´سیدنا انس بن مالک رضی اللہ عنہ سے مروی ہے کہ` نبی کریم صلی اللہ علیہ وسلم نے عبدالرحمٰن بن عوف رضی اللہ عنہ کے کپڑوں پر زرد رنگ لگا ہوا دیکھا ۔ آپ صلی اللہ علیہ وسلم نے فرمایا ” یہ کیا ہے ؟ “ عبدالرحمٰن بن عوف رضی اللہ عنہ نے کہا یا رسول اللہ میں نے ایک عورت سے ایک گھٹلی کے مساوی سونا دے کر نکاح کیا ہے ۔ آپ صلی اللہ علیہ وسلم نے فرمایا ” اللہ تعالیٰ تجھے برکت دے ، ولیمہ ضرور کرو خواہ ایک بکری ہی ہو ۔ “ ( بخاری و مسلم ) اور الفاظ صحیح مسلم کے ہیں ۔

´سیدنا ابن عمر رضی اللہ عنہا سے روایت ہے کہ` رسول اللہ صلی اللہ علیہ وسلم نے فرمایا ” جب تم میں سے کسی کو دعوت ولیمہ پر مدعو کیا جائے تو اسے وہاں پہنچنا چاہیئے ۔ “ ( بخاری و مسلم ) اور مسلم کی روایت میں ہے جب تم میں سے کسی کو اس کا بھائی مدعو کرے تو اسے اس کی دعوت کو قبول کرنا چاہیئے خواہ وہ شادی ہو یا اسی طرح کی کوئی اور دعوت ۔

´سیدنا ابوہریرہ رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا ” بدترین کھانا ولیمہ کا کھانا ہے کہ آنے والے ( مستحقین ) کو روک دیا جاتا ہے اور جو آنے سے انکاری ہو اسے مدعو کیا جاتا ہے اور جس نے دعوت ( ولیمہ ) کو قبول و منظور نہ کیا تو اس نے اللہ اور اس کے رسول کی نافرمانی کی ۔ “ ( مسلم )

´سیدنا ابوہریرہ رضی اللہ عنہ سے ہی مروی ہے کہ` رسول اللہ صلی اللہ علیہ وسلم نے ارشاد فرمایا کہ ” جب تم میں سے کسی کو دعوت ( ولیمہ ) پر مدعو کیا جائے تو اسے منظور کرنا چاہیئے ۔ اگر وہ روزے سے ہو تو دعا کرے اور اگر روزے سے نہ ہو تو پھر اسے کھانا کھانا چاہیئے ۔ ‘‘ ( مسلم ) اور مسلم میں سیدنا جابر رضی اللہ عنہ سے بھی اسی طرح کی روایت ہے اور اس میں آپ صلی اللہ علیہ وسلم کا ارشاد ہے کہ ” اگر وہ چاہے تو کھانا کھا لے اور اگر وہ چاہے تو چھوڑ دے ( یعنی نہ کھائے ) ۔ ‘‘

´سیدنا ابن مسعود رضی اللہ عنہما سے روایت ہے کہ` رسول اللہ صلی اللہ علیہ وسلم نے فرمایا ” ولیمہ کا کھانا پہلے روز حق ہے اور دوسرے روز سنت اور تیسرے روز کھانا تو نمود و نمائش ہے جو شخص ریاکاری کرے گا اللہ تعالیٰ اس کی تشہیر ( یا اسے سزا ) کرے گا ۔ ‘‘ اس کو ترمذی نے روایت کیا ہے اور اسے غریب بھی قرار دیا ہے ۔ حالانکہ اس حدیث کے راوی صحیح کے راوی ہیں اور ابن ماجہ میں سیدنا انس رضی اللہ عنہ سے مروی روایت کی صورت میں اس کا ایک شاہد بھی موجود ہے ۔

´سیدہ صفیہ بنت شیبہ رضی اللہ عنہا سے مروی ہے کہ` نبی کریم صلی اللہ علیہ وسلم نے اپنی بعض بیویوں کا ولیمہ دو مد جو سے کیا ۔ ( بخاری )

´سیدنا انس رضی اللہ عنہ سے مروی ہے کہ` نبی کریم صلی اللہ علیہ وسلم نے خیبر اور مدینہ کے درمیان تین روز تک قیام کیا ۔ صفیہ رضی اللہ عنہا سے اسی مقام پر شب باشی کی تو میں نے مسلمانوں کو حضور صلی اللہ علیہ وسلم کے ولیمہ کی دعوت دی ۔ بس اس دعوت میں نہ روٹی تھی اور نہ گوشت اس تقریب میں بس یہی تھا کہ آپ صلی اللہ علیہ وسلم کے ارشاد گرامی کے مطابق چٹائیاں بچھائی گئیں اور ان پر کھجوریں ، پنیر اور مکھن چن دیا گیا ۔ ( بخاری و مسلم ) اور یہ الفاظ بخاری کے ہیں ۔

´اصحاب نبی کریم صلی اللہ علیہ وسلم میں سے ایک صحابی رضی اللہ عنہ سے مروی ہے کہ` نبی کریم صلی اللہ علیہ وسلم نے فرمایا ’’ جب دو آدمیوں نے دعوت طَعام دی ہو تو جس کا دروازہ متصل و قریب ہو اس کی دعوت قبول کرو اور ان میں سے جو پہلے دعوت دے اس کی دعوت قبول کر لو ۔ “ اسے ابوداؤد نے روایت کیا ہے اس کی سند ضعیف ہے ۔

´سیدنا ابوحجیفہ رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا کہ ’’ میں ٹیک لگا کر نہیں کھایا کرتا ۔ “ ( بخاری )

´سیدنا عمر بن ابی سلمہ رضی اللہ عنہ سے مروی ہے کہ` رسول اللہ صلی اللہ علیہ وسلم نے مجھے فرمایا ” اے بچے ! اللہ کا نام لے کر کھانا شروع کرو اور اپنے سیدھے ہاتھ سے کھاؤ اور اپنے سامنے سے کھاؤ ۔ “ ( بخاری و مسلم )

´سیدنا ابن عباس رضی اللہ عنہما سے مروی ہے کہ` نبی کریم صلی اللہ علیہ وسلم کی خدمت میں ثرید سے بھرا ہوا ایک بڑا پیالہ پیش کیا گیا ۔ آپ صلی اللہ علیہ وسلم نے ہدایت فرمائی ” پیالے کے کناروں سے کھاؤ ، درمیان سے نہ کھاؤ ، اس لیے کہ برکت کا نزول درمیان میں ہوتا ہے ۔ “ اسے چاروں نے روایت کیا ہے اور یہ الفاظ نسائی کے ہیں اور اس کی سند صحیح ہے ۔

حضرت ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے کبھی بھی کسی کھانے کو برا نہیں کہا ۔ جب کسی چیز کی خواہش ہوتی تو تناول فرما لیتے اور اگر ناپسند فرماتے تو چھوڑ دیتے ۔ ( بخاری و مسلم )

´سیدنا جابر رضی اللہ عنہ نے نبی کریم صلی اللہ علیہ وسلم سے روایت کی ہے کہ` آپ صلی اللہ علیہ وسلم نے فرمایا ” بائیں ہاتھ سے نہ کھاؤ ، اس لیے کہ شیطان بائیں ہاتھ سے کھاتا ہے ۔ “ ( مسلم )

´سیدنا ابوقتادہ رضی اللہ عنہ سے روایت ہے کہ` نبی کریم صلی اللہ علیہ وسلم نے فرمایا ” تم میں سے جب کوئی مشروب پی رہا ہو تو برتن میں سانس نہ لے ۔ “ ( بخاری و مسلم ) ابن عباس رضی اللہ عنہما سے اسی طرح کی روایت ابوداؤد میں بھی ہے اور اس میں اتنا اضافہ ہے ” اس میں پھونک نہ مارے ۔ “ اور ترمذی نے اسے صحیح قرار دیا ہے ۔