سنن الدارقطني

زیاد نامی راوی بیان کرتے ہیں: ایک شخص سیدنا علی بن ابوطالب رضی اللہ عنہ کی خدمت میں حاضر ہوا اور ان سے وضو کرنے کے بارے میں دریافت کیا اور بولا: ”میں دائیں ہاتھ کے ذریعہ آغاز کروں یا بائیں ہاتھ کے ذریعے آغاز کروں؟“ تو سیدنا علی رضی اللہ عنہ نے اسے جھڑکا اور پھر آپ نے پانی منگوایا اور (وضو کرتے ہوئے) دائیں ہاتھ سے پہلے بائیں ہاتھ کو دھو لیا۔

زیاد نامی راوی بیان کرتے ہیں: ایک شخص نے سیدنا علی رضی اللہ عنہ سے دریافت کیا: ”میں وضو کے دوران اپنے دائیں ہاتھ سے پہلے بائیں ہاتھ کو دھو سکتا ہوں؟“ تو سیدنا علی رضی اللہ عنہ نے اسے ڈانٹا، پھر انہوں نے پانی منگوایا اور دائیں ہاتھ سے پہلے بائیں ہاتھ کو دھو لیا۔

زیاد نامی راوی بیان کرتے ہیں: سیدنا علی رضی اللہ عنہ سے دریافت کیا گیا: ”سیدنا ابوہریرہ رضی اللہ عنہ وضو میں ہمیشہ دائیں عضو کو پہلے دھوتے ہیں؟“ تو سیدنا علی رضی اللہ عنہ نے پانی منگوایا اور وضو کرتے ہوئے بائیں طرف سے آغاز کیا۔

سیدنا علی رضی اللہ عنہ ارشاد فرماتے ہیں: ”جب میں وضو پورا کرتا ہوں تو میں اس بات کی پرواہ نہیں کرتا کہ میں نے (دائیں یا بائیں) کون سے عضو سے آغاز کیا ہے؟“

یہی روایت ایک اور سند کے ہمراہ بھی منقول ہے۔

سیدنا علی رضی اللہ عنہ ارشاد فرماتے ہیں: ”میں اس بات کی پرواہ نہیں کرتا، جب میں وضو کرنے لگوں تو دائیں ہاتھ سے پہلے بائیں ہاتھ سے آغاز کر لوں۔“

سیدنا عبداللہ (بن عباس رضی اللہ عنہما) یہ بات بیان کرتے ہیں: ”اس میں کوئی حرج نہیں ہے، تم (وضو میں) اپنے دونوں پاؤں دونوں بازوؤں سے پہلے دھو لو۔“ یہ روایت ”مرسل“ ہے اور یہ ثابت نہیں ہے۔

سیدنا عبداللہ بن مسعود رضی اللہ عنہ کے بارے میں یہ بات منقول ہے: ان سے ایسے شخص کے بارے میں دریافت کیا گیا جو وضو کرتے ہوئے بائیں طرف کے اعضاء کو پہلے دھو لیتا ہے، تو سیدنا عبداللہ رضی اللہ عنہ نے ارشاد فرمایا: ”اس میں کوئی حرج نہیں ہے۔“ یہ روایت مستند ہے۔