الفتح الربانی

فوائد: … ۱۔ اس فصل کی احادیث سے معلوم ہوا کہ کلام کرنا اللہ تعالیٰ کی صفات میں سے ایک صفت ہے۔
۲۔ یہ بھی معلوم ہوا کہ قیامت کے دن اللہ تعالیٰ ہر بندے کے ساتھ براہِ راست کلام کرے گا۔ اور ان کے درمیان کوئی ترجمان نہیں ہوگا۔
۳۔ نیز معلوم ہوا کہ انسانوں کے اعمال کو قیامت کے دن ایک شکل اور جسم دیا جائے گا اور وہ اعمال انسان کو دکھائی دیں گے۔
۴۔ نیز معلوم ہوا کہ جہنم سے بچاؤ کے لیے انسان کو تدبیر کرتے رہنا چاہیے۔
۵۔ جہنم سے بچنے کے لیے کسی بھی نیکی کا موقعہ ملے اسے انسان حقیر نہ سمجھے۔ حتیٰ کہ اگر اللہ تعالیٰ کی راہ میں پوری کھجور دینے کی توفیق نہ ہو تو آدھی کھجور ہی دے دے اگر یہ نیکی اللہ تعالیٰ کے ہاں قبول ہوجائے تو انسان کی مغفرت اور بلندی درجات کا ذریعہ بنے گی۔ ان شاء اللہ تعالیٰ!
۶۔ نیز معلوم ہوا کہ اللہ تعالیٰ نے انسان کو مال و اولاد کے علاوہ دیکھنے اور سننے وغیرہ کی بھی جو صلاحیتیں اور نعمتیں عطا کی ہیں۔ اللہ تعالیٰ قیامت کے دن ان کا ذکر کر کے بندوں سے پوچھے گا کہ کیا میں نے تمہیں فلاں فلاں نعمتوں سے نہیں نواز ا تھا۔ ان کے نتیجے میں تم نے کیا کچھ کیا؟
۷۔ یہ بھی معلوم ہوا کہ انسان کے لیے اللہ تعالیٰ کے ہاں نیکیوں کا ثواب بے حد و بے حساب ہے۔ انسان اگر اپنی پیدائش کے دن سے بوڑھا ہو کر مرنے تک ساری زندگی اللہ تعالیٰ کی اطاعت میں گزار دے۔ لیکن جب قیامت کے دن اعمال کا بدلہ اور ثواب دیکھے گا۔ تو اپنی زندگی بھر کی نیکیوں کو وہ معمولی سمجھے گا اور تمنا کرے گا کہ کاش مجھے دنیا میں واپس بھیج دیا جائے تو میں مزید نیکیاں کر کے اللہ تعالیٰ سے مزید اجر و ثواب حاصل کر سکوں۔
۸۔ یہ بھی معلوم ہوا کہ جہنم کا عذاب بہت سخت ہے۔ اور مال و دولت چونکہ انسان کے پاس نہیں ہوگا۔ اس لیے وہاں سے نجات کی کوئی صورت نہیں ہوگی۔ جہنمی لوگ تمنا کریں گے کہ کاش اگر ہمارے پاس دنیا بھر کی دولت ہو تو ہم وہ ادا کر کے جہنم سے رہائی کے لیے فدیہ دے دیں مگر ایسا کرنا ممکن نہیں ہوگا۔ اللہ تعالیٰ فرمائے گا کہ میں نے تو تم سے اس سے بھی آسان مطالبہ کیا تھا کہ تم میرے ساتھ شرک نہیں کرو۔
۹۔ اس سے یہ بھی معلوم ہوا کہ مشرک کا انجام جہنم ہے۔
۱۰۔ نیز معلوم ہوا کہ اللہ تعالیٰ سے آسان حساب کی دعا بھی کرنی چاہیے کہ اللہ تعالیٰ قیامت کے دن ہمارا آسان حساب لے۔ اس سے مراد یہ ہے کہ وہ ہمارے اعمال دیکھنے کے باوجود درگزر کر دے۔
۱۱۔ اور اگر کسی کے بارے میں اللہ تعالیٰ نے ایسی پرسش کر لی کہ تم نے فلاں فلاں کام کیوں کیے اور فلاں کام نہیں کیے؟ تو ایسا آدمی ہلاک ہوجائے گا۔ اس کی نجات کی کوئی امید نہیں۔ (نسأل اللہ تعالیٰ العافیۃ، آمین)
۱۲۔ نیز معلوم ہوا کہ مسلمان کو اگر کوئی دکھ، درد، تکلیف یا پریشانی لاحق ہوحتیٰ کہ اسے کانٹا بھی چبھے تو یہ اس کے گناہوں کا کفارہ ہوتا ہے۔
۱۳۔ قیامت کے دن کسی جن یا انسان سے اعمال کے بارے میں پوچھنے کی ضرورت ہی نہیں ہوگی۔ ہر آدمی اپنے چہرے سے پہچانا جائے گا کہ یہ کیسے اعمال کر کے آیا اور اس کا انجام کیا ہونے والا ہے؟