الفتح الربانی

فوائد: … فاروق اعظم رضی اللہ عنہ کی تجہیز و تکفین کے بعد خلیفہ کے انتخاب کامسئلہ پیش ہوا اور دو دن تک اس پر بحث ہوتی رہی، لیکن کوئی فیصلہ نہ ہوا، آخر تیسرے دن سیدنا عبد الرحمن بن عوف رضی اللہ عنہ نے کہا کہ وصیت کے مطابق خلافت چھ آدمیوں میں دائر ہے، لیکن اس کو تین شخصوں تک محدود کر دینا چاہیے اور جو اپنے خیال میں جس کو مستحق سمجھتا ہو، اس کا نام پیش کرے۔سیدنا زبیر رضی اللہ عنہ نے سیدنا علی رضی اللہ عنہ کا، سیدنا سعد رضی اللہ عنہ نے سیدنا عبد الرحمن بن عوف رضی اللہ عنہ کا اور سیدنا طلحہ رضی اللہ عنہ نے سیدنا عثمان رضی اللہ عنہ کا نام پیش کیا، پھر سیدنا عبد الرحمن بن عوف رضی اللہ عنہ نے اپنے حق سے باز آنے کا اعلان کر دیا اور کہا: اب معاملہ دو آدمیوں میں منحصر ہو گیا ہے، ان دونوں میں سے جو کتاب اللہ اور سنت ِ رسول اللہ صلی اللہ علیہ وآلہ وسلم اور سنت ِ شیخین کی پابندی کا عہد کرے گا، اس کے ہاتھ پر بیعت کی جائے گی، اس کے بعد علیحدہ علیحدہ سیدنا علی رضی اللہ عنہ اور سیدنا عثمان رضی اللہ عنہ سے کہا: آپ دونوں اس کا فیصلہ میرے ہاتھ میں دے دیں، اس پر ان دونوں کی رضامندی لینے کے بعد سیدنا عبد الرحمن بن عوف رضی اللہ عنہ اور تمام صحابہ مسجد میں جمع ہوئے، سیدنا عبد الرحمن رضی اللہ عنہ نے ایک مختصر لیکن مؤثر تقریر کی اور سیدنا عثمان رضی اللہ عنہ کے ہاتھ پر بیعت کی، اس کے بعد سیدنا علی رضی اللہ عنہ نے بیعت کرنے کے لیے ہاتھ بڑھایا، سیدنا علی رضی اللہ عنہ کا بیعت کرنا ہی تھا کہ تمام حاضرین بیعت کے لیے ٹوٹ پڑے، اس طرح محرم کی ۴ تاریخ سنہ ۲۴ ہجری دوشنبہ کے دن سیدنا عثمان رضی اللہ عنہ اتفاقِ عام کے ساتھ مسند نشین خلافت ہوئے اور دنیائے اسلام کی عنانِ حکومت اپنے ہاتھ میں لی۔