نافع بیان کرتے ہیں: سیدنا عبداللہ بن عمر رضی اللہ عنہما مربد النعم کے مقام پر تیمم کر لیتے تھے، وہ مدینہ منورہ سے تین میل کے فاصلے پر ہے، اس کے بعد (وہ نماز ادا کر لیتے اور پھر) مدینہ منورہ میں داخل ہوتے تو سورج پورا بلند ہوتا تھا لیکن وہ دوبارہ نماز نہیں پڑھتے تھے۔

یہی روایت ایک اور سند کے ہمراہ بھی منقول ہے۔

نافع بیان کرتے ہیں: سیدنا عبداللہ بن عمر رضی اللہ عنہما نے مدینہ منورہ سے ایک یا دو میل کے فاصلے پر تیمم کر کے عصر کی نماز ادا کی، پھر وہ (شہر) میں تشریف لے آئے تو سورج ابھی بلند تھا۔ انہوں نے دوبارہ نماز ادا نہیں کی۔

سیدنا علی رضی اللہ عنہ ارشاد فرماتے ہیں: ”جب کوئی شخص سفر میں ہو وہ اپنے اور نماز کے آخری وقت کے درمیان کے بارے میں حساب لگا لے، اگر اسے پانی نہ مل سکتا ہو تو وہ تیمم کرے۔“