سنن الدارقطني

سیدنا عمر رضی اللہ عنہ کے آزاد کردہ غلام اسلم بیان کرتے ہیں: سیدنا عمر رضی اللہ عنہ کے لیے ایک مٹکے میں پانی گرم کیا جاتا تھا، وہ اس پانی کے ذریعے غسل کرتے تھے۔ اس حدیث کی سند ”صحیح“ ہے۔

سیدہ عائشہ رضی اللہ عنہا بیان کرتی ہیں: ایک مرتبہ نبی کریم صلی اللہ علیہ وسلم میرے پاس تشریف لائے، اس دوران میں نے دھوپ میں کچھ پانی گرم کیا تھا، تو آپ صلی اللہ علیہ وسلم نے فرمایا: ”اے گوری! ایسا نہ کیا کرو، کیونکہ اس کے نتیجے میں برص ہو سکتا ہے۔“ یہ روایت انتہائی ”غریب“ ہے، اس کا راوی خالد بن اسماعیل ”متروک“ ہے۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے اس بات سے منع کیا ہے، ایسے پانی کے ذریعے وضو کیا جائے جسے دھوپ میں رکھا گیا ہو، یا اس کے ذریعے غسل کیا جائے۔ نبی کریم صلی اللہ علیہ وسلم نے یہ بات ارشاد فرمائی ہے: ”اس کے نتیجہ میں برص ہو سکتا ہے۔“ اس روایت کا راوی عمر بن محمد اعسم منکر الحدیث ہے۔ اس روایت کو اس کے علاوہ اور کسی نے بھی فلیح سے نقل نہیں کیا ہے اور زہری سے منقول ہونے کے حوالے سے یہ حدیث مستند نہیں ہے۔

حسان بن ازہر بیان کرتے ہیں: سیدنا عمر بن خطاب رضی اللہ عنہ نے یہ بات ارشاد فرمائی ہے: ”دھوپ میں گرم کیے گئے پانی سے غسل نہ کرو، کیونکہ اس کے نتیجہ میں برص پیدا ہو سکتا ہے۔“