سنن الدارقطني

سیدہ عائشہ رضی اللہ عنہا بیان کرتی ہیں: ابن زبیر رضی اللہ عنہ نے نبی کریم صلی اللہ علیہ وسلم پر پیشاب کر دیا، تو میں نے اسے سختی سے اٹھا لیا، نبی کریم صلی اللہ علیہ وسلم نے ارشاد فرمایا: ”یہ کھانا نہیں کھاتا، اس کے پیشاب کا کوئی نقصان نہیں ہے۔“ ایک روایت میں یہ الفاظ ہیں: آپ نے فرمایا: ”اسے چھوڑ دو! کیونکہ یہ کھانا نہیں کھاتا، اس کا پیشاب گندا نہیں کرتا۔“

سیدنا علی رضی اللہ عنہ روایت کرتے ہیں: نبی کریم صلی اللہ علیہ وسلم نے دودھ پینے والے بچے کے پیشاب کے بارے میں یہ بات ارشاد فرمائی: ”بچے کے پیشاب پر پانی بہا دیا جائے، اور بچی کے پیشاب کو دھو لیا جائے۔“ قتادہ نامی راوی نے یہ بات واضح کی ہے: ”یہ اس وقت تک ہے جب وہ دونوں کچھ کھاتے نہ ہوں، اگر وہ کھانا شروع کر دیں تو ان دونوں کے (پیشاب لگے ہوئے کپڑے کو) دھویا جائے گا۔“

سیدنا علی رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”لڑکے کے پیشاب پر پانی چھڑک دیا جائے گا اور لڑکی کے پیشاب کو دھویا جائے گا۔“

قتادہ نامی راوی نے یہ بات بیان کی ہے: ”یہ اس وقت ہے جب وہ کچھ کھاتے نہ ہوں، اگر وہ کھانا شروع کر دیں تو ان دونوں کے پیشاب کو دھویا جائے گا۔“

سیدنا ابوسمح رضی اللہ عنہ بیان کرتے ہیں: میں نبی کریم صلی اللہ علیہ وسلم کی خدمت کیا کرتا تھا، جب آپ نے غسل کرنا ہوتا تو آپ مجھ سے فرماتے: ”منہ دوسری طرف کر لو۔“ تو میں منہ دوسری طرف کر لیتا اور پردہ کر دیتا۔ (ایک مرتبہ آپ نے غسل کر لیا تھا) تو آپ کے پاس جناب امام حسن رضی اللہ عنہ یا شاید امام حسین رضی اللہ عنہ کو لایا گیا، انہوں نے آپ کے سینے پر پیشاب کر دیا، تو نبی کریم صلی اللہ علیہ وسلم نے پانی منگوا کر اس پر چھڑک دیا، اور ارشاد فرمایا: ”اگر لڑکا پیشاب کر دے، تو اس طرح چھڑک دیا جائے گا اور اگر لڑکی پیشاب کرے تو اسے دھویا جائے گا۔“

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم کے جسم مبارک پر یا آپ کی جلد پر نابالغ کم سن بچے کا پیشاب لگ گیا تو آپ نے اس جگہ پر پانی چھڑک دیا، جہاں پیشاب لگا تھا۔

سیدنا عبداللہ بن عباس رضی اللہ عنہما بچے کے پیشاب کے بارے میں یہ فرماتے ہیں: ”جس حصے پر وہ لگا ہو، اس حصے پر پانی چھڑک دیا جائے۔“ سیدنا عبداللہ بن عباس رضی اللہ عنہما نے یہ بات بیان کی ہے: نبی کریم صلی اللہ علیہ وسلم نے امام حسین بن علی رضی اللہ عنہ کا پیشاب لگنے پر بھی اسی طرح کیا تھا۔ اس روایت کا راوی ابراہیم، ابویحییٰ کا بیٹا ہے اور یہ ضعیف ہے۔