سیدنا عبداللہ بن عباس رضی اللہ عنہما بیان کرتے ہیں: ایک مرتبہ نبی کریم صلی اللہ علیہ وسلم سو گئے، آپ اس وقت سجدے کی حالت میں تھے، یہاں تک کہ آپ خراٹے لینے لگے، پھر آپ کھڑے ہوئے اور نماز ادا کی، میں نے عرض کی: ”یا رسول اللہ! آپ تو سو گئے تھے۔“ تو نبی کریم صلی اللہ علیہ وسلم نے ارشاد فرمایا: ”وضو کرنا اس شخص پر لازم ہے، جو لیٹ کر سوتا ہے، کیونکہ جب وہ لیٹ کر سوتا ہے، تو اس کے جوڑ ڈھیلے پڑ جاتے ہیں۔“ اس روایت کو ابوقتادہ کے حوالے سے نقل کرنے میں ابوخالد منفرد ہے، یہ روایت معتبر نہیں ہے۔

سیدنا معاویہ بن ابوسفیان رضی اللہ عنہ یہ بات بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”آنکھ مقعد کی بندش ہے، تو جب آنکھ سو جاتی ہے، تو یہ بندش ٹوٹ جاتی ہے۔“

یہی روایت ایک اور سند کے ہمراہ منقول ہے۔

سیدنا عمرو بن شعیب اپنے والد کے حوالے سے، اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”جو شخص بیٹھے بٹھائے سو جائے، تو اس پر وضو کرنا لازم نہیں ہوتا، جو شخص اپنا پہلو (زمین پر) رکھ لے، اس پر وضو کرنا لازم ہو گا۔“

سیدنا علی بن ابوطالب رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”آنکھ مقعد کی بندش ہے، جو شخص سو جائے، اسے اچھی طرح وضو کرنا چاہیے۔“