سنن نسائي

´عبداللہ بن عمر رضی اللہ عنہما سے روایت ہے کہ` رسول اللہ صلی اللہ علیہ وسلم نے تجارتی قافلے سے آگے جا کر ملنے سے منع فرمایا ۔

´عبداللہ بن عمر رضی اللہ عنہما کہتے ہیں کہ` رسول اللہ صلی اللہ علیہ وسلم نے منع فرمایا کہ آگے جا کر قافلے سے ملا جائے یہاں تک کہ وہ خود بازار آئے ( اور وہاں کا نرخ ( بھاؤ ) معلوم کر لے ) ۔ ابواسامہ نے اس کی تصدیق کی اور کہا : جی ہاں ۔

´عبداللہ بن عباس رضی اللہ عنہما کہتے ہیں کہ` نبی اکرم صلی اللہ علیہ وسلم نے منع فرمایا کہ کوئی آگے جا کر تجارتی قافلے سے ملے ، اور کوئی شہری کسی دیہاتی کا سامان بیچے ، ( راوی طاؤس کہتے ہیں : ) میں نے ابن عباس سے کہا : اس قول ” کوئی شہری دیہاتی کا سامان نہ بیچے “ کا کیا مطلب ہے ؟ انہوں نے کہا : یعنی شہری دلال نہ بنے ۔

´ابوہریرہ رضی اللہ عنہ کہتے ہیں کہ` رسول اللہ صلی اللہ علیہ وسلم نے فرمایا : ” آگے جا کر تجارتی قافلے سے نہ ملو ، جو اس سے جا کر ملا اور اس سے کوئی چیز خرید لی ، جب اس کا مالک بازار آئے تو اسے اختیار ہو گا “ ۱؎ ۔