بلوغ المرام

´سیدنا ابوہریرہ رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا ’’ جو شخص ایسی حالت میں مر گیا کہ اس نے نہ کبھی جہاد میں حصہ لیا اور نہ کبھی اس کے دل میں یہ خیال آیا اور نہ اس کی خواہش و تمنا پیدا ہوئی تو اس کی موت نفاق کے شعبہ پر ہوئی ۔ “ ( مسلم )

´سیدنا انس رضی اللہ عنہ سے روایت ہے کہ` نبی کریم صلی اللہ علیہ وسلم نے فرمایا ’’ مشرکین سے اپنے مالوں ، اپنی جانوں اور اپنی زبانوں سے جہاد کرو ۔ “ اسے احمد اور نسائی نے روایت کیا ہے اور حاکم نے اسے صحیح قرار دیا ۔

´سیدہ عائشہ رضی اللہ عنہا سے روایت ہے کہ` میں نے عرض کیا اے اللہ کے رسول ! کیا خواتین پر بھی جہاد ہے ؟ فرمایا ’’ ہاں ! جہاد ہے جس میں لڑائی نہیں ۔ اور وہ ہے حج اور عمرہ ۔ “ اسے ابن ماجہ نے روایت کیا ہے اور اس کی اصل بخاری میں ہے ۔

´سیدنا عبداللہ بن عمرو رضی اللہ عنہما سے روایت ہے کہ` ایک شخص نبی کریم صلی اللہ علیہ وسلم کی خدمت میں حاضر ہوا اور وہ جہاد میں شرکت کی اجازت طلب کر رہا تھا ۔ آپ صلی اللہ علیہ وسلم نے فرمایا ’’ کیا تیرے والدین بقید حیات ہیں ؟ ‘‘ وہ بولا ہاں ! آپ صلی اللہ علیہ وسلم نے فرمایا ’’ پس ان دونوں ( کی خدمت ) میں جدوجہد کرو ۔ ‘‘ ( بخاری و مسلم ) مسند احمد اور ابوداؤد میں ابوسعید کی روایت بھی اسی طرح منقول ہے ۔ اس میں اضافہ ہے کہ آپ صلی اللہ علیہ وسلم نے فرمایا ’’ واپس چلے جاؤ ان سے اجازت طلب کرو ۔ پھر اگر وہ دونوں تجھے اجازت دے دیں تو درست ورنہ ان کے ساتھ نیکی اور حسن سلوک کرو ۔ ‘‘

´سیدنا جریر بجلی رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا ’’ میں ہر اس مسلمان سے بری الذمہ ہوں جو مشرکین میں قیام پذیر ہو ۔ ‘‘ اسے تینوں نے روایت کیا ہے اور اس کی سند صحیح ہے مگر بخاری نے اس کے مرسل ہونے کو ترجیح دی ہے ۔

´سیدنا ابن عباس رضی اللہ عنہما سے روایت ہے کہ` رسول اللہ صلی اللہ علیہ وسلم نے فرمایا ’’ فتح ( مکہ ) کے بعد ہجرت نہیں لیکن جہاد اور نیت باقی ہے ۔ ‘‘ ( بخاری و مسلم )

´سیدنا ابوموسیٰ اشعری رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا ’’ جو شخص اس نیت سے لڑا کہ اللہ کا کلمہ بلند ہو تو وہ اللہ کی راہ میں لڑنے والا ہے ۔ “ ( بخاری ومسلم )

´سیدنا عبداللہ بن سعدی رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا ’’ جب تک دشمنوں سے جنگ جاری رہے گی ہجرت بھی جاری رہے گی ۔ “ اسے نسائی نے روایت کیا ہے اور ابن حبان نے صحیح کہا ہے ۔

´سیدنا نافع رحمہ اللہ سے روایت ہے کہ` رسول اللہ صلی اللہ علیہ وسلم نے بنو مصطلق پر شب خون مارا تو اس وقت یہ لوگ بےخبر و غافل تھے ۔ پس آپ صلی اللہ علیہ وسلم نے ان کے لڑائی کرنے والوں کو قتل کیا اور ان کی اولاد کو قیدی بنا لیا ۔ یہ مجھ سے عبداللہ بن عمر نے بیان کیا ۔ ( بخاری و مسلم )

´سیدنا سلیمان بن بریدہ اپنے باپ سے روایت کرتے ہیں کہ` رسول اللہ صلی اللہ علیہ وسلم جب کسی لشکر یا سریہ کا امیر مقرر فرماتے تو اسے بالخصوص خدا خوفی اور اپنے مسلمانوں ساتھیوں کے ساتھ بھلائی اور خیر کی نصیحت فرماتے ۔ اس کے بعد فرماتے ’’ اللہ کے نام کے ساتھ اس کے راستہ میں جہاد کرو ان لوگوں سے جو خدا کے منکر و کافر ہیں ۔ لڑائی کرو ، خیانت نہ کرنا ، دھوکہ نہ دینا اور مثلہ نہ کرنا ، بچوں کو قتل نہ کرنا ۔ مشرک دشمن سے جب ملاقات ہو تو ان کو لڑائی سے پہلے تین چیزوں کی دعوت پیش کرو ۔ ان میں سے جسے وہ قبول کر لیں اسے قبول کر لو اور ان سے لڑائی نہ کرو ۔ پہلے ان کو اسلام کی دعوت پیش کرو ۔ پس اگر وہ اس کو تسلیم کر لیں تو اسے قبول کر لو ۔ پھر ان کو دعوت دو کہ وہ اپنے گھربار چھوڑ کر ( دارالسلام ) مہاجرین کے ملک کی طرف ہجرت کر کے آ جائیں ۔ اگر وہ انکار کریں تو ان کو خبردار کر دو کہ ان کے حقوق بدوی مسلمانوں کے برابر ہوں گے اور ان کے لیے مال غنیمت اور اموال فے میں سے کچھ بھی نہیں ہو گا ۔ الایہ کہ وہ مسلمانوں کے ساتھ مل کر جہاد میں شریک ہوں ۔ اگر اس سے انکار کریں تو ان سے جزیہ لو ۔ اگر وہ تسلیم کر لیں تو اسے بھی قبول کر لو اور اگر وہ انکار کریں تو اللہ سے مدد طلب کرو اور ان سے لڑائی شروع کر دو اور جب تم کسی قلعہ کا محاصرہ کر لو اور وہ تم سے اللہ اور اس کے نبی کا ذمہ و عہد لینا چاہیں تو انہیں یہ ذمہ نہ دو بلکہ تم اپنا عہد و ذمہ ان کو دے دو ۔ ( اس کے خلاف نہ کرنا ) اس لئے کہ اگر تم اپنے عہد و ذمہ کو توڑتے ہو تو یہ اللہ کی پناہ کو توڑنے سے بہت خفیف و ہلکا ہے اور جب یہ چاہیں کہ تو ان کو اللہ کے حکم و فیصلہ پر اتارے تو ایسا نہ کرنا بلکہ اپنے حکم و فیصلہ پر اتارنا کیونکہ تجھے علم نہیں کہ تو اللہ کے فیصلہ پر پہنچ بھی سکے گا یا نہیں ۔ ( مسلم )

´سیدنا کعب بن مالک رضی اللہ عنہ سے روایت ہے کہ` نبی کریم صلی اللہ علیہ وسلم جب کسی غزوہ پر جانا چاہتے تو توریہ ( غیر سے چھپانے ) سے کام لیتے ۔ ( بخاری و مسلم )

´سیدنا معقل سے روایت ہے کہ` سیدنا نعمان بن مقرن رضی اللہ عنہ نے فرمایا کہ میں نبی کریم صلی اللہ علیہ وسلم کے ساتھ لڑائیوں میں شریک ہوتا رہا ہوں ۔ آپ صلی اللہ علیہ وسلم جب دن کے آغاز میں لڑائی شروع نہ کرتے تو پھر زوال آفتاب کے بعد لڑائی شروع کرتے ۔ موافق ہوائیں چلتی تھیں اور مدد کرتی تھیں ۔ اسے احمد اور تینوں نے روایت کیا ہے اور حاکم نے اسے صحیح کہا ہے اور اس کی اصل بخاری میں ہے ۔

´سیدنا صعب بن جشامہ رضی اللہ عنہ سے روایت ہے کہ` نبی کریم صلی اللہ علیہ وسلم سے مشرکین کے بچوں کے متعلق پوچھا گیا کہ ان کے گھر والوں پر شب خون مارا جاتا ہے تو ان کی عورتوں اور بچوں کو بھی مار دیتے ہیں ، آپ صلی اللہ علیہ وسلم نے فرمایا کہ ’’ وہ بھی ان میں سے ہیں ۔ “ ( بخاری ومسلم )

´سیدہ عائشہ رضی اللہ عنہا سے مروی ہے کہ` نبی کریم صلی اللہ علیہ وسلم نے اس شخص سے فرمایا جو بدر کے دن آپ صلی اللہ علیہ وسلم کے ساتھ شامل ہو گیا تھا ’’ واپس چلا جا میں مشرک سے مدد کا طالب نہیں ہوں ۔ “ ( مسلم )

´سیدنا ابن عمر رضی اللہ عنہما سے روایت ہے کہ` نبی کریم صلی اللہ علیہ وسلم نے کسی غزوہ میں ایک عورت کو دیکھا کہ اسے قتل کیا گیا ہے تو اس کے بعد آپ صلی اللہ علیہ وسلم نے عورتوں اور بچوں کے قتل سے منع فرما دیا ۔ ( بخاری و مسلم )

´سیدنا سمرہ رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا کہ ’’ مشرکین کے تجربہ کار و ماہر عمر رسیدہ لوگوں کو قتل کر دو اور بلوغت کی عمر کو نہ پہنچنے والوں کو باقی رہنے دو ۔ ‘‘ اسے ابوداؤد نے روایت کیا ہے اور ترمذی نے اسے صحیح کہا ہے ۔

´سیدنا علی رضی اللہ عنہ سے روایت ہے کہ` انہوں نے بدر کے روز ان ( کافروں ) کو دعوت مبارزت دی ۔ ( بخاری ) اور ابوداؤد میں یہ حدیث طویل ہے ۔

´سیدنا ابوایوب انصاری رضی اللہ عنہ سے روایت ہے کہ` یہ آیت «ولا تلقوا بأيديكم إلى التهلكة» ’’ اپنے ہاتھوں اپنے آپ کو ہلاکت میں نہ ڈالو ۔ ‘‘ ہمارے حق میں نازل ہوئی ۔ یہ سیدنا ابوایوب رضی اللہ عنہ نے ان لوگوں سے بطور تردید فرمایا تھا جنہوں نے رومیوں کی صفوں پر حملہ کیا تھا اور ان کی صفوں میں جا گھسے تھے ۔ اسے تینوں نے روایت کیا ہے ۔ ترمذی ، ابن حبان اور حاکم نے اسے صحیح قرار دیا ہے ۔

´سیدنا ابن عمر رضی اللہ عنہما سے روایت ہے کہ` رسول اللہ صلی اللہ علیہ وسلم نے بنو نصیر کے کھجوروں کے درخت نذر آتش کروا دیئے اور کٹوا دیئے ۔ ( بخاری و مسلم )

´سیدنا عبادہ بن صامت رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا ’’ خیانت ( غنیمت کے مال میں ) نہ کرو کیونکہ یہ ( خیانت ) دنیا میں بھی عار ہے اور آخرت میں بھی عار ۔ ‘‘ اسے احمد اور نسائی نے روایت کیا ہے اور ابن حبان نے صحیح کہا ہے ۔

´سیدنا عوف بن مالک رضی اللہ عنہ سے مروی ہے کہ` نبی کریم صلی اللہ علیہ وسلم نے فیصلہ فرمایا کہ ’’ ساز و سامان ( غازی ) قاتل کیلئے ہے ۔ ‘‘ اس کو ابوداؤد نے روایت کیا ہے اور اس کی اصل مسلم میں ہے ۔

´سیدنا عبدالرحمٰن بن عوف رضی اللہ عنہ سے` ابوجہل کے قتل کے قصہ میں مروی ہے کہ دونوں اپنی اپنی تلوار لے کر ابوجہل کی طرف ایک دوسرے سے آگے بڑھے اور انہوں نے اسے قتل کر دیا ۔ اس کے بعد وہ رسول اللہ صلی اللہ علیہ وسلم کی طرف پھرے اور آپ صلی اللہ علیہ وسلم کو ابوجہل کے قتل کی خبر دی ۔ آپ صلی اللہ علیہ وسلم نے دریافت فرمایا کہ ’’ تم دونوں میں سے کس نے اسے قتل کیا ؟ ‘‘ نیز دریافت فرمایا کہ ’’ کیا تم نے تلواریں صاف کر لی ہیں ؟ ‘‘ دونوں بولے نہیں ۔ عبدالرحمٰن نے کہا کہ آپ صلی اللہ علیہ وسلم نے ان دونوں کی تلواروں کو ملاحظہ کیا اور فرمایا ’’ تم دونوں نے اسے قتل کیا ہے ۔ ‘‘ پس رسول اللہ صلی اللہ علیہ وسلم نے ابوجہل کا ساز و سامان معاذ بن عمرو بن جموح کو دینے کا فیصلہ فرمایا ۔ ( بخاری و مسلم )

´سیدنا مکحول رحمہ اللہ سے روایت ہے کہ` نبی کریم صلی اللہ علیہ وسلم نے اہل طائف پر منجنیق نصب کی ۔ اسے ابوداؤد نے اپنی مراسیل میں تخریج کیا ہے اور اس کے راوی ثقہ ہیں مگر عقیل نے سیدنا علی رضی اللہ عنہ سے ضعیف سند کے ساتھ موصول قرار دیا ہے ۔

´سیدنا انس رضی اللہ عنہ سے روایت ہے کہ` نبی کریم صلی اللہ علیہ وسلم مکہ میں داخل ہوئے تو اس وقت آپ صلی اللہ علیہ وسلم کے سر پر ’’ خود “ تھا ۔ جب آپ صلی اللہ علیہ وسلم نے اسے سر سے اتارا تو آپ صلی اللہ علیہ وسلم کے پاس ایک آدمی آیا ، اس نے کہا کہ ابن خطل کعبہ کے پردوں کے ساتھ چمٹا ہوا ہے ۔ آپ صلی اللہ علیہ وسلم نے فرمایا ’’ اسے قتل کر دو ۔ “ ( بخاری و مسلم )

´سیدنا سعید بن جبیر رضی اللہ عنہ سے مروی ہے کہ` رسول اللہ صلی اللہ علیہ وسلم نے بدر کے روز تین آدمیوں کو باندھ کر قتل کیا ۔ اسے ابوداؤد نے اپنی مراسیل میں نقل کیا ہے ۔ اس کے راوی ثقہ ہیں ۔

´سیدنا عمران حصین رضی اللہ عنہما سے مروی ہے کہ` رسول اللہ صلی اللہ علیہ وسلم نے مشرکین کے ایک قیدی مرد کے بدلہ میں دو مسلمان مردوں کو چھڑوایا ۔ اس کی تخریج ترمذی نے کی ہے اور اسے صحیح قرار دیا ہے اور اس کی اصل مسلم میں ہے ۔

´سیدنا صخر بن عیلہ رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا ’’ جب لوگ اسلام قبول کر لیتے ہیں تو اپنے خون اور اپنے مال محفوظ کر لیتے ہیں ۔ “ اس کو روایت ابوداؤد نے روایت کیا ہے اور اس کے راوی ثقہ ہیں ۔

´سیدنا جبیر بن مطعم رضی اللہ عنہ سے مروی ہے کہ` رسول اللہ صلی اللہ علیہ وسلم نے اسیران بدر کے متعلق فرمایا ’’ اگر مطعم بن عدی بقید حیات ہوتا پھر وہ میرے پاس آ کر ان مرداروں کے متعلق بات چیت کرتا تو میں ان کو اس کی خاطر چھوڑ دیتا ۔“ ( بخاری )

´سیدنا ابوسعيد خدرى رضی اللہ عنہ سے روايت ہے كہ` اوطاس کے دن کچھ لونڈیاں ہمارے ہاتھ لگیں جن کے شوہر زندہ تھے ۔ مسلمانوں نے ان کے خاوندوں کی موجودگی کو باعث حرج سمجھا تو اس موقع پر اللہ تعالیٰ نے یہ آیت نازل فرمائی «والمحصنات من النساء إلا ما ملكت أيمانكم» ’’ تم پر خاوند والی عورتیں حرام ہیں ، مگر وہ جن کے تم مالک ہوئے ہو ۔ “ ( مسلم )

´سیدنا ابن عمر رضی اللہ عنہما سے روایت ہے کہ` رسول اللہ صلی اللہ علیہ وسلم نے نجد کی طرف ایک سریہ روانہ فرمایا ، میں بھی اس میں موجود تھا بہت سے اونٹ مال غنیمت میں حاصل ہوئے ، ان میں سے ہر ایک کے حصے میں سے بارہ بارہ اونٹ مال غنیمت کے طور پر آئے اور پھر انہیں ایک ایک اونٹ زائد دیا گیا ( بخاری و مسلم )

´سیدنا ابن عمر رضی اللہ عنہھا سے مروی ہے کہ` رسول اللہ صلی اللہ علیہ وسلم نے خیبر کے روز گھڑ سوار کو دو حصے اور پیدل کو ایک حصہ دیا ( بخاری ومسلم ) یہ الفاظ بخاری کے ہیں اور ابوداؤد کی روایت میں ہے کہ آپ صلی اللہ علیہ وسلم نے پیدل مرد مجاہد کے لئے ایک حصہ اور گھڑ سوار کے لئے تین حصے ، دو حصے اس کے گھوڑے کے اور ایک حصہ اس کا اپنا ۔

´سیدنا معن بن یزید رضی اللہ عنہ سے مروی ہے کہ` میں نے رسول اللہ صلی اللہ علیہ وسلم کو فرماتے سنا ہے ’’ حصہ سے اضافی طور پر جو کچھ دیا جائے گا وہ پانچواں حصہ نکال کر دیا جائے ۔ ‘‘ اسے احمد اور ابوداؤد نے روایت کیا ہے اور طحاوی نے اسے صحیح قرار دیا ہے ۔

´سیدنا حبیب بن مسلمہ رضی اللہ عنہ سے روایت ہے کہ` میں رسول اللہ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے سریہ میں پہلی مرتبہ جانے پر چوتھا حصہ زائد عطا فرمایا اور دوبارہ جانے پر تیسرا حصہ ۔ اسے ابوداؤد نے روایت کیا ہے اور ابن جارود ، ابن حبان اور حاکم نے صحیح کہا ہے ۔

´سیدنا ابن عمر رضی اللہ عنہما سے مروی ہے کہ` رسول اللہ صلی اللہ علیہ وسلم بعض فوجی دستوں کو بالخصوص غنیمت کے حصہ کے علاوہ کچھ مزید دیا کرتے تھے ۔ یہ عام فوجی کی تقسیم میں شامل نہیں ہوتا تھا ۔ ( بخاری و مسلم )

´سیدنا ابن عمر رضی اللہ عنہما ہی سے روایت ہے کہ` ہمیں غزوات میں شہد ، انگور ہاتھ آتے تو ان کو کھا پی لیتے اٹھا کر نہیں لے جاتے تھے ۔ ( بخاری ) اور ابوداؤد کی روایت میں ہے کہ ان کھانے والے حضرات سے خمس وصول نہیں کیا جاتا تھا اور ابن حبان نے اسے صحیح کہا ہے ۔

´سیدنا عبداللہ بن ابی اوفی رضی اللہ عنہ سے روایت ہے کہ` خیبر کے روز ہمیں کھانے کی اشیاء ہاتھ آئیں تو ہر آدمی آتا اور اس میں سے اپنی ضرورت کے مطابق کھانے کے لیے حاصل کر لیتا تھا پھر واپس چلا جاتا ۔ اسے ابوداؤد نے نقل کیا ہے ابن جارود اور حاکم نے اسے صحیح قرار دیا ہے ۔

´سیدنا رویفع بن ثابت رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا ’’ جو کوئی اللہ پر ایمان اور یوم آخرت پر یقین رکھتا ہے تو وہ مسلمانوں کے مال غنیمت کے گھوڑے پر سوار نہ ہو حتیٰ کہ جب وہ کمزور ہو جائے تو اسے واپس کر دے اور مسلمانوں کے مال غنیمت سے کوئی کپڑا نہ پہنے حتیٰ کہ جب وہ بوسیدہ و پرانا ہو جائے تو اسے واپس بیت المال میں جمع کرا دے ۔ “ اسے ابوداؤد اور دارمی نے روایت کیا ہے اور اس کے سب راوی ایسے ہیں جن میں کوئی حرج نہیں ۔

´سیدنا ابوعبیدہ بن جراح رضی اللہ عنہ روایت کرتے ہیں کہ` میں نے رسول اللہ سے سنا ہے کہ ’’ مسلمانوں میں سے کوئی بھی پناہ دینے کا مجاز ہے ۔ “ اس روایت کو ابن شیبہ اور احمد نے نقل کیا ہے ۔ اس کی سند ضعف ہے ۔ اور طیالسی میں عمرو بن عاص سے مروی ہے ’’ مسلمانوں کا ادنی آدمی بھی پناہ و امان دے سکتا ہے ۔ “ اور طیالسی میں عمرو بن عاص رضی اللہ عنہ سے مروی ہے کہ ’’ مسلمانوں کا ادنی آدمی بھی پناہ و امان دے سکتا ہے ۔ “ اور صحیحین کی حضرت علی رضی اللہ عنہ سے روایت میں ہے کہ ’’ تمام مسلمانوں کی پناہ ایک ہی ہے جس کے لیے ان کا ادنی آدمی بھی سعی کر سکتا ہے ۔ “ ابن ماجہ نے ایک اور طریقے سے اتنا اضافہ نقل کیا ہے ۔ ’’ ان کا بہت دور کا آدمی بھی پناہ دے سکتا ہے ۔ “ اور صحیحین میں ام ہانی رضی اللہ عنہا کی روایت ہے کہ رسول اللہ صلی اللہ علیہ وسلم نے فرمایا ’’ ہم نے بھی امان دی جسے تو نے امان دی ۔ “

´سیدنا عمر رضی اللہ عنہ سے مروی ہے کہ` انہوں نے سنا ، رسول اللہ صلی اللہ علیہ وسلم فرما رہے تھے کہ ’’ میں یہود و نصاریٰ کو جزیرۃ العرب سے باہر نکال کر دم لوں گا ۔ یہاں تک کہ عرب میں مسلمانوں کے علاوہ کسی ایک کو بھی نہیں چھوڑوں گا ۔ “ ( مسلم )

´سیدنا عمر رضی اللہ عنہ ہی سے روایت ہے کہ` بنو نضیر کے اموال ، ان اموال میں سے ہیں جو اللہ تعالیٰ نے اپنے رسول کی طرف پلٹا دئیے ہیں ۔ جن پر مسلمانوں نے نہ گھوڑے دوڑائے اور نہ اونٹ ۔ یہ اموال خالص نبی کریم صلی اللہ علیہ وسلم کے لیے تھے ۔ آپ صلی اللہ علیہ وسلم ان اموال میں سے اپنی بیویوں پر سال بھر خرچ کرتے تھے اور جو باقی بچ رہتا اس سے گھوڑے اور اسلحہ جہاد فی سبیل اللہ کی تیاری کے لیے خرید فرماتے ۔ ( بخاری و مسلم )