سیدہ عائشہ رضی اللہ عنہا بیان کرتی ہیں: فاطمہ بنت ابوحبیش نے نبی کریم صلی اللہ علیہ وسلم سے عرض کیا: ”یا رسول اللہ! میں پاک نہیں ہوتی، کیا میں نماز کو ترک کر دوں؟“ تو نبی کریم صلی اللہ علیہ وسلم نے ان سے فرمایا: ”یہ ایک رگ کا خون ہے، یہ حیض نہیں ہے۔ جب تمہیں حیض آئے تو تم نماز پڑھنا ترک کر دو۔ جب اس کی مدت گزر جائے تو تم اپنے جسم سے خون دھو کر نماز ادا کر لو۔“

سیدہ عائشہ رضی اللہ عنہا بیان کرتی ہیں: فاطمہ بنت ابوحبیش نبی کریم صلی اللہ علیہ وسلم کی خدمت میں حاضر ہوئیں اور عرض کی: ”یا رسول اللہ! میں ایک ایسی عورت ہوں جو استحاضہ میں مبتلا ہے۔ میں پاک نہیں ہوتی، کیا میں نماز ترک کر دوں؟“ آپ نے فرمایا: ”نہیں، یہ ایک دوسری رگ کا خون ہے، حیض نہیں ہے۔ جب حیض آئے تو نماز پڑھنا ترک کر دو۔ جب وہ ختم ہو جائے تو غسل کر کے نماز ادا کرنا شروع کرو۔“ یحییٰ نامی راوی نے یہ بات نقل کی ہے: ”جب وہ رخصت ہو جائے تو اپنے جسم سے خون دھو کر نماز ادا کر لو۔“ ایک روایت میں یہ الفاظ زائد ہیں: ہشام بیان کرتے ہیں: میرے والد نے یہ بات بیان کی ہے: ”پھر تم ہر نماز کے لیے وضو کرو، یہاں تک کہ وہ وقت آ جائے۔“

سیدہ فاطمہ بنت ابوحبیش رضی اللہ عنہا بیان کرتی ہیں کہ وہ استحاضہ میں مبتلا تھیں۔ نبی کریم صلی اللہ علیہ وسلم نے ان سے فرمایا: ”جب حیض کا خون آئے گا وہ زیادہ ہو گا۔ جب ایسی صورت حال ہو تو تم نماز پڑھنا ترک کر دو۔ لیکن جب دوسری صورت حال ہو تو تم وضو کر کے نماز ادا کرو، کیونکہ یہ کسی اور رگ کا خون ہے۔“

سیدہ عائشہ رضی اللہ عنہا بیان کرتی ہیں: فاطمہ بنت ابوحبیش استحاضہ میں مبتلا تھیں۔ نبی کریم صلی اللہ علیہ وسلم نے فرمایا: ”حیض کا خون سیاہ ہوتا ہے جو پہچانا جاتا ہے۔ جب وہ ہو تو تم نماز کو ترک کر دو اور جب دوسری رنگت کا ہو تو وضو کر کے نماز ادا کر لو۔“

عروہ، سیدہ فاطمہ بنت ابوحبیش رضی اللہ عنہا کا بیان نقل کرتے ہیں: وہ استحاضہ میں مبتلا ہوئیں۔ نبی کریم صلی اللہ علیہ وسلم نے ان سے یہ فرمایا: ”جب حیض کا خون ہو گا تو وہ سیاہ خون ہو گا جو پہچانا جائے گا۔ جب یہ خون ہو تو تم نماز پڑھنے سے باز آ جاؤ اور جب دوسری رنگت کا خون ہو تو تم وضو کر کے نماز پڑھ لیا کرو، کیونکہ یہ کسی اور رگ کا خون ہے۔“ ایک روایت میں یہ سیدہ عائشہ رضی اللہ عنہا کے حوالے سے منقول ہے۔ فاطمہ بنت ابوحبیش نے اس کے بعد حسب ثابت حدیث بیان کی۔ اس روایت میں نبی کریم صلی اللہ علیہ وسلم کے یہ الفاظ منقول ہیں: ”خون جب دوسری طرح کا ہو تو تم وضو کر کے نماز ادا کر لیا کرو۔“

عروہ، سیدہ فاطمہ بنت ابوحبیش رضی اللہ عنہا کے بارے میں یہ بیان نقل کرتے ہیں: وہ استحاضہ میں مبتلا ہوئیں تو نبی کریم صلی اللہ علیہ وسلم نے ان سے فرمایا: ”جو حیض کا خون ہو گا وہ سیاہ ہو گا جو پہچانا جائے گا، تو تم نماز سے رک جاؤ۔ جب دوسری طرح کا ہو گا تو تم وضو کر کے نماز پڑھو، کیونکہ یہ کسی دوسری رگ کا خون ہے۔“

سیدہ ام سلمہ رضی اللہ عنہا جو نبی کریم صلی اللہ علیہ وسلم کی زوجہ ہیں، بیان کرتی ہیں: فاطمہ بنت ابوحبیش نبی کریم صلی اللہ علیہ وسلم کے زمانہ میں استحاضہ کا شکار ہوئیں۔ سیدہ ام سلمہ نے ان کے بارے میں نبی کریم صلی اللہ علیہ وسلم سے مسئلہ دریافت کیا تو نبی کریم صلی اللہ علیہ وسلم نے ارشاد فرمایا: ”پہلے مہینوں میں جتنے دن تک اسے حیض آیا کرتا تھا، وہ اس تعداد کو شمار کرے اور اس دوران نماز کو ترک کر دے۔ جب وہ وقت گزر جائے تو وہ غسل کر کے وضو کر لیا کرے اور کپڑا رکھ کر نماز ادا کر لیا کرے۔“

سلیمان بن یسار بیان کرتے ہیں: سیدہ ام سلمہ رضی اللہ عنہا نے فاطمہ بنت ابوحبیش کے لیے نبی کریم صلی اللہ علیہ وسلم سے مسئلہ دریافت کیا تو نبی کریم صلی اللہ علیہ وسلم نے ارشاد فرمایا: ”وہ حیض کی مخصوص میعاد کے دوران ترک کرے گی اور اس کے بعد غسل کر کے نماز ادا کرے گی۔“ یہی روایت ایک اور سند کے ہمراہ سیدہ ام سلمہ رضی اللہ عنہا سے منقول ہے، تاہم اس میں نبی کریم صلی اللہ علیہ وسلم کے یہ الفاظ ہیں: ”وہ اپنے حیض کے ایام کا انتظار کرے گی اور نماز ترک کر دے گی۔“

سلیمان بن یسار بیان کرتے ہیں: سیدہ فاطمہ بنت ابوحبیش رضی اللہ عنہا کو استحاضہ کی شکایت ہو گئی، یہاں تک کہ ان کے لیے ایک بڑا برتن رکھا جاتا تھا جس میں خون ہی خون ہو جاتا تھا۔ راوی بیان کرتے ہیں: پھر انہوں نے سیدہ ام سلمہ رضی اللہ عنہا سے یہ کہا: ”نبی کریم صلی اللہ علیہ وسلم سے مسئلہ دریافت کریں۔“ تو آپ صلی اللہ علیہ وسلم نے یہ فرمایا: ”وہ حیض کے ایام کے دوران نماز ترک کرے گی، پھر غسل کر کے کپڑا باندھ کر نماز ادا کیا کرے گی۔“

سلیمان بن یسار بیان کرتے ہیں: سیدہ فاطمہ بنت ابوحبیش رضی اللہ عنہا کو استحاضہ کی شکایت ہو گئی تو انہوں نے نبی کریم صلی اللہ علیہ وسلم سے دریافت کیا۔ راوی کو شک ہے کہ یہ الفاظ ہیں: ”ان کے لیے نبی کریم صلی اللہ علیہ وسلم سے مسئلہ دریافت کیا گیا۔“ تو نبی کریم صلی اللہ علیہ وسلم نے ہدایت کی: ”وہ اپنے حیض کے مخصوص ایام کے دوران نماز کو ترک کرے، اس کے علاوہ غسل کر لیا کرے گی اور کپڑا باندھ کر نماز ادا کر لیا کرے گی۔“ سلیمان نامی راوی سے دریافت کیا گیا: ”کیا ان کے شوہر ان سے صحبت کیا کرتے تھے؟“ تو انہوں نے جواب دیا: ”ہم وہی بات بیان کریں گے جو ہم نے سنی ہے۔“

عطاء بیان کرتے ہیں: ”حیض کی زیادہ سے زیادہ مدت پندرہ دن ہے۔“

عطاء بیان کرتے ہیں: ”حیض کی زیادہ سے زیادہ مدت پندرہ دن ہے۔“

عطاء بیان کرتے ہیں: ”حیض کی زیادہ سے زیادہ مدت پندرہ دن ہے۔“

ុطاء بیان کرتے ہیں: ”حیض کی زیادہ سے زیادہ مدت پندرہ دن ہے۔“ ابوابراہیم بیان کرتے ہیں: امام أحمد بن حنبل نے ان دونوں روایات کو اختیار کیا ہے اور ان کو دلیل کے طور پر پیش کیا ہے۔

عطاء بن ابی رباح بیان فرماتے ہیں: ”حیض کا کم از کم وقت ایک دن ہے۔“ ابوابراہیم بیان کرتے ہیں: امام أحمد بن حنبل نے ان دونوں روایات کو اختیار کیا ہے اور ان کو دلیل کے طور پر پیش کیا ہے۔

شریک بیان کرتے ہیں: ہمارے ہاں ایک خاتون تھی جسے ہر مہینے پندرہ دن حیض آیا کرتا تھا اور وہ حیض بالکل درست اور ٹھیک تھا۔

اوزاعی بیان کرتے ہیں: ہمارے ہاں ایک خاتون تھی جسے صبح کے وقت حیض آتا تھا اور شام کے وقت وہ پاک ہو جاتی تھی۔

حسن بن صالح بیان کرتے ہیں: ”حیض کی زیادہ سے زیادہ مدت پندرہ دن ہے۔“

سیدنا عبداللہ بن مسعود رضی اللہ عنہ بیان کرتے ہیں: ”حیض (کم از کم) تین دن ہو سکتا ہے یا چار یا پانچ یا چھ یا سات یا آٹھ یا نو یا دس دن تک ہو سکتا ہے۔ اس سے زیادہ ہو تو وہ مستحاضہ ہو گی۔“ اس روایت کو اس سند کے ہمراہ اعمش کے حوالے سے ہارون بن زیاد کے علاوہ کسی نے نقل نہیں کیا اور یہ راوی ضعیف ہے اور اعمش سے منقول ہونے کے اعتبار سے اہل کوفہ کے نزدیک اس روایت کی کوئی اصل نہیں ہے۔ باقی اللہ بہتر جانتا ہے۔

سیدنا انس رضی اللہ عنہ بیان کرتے ہیں: ”حیض یا تین دن ہو سکتا ہے، یا چار دن یا پانچ دن یا چھ دن یا سات دن یا آٹھ دن یا نو دن یا دس دن ہو سکتا ہے۔“

سیدنا انس رضی اللہ عنہ بیان کرتے ہیں: ”حیض تین، چار، پانچ، چھ، سات، آٹھ، نو، دس، (دن تک ہو سکتا ہے)۔“

سیدنا انس رضی اللہ عنہ بیان کرتے ہیں: ”حیض کی مدت کم از کم تین دن اور زیادہ سے زیادہ دس دن ہو سکتی ہے۔“

سیدنا انس رضی اللہ عنہ بیان کرتے ہیں: ”حیض دس دن سے زیادہ نہیں ہو سکتا۔“

سفیان ثوری فرماتے ہیں: ”حیض کی کم سے کم مدت تین دن اور زیادہ سے زیادہ دس دن ہے۔“

سیدنا انس رضی اللہ عنہ فرماتے ہیں: ”عورت اس وقت تک حائضہ شمار ہو گی جب تک حیض دس دن تک ہو۔ اگر اس سے زیادہ دن ہو جائیں تو وہ مستحاضہ شمار ہو گی۔“

شیخ ابوزرعہ دمشقی فرماتے ہیں: میں نے امام أحمد بن حنبل کو دیکھا۔ انہوں نے جلد بن ایوب کی اس روایت کو تسلیم نہیں کیا۔ میں نے امام أحمد بن حنبل کو یہ فرماتے ہوئے سنا ہے کہ وہ فرماتے ہیں: ”اگر یہ روایت مستند مان لی جائے تو ابن سیرین نے یہ نہیں کہا ہو گا۔“ سیدنا انس بن مالک کی ام ولد کو استحاضہ ہو گیا تو ان لوگوں نے مجھے سیدنا عبداللہ بن عباس رضی اللہ عنہما کے پاس بھیجا تاکہ میں یہ مسئلہ دریافت کروں۔

حماد بن زید بیان کرتے ہیں: میں اور جریر بن حازم، جلد بن ایوب کے پاس گئے تو انہوں نے مستحاضہ عورت کے بارے میں یہ روایت سنائی: ”مستحاضہ عورت تین دن، پانچ دن یا سات دن یا دس دن تک انتظار کرے گی، (یعنی ان ایام کو حیض سمجھے گی)۔“ پس ہم گئے اور ہم نے انہیں منع کرنے کی کوشش کی لیکن انہوں نے حیض اور استحاضہ کے درمیان کوئی فرق نہیں کیا۔

سیدنا انس رضی اللہ عنہ بیان کرتے ہیں: ”حائضہ عورت تین دن، چار، پانچ دن سے دس دن تک انتظار کرے گی۔ اگر دس دن سے زیادہ خون آئے تو وہ مستحاضہ ہو گی، اور وہ غسل کر کے نماز ادا کرنا شروع کر دے گی۔“

عثمان بن ابوالعاص بیان کرتے ہیں: ”ایک یا دو یا تین دن کی وجہ سے عورت مستحاضہ شمار نہیں ہو گی، یہاں تک کہ وہ دس دن تک پہنچ جائے۔ جب دس دن تک پہنچ جائے تو اس کے بعد عورت مستحاضہ شمار ہو گی۔“

عثمان بن ابوالعاص ثقفی بیان فرماتے ہیں: ”جس حائضہ عورت کو دس دن کے بعد (خون آتا رہے) تو وہ مستحاضہ شمار ہو گی۔ وہ غسل کر کے نماز ادا کرے گی۔“

سعید بن جبیر فرماتے ہیں: ”حیض (کی زیادہ سے زیادہ مدت) تیرہ دن ہے۔“

سیدہ عائشہ رضی اللہ عنہا بیان کرتی ہیں: فاطمہ بنت ابوحبیش نبی کریم صلی اللہ علیہ وسلم کی خدمت میں حاضر ہوئیں۔ انہوں نے عرض کیا: ”یا رسول اللہ! میں استحاضہ کا شکار عورت ہوں۔“ تو نبی کریم صلی اللہ علیہ وسلم نے فرمایا: ”یہ کسی اور رگ کا خون ہے۔ تو تم اپنے حیض کے ایام کا حساب رکھو۔ جب اس سے زیادہ دن ہو جائیں تو غسل کر کے صفائی کر کے نماز ادا کر لیا کرو۔“ اس روایت کو نقل کرنے میں عمار نامی راوی منفرد ہے، یہ ضعیف ہیں جبکہ محدثین کے نزدیک اسماعیل سے منقول ہونے کے اعتبار سے یہ روایت موقوف ہے۔ (اس میں یہ الفاظ ہیں) ”استحاضہ کا شکار عورت اپنے حیض کے ایام شمار کرے گی۔ اس کے بعد وہ غسل کر لے گی اور ہر نماز کے لیے وضو کرے گی۔“

سیدہ عائشہ رضی اللہ عنہا بیان کرتی ہیں: فاطمہ بنت ابوحبیش نبی کریم صلی اللہ علیہ وسلم کی خدمت میں حاضر ہوئیں اور عرض کیا: ”یا رسول اللہ! میں استحاضہ میں مبتلا ہوں تو میں کیسے پاک ہو گی؟“ نبی کریم صلی اللہ علیہ وسلم نے فرمایا: ”تم اپنے حیض کے ایام شمار کر لو۔ اس میں نماز کو ترک کر دو۔ اس کے بعد غسل کر کے ہر نماز کے لیے وضو کیا کرو، اگرچہ خون کے قطرے چٹائی پر گر رہے ہوں۔“ یہی روایت بعض دیگر اسناد کے ہمراہ بھی منقول ہے۔ بعض راویوں نے اسے مرفوع روایت کے طور پر نقل کیا ہے جبکہ بعض راویوں نے اسے موقوف روایت کے طور پر نقل کیا ہے اور یہ روایت بھی مستند ہیں۔

سیدہ عائشہ رضی اللہ عنہا بیان کرتی ہیں: ایک انصاری عورت نبی کریم صلی اللہ علیہ وسلم کی خدمت میں حاضر ہوئی۔ اس نے عرض کیا: ”یا رسول اللہ! میں استحاضہ میں مبتلا ہوں۔“ تو نبی کریم صلی اللہ علیہ وسلم نے اس کو ہدایت کی کہ: ”وہ اپنے حیض کے مخصوص ایام کے دوران نماز ادا نہ کرے۔ پھر اس کے بعد غسل کر لے اور ہر نماز کے وقت وضو کر کے نماز ادا کر لیا کرے اگرچہ خون کے قطرے چٹائی پر گر رہے ہوں۔“

سیدہ عائشہ رضی اللہ عنہا بیان کرتی ہیں: فاطمہ بنت ابوحبیش نبی کریم صلی اللہ علیہ وسلم کی خدمت میں حاضر ہوئیں۔ انہوں نے عرض کیا: ”یا رسول اللہ! میں ایک ایسی عورت ہوں جو استحاضہ میں مبتلا ہے۔ میں پاک نہیں ہوتی۔ کیا میں نماز کو ترک کر دوں؟“ نبی کریم صلی اللہ علیہ وسلم نے ارشاد فرمایا: ”یہ کسی اور رگ کا خون ہے۔ تم حیض کے ایام کے دوران نماز نہ پڑھو۔ اس کے بعد غسل کر لیا کرو اور ہر نماز کے لیے وضو کر لیا کرو اگرچہ خون کے قطرے چٹائی پر گر رہے ہوں۔“

سیدہ عائشہ رضی اللہ عنہا بیان کرتی ہیں: فاطمہ بنت ابوحبیش نبی کریم صلی اللہ علیہ وسلم کی خدمت میں حاضر ہوئیں۔ انہوں نے عرض کیا: ”یا رسول اللہ! میں استحاضہ میں مبتلا ہوں۔ میں پاک نہیں ہوتی۔ کیا میں نماز کو ترک کر دوں؟“ نبی کریم صلی اللہ علیہ وسلم نے ارشاد فرمایا: ”تم نماز کو اپنے حیض کے ایام کے دوران ترک کر دو۔ اس کے بعد غسل کرو اور نماز پڑھنا شروع کر دو اگرچہ خون کے قطرے چٹائی پر گر رہے ہوں۔“ ایک روایت میں یہ الفاظ ہیں: ”تم ہر نماز کے لیے وضو کیا کرو۔“

یہی روایت ایک اور سند کے ہمراہ منقول ہے، تاہم اس میں نبی کریم صلی اللہ علیہ وسلم کے یہ الفاظ ہیں: ”تم پھر غسل کر لو، پھر ہر نماز کے لیے وضو کر لیا کرو، اور نماز پڑھ لیا کرو، اگرچہ خون کے قطرے چٹائی پر گر رہے ہوں۔“

سیدہ عائشہ رضی اللہ عنہا بیان کرتی ہیں: فاطمہ بنت ابوحبیش نبی کریم صلی اللہ علیہ وسلم کی خدمت میں حاضر ہوئیں۔ اس نے عرض کی: ”یا رسول اللہ! میں استحاضہ میں مبتلا ہوں۔“ تو نبی کریم صلی اللہ علیہ وسلم نے فرمایا: ”تم اپنے حیض کے ایام کو شمار کر لو اور ان کے دوران نماز نہ پڑھو۔ پھر اس کے بعد غسل کر لو۔ پھر ہر نماز کے لیے وضو کر لیا کرو اگرچہ خون کے قطرے چٹائی پر گر رہے ہوں۔“

سیدہ عائشہ رضی اللہ عنہا نبی کریم صلی اللہ علیہ وسلم کا یہ فرمان نقل کرتی ہیں: ”مستحاضہ عورت نماز ادا کرے گی، اگرچہ خون کے قطرے چٹائی پر گر رہے ہوں۔“

عبدالرحمن بن بشر بیان کرتے ہیں: ہم عبداللہ بن داؤد کے پاس سے اٹھ کر یحییٰ بن سعید کے پاس آئے تو انہوں نے دریافت کیا: ”تم لوگ کہاں سے آئے ہو؟“ انہوں نے جواب دیا: ”عبداللہ بن داؤد کے پاس سے آ رہے ہیں۔“ انہوں نے دریافت کیا: ”انہوں نے تمہیں حدیث سنائی؟“ تو ہم نے جواب دیا: ”انہوں نے اعمش کے حوالے سے حبیب کے حوالے سے، عروہ کے حوالے سے سیدہ عائشہ رضی اللہ عنہا کی حدیث سنائی۔“ تو یحییٰ بولے: ”اس بارے میں سفیان ثوری کو سب سے زیادہ علم ہے۔ انہوں نے یہ بات بیان کی ہے: حبیب نامی راوی نے عروہ بن زبیر سے کوئی حدیث نہیں سنی ہے۔“