´سعید بن مسیب ، ابوسلمہ ، ابوبکر بن عبدالرحمٰن اور ابن ابی حثمہ چاروں ابوہریرہ رضی اللہ عنہ سے روایت کرتے ہیں کہ` رسول اللہ صلی اللہ علیہ وسلم نے اس دن نہ تو سلام سے پہلے سجدہ ( سہو ) کیا ، اور نہ ہی اس کے بعد ۔

´عراک بن مالک ابوہریرہ رضی اللہ عنہ سے روایت کرتے ہیں کہ` رسول اللہ صلی اللہ علیہ وسلم نے ذوالیدین والے دن سلام پھیرنے کے بعد دو سجدے کئے ۔

´محمد بن سیرین ابوہریرہ رضی اللہ عنہ سے ،` اور وہ رسول اللہ صلی اللہ علیہ وسلم اسی کے مثل روایت کرتے ہیں ۔

´ابن سیرین ابوہریرہ رضی اللہ عنہ سے روایت کرتے ہیں کہ` نبی اکرم صلی اللہ علیہ وسلم نے بھول ہو جانے کی صورت میں سلام پھیرنے کے بعد سجدہ ( سہو ) کیا ۔

´عمران بن حصین رضی اللہ عنہما سے روایت ہے کہ` نبی اکرم صلی اللہ علیہ وسلم نے ان لوگوں کو نماز پڑھائی ، آپ کو سہو ہو گیا ، تو آپ نے دو سجدے ( سہو کے ) کیے ، پھر سلام پھیرا ۱؎ ۔

´عمران بن حصین رضی اللہ عنہما کہتے ہیں کہ` رسول اللہ صلی اللہ علیہ وسلم نے عصر کی تین رکعت پر سلام پھیر دیا ، پھر آپ اپنے حجرے میں چلے گئے ، تو آپ کی طرف اٹھ کر خرباق نامی ایک شخص گئے اور پوچھا : اللہ کے رسول ! کیا نماز کم ہو گئی ہے ؟ تو آپ غصہ کی حالت میں اپنی چادر گھسیٹتے ہوئے باہر تشریف لائے ، اور پوچھا : ” کیا یہ سچ کہہ رہے ہیں ؟ “ لوگوں نے کہا : جی ہاں ، تو آپ کھڑے ہوئے ، اور ( جو چھوٹ گئی تھی ) اسے پڑھایا پھر سلام پھیرا ، پھر اس رکعت کے ( چھوٹ جانے کے سبب ) دو سجدے کیے ، پھر سلام پھیرا ۔