سیدنا عقبہ بن حارث رضی اللہ عنہ بیان کرتے ہیں: میں نے سیدنا ابووہاب رضی اللہ عنہ کی صاحبزادی کے ساتھ شادی کر لی تو ایک سیاہ فام عورت آئی اور بولی: میں نے تم دونوں (میاں، بیوی) کو دودھ پلایا ہے۔ (سیدنا عقبہ رضی اللہ عنہ کہتے ہیں) میں نبی کریم صلی اللہ علیہ وسلم کی خدمت میں دائیں طرف سے حاضر ہوا۔ میں نے آپ صلی اللہ علیہ وسلم سے یہ سوال کیا، تو آپ صلی اللہ علیہ وسلم نے مجھ سے اعراض کیا۔ پھر میں بائیں طرف سے آپ صلی اللہ علیہ وسلم کے سامنے آیا، تو آپ صلی اللہ علیہ وسلم نے پھر مجھ سے اعراض کیا۔ پھر میں سامنے کی طرف سے آپ صلی اللہ علیہ وسلم کے آگے آیا۔ اور آپ صلی اللہ علیہ وسلم سے یہ مسئلہ دریافت کیا: میں نے عرض کی: یا رسول اللہ! وہ ایک سیاہ فام عورت ہے اور یہ ہے اور وہ ہے، تو نبی کریم صلی اللہ علیہ وسلم نے فرمایا: ”جب بات کر دی گئی ہے، تو پھر اب کیا ہو سکتا ہے۔“