´سیدنا ابوبردہ انصاری رضی اللہ عنہ سے مروی ہے کہ` انہوں نے رسول اللہ صلی اللہ علیہ وسلم کو ارشاد فرماتے سنا ’’ حدود اللہ میں سے کسی حد کے سوا دس کوڑوں سے زیادہ سزا نہ دی جائے ۔ “ ( بخاری ومسلم )

´سیدہ عائشہ رضی اللہ عنہا سے مروی ہے کہ` نبی کریم صلی اللہ علیہ وسلم نے فرمایا ’’ صاحب عز و شرف لوگوں سے بجز حدود الٰہی ، ان کی لغزشیں درگزر کر دیا کرو ۔ “ اسے احمد ، ابوداؤد ، نسائی اور بیہقی نے روایت کیا ہے ۔

´سیدنا على رضی اللہ عنہ سے روايت ہے كہ` میں کسی پر ایسی حد نافذ نہیں کروں گا کہ وہ اس سے مر جائے اور میں اس کا غم اپنے دل میں محسوس کروں سوائے شرابی کے اگر وہ سزا میں جاں بحق ہو جائے تو میں اس کی دیت ادا کروں گا ۔ ( بخاری )

´سیدنا سعید بن زید رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا ’’ جو شخص اپنے مال و متاع کی حفاظت کرتا ہوا مارا جائے ، وہ شہید ہے ۔ “ اسے چاروں نے روایت کیا ہے اور ترمذی نے اسے صحیح قرار دیا ہے ۔

´سیدنا عبداللہ بن خباب سے روایت ہے کہ` میں نے اپنے والد کو بیان کرتے سنا وہ کہتے تھے کہ میں نے رسول اللہ صلی اللہ علیہ وسلم کو ارشاد فرماتے سنا ہے کہ ’’ میرے بعد فتنے رونما ہوں گے ۔ اے اللہ کے بندے ! تو ان میں مقتول بن جانا ، قاتل نہ بننا ۔ “ اس کو ابن ابی خیشمہ اور دارقطنی نے نکالا ہے اور احمد نے اسی طرح خالد بن عرفطہٰ سے روایت کیا ہے ۔