´سیدنا ابوبکر بن عبدالرحمٰن نے سیدنا ابوہریرہ رضی اللہ عنہ سے روایت کیا کہ` ہم نے رسول اللہ صلی اللہ علیہ وسلم کو فرماتے سنا کہ ” جو شخص مفلس کے پاس اپنی چیز بعینہ اسی حالت میں پائے تو وہ اس کا دوسرے کی بہ نسبت زیادہ حقدار ہے ۔ ( بخاری و مسلم ) ابوداؤد اور مالک نے ابوبکر بن عبدالرحمٰن سے ان الفاظ کے ساتھ مرسل روایت بیان کی ہے کہ ” کوئی آدمی اگر کوئی چیز بیچے اور خریدنے والا مفلس ہو جائے اور بیچنے والے کو اس کی قیمت میں سے ابھی کچھ بھی نہیں ملا تو ( اس صورت میں ) اگر وہ بعینہ اپنا مال پا لیتا ہے تو وہ اس مال کا زیادہ حقدار ہے اور اگر خریدار مر جائے تو پھر صاحب مال دوسرے قرض خواہوں کے برابر ہے ۔ بیہقی نے اسے موصول بیان کیا ہے اور ابوداؤد کی اتباع میں اسے ضعیف کہا ہے ۔ ابوداؤد اور ابن ماجہ نے اسے عمر بن خلدۃ کی روایت سے بیان کیا ہے کہ ہم اپنے ایک ساتھی کے لئے جو مفلس ہو گیا تھا ابوہریرہ رضی اللہ عنہ کے پاس آئے تو انہوں نے کہا کہ میں تمہارے معاملے میں رسول اللہ صلی اللہ علیہ وسلم والا ہی فیصلہ کروں گا ( اور وہ یہ تھا کہ ) جو کوئی مفلس ہو جائے یا مر جائے اور کوئی آدمی اس کے پاس اپنی چیز بعینہ پا لے تو وہ ہی اس کا سب سے زیادہ حقدار ہے ۔ حاکم نے اسے صحیح کہا ہے اور ابوداؤد نے ضعیف کہا ہے اور اسی طرح ابوداؤد نے اس زیادتی کو جو موت کے ذکر میں ہے ، ضعیف کہا ہے ۔

´سیدنا عمرو بن شرید رحمہ اللہ نے اپنے والد سے روایت کی ہے کہ` رسول اللہ صلی اللہ علیہ وسلم نے فرمایا ” مالدار آدمی کا ادائیگی قرض میں ٹال مٹول کرنا ، اس کی بے عزتی اور سزا دینے کو حلال کرنا ہے ۔ “ اسے ابوداؤد اور نسائی نے روایت کیا ہے اور بخاری نے اسے تعلیق کے طور پر نقل کیا ہے اور ابن حبان نے اس کو صحیح قرار دیا ہے ۔

´سیدنا ابوسعید خدری رضی اللہ عنہ سے روایت ہے کہ` رسول اللہ صلی اللہ علیہ وسلم کے عہد میں ایک آدمی کو پھلوں کی تجارت میں ( کافی ) نقصان ہوا جس وجہ سے اس پر قرض کا بار بہت زیادہ ہو گیا حتیٰ کہ کنگال ہو گیا ۔ رسول اللہ صلی اللہ علیہ وسلم نے فرمایا ” اس پر صدقہ کرو ۔ “ لوگوں نے اس پر صدقہ کیا ، مگر وہ صدقہ اتنا نہیں تھا کہ قرض پورا ادا ہو جاتا ۔ تو رسول اللہ صلی اللہ علیہ وسلم نے اس کے قرض خواہوں سے فرمایا ( یہی کچھ ہے ) جو کچھ ملتا ہے لے لو ۔ اس کے علاوہ تمہارے لئے کچھ بھی نہیں ہے ۔ “ ( مسلم )

´سیدنا ابن کعب بن مالک اپنے باپ سے روایت کرتے ہیں کہ` رسول اللہ صلی اللہ علیہ وسلم نے سیدنا معاذ رضی اللہ عنہ کو ان کے مال میں تصرف سے روک دیا تھا اور اس کا مال اس قرض کی رقم کے عوض میں فروخت کر دیا جو اس کے ذمہ تھی ۔ اسے دارقطنی نے روایت کیا ہے اور حاکم نے اسے صحیح قرار دیا ہے اور ابوداؤد نے اسے مرسل روایت کیا ہے اور اس کے مرسل ہونے کو قابل ترجیح ٹھہرایا ہے ۔

´سیدنا ابن عمر رضی اللہ عنہما سے مروی ہے کہ` مجھے احد کے روز نبی کریم صلی اللہ علیہ وسلم کے روبرو پیش کیا گیا ۔ اس وقت میری عمر چودہ برس تھی ۔ آپ صلی اللہ علیہ وسلم نے مجھے جنگ میں شرکت کی اجازت نہ دی ۔ پھر خندق کے روز مجھے آپ صلی اللہ علیہ وسلم کے سامنے پیش کیا گیا اس وقت میری عمر پندرہ برس تھی تو آپ صلی اللہ علیہ وسلم نے مجھے شرکت کی اجازت دے دی ۔ ( بخاری و مسلم ) اور بیہقی کی روایت میں ہے کہ آپ صلی اللہ علیہ وسلم نے مجھے اجازت نہ دی اور مجھے بالغ نہیں سمجھا ۔ ابن خزیمہ نے اسے صحیح کہا ہے ۔

´سیدنا عطیہ قرظی رضی اللہ عنہ سے روایت ہے کہ` بنوقریظہ سے جنگ کے موقع پر ہمیں نبی کریم صلی اللہ علیہ وسلم کے روبرو پیش کیا گیا ، جس کے زیر ناف بال اگے ہوتے تھے ، اسے قتل کر دیا گیا اور جس کے نہیں اگے تھے اسے چھوڑ دیا گیا ۔ میں بھی ان میں سے تھا جس کے بال نہیں اگے تھے ، لہٰذا مجھے بھی چھوڑ دیا گیا ۔ اسے پانچوں نے روایت کیا ہے ۔ ابن حبان اور حاکم نے اسے صحیح قرار دیا ہے ۔

´سیدنا عمرو بن شعیب رحمہ اللہ اپنے باپ سے اور وہ اپنے دادا سے روایت کرتے ہیں کہ` رسول اللہ علیہ وسلم نے فرمایا ” کسی عورت کا اپنے شوہر کی اجازت کے بغیر عطیہ دینا جائز نہیں “ اور ایک روایت میں ہے کہ ” کسی عورت کو اپنے ذاتی مال میں کوئی معاملہ کرنے کا اختیار نہیں جب اس کا شوہر اس کی عصمت کا مالک ہو ۔ “ اسے احمد اور اصحاب سنن نے ترمذی کے علاوہ روایت کیا ہے اور حاکم نے اسے صحیح کہا ہے ۔

´سیدنا قبیصہ بن مخارق ہلالی رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا ” بیشک تین آدمیوں میں سے کسی ایک کے سوا کسی دوسرے کے لئے سوال کرنا حلال نہیں ۔ ایک وہ آدمی جس نے ضمانت کا بوجھ اٹھایا ہو ۔ اس کے لئے تاوان و ضمانت کی مقدار تک سوال کرنا جائز ہے اس کے بعد سوال کرنا چھوڑ دے اور ایک وہ آدمی جسے کوئی آفت پہنچی ہو اور اس نے اس کا مال تباہ و برباد کر دیا ہو اس کے لئے سوال کرنا حلال ہے تاوقتیکہ اس کے لئے گزران کی کوئی سبیل نکل آئے اور ایک وہ آدمی جو فاقہ میں مبتلا ہو ، یہاں تک کہ اس کی شہادت اس کی قوم کے تین قابل اعتماد آدمی دیں ۔ اس کے لئے سوال کرنا حلال ہے ۔ “ ( مسلم )