کو اپنے موزوں پر مسح کرتے ہوئے دیکھا۔“ یہ روایت سیدنا عبداللہ رضی اللہ عنہ کے شاگردوں کو بہت پسند تھی۔ وہ فرمایا کرتے تھے کہ سیدنا جریر رضی اللہ عنہ نے سورہ مائدہ کے نازل ہونے کے بعد اسلام قبول کیا تھا۔

یہی روایت ایک اور سند کے ہمراہ بھی منقول ہے۔

سیدنا جریر بن عبداللہ بجلی رضی اللہ عنہ بیان کرتے ہیں کہ: ”میں سورہ مائدہ نازل ہونے کے بعد نبی کریم صلی اللہ علیہ وسلم کی خدمت میں حاضر ہوا۔ میں نے آپ کو دیکھا کہ آپ نے اپنے موزوں پر مسح کیا تھا۔“

سیدنا جریر رضی اللہ عنہ بیان کرتے ہیں کہ: ”میں نے نبی کریم صلی اللہ علیہ وسلم کو موزوں پر مسح کرتے ہوئے دیکھا ہے۔“ لوگوں نے دریافت کیا کہ: ”کیا آپ نے سورہ مائدہ نازل ہونے کے بعد یہ دیکھا تھا؟“ انہوں نے کہا کہ: ”میں نے سورہ مائدہ نازل ہونے کے بعد اسلام قبول کیا تھا۔“

سیدہ عائشہ رضی اللہ عنہا بیان کرتی ہیں کہ: ”سورہ مائدہ نازل ہونے کے بعد نبی کریم صلی اللہ علیہ وسلم اپنے موزوں پر مسح کرتے رہے یہاں تک کہ اللہ کی بارگاہ میں حاضر ہو گئے۔“