سلسله احاديث صحيحه

سیدنا جابر رضی اللہ عنہ کہتے ہیں : رسول اللہ صلی اللہ علیہ وسلم ایک آدمی کے پاس سے گزرے ، وہ ایک چٹان پر کھڑا ہو کر نماز پڑھ رہا تھا ، آپ صلی اللہ علیہ وسلم مکہ کی ایک طرف چلے گئے ، وہاں کچھ دیر ٹھہرے اور پھر واپس آ گئے ، آپ صلی اللہ علیہ وسلم نے اس آدمی کو اسی حالت میں نماز پڑھتے ہوئے پایا ، آپ صلی اللہ علیہ وسلم نے اپنے دونوں ہاتھ جمع کیے اور فرمایا : ” لوگو ! میانہ روی کو ختیار کرو ، کیونکہ اللہ تعالیٰ اس وقت تک نہیں اکتاتا ، جب تک تم نہیں اکتا جاتے ۔ “

سیدنا سہل بن ابوامامہ بن سہل بن حنیف اپنے باپ اور وہ ان کے دادا سے روایت کرتے ہیں کہ نبی کریم صلی اللہ علیہ وسلم نے فرمایا : ” ( دین کے معاملے میں ) اپنے آپ پر سختی مت کرو ، کیونکہ تم سے پہلے والے لوگ اپنے نفسوں پر سختیاں کرنے کی وجہ سے ہلاک ہو گئے ۔ اب بھی تم ایسے لوگوں کے باقی ماندہ کو گرجا گھروں اور راہبوں کی خانقاہوں میں دیکھ سکتے ہو ۔ “