سیدنا مقداد بن اسود رضی اللہ عنہ بیان کرتے ہیں: سیدنا علی بن ابوطالب رضی اللہ عنہ نے انہیں یہ ہدایت کی کہ وہ نبی اکرم صلی اللہ علیہ وسلم سے ایسے شخص کے بارے میں دریافت کریں جو اپنی بیوی کے قریب ہوتا ہے، تو اس کی مذی خارج ہو جاتی ہے۔ ایسے شخص پر کیا چیز لازم ہو گی (سیدنا علی رضی اللہ عنہ نے وضاحت کی) کہ نبی اکرم صلی اللہ علیہ وسلم کی صاحب زادی میری اہلیہ ہے۔ اس لئے مجھے خود نبی اکرم صلی اللہ علیہ وسلم سے دریافت کرتے ہوئے شرم آتی ہے۔ سیدنا مقداد رضی اللہ عنہ بیان کرتے ہیں۔ میں نے نبی اکرم صلی اللہ علیہ وسلم سے اس بارے میں دریافت کیا، تو آپ نے ارشاد فرمایا: جب کوئی شخص اس طرح کی صورت حال کا سامنا کرے تو اسے اپنی شرمگاہ پر پانی چھڑک لینا چاہئے اور نماز کے وضو کی طرح وضو کر لینا چاہئے۔ (امام ابن حبان رحمہ اللہ فرماتے ہیں:) ان روایات کو سننے والے بعض ایسے افراد جنہوں نے علم حدیث کو اس کے اصل ماخذ سے حاصل نہیں کیا اور حقیقت کو اس کے اپنے دائرے میں نہیں گھمایا۔ وہ اس غلط فہمی کا شکار ہو جاتے ہیں، ان روایات کے درمیان تضاد اور اختلاف پایا جاتا ہے، کیونکہ ابوعبدالرحمن سلمی کی نقل کردہ روایت میں یہ ہے، میں نے نبی اکرم صلی اللہ علیہ وسلم سے سوال کیا جبکہ ایاس بن خلیفہ کی نقل کردہ روایت میں ہے، انہوں نے سیدنا عمار رضی اللہ عنہ کو ہدایت کی تھی کہ وہ نبی اکرم صلی اللہ علیہ وسلم سے سوال کریں جبکہ سلیمان بن یسار کی نقل کردہ روایت میں ہے، انہوں نے سیدنا مقداد رضی اللہ عنہ کو ہدایت کی تھی کہ وہ نبی اکرم صلی اللہ علیہ وسلم سے سوال کریں۔ حالانکہ ان روایات کے درمیان کوئی اختلاف میں ہے، کیونکہ اس بات کا احتمال موجود ہے، پہلے سیدنا علی رضی اللہ عنہ نے سیدنا عمار کو یہ حکم دیا کہ نبی اکرم صلی اللہ علیہ وسلم سے سوال کریں۔ انہوں نے نبی اکرم صلی اللہ علیہ وسلم سے سوال کیا۔ پھر آپ نے سیدنا مقداد رضی اللہ عنہ کو یہ حکم دیا ہو کہ وہ نبی صلی اللہ علیہ وسلم سے سوال کریں، تو انہوں نے بھی نبی اکرم صلی اللہ علیہ وسلم سے سوال کیا ہو۔ پھر سیدنا علی رضی اللہ عنہ نے بذات خود نبی اکرم صلی اللہ علیہ وسلم سے یہ سوال کیا ہو۔ میں نے جو چیز ذکر کی ہے اس کے صحیح ہونے کی دلیل یہ ہے، ان میں سے ہر روایت کا متن دوسری روایت کے متن سے مختلف ہے۔ ‘ کیونکہ ابوعبدالرحمن سلمی کی نقل کردہ روایت میں یہ الفاظ ہیں: ” میں ایک ایسا شخص تھا ‘ جس کی مذی بکثرت خارج ہوتی تھی۔ پھر میں نے نبی اکرم صلی اللہ علیہ وسلم سے سوال کیا، تو نبی اکرم صلی اللہ علیہ وسلم نے ارشاد فرمایا: تم جب پانی کو دیکھو تو غسل کرو ۔“ ایاس بن خلیفہ کی روایت میں الفاظ ہیں۔ ” سیدنا علی رضی اللہ عنہ نے سیدنا عمار کو یہ حکم دیا کہ وہ نبی اکرم صلی اللہ علیہ وسلم سے سوال کریں نبی اکرم صلی اللہ علیہ وسلم نے ارشاد فرمایا: وہ شخص اپنی شرمگاہ کو دھو کر وضو کر لے۔ اس روایت میں منی کا تذکرہ نہیں ہے، جو ابوعبدالرحمن کی نقل کردہ روایت میں ہے، جبکہ سیدنا مقداد رضی اللہ عنہ بن اسود کی نقل کردہ روایت میں مذکور ہے، انہوں نے پہلے سوال کیا تھا، تو یہ پہلے والے دو سوالات نہیں ہیں جو ہم پہلے ذکر کر چکے ہیں، سیدنا مقداد رضی اللہ عنہ کی روایت میں یہ ہے کہ سیدنا علی بن ابوطالب رضی اللہ عنہ نے انہیں یہ حکم دیا تھا کہ وہ نبی اکرم صلی اللہ علیہ وسلم سے ایسے شخص کے بارے میں سوال کریں جو اپنی بیوی کے قریب ہوتا ہے، تو اس کی منی خارج ہوتی ہے، تو ایسے شخص پر کیا بات لازم ہو گی کیونکہ نبی اکرم صلی اللہ علیہ وسلم کی صاحبزادی میری اہلیہ ہے۔ میں (اس لئے براہ راست آپ سے یہ سوال نہیں کر سکتا) تو ہم نے جو چیز ذکر کی ہے وہ اس بات پر دلالت کرتی ہے، یہ مختلف سوالات ہیں جو مختلف مواقعوں پر کئے گئے جن کی اپنی مخصوص علتیں ہیں۔ ان کے درمیان کوئی تضاد اور اختلاف نہیں ہے۔