بلوغ المرام

´سیدنا ابوہریرہ رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا : ’’جس کسی کو یہ پسند ہے کہ اس کے رزق میں کشادگی و کشائش ہو اور عمردراز ملے تو اسے صلہ رحمی کرنی چاہیئے ۔ “ ( بخاری )

´سیدنا جبیر بن مطعم رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا : ’’جنت میں قطع رحمی کرنے والا داخل نہیں ہو گا ۔ “ ( بخاری و مسلم )

´سیدنا مغیرہ بن شعبہ رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا: ’’اللہ تعالیٰ نے تم پر ماؤں کی نافرمانی ، لڑکیوں کو زندہ درگور کرنا اور احسان سے باز رہنا اور دوسروں کے سامنے ہاتھ پھیلانا حرام فرما دیا ہے اور کثرت سے باتیں کرنا اور کثرت سے سوال اور مال کو ضائع کرنا ناپسند کیا ہے ۔ “ ( بخاری و مسلم )

´سیدنا عبداللہ بن عمرو رضی اللہ عنہما نے نبی کریم صلی اللہ علیہ وسلم سے روایت کیا ہے کہ` آپ صلی اللہ علیہ وسلم نے فرمایا : ’’اللہ تعالیٰ کی رضامندی والدین کی رضامندی میں ہے اور اللہ تعالیٰ کی ناراضگی والدین کی ناراضگی میں ہے ۔ اسے ترمذی نے نکالا ہے اور ابن حبان اور حاکم نے اسے صحیح قرار دیا ہے ۔

´سیدنا انس رضی اللہ عنہ نے روایت کیا ہے کہ` نبی کریم صلی اللہ علیہ وسلم نے فرمایا : ’’مجھے اس ذات اقدس کی قسم ، جس کے ہاتھ میں میری جان ہے کوئی بندہ اس وقت تک مومن نہیں ہو سکتا جب تک وہ اپنے ہمسایہ یا اپنے بھائی کیلئے بھی وہی پسند نہ کرے جو اپنے لیے پسند کرتا ہے ۔ “ ( بخاری ومسلم )

´سیدنا ابن مسعود رضی اللہ عنہما سے روایت ہے کہ` میں نے رسول اللہ صلی اللہ علیہ وسلم سے سوال کیا ، کون سا گناہ سب سے بڑا ہے ؟ آپ صلی اللہ علیہ وسلم نے فرمایا : ’’یہ کہ تو اللہ تعالیٰ کے ساتھ کسی کو شریک بنائے ۔ حالانکہ وہ تیرا خالق ہے ۔ “ میں نے عرض کیا پھر کون سا ؟ آپ صلی اللہ علیہ وسلم نے فرمایا : ’’یہ کہ تو اپنی اولاد کو اس ڈر سے قتل کرے کہ وہ تمہارے ساتھ مل کر کھائیں گے ۔ “ میں نے پھر عرض کیا کہ پھر کون سا آپ صلی اللہ علیہ وسلم نے فرمایا : ’’تو اپنے ہمسایہ کی اہلیہ سے زنا کرے ۔ “ ( بخاری و مسلم )

´سیدنا عبداللہ بن عمرو بن العاص رضی اللہ عنہا سے مروی ہے کہ` رسول اللہ صلی اللہ علیہ وسلم نے فرمایا ’’ آدمی کا اپنے والدین کو گالی دینا کبیرہ گناہوں میں سے ہے ۔ “ کہا گیا کہ کیا کوئی شخص اپنے ماں باپ کو بھی گالی دیتا ہے ؟ آپ صلی اللہ علیہ وسلم نے فرمایا ’’ ہاں ! کہ وہ کسی آدمی کے باپ کو گالی گلوچ کرتا ہے تو وہ اس کے باپ کو گالی گلوچ کرتا ہے اور یہ اس کی والدہ کو گالی دیتا ہے تو وہ اس کی والدہ کو گالی دیتا ہے ۔ “ ( بخاری و مسلم )

´سیدنا ابوایوب رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا کہ ’’ کسی مسلمان کیلئے یہ حلال نہیں ہے کہ وہ اپنے بھائی سے تین روز سے زیادہ قطع تعلق رکھے ۔ جب دونوں کا آمنا سامنا ہو تو یہ اپنا منہ ادھر کر لے اور وہ ادھر کر لے ۔ دونوں میں بہتر انسان وہ ہے جو سلام میں پہل کرے ۔ “ ( بخاری و مسلم )

´سیدنا جابر رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا کہ ’’ ہر بھلائی صدقہ ہے ۔ “ ( بخاری )

´سیدنا ابوذر رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا ’’ کسی بھلے کام کو حقیر اور معمولی نہ سمجھو ۔ خواہ اپنے بھائی سے کشادہ چہرے سے ملنا ہی کیوں نہ ہو ۔ “ ( اس کو مسلم نے روایت کیا ہے ) ۔

´انہى ( سیدنا ابوذر رضی اللہ عنہ ) سے مروى ہے كہ` رسول الله صلی اللہ علیہ وسلم نے فرمايا ’’ جب تم شوربا پکاؤ تو اس میں پانی زیادہ ڈال لیا کرو اور اپنے ہمسایہ کا بھی خیال رکھا کرو ۔ “ ان دونوں احادیث کو مسلم نے روایت کیا ہے ۔

´سیدنا ابوہریرہ رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا کہ ’’ جو کوئی دنیا کی مصیبتوں اور سختیوں میں سے کسی مسلمان کی مصیبت کو دور کرے گا اللہ تعالیٰ قیامت کے روز ، قیامت کی سختیوں میں سے اس کی کوئی سختی دور فرما دے گا اور جو کوئی کسی تنگ دست کیلئے دنیا میں آسانی پیدا کرے گا تو اللہ تعالیٰ دنیا و آخرت میں اس کیلئے آسانی پیدا فرمائے گا اور جو کوئی کسی مسلمان کے عیب پر پردہ ڈالے گا اللہ تعالیٰ دنیا و آخرت میں اس کی پردہ پوشی فرمائے گا اور اللہ تعالیٰ اس وقت تک بندے کی مدد میں رہتا ہے جب تک وہ بندہ اپنے بھائی کی مدد کرتا رہے گا ۔ “ ( مسلم )

´سیدنا ابن مسعود رضی اللہ عنہما سے مروی ہے کہ` رسول اللہ صلی اللہ علیہ وسلم نے فرمایا کہ ’’ جو کوئی خیر و بھلائی کا راستہ بتائے اس کو بھی نیکی کرنے والے کے برابر ثواب ملتا ہے ۔ “ ( مسلم )

´سیدنا ابن عمر رضی اللہ عنہما نے نبی کریم صلی اللہ علیہ وسلم سے روایت کیا ہے کہ` ’’ جو کوئی تم سے اللہ کی نام سے پناہ طلب کرے تو اس کو پناہ دو اور جو کوئی اللہ کے نام پر تم سے سوال کرے تو اس کو دو اور جو کوئی تم سے حسن سلوک و احسان کرے تو اس کو بدلہ دو اگر ( پورا بدلہ دینے کی ) طاقت و وسعت نہ ہو تو پھر اس کے حق میں دعا کرو ۔ “ ( سنن بیہقی )