سیدنا انس بن مالک رضی اللہ عنہ بیان کرتے ہیں: ایک دن نبی اکرم صلی اللہ علیہ وسلم مسجد میں تشریف لائے، آپ نے موٹی نجانی چادر اوڑھی ہوئی تھی۔ ایک دیہاتی آپ کے پیچھے سے آیا۔ اس نے آپ کی چادر کا کنارہ پکڑا اور اسے کھینچا، تو اس چادر کا نشان نبی اکرم صلی اللہ علیہ وسلم کی گردن پر بن گیا، اس نے کہا: اے سیدنا محمد! آپ کے پاس اللہ تعالیٰ کا جو مال ہے اس میں سے ہمیں بھی عطا کریں، نبی اکرم صلی اللہ علیہ وسلم نے اس کی طرف رخ کیا آپ مسکرائے اور فرمایا: اسے کچھ دے دو!