´سیدنا انس رضی اللہ عنہ نے نبی کریم صلی اللہ علیہ وسلم سے روایت کہ` ہے کہ آپ صلی اللہ علیہ وسلم نے صفیہ رضی اللہ عنہا کو آزاد کیا اور ان کی آزادی کو ان کا مہر قرار دیا ۔ ( بخاری و مسلم )

´سیدنا ابوسلمہ بن عبدالرحمٰن سے روایت ہے کہ` میں نے سیدہ عائشہ رضی اللہ عنہا سے پوچھا کہ رسول اللہ صلی اللہ علیہ وسلم ( کی بیویوں ) کا مہر کتنا تھا ؟ فرمایا آپ صلی اللہ علیہ وسلم کی ازواج مطہرات کا مہر بارہ اوقیہ اور ایک نش ، پھر انہوں نے فرمایا ، کیا تو جانتا ہے کہ نش کتنا ہوتا ہے ؟ میں نے کہا نہیں ، انہوں نے فرمایا آدھا اوقیہ ۔ اس طرح یہ پانچ سو درہم ہوئے ۔ بس یہ تھا رسول اللہ صلی اللہ علیہ وسلم کی ازواج مطہرات کا حق مہر ۔ ( صحیح مسلم )

´سیدنا ابن عباس رضی اللہ عنہما سے مروی ہے کہ` جب سیدنا علی رضی اللہ عنہ نے سیدہ فاطمہ رضی اللہ عنہا سے نکاح کیا تو رسول اللہ صلی اللہ علیہ وسلم نے فرمایا ” اسے کچھ دو ۔ “ سیدنا علی رضی اللہ عنہ نے عرض کیا ، میرے پاس کچھ بھی نہیں ۔ آپ صلی اللہ علیہ وسلم نے فرمایا ” وہ تمہاری حطمی زرہ کہاں ہے ؟ “ اسے ابوداؤد اور نسائی نے روایت کیا ہے اور حاکم نے اسے صحیح قرار دیا ہے ۔

´سیدنا عمرو بن شعیب رحمہ اللہ نے اپنے باپ سے ، انہوں نے اپنے دادا سے روایت کی ہے کہ` رسول اللہ صلی اللہ علیہ وسلم نے فرمایا ” جس عورت کو مہر عطیہ یا نکاح سے پہلے کسی وعدہ کی بنا پر بیاہ دیا جائے تو یہ اس عورت کا حق ہے اور جو عطیہ نکاح کے بعد دیا جائے تو وہ اسی کا ہے جسے دیا جائے اور وہ چیز جس کی وجہ سے مرد زیادہ تکریم کا مستحق ہے اس کی بیٹی یا اس کی بہن ہے ۔ “ اسے احمد اور ترمذی کے علاوہ چاروں نے روایت کیا ہے ۔

´سیدنا علقمہ کہتے ہیں کہ` ابن مسعود رضی اللہ عنہا سے ایسے شخص کے متعلق مسئلہ پوچھا گیا جس نے کسی عورت سے نکاح کیا اور اس کے لئے مہر مقرر نہیں کیا تھا اس سے دخول بھی نہیں کیا اور وہ فوت ہو گیا ۔ ابن مسعود رضی اللہ عنہما نے جواب دیا کہ اس عورت کو مہر اس کے خاندان کی عورتوں کے برابر ملے گا ۔ اس میں نہ کمی ہو گی اور نہ زیادتی ۔ اس پر عدت گزارنا بھی لازمی ہے اور اس کے لئے میراث بھی ہے ۔ یہ سن کر معقل بن سنان رضی اللہ عنہ اٹھے اور فرمایا کہ ہماری ایک عورت بروع بنت واشق کے بارے میں حضور صلی اللہ علیہ وسلم نے ایسا ہی فیصلہ فرمایا تھا جیسا آپ نے کیا ہے ۔ اس پر ابن مسعود رضی اللہ عنہما بہت خوش ہوئے ۔ اسے احمد اور چاروں نے روایت کیا ہے اور ترمذی نے اسے صحیح کہا ہے اور ایک جماعت نے اسے حسن قرار دیا ہے ۔

´سیدنا جابر بن عبداللہ رضی اللہ عنہما سے روایت ہے کہ` نبی کریم صلی اللہ علیہ وسلم نے فرمایا ’’ جس کسی نے مہر میں عورت کو ستو یا کھجوریں دے دیں اس نے حلال کر لیا ۔ “ اسے ابوداؤد نے روایت کیا ہے اور اس کے موقوف ہونے کی طرف اشارہ کیا ہے اور ترجیح بھی اسی کو دی ہے ۔

´سیدنا عبداللہ بن عامر بن ربیعہ نے اپنے باپ سے روایت کیا ہے کہ` نبی کریم صلی اللہ علیہ وسلم نے دو جوتیوں کے عوض ایک عورت کے نکاح کو جائز قرار دے دیا ۔ اسے ترمذی نے نقل کیا ہے اور صحیح قرار دیا ہے اور اس کے صحیح قرار دیئے جانے میں مخالفت کی گئی ہے ۔

´سیدنا سہل بن سعد رضی اللہ عنہ سے روایت ہے کہ` نبی کریم صلی اللہ علیہ وسلم نے ایک مرد کا نکاح ایک عورت کے ساتھ لوہے کی ایک انگوٹھی مہر میں دے کر کیا ۔ اسے حاکم نے روایت کی ہے ۔ یہ کتاب انکاح کے آغاز میں مذکور ایک طویل حدیث کا ایک ٹکڑا ہے ۔

´سیدنا علی رضی اللہ عنہ نے فرمایا کہ` مہر دس درہم سے کم نہیں ۔ اسے دارقطنی نے موقوف روایت کی ہے اور اس کی سند میں بھی کلام ہے ۔

´سیدنا عقبہ بن عامر رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا ” بہترین حق مہر وہ ہے جس کا ادا کرنا نہایت سہل اور آسان ہو ۔ “ اسے ابوداؤد نے روایت کی ہے اور حاکم نے اسے صحیح کہا ہے ۔

´سیدہ عائشہ رضی اللہ عنہا سے روایت ہے کہ` عمرہ بنت الجون نے رسول اللہ صلی اللہ علیہ وسلم سے اس وقت اللہ تعالیٰ کی پناہ طلب کی جب اسے آپ صلی اللہ علیہ وسلم کے پاس ( خلوت میں ) داخل کیا گیا یعنی جب آپ صلی اللہ علیہ وسلم نے اس سے نکاح کیا تو رسول اللہ صلی اللہ علیہ وسلم نے فرمایا ” تو نے ٹھیک پناہ دینے والے کی پناہ طلب کی ہے ۔ “ پھر آپ صلی اللہ علیہ وسلم نے اسے طلاق دیدی اور اسامہ رضی اللہ عنہ سے فرمایا کہ ” اس کو فائدے کے طور پر تین کپڑے دے دو ۔ “ اسے ابن ماجہ نے روایت کی ہے ۔ اس کی سند میں متروک راوی ہے ۔ اس کا اصل قصہ صحیح بخاری میں ابواسید ساعدی سے مروی ہے ۔