سنن ابن ماجه

´ابوہریرہ رضی اللہ عنہ سے روایت ہے کہ` نبی اکرم صلی اللہ علیہ وسلم نے فرمایا : ” جو شخص بھی علم دین یاد رکھتے ہوئے اسے چھپائے ، تو اسے قیامت کے دن آگ کی لگام پہنا کر لایا جائے گا “ ۔

´اس سند سے بھی` عمارہ بن زاذان نے اسی طرح کی حدیث ذکر کی ہے ۔

´اس سند سے بھی` عمارہ بن زاذان نے اسی طرح کی حدیث ذکر کی ہے ۔

´ابوہریرہ رضی اللہ عنہ فرماتے ہیں` اللہ کی قسم ! اگر قرآن کریم کی دو آیتیں نہ ہوتیں تو میں نبی اکرم صلی اللہ علیہ وسلم سے کبھی بھی کوئی نہ حدیث بیان کرتا ، اور دو آیتیں یہ ہیں : «إن الذين يكتمون ما أنزل الله من الكتاب» إلى آخر الآيتين ” بیشک جو لوگ اللہ کی اتاری ہوئی کتاب کو چھپاتے ہیں اور اس کے بدلہ میں معمولی قیمت لیتے ہیں ، وہ اپنے پیٹ میں جہنم کی آگ بھر رہے ہیں ، قیامت کے دن اللہ نہ تو ان سے بات کرے گا اور نہ ہی ان کو معاف کرے گا ، اور ان کو سخت عذاب پہنچے گا ، یہی وہ لوگ ہیں جنہوں نے گمراہی کو ہدایت کے بدلے خرید لیا اور عذاب کو مغفرت کے بدلے ، پس وہ کیا ہی صبر کرنے والے ہیں جہنم پر “ ( سورة البقرة : 174-175 ) ۱؎ ۔

´جابر رضی اللہ عنہ کہتے ہیں کہ` رسول اللہ صلی اللہ علیہ وسلم نے فرمایا : ” جب اس امت کے خلف ( بعد والے ) اپنے سلف ( پہلے والوں ) کو برا بھلا کہنے لگیں ، تو جس شخص نے اس وقت ایک حدیث بھی چھپائی اس نے اللہ کا نازل کردہ فرمان چھپایا “ ۱؎ ۔

´انس بن مالک رضی اللہ عنہ کہتے ہیں کہ` میں نے رسول اللہ صلی اللہ علیہ وسلم کو فرماتے ہوئے سنا : ” جس شخص سے دین کے کسی مسئلہ کے متعلق پوچھا گیا ، اور باوجود علم کے اس نے اسے چھپایا ، تو قیامت کے دن اسے آگ کی لگام پہنائی جائے گی “ ۔

´ابو سعید خدری رضی اللہ عنہ کہتے ہیں کہ` رسول اللہ صلی اللہ علیہ وسلم نے فرمایا : ” جس شخص نے کوئی ایسا علم چھپایا جس سے اللہ تعالیٰ لوگوں کے دینی امور میں نفع دیتا ہے ، تو اللہ اسے قیامت کے دن آگ کی لگام پہنائے گا “ ۔

´ابوہریرہ رضی اللہ عنہ کہتے ہیں کہ` رسول اللہ صلی اللہ علیہ وسلم نے فرمایا : ” جس شخص سے دین کا کوئی مسئلہ پوچھا گیا ، اور جاننے کے باوجود اس نے اس کو چھپایا ، تو قیامت کے دن اسے آگ کی لگام پہنائی جائے گی “ ۔