بلوغ المرام

´سیدنا ابن عمر رضی اللہ عنہما سے روایت ہے کہ` رسول اللہ صلی اللہ علیہ وسلم نے فرمایا ” کسی مسلمان کو یہ لائق نہیں ہے کہ وہ اپنی کسی چیز کو وصیت کرنے کا ارادہ رکھتا ہو مگر دو راتیں بھی اسی حالت میں گزار دے کہ اس کے پاس وصیت تحریری شکل میں موجود نہ ہو ۔ “ ( بخاری و مسلم )

´سیدنا سعد بن ابی وقاص رضی اللہ عنہ سے روایت ہے کہ` میں نے عرض کیا یا رسول اللہ ! میں مالدار آدمی ہوں اور میری وارث صرف میری ایک ہی بیٹی ہے ۔ تو کیا میں دو تہائی مال کو صدقہ و خیرات کر دوں ؟ آپ صلی اللہ علیہ وسلم نے فرمایا ” نہیں “ میں نے دوبارہ ، عرض کیا ، کیا میں اپنے مال کا نصف حصہ خیرات کر دوں ؟ فرمایا ” نہیں “ میں نے تیسری مرتبہ عرض کیا ، تو کیا میں تہائی مال صدقہ و خیرات کر سکتا ہوں ؟ آپ صلی اللہ علیہ وسلم نے فرمایا ” ہاں ! مگر ایک تہائی بھی بہت ہے ۔ تیرا اپنے ورثاء کو غنی چھوڑ جانا اس سے کہیں بہتر ہے کہ تو ان کو محتاج چھوڑے اور وہ لوگوں کے سامنے ہاتھ پھیلاتے پھریں ۔ “ ( بخاری و مسلم )

´سیدہ عائشہ رضی اللہ عنہا سے روایت ہے کہ` ایک شخص نبی کریم صلی اللہ علیہ وسلم کی خدمت میں حاضر ہوا اور عرض کیا یا رسول اللہ ! میری والدہ اچانک وفات پا گئی ہیں اور انہوں نے کوئی وصیت نہیں کی ۔ میرا اس کے بارے میں خیال ہے کہ اگر وہ کوئی گفتگو کرتیں تو صدقہ ( ضرور ) کرتیں ۔ کیا انہیں ثواب ملے گا اگر میں ان کی جانب سے صدقہ کر دوں ؟ آپ صلی اللہ علیہ وسلم نے فرمایا ” ہاں “ ( بخاری و مسلم ) یہ الفاظ مسلم کے ہیں ۔

´سیدنا ابوامامہ باہلی رضی اللہ عنہ سے مروی ہے کہ` میں نے رسول اللہ صلی اللہ علیہ وسلم کو ارشاد فرماتے سنا ہے کہ ” اللہ تعالیٰ نے ہر حقدار کو اس کا حق عطا فرما دیا ہے لہذا اب کسی وارث کے لیے کوئی وصیت نہیں ۔ “ اسے احمد اور چاروں نے سوائے نسائی کے روایت کیا ہے ۔ احمد اور ترمذی نے اسے حسن قرار دیا ہے اور ابن خزیمہ اور ابن جارود نے اسے قوی قرار دیا ہے اور دارقطنی نے ابن عباس رضی اللہ عنہما سے روایت کی ہے اور اس کے آخر میں اتنا اضافہ بھی کیا ہے ۔ الایہ کہ اس کے وارث چاہیں اور ان کی اسناد حسن ہیں ۔

´سیدنا معاذ بن جبل رضی اللہ عنہ سے روایت ہے کہ` نبی کریم صلی اللہ علیہ وسلم نے فرمایا ” اللہ تعالیٰ نے تم کو موت کے وقت تہائی مال کا صدقہ دینے کی اجازت دے کر تم پر احسان فرمایا ہے تاکہ تمہاری نیکیاں زیادہ ہو جائیں ۔ ٍ “ اسے دارقطنی نے روایت کیا ہے اور احمد اور بزار نے ابوالدرداء رضی اللہ عنہ کے حوالہ سے اس حدیث کی تخریج کی ہے اور ابن ماجہ نے ابوہریرہ رضی اللہ عنہ کے حوالہ سے ۔ مگر ساری کی ساری روایتیں ضعیف ہیں اس کے باوجود بعض ، بعض کے لیے باعث تقویت ہیں «والله أعلم»