سنن ابن ماجه

´عبداللہ بن شخیر رضی اللہ عنہ کہتے ہیں کہ` رسول اللہ صلی اللہ علیہ وسلم نے فرمایا : ” مسلمان کی گمشدہ چیز آگ کا شعلہ ہے “ ۱؎ ۔

´منذر بن جریر کہتے ہیں کہ` میں اپنے والد کے ساتھ بوازیج میں تھا کہ گایوں کا ریوڑ نکلا ، تو آپ نے ان میں ایک اجنبی قسم کی گائے دیکھی تو پوچھا : یہ گائے کیسی ہے ؟ لوگوں نے کہا : کسی اور کی گائے ہے ، جو ہماری گایوں کے ساتھ آ گئی ہے ، انہوں نے حکم دیا ، اور وہ ہانک کر نکال دی گئی یہاں تک کہ وہ نظر سے اوجھل ہو گئی ، پھر کہا کہ میں نے رسول اللہ صلی اللہ علیہ وسلم کو فرماتے سنا ہے : ” گمشدہ چیز کو وہی اپنے پاس رکھتا ہے جو گمراہ ہو “ ۱؎ ۔

´زید بن خالد جہنی رضی اللہ عنہ کہتے ہیں کہ` نبی اکرم صلی اللہ علیہ وسلم سے گمشدہ اونٹ کے متعلق پوچھا گیا ، تو آپ غضب ناک ہو گئے ، اور غصے سے آپ کے رخسار مبارک سرخ ہو گئے اور فرمایا : ” تم کو اس سے کیا سروکار ، اس کے ساتھ اس کا جوتا اور مشکیزہ ہے ، وہ خود پانی پر جا سکتا ہے اور درخت سے کھا سکتا ہے ، یہاں تک کہ اس کا مالک اسے پا لیتا ہے “ پھر آپ صلی اللہ علیہ وسلم سے گمشدہ بکری کے بارے پوچھا گیا ، تو آپ صلی اللہ علیہ وسلم نے فرمایا : ” اس کو لے لو اس لیے کہ وہ یا تو تمہاری ہے یا تمہارے بھائی کی یا بھیڑیئے کی “ ۱؎ پھر آپ سے گری پڑی چیز کے متعلق پوچھا گیا ، تو آپ صلی اللہ علیہ وسلم نے فرمایا : ” اس کی تھیلی اور بندھن کو پہچان لو ، اور ایک سال تک اس کا اعلان کرتے رہو ، ۲؎ اگر اس کی شناخت پہچان ہو جائے تو ٹھیک ہے ، ورنہ اسے اپنے مال میں شامل کر لو “ ۔