سیدہ عائشہ رضی اللہ عنہا بیان کرتی ہیں: ایک مرتبہ سورج گرہن ہو گیا، نبی کریم صلی اللہ علیہ وسلم نے ایک شخص کو حکم دیا، اس نے اعلان کیا کہ نماز باجماعت ادا کی جائے گی۔ ابن ابی داؤد نامی راوی کہتے ہیں: یہ سنت ہے اور اسے نقل کرنے میں اہل مدینہ منورہ منفرد ہیں، زہری کے حوالے سے عبدالرحمن نامی راوی نے یہ بات نقل کی ہے: نماز کسوف کے لیے اعلان کیا جائے۔

یہی روایت ایک اور سند کے ہمراہ بھی منقول ہے۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم کی حیات مبارکہ میں ایک مرتبہ سورج گرہن ہوا۔ نبی کریم صلی اللہ علیہ وسلم مسجد تشریف لے گئے۔ آپ صلی اللہ علیہ وسلم کھڑے ہوئے، آپ صلی اللہ علیہ وسلم نے تکبیر کہی۔ لوگوں نے آپ کے پیچھے صف قائم کر لی۔ نبی کریم صلی اللہ علیہ وسلم نے طویل قراءت کی۔ پھر آپ تکبیر کہتے ہوئے رکوع میں چلے گئے اور آپ نے طویل رکوع کیا۔ پھر آپ نے رکوع سے سر اٹھایا اور ”سمع اللہ لمن حمدہ ربنا ولك الحمد“ پڑھا اور پھر آپ نے کھڑے ہو کر قراءت کرنا شروع کی، لیکن یہ پہلے والی قراءت سے کم تھی۔ پھر اس کے بعد آپ صلی اللہ علیہ وسلم نے تکبیر کہتے ہوئے طویل رکوع کیا، لیکن یہ پہلے والے رکوع سے کم تھا۔ پھر اس کے بعد آپ صلی اللہ علیہ وسلم نے ”سمع اللہ لمن حمدہ ربنا ولك الحمد“ پڑھا۔ پھر آپ صلی اللہ علیہ وسلم نے دوسری رکعت میں بھی اسی طرح کیا اور آپ نے ان دو رکعت میں چار مرتبہ رکوع کیا اور چار مرتبہ سجدہ کیا۔ آپ صلی اللہ علیہ وسلم کی نماز ختم کرنے سے پہلے سورج روشن ہو چکا تھا۔

سیدنا عبداللہ بن عباس رضی اللہ عنہما یہ بیان کرتے ہیں: نبی کریم صلی اللہ علیہ وسلم نے سورج گرہن کی نماز ادا کی ہے۔ یہ روایت اسی طرح منقول ہے، جیسے سیدہ عائشہ رضی اللہ عنہا کے حوالے سے نبی کریم صلی اللہ علیہ وسلم سے منقول ہے، آپ نے ہر ایک رکعت میں دو مرتبہ رکوع کیا تھا۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے (سورج گرہن کی نماز میں) طویل قراءت کی تھی، آپ صلی اللہ علیہ وسلم نے بلند آواز میں قراءت کی تھی، راوی کہتے ہیں: اس سے مراد یہ ہے آپ صلی اللہ علیہ وسلم نے سورج گرہن کی نماز میں ایسا کیا تھا۔ ابن ابی داؤد نامی راوی بیان کرتے ہیں: بلند آواز میں قراءت کرنے کو نقل کرنے میں اہل مدینہ منفرد ہیں۔

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے چاند گرہن اور سورج گرہن کی نماز میں چار رکعت میں آٹھ مرتبہ رکوع تھا اور آپ صلی اللہ علیہ وسلم نے ہر ایک رکعت میں قراءت کی تھی۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے سورج گرہن اور چاند گرہن کی نماز میں (دو رکعت میں) چار مرتبہ رکوع کیا تھا اور چار مرتبہ سجدہ کیا تھا۔ آپ صلی اللہ علیہ وسلم نے پہلی رکعت میں سورۃ العنکبوت اور سورۃ الروم کی تلاوت کی تھی، جبکہ دوسری رکعت میں سورۃ یٰسین کی تلاوت کی تھی۔

سیدنا ابوبکرہ رضی اللہ عنہ بیان کرتے ہیں: نبی کریم صلی اللہ علیہ وسلم کے زمانہ اقدس میں سورج گرہن ہو گیا، آپ صلی اللہ علیہ وسلم نے فرمایا: ”سورج اور چاند یہ دونوں نشانیاں ہیں۔“ اس روایت میں یہ بھی ہے، آپ صلی اللہ علیہ وسلم نے یہ بھی ارشاد فرمایا: ”جب اللہ تعالیٰ اپنی مخلوق میں سے کسی چیز پر تجلی کرتا ہے، تو وہ اس کی بارگاہ میں خشوع و خضوع کے ساتھ (جھک جاتی ہے)، تو جب ان دونوں میں سے کوئی ایک گرہن ہو جائے، تو تم نماز ادا کرو اور دعا مانگو۔“

سیدنا ابوبکرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جب اللہ تعالیٰ اپنی مخلوق میں سے کسی چیز کے لیے تجلی فرماتا ہے، تو وہ اس کی بارگاہ میں جھک جاتی ہے۔“ یہی روایت ایک اور سند کے ساتھ بھی منقول ہے۔

محمد بن علی فرماتے ہیں: ہمارے مہدی کی دو نشانیاں ہیں جو آسمان و زمین کی تخلیق کے بعد کبھی رونما نہیں ہوئیں، وہ رمضان کی پہلی رات میں چاند گرہن ہونا اور پندرھویں تاریخ کو سورج گرہن ہونا، آسمان و زمین کو جب اللہ تعالیٰ نے پیدا کیا، تو اس وقت سے لے کر اب تک (اس تاریخ میں یہ دونوں گرہن نہیں ہوئے)۔

سیدنا عبداللہ بن عمر رضی اللہ عنہما، نبی کریم صلی اللہ علیہ وسلم کا یہ فرمان نقل کرتے ہیں: ”سورج اور چاند اللہ تعالیٰ کی دو نشانیاں ہیں، یہ دونوں کسی کے مرنے یا کسی کے پیدا ہونے کی وجہ سے گرہن نہیں ہوتے، یہ اللہ تعالیٰ کی نشانیاں ہیں، جب تم ان دونوں کو (گرہن کی حالت میں) دیکھو، تو نماز (کسوف) ادا کرو۔“