´ابوسعید خدری رضی اللہ عنہ سے روایت ہے کہ` نبی اکرم صلی اللہ علیہ وسلم نے فرمایا : ” میرا ایک حوض ہے ، کعبہ سے لے کر بیت المقدس تک ، دودھ جیسا سفید ہے ، اس کے برتن آسمان کے ستاروں کی تعداد میں ہیں ، اور قیامت کے دن میرے پیروکار اور متبعین تمام انبیاء کے پیروکاروں اور متبعین سے زیادہ ہوں گے “ ۔

´حذیفہ رضی اللہ عنہ کہتے ہیں کہ` رسول اللہ صلی اللہ علیہ وسلم نے فرمایا : ” میرا حوض ایلہ سے عدن تک کے فاصلے سے بھی زیادہ بڑا ہے ، اس ذات کی قسم جس کے ہاتھ میں میری جان ہے ! اس کے برتن ستاروں کی تعداد سے زیادہ ہیں ، اس کا پانی دودھ سے زیادہ سفید اور شہد سے زیادہ میٹھا ہے ، اس ذات کی قسم جس کے ہاتھ میں میری جان ہے ، میں اس حوض سے کچھ لوگوں کو ایسے ہی دھتکاروں اور بھگاؤں گا جیسے کوئی آدمی اجنبی اونٹ کو اپنے حوض سے دھتکارتا اور بھگاتا ہے “ ، سوال کیا گیا : اللہ کے رسول ! کیا آپ ہمیں پہچان لیں گے ؟ آپ صلی اللہ علیہ وسلم نے فرمایا : ” ہاں ، تم میرے پاس اس حالت میں آؤ گے کہ تمہارے ہاتھ اور منہ وضو کے نشان سے روشن ہوں گے ، اور یہ نشان تمہارے علاوہ اور کسی کا نہیں ہو گا “ ۔

´ابوسلام حبشی کہتے ہیں کہ` عمر بن عبدالعزیز نے مجھ کو بلا بھیجا ، میں ان کے پاس ڈاک کے گھوڑے پر بیٹھ کر آیا ، جب میں پہنچا تو انہوں نے کہا : اے ابو سلام ! ہم نے آپ کو زحمت دی کہ آپ کو تیز سواری سے آنا پڑا ، میں نے کہا : بیشک ، اللہ کی قسم ! اے امیر المؤمنین ! ( ہاں واقعی تکلیف ہوئی ہے ) ، انہوں نے کہا ، اللہ کی قسم ، میں آپ کو تکلیف نہیں دینا چاہتا تھا ، لیکن مجھے پتا چلا کہ آپ ثوبان رضی اللہ عنہ ( رسول اللہ صلی اللہ علیہ وسلم کے غلام ) سے حوض کوثر کے بارے میں ایک حدیث روایت کرتے ہیں تو میں نے چاہا کہ یہ حدیث براہ راست آپ سے سن لوں ، تو میں نے کہا کہ مجھ سے ثوبان رضی اللہ عنہ نے بیان کیا ہے کہ رسول اللہ صلی اللہ علیہ وسلم نے فرمایا : ” میرا حوض اتنا بڑا ہے جتنا عدن سے ایلہ تک کا فاصلہ ، دودھ سے زیادہ سفید ، اور شہد سے زیادہ میٹھا ، اس کی پیالیاں آسمان کے تاروں کی تعداد کے برابر ہیں ، جو شخص اس میں سے ایک گھونٹ پی لے گا کبھی پیاسا نہ ہو گا ، اور سب سے پہلے جو لوگ میرے پاس آئیں گے ( پانی پینے ) وہ میلے کچیلے کپڑوں اور پراگندہ بالوں والے فقراء مہاجرین ہوں گے ، جو ناز و نعم میں پلی عورتوں سے نکاح نہیں کر سکتے اور نہ ان کے لیے دروازے کھولے جاتے “ ۔ ابو سلام کہتے ہیں کہ عمر بن عبدالعزیز رونے لگے یہاں تک کہ ان کی داڑھی تر ہو گئی ، پھر بولے : میں نے تو ناز و نعم والی عورتوں سے نکاح بھی کیا ، اور میرے لیے دروازے بھی کھلے ، اب میں جو کپڑا پہنوں گا ، اس کو ہرگز نہ دھووں گا ، جب تک وہ میلا نہ ہو جائے ، اور اپنے سر میں تیل نہ ڈالوں گا جب تک کہ وہ پراگندہ نہ ہو جائے ۔

´انس رضی اللہ عنہ کہتے ہیں کہ` رسول اللہ صلی اللہ علیہ وسلم نے فرمایا : ” میرے حوض کے دونوں کناروں کا فاصلہ اتنا ہے جتنا صنعاء اور مدینہ میں یا مدینہ و عمان میں ہے “ ۔

´انس بن مالک رضی اللہ عنہ کہتے ہیں کہ` نبی اکرم صلی اللہ علیہ وسلم نے فرمایا : ” حوض کوثر پر چاندی اور سونے کے جگ آسمان کے تاروں کی تعداد کے برابر ہوں گے “ ۔

´ابوہریرہ رضی اللہ عنہ کہتے ہیں کہ` نبی اکرم صلی اللہ علیہ وسلم قبرستان میں آئے ، اور قبر والوں کو سلام کرتے ہوئے فرمایا : «السلام عليكم دار قوم مؤمنين وإنا إن شاء الله تعالى بكم لاحقون» ” اے مومن قوم کے گھر والو ! آپ پر سلامتی ہو ، ان شاءاللہ ہم آپ لوگوں سے جلد ہی ملنے والے ہیں “ ، پھر فرمایا : ” میری آرزو ہے کہ میں اپنے بھائیوں کو دیکھوں “ ، صحابہ کرام رضی اللہ عنہم نے عرض کیا ، کیا ہم آپ کے بھائی نہیں ہیں ؟ فرمایا : ” تم سب میرے اصحاب ہو ، میرے بھائی وہ ہیں جو میرے بعد آئیں گے ، اور میں حوض پر تمہارا پیش رو ہوں گا “ ، صحابہ کرام رضی اللہ عنہم نے عرض کیا : اللہ کے رسول ! آپ کی امت میں سے جو لوگ ابھی نہیں آئے ہیں آپ ان کو کیسے پہچانیں گے ؟ آپ صلی اللہ علیہ وسلم نے فرمایا : ” کیا وہ آدمی جس کے گھوڑے سفید پیشانی ، اور سفید ہاتھ پاؤں والے ہوں خالص کالے گھوڑوں کے بیچ میں ان کو نہیں پہچانے گا “ ؟ صحابہ کرام رضی اللہ عنہم نے کہا : کیوں نہیں ، آپ صلی اللہ علیہ وسلم نے فرمایا : ” میرے اخوان قیامت کے دن وضو کے نشانات سے ( اسی طرح ) سفید پیشانی ، اور سفید ہاتھ پاؤں ہو کر آئیں گے “ ، پھر فرمایا : ” میں حوض پر تمہارا پیش رو ہوں گا کچھ لوگ میرے حوض سے بھولے بھٹکے اونٹ کی طرح ہانک دئیے جائیں گے ، میں انہیں پکاروں گا کہ ادھر آؤ ، تو کہا جائے گا کہ انہوں نے تمہارے بعد دین کو بدل دیا ، اور وہ الٹے پاؤں لوٹ جائیں گے ، میں کہوں گا : خبردار ! دور ہٹو ، دور ہٹو “ ۔