بلوغ المرام

´سیدنا جابر بن عبداللہ رضی اللہ عنہما سے روایت ہے کہ` رسول اللہ صلی اللہ علیہ وسلم نے حج کیا تو ہم آپ صلی اللہ علیہ وسلم کے ساتھ نکلے یہاں تک کہ ہم ذوالحلیفہ پہنچے تو اسماء بنت عمیس رضی اللہ عنہا نے بچہ جنا ۔ آپ صلی اللہ علیہ وسلم نے فرمایا ” غسل کر اور کسی کپڑے سے لنگوٹ باندھ لے اور احرام باندھ لے ۔ “ رسول اللہ صلی اللہ علیہ وسلم نے مسجد میں نماز پڑھی اور قصواء ( آپ صلی اللہ علیہ وسلم کی اونٹنی کا نام ) پر سوار ہو گئے یہاں تک کہ جب آپ صلی اللہ علیہ وسلم بیداء کے برابر آئے تو آپ صلی اللہ علیہ وسلم نے توحیدی تلبیہ پکارا «لبيك اللهم لبيك لبيك لا شريك لك لبيك إن الحمد والنعمة لك والملك لا شريك لك» ” حاضر ہوں ، اے میرے اللہ ! میں حاضر ہوں ، تیرا کوئی شریک نہیں ، میں حاضر ہوں ، بلا شک سب تعریفیں اور انعامات تیرے ہیں ۔ بادشاہت بھی تیری ہے ، تیرا کوئی شریک نہیں ۔ “ یہاں تک کہ ہم بیت اللہ میں داخل ہوئے ۔ رکن ( اسود ) کو آپ صلی اللہ علیہ وسلم نے بوسہ دیا ، تین بار رمل کیا اور چار بار معمول کے مطابق چلے ۔ پھر آپ صلی اللہ علیہ وسلم مقام ابراہیم پر آئے اور نماز پڑھی پھر رکن ( حجر اسود ) کی طرف واپس آئے اور اس کو بوسہ دیا ۔ پھر مسجد الحرام کے دروازہ سے صفا کی طرف نکلے جب صفا کے نزدیک پہنچے تو یہ آیت پڑھی ۔ ” تحقیق صفا اور مروہ اللہ تعالیٰ کی نشانیوں میں سے ہیں ۔ “ ( پھر فرمایا ) ” میں شروع کرتا ہوں ( سعی کو ) اس مقام سے کہ جہاں سے اللہ نے شروع کیا ہے ۔ “ پھر صفا پر چڑھے ۔ یہاں تک کہ آپ صلی اللہ علیہ وسلم نے بیت اللہ کو دیکھا ۔ پھر قبلہ رخ ہوئے اور اللہ کی وحدانیت اور کبریائی بیان کی اور کہا ” اللہ کے سوا کوئی معبود نہیں وہ اکیلا ہے کوئی اس کا شریک نہیں ۔ بادشاہی اور سب خوبیاں اسی کی ہیں اور وہ ہر چیز پر قادر ہے اللہ کے سوا کوئی معبود نہیں ۔ اس نے اپنا وعدہ پورا کر دیا اور اپنے بندے کی مدد کی اور کفار کی جماعت کو اکیلے اسی نے شکست دی ۔ “ پھر اس کے درمیان تین بار دعا کی ۔ پھر صفا سے اترے اور مروہ کی طرف گئے ۔ یہاں تک کہ جب آپ صلی اللہ علیہ وسلم کے دونوں پاؤں وادی کے نشیب میں پڑے تو دوڑے یہاں تک کہ آپ صلی اللہ علیہ وسلم نشیب سے اوپر چڑھے اور مروہ کی طرف چلے ۔ مروہ پر وہی کچھ کیا جو صفا پر کیا تھا ۔ پھر جابر رضی اللہ عنہ نے ساری حدیث بیان کی جس میں یہ ہے کہ جب ترویہ کا دن ( 8 ذی الحج ) ہوا تو لوگ منیٰ کی طرف متوجہ ہوئے اور نبی کریم صلی اللہ علیہ وسلم سوار تھے پھر وہاں ظہر ، عصر ، مغرب ، عشاء اور صبح کی نماز پڑھی ۔ پھر تھوڑی دیر ٹھہرے یہاں تک کہ سورج نکل آیا تو وہاں سے روانہ ہوئے اور مزدلفہ سے گزرتے ہوئے عرفات میں پہنچے تو خیمہ میں اترے جو آپ صلی اللہ علیہ وسلم کیلئے نمرہ میں لگایا گیا تھا ۔ پھر جب سورج ڈھلنے لگا تو آپ صلی اللہ علیہ وسلم نے قصواء پر پالان رکھنے کا حکم دیا ۔ آپ صلی اللہ علیہ وسلم سوار ہو کر وادی کے درمیان میں آئے اور لوگوں کو خطبہ دیا پھر اذان دلوائی پھر اقامت کہلوائی تو نماز ظہر ادا کی پھر اقامت کہلوائی تو عصر کی نماز پڑھی اور ان دونوں کے درمیان کوئی نماز نہ پڑھی ۔ پھر سوار ہو کر ٹھہرنے کی جگہ پر پہنچے تو اپنی اونٹنی قصواء کا پیٹ پتھروں کی طرف کر دیا اور راہ چلنے والوں کو اپنے سامنے کر لیا اور اپنا رخ قبلہ کی جانب کر لیا ۔ پھر آپ صلی اللہ علیہ وسلم اس وقت تک ٹھہرے رہے کہ سورج غروب ہونے لگا اور تھوڑی سی زردی ختم ہو گئی حتیٰ کہ سورج مکمل طور پر غروب ہو گیا پھر آپ صلی اللہ علیہ وسلم اسی حالت میں واپس ہوئے ۔ آپ صلی اللہ علیہ وسلم نے قصواء کی باگ اتنی تنگ کر رکھی تھی کہ اس کا سر آپ صلی اللہ علیہ وسلم کے پالان کے اگلے ابھرے ہوئے حصے کو پہنچتا تھا اور آپ صلی اللہ علیہ وسلم اپنے داہنے ہاتھ سے اشارہ کرتے ہوئے فرماتے تھے ” اے لوگو ! تسکین و اطمینان اختیار کرو “ اور جب بھی آپ صلی اللہ علیہ وسلم کسی ٹیلے پر آتے تو باگ تھوڑی سی ڈھیلی کر دیتے کہ وہ اوپر چڑھ جاتی یہاں تک کہ آپ صلی اللہ علیہ وسلم مزدلفہ تشریف لائے اور وہاں ایک اذان اور دو اقامت کے ساتھ مغرب اور عشاء کی نماز پڑھی اور دونوں کے درمیان کوئی نفلی نماز نہیں پڑھی ۔ پھر لیٹ گئے ۔ یہاں تک کہ صبح ہو گئی ۔ جب صبح کا وقت ظاہر ہوا تو آپ صلی اللہ علیہ وسلم نے اذان اور اقامت سے فجر کی نماز پڑھی ۔ پھر سوار ہو کر مشعر حرام پر آئے ۔ پس آپ صلی اللہ علیہ وسلم قبلہ رو ہوئے دعا کی اور تکبیر و تہلیل کہتے رہے ۔ آپ صلی اللہ علیہ وسلم وہاں اچھی طرح سفیدی ظاہر ہونے تک ٹھہرے رہے پھر سورج نکلنے سے پہلے واپس ہو کر وادی محسر کے نشیب میں آ گئے تو سواری کو کچھ تیز کر دیا ۔ پھر درمیانی راستہ پر چلے جو جمرہ کبریٰ ( بڑا شیطان ) پر پہنچتا ہے پھر آپ صلی اللہ علیہ وسلم اس جمرہ پر آئے جو درخت کے پاس ہے تو اسے سات کنکریاں وادی کے نشیب سے ماریں ، ہر کنکری کے ساتھ «الله اكبر» کہتے تھے ، ان میں سے ہر کنکری خذف ( لوبیے کے دانے ) کے برابر تھی ۔ پھر آپ صلی اللہ علیہ وسلم قربان گاہ کی طرف گئے اور وہاں قربانی کی پھر رسول اللہ صلی اللہ علیہ وسلم سوار ہوئے اور بیت اللہ کی طرف روانہ ہوئے ۔ پھر مکہ میں ظہر کی نماز پڑھی ۔ اسے مسلم نے تفصیل سے بیان کیا ہے ۔

´سیدنا خزیمہ بن ثابت رضی اللہ عنہ سے روایت ہے کہ` نبی کریم صلی اللہ علیہ وسلم جب حج یا عمرہ میں تلبیہ ( یعنی لبیک ) کہنے سے فارغ ہوتے تو اللہ تعالیٰ سے اس کی رضامندی اور جنت طلب کرتے اور اس کی رحمت کے ساتھ آگ سے پناہ مانگتے ۔ اسے امام شافعی رحمہ اللہ نے ضعیف سند سے روایت کیا ہے ۔

´سیدنا جابر رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا ” میں نے قربانی اس جگہ کی ہے ، مگر منی سارے کا سارا قربان گاہ ہے ۔ لہذا تم اپنے اپنے ٹھہرنے کے مقامات پر قربانی کر دو اور میں نے اس جگہ قیام کیا ہے مگر عرفات کا سارا میدان جائے قیام ہے اور میں نے یہاں قیام کیا مگر مزدلفہ سارا جائے قیام ہے ۔ “ ( مسلم )

´سیدہ عائشہ رضی اللہ عنہا سے مروی ہے کہ` نبی کریم صلی اللہ علیہ وسلم جب حج کے لیے مکہ میں داخل ہوئے تو اس موقع پر مکہ کی بالائی جانب سے داخل ہوئے اور جب واپس جانے کے لیے مکہ سے نکلے تو زیریں حصے سے نکلے ۔ ( بخاری و مسلم )

´سیدنا ابن عمر رضی اللہ عنہما سے روایت ہے کہ` وہ جب بھی مکہ میں آتے تو ذی طویٰ میں صبح تک شب بسر کرتے اور غسل کرتے اور کہتے تھے کہ رسول اللہ صلی اللہ علیہ وسلم اسی طرح کیا کرتے تھے ۔ ( بخاری و مسلم )

´سیدنا ابن عباس رضی اللہ عنہما سے مروی ہے کہ` آپ حجر اسود کو بوسہ دیتے اور اس کے سامنے سجدہ کرتے ۔ اسے حاکم نے مرفوع اور بیہقی نے موقوف روایت کیا ہے ۔

´سیدنا ابن عباس رضی اللہ عنہما سے ہی روایت ہے کہ` نبی کریم صلی اللہ علیہ وسلم نے صحابہ کرام رضی اللہ عنہم کو حکم دیا کہ تین چکروں میں تیز قدم چلیں اور دونوں رکنوں کے درمیان چار چکر عام معمول کے مطابق چل کر لگائیں ۔ ( بخاری و مسلم )

´سیدنا عبداللہ بن عمر رضی اللہ عنہما` جب بھی بیت اللہ کا طواف قدوم ( پہلا طواف ) کرتے تو اس کے پہلے تین چکروں میں پہلوانوں کی سی چال چلتے اور ( باقی ) چار میں آہستہ چلتے ۔ ایک اور روایت میں ہے کہ ( سیدنا عبداللہ بن عمر رضی اللہ عنہما رسول اللہ صلی اللہ علیہ وسلم کا عمل بیان کرتے ہوئے فرماتے ہیں ) میں نے اللہ کے رسول صلی اللہ علیہ وسلم کو دیکھا کہ آپ صلی اللہ علیہ وسلم نے حج یا عمرہ کے لئے بھی جب طواف قدوم کیا تو اس کے پہلے تین چکر دوڑ کر لگائے اور باقی چار میں آپ صلی اللہ علیہ وسلم آہستہ چال چلتے ۔ ( متفق علیہ )

´سیدنا عبداللہ بن عمر رضی اللہ عنہما ہی اس کے راوی ہیں کہ` میں نے رسول اللہ صلی اللہ علیہ وسلم کو سوائے دونوں یمانی رکنوں کے بیت اللہ کے کسی رکن کو چھوتے ہوئے نہیں دیکھا ۔ ( مسلم )

´سیدنا عمر رضی اللہ عنہ سے مروی ہے کہ` انہوں نے حجر اسود کو بوسہ دیا اور فرمایا کہ مجھے اچھی طرح معلوم ہے کہ تو پتھر ہے کسی قسم کے نفع و نقصان کا مالک نہیں ۔ اگر میں نے رسول اللہ صلی اللہ علیہ وسلم کو تجھے بوسہ دیتے ہوئے نہ دیکھا ہوتا تو میں تجھے بوسہ نہ دیتا ۔ ( بخاری و مسلم )

´سیدنا ابوطفیل رضی اللہ عنہ سے روایت ہے کہ` میں نے رسول اللہ صلی اللہ علیہ وسلم کو بیت اللہ کا طواف کرتے دیکھا ہے آپ صلی اللہ علیہ وسلم نوکیلے سرے والی چھڑی جو آپ صلی اللہ علیہ وسلم کے پاس تھی ، ( اس ) سے حجر اسود کو چھوتے اور اس چھڑی کو بوسہ دیتے تھے ۔ ( مسلم )

´سیدنا یعلیٰ بن امیہ رضی اللہ عنہ سے روایت ہے کہ` رسول اللہ صلی اللہ علیہ وسلم نے ایک سبز چادر میں طواف کیا جس کو آپ صلی اللہ علیہ وسلم نے دائیں بغل سے نکال کر بائیں کندھے پر ڈال رکھا تھا ۔ اسے نسائی کے سوا پانچوں نے روایت کیا ہے اور ترمذی نے اسے صحیح قرار دیا ہے ۔

´سیدنا انس رضی اللہ عنہ سے روایت ہے کہ` ہم میں سے کچھ لوگ «لا إله إلا الله» کہتے تھے ، اسے بھی برا نہیں سمجھا جاتا تھا اور بعض ہم میں سے تکبیریں کہتے تھے ان کو بھی برا نہیں سمجھا جاتا تھا ۔ ( بخاری و مسلم )

´سیدنا ابن عباس رضی اللہ عنہما سے مروی ہے کہ` مجھے نبی کریم صلی اللہ علیہ وسلم نے مسافروں کے سامان کے ساتھ ( یا فرمایا ) کہ کمزوروں کے ساتھ رات ہی کو مزدلفہ سے ( منیٰ کی جانب ) بھیج دیا تھا ۔ ( بخاری و مسلم )

´سیدہ عائشہ رضی اللہ عنہا سے روایت ہے کہ` سیدہ سودہ رضی اللہ عنہا نے مزدلفہ کی رات آپ صلی اللہ علیہ وسلم سے اجازت طلب کی کہ وہ آپ صلی اللہ علیہ وسلم سے پہلے واپس آ جائیں ( یہ اجازت انہوں نے اس لئے طلب کی ) کہ بھاری جسم والی تھیں ۔ ( اس وجہ سے آہستہ آہستہ اور ٹھہر ٹھہر کر چلتی تھیں ) آپ صلی اللہ علیہ وسلم نے ان کو اجازت دے دی ۔ ( بخاری و مسلم )

´سیدنا ابن عباس رضی اللہ عنہما سے مروی ہے کہ` رسول اللہ صلی اللہ علیہ وسلم نے ہمیں حکم دیا کہ ” طلوع آفتاب سے پہلے کنکریاں نہ مارو ۔ “ اسے نسائی کے علاوہ پانچوں نے روایت کیا ہے اس کی سند میں انقطاع ہے ۔

´سیدہ عائشہ رضی اللہ عنہا سے مروی ہے کہ` نبی کریم صلی اللہ علیہ وسلم نے سیدہ ام سلمہ رضی اللہ عنہا کو قربانی والی رات پہلے بھیج دیا تھا ۔ انہوں نے فجر کے طلوع ہونے سے پہلے کنکریاں ماریں پھر جا کر طواف افاضہ کیا ۔ اسے ابوداؤد نے روایت کیا اس کی سند مسلم کی شرط پر ہے ۔

´سیدنا عروہ بن مضرس رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا ” جو کوئی مزدلفہ میں ہماری نماز میں شامل ہوا اور ہمارے ساتھ وقوف کیا یہاں تک کہ ہم نے کوچ کیا اور اس سے قبل عرفات میں رات یا دن میں قیام کر چکا ہو تو اس کا حج مکمل ہو گیا اور اس نے اپنی میل کچیل اتار لی ۔ “ اسے پانچوں نے روایت کیا ہے ترمذی اور ابن خزیمہ نے اسے صحیح قرار دیا ہے ۔

´سیدنا عمر رضی اللہ عنہ کا بیان ہے کہ` مشرکین طلوع آفتاب کے بعد واپس لوٹتے تھے اور کہتے تھے ، ثبیر ( ایک پہاڑ کا نام ) روشن ہو گیا اور نبی کریم صلی اللہ علیہ وسلم نے ان کی مخالفت کی اور طلوع آفتاب سے پہلے تشریف لے آئے ۔ ( بخاری )

´سیدنا ابن عباس رضی اللہ عنہما اور اسامہ بن زید رضی اللہ عنہما دونوں سے مروی ہے کہ` نبی کریم صلی اللہ علیہ وسلم جمرہ عقبہ ( چھوٹا شیطان ) کو کنکری مارنے تک تلبیہ کہتے رہے ۔ ( بخاری )

´سیدنا عبداللہ بن مسعود رضی اللہ عنہما سے منقول ہے کہ` انہوں نے بیت اللہ کو اپنی بائیں جانب اور منٰی کو اپنی دائیں جانب رکھا اور جمرہ کو سات سنگریزے مارے اور فرمایا کہ یہ ان ( صلی اللہ علیہ وسلم ) کے کھڑے ہونے کی جگہ ہے جن پر سورۃ «البقره» کا نزول ہوا تھا ۔ ( بخاری و مسلم )

´سیدنا جابر رضی اللہ عنہ سے روایت ہے کہ` رسول اللہ صلی اللہ علیہ وسلم نے جمرہ کو قربانی کے روز چاشت کے وقت کنکریاں ماریں اور اس روز کے بعد آفتاب ڈھلنے کے بعد ۔ ( مسلم )

´سیدنا ابن عمر رضی اللہ عنہما سے روایت ہے کہ` وہ سب سے قریبی جمرہ کو سات سنگریزے مارتے اور ہر کنکری مارتے وقت تکبیر کہتے ۔ پھر آگے تشریف لے جاتے اور میدان میں آ کر کھڑے ہو جاتے اور قبلہ رخ ہو کر طویل قیام فرماتے اور اپنے ہاتھ اوپر اٹھا کر دعا کرتے ۔ پھر جمرہ وسطی ( درمیانہ شیطان ) کو کنکریاں مارتے ۔ پھر بائیں جانب ہو جاتے اور میدان میں آ کر قبلہ رخ کھڑے ہو جاتے ۔ پھر اپنے ہاتھ اوپر اٹھاتے اور دعا فرماتے اور طویل قیام فرماتے ۔ اس کے بعد جمرہ عقبہ کو کنکریاں وادی کی نچلی جگہ سے مارتے مگر وہاں قیام نہ فرماتے ۔ پھر واپس تشریف لے آتے ۔ ابن عمر رضی اللہ عنہما کا بیان ہے کہ میں نے رسول اللہ صلی اللہ علیہ وسلم کو اسی طرح عمل کرتے دیکھا ہے ۔ ( بخاری )

´سیدنا ابن عمر رضی اللہ عنہما سے ہی یہ حدیث بھی مروی ہے کہ` رسول اللہ صلی اللہ علیہ وسلم نے فرمایا ” الٰہی سر منڈانے والے حاجیوں پر رحم فرما “ صحابہ نے عرض کیا اے اللہ کے رسول ! بال ترشوانے والے پر بھی ۔ تو رسول اللہ صلی اللہ علیہ وسلم نے تیسری مرتبہ فرمایا ” بال ترشوانے والوں پر بھی ۔ “ ( بخاری و مسلم )

´سیدنا عبداللہ بن عمرو بن عاص رضی اللہ عنہما سے روایت ہے کہ` رسول اللہ صلی اللہ علیہ وسلم حجۃ الوداع میں ایک مقام پر کھڑے ہو گئے ۔ صحابہ رضی اللہ عنہم نے آپ صلی اللہ علیہ وسلم سے سوالات کرنے شروع کیے ۔ کسی نے کہا کہ مجھے علم نہیں تھا اور میں نے قربانی سے پہلے حجامت بنوا لی ۔ آپ صلی اللہ علیہ وسلم نے اسے فرمایا ” قربانی کرو ، کوئی حرج نہیں “ اور ایک آدمی نے عرض کیا ” مجھے معلوم نہیں تھا اور میں نے کنکریاں مارنے سے پہلے قربانی کر لی “ آپ صلی اللہ علیہ وسلم نے اسے فرمایا ” اب کنکریاں مار لے ، کوئی حرج نہیں “ اس روز آپ صلی اللہ علیہ وسلم سے کسی عمل کے مقدم و مؤخر کرنے کے متعلق استفسار پر آپ صلی اللہ علیہ وسلم نے فرمایا ” جاؤ اب کر لو ، کوئی حرج نہیں ۔ “ ( بخاری و مسلم )

´سیدنا مسور بن مخرمہ رضی اللہ عنہما سے روایت ہے کہ` رسول اللہ صلی اللہ علیہ وسلم نے خود قربانی حجامت کرانے سے پہلے کی اور اپنے صحابہ رضی اللہ عنہم کو بھی اس کا حکم دیا ۔ ( بخاری )

´سیدہ عائشہ رضی اللہ عنہا سے روایت ہے کہ` رسول اللہ صلی اللہ علیہ وسلم نے فرمایا ” جب کنکریاں مار چکو اور سر کے بال منڈوا لو تو تمہارے لیے خوشبو اور بیویوں کے علاوہ ہر چیز حلال ہو گئی ۔ “ اسے احمد اور ابوداؤد نے روایت کیا اور اس کی سند میں ضعف ہے ۔

´سیدنا ابن عباس رضی اللہ عنہما سے مروی ہے کہ` نبی کریم صلی اللہ علیہ وسلم نے فرمایا ” عورتوں کے لیے منڈوانا نہیں بلکہ ان کے لیے صرف بال ترشوانا ہے ۔ “ اسے ابوداؤد نے حسن سند سے روایت کیا ہے ۔

´سیدنا ابن عمر رضی اللہ عنہما سے روایت ہے کہ` عباس بن عبدالمطلب رضی اللہ عنہ نے رسول اللہ صلی اللہ علیہ وسلم سے اجازت طلب کی کہ وہ منٰی والی راتیں مکہ میں کاٹیں تاکہ وہ آب زمزم پلا سکیں تو آپ صلی اللہ علیہ وسلم نے ان کو اجازت دیدے دی ۔ ( بخاری و مسلم )

´سیدنا عاصم بن عدی رضی اللہ عنہ سے مروی ہے کہ` رسول اللہ صلی اللہ علیہ وسلم نے اونٹ کے چرواہوں کو منی سے باہر رات گزارنے کی اجازت دے دی کہ قربانی کے دن کنکریاں ماریں پھر دوسرے اور تیسرے دو روز بھی کنکریاں ماریں پھر کوچ کے سنگریزے ماریں ۔ اسے پانچوں نے روایت کیا ہے ترمذی اور ابن حبان نے اسے صحیح قرار دیا ہے ۔

´سیدنا ابوبکرہ رضی اللہ عنہ سے روایت ہے کہ` رسول اللہ صلی اللہ علیہ وسلم نے قربانی کے روز خطبہ دیا اور ساری حدیث ذکر کی ۔ ( بخاری ومسلم )

´سیدہ سراء بنت نبھان رضی اللہ عنہا سے روایت ہے کہ` رسول اللہ صلی اللہ علیہ وسلم نے ہمیں سروں والے دن خطاب فرمایا اور فرمایا ” کیا یہ دن ایام تشریق کا درمیانہ دن نہیں ہے ؟ “ اور ساری حدیث ذکر کی ۔ اسے ابوداؤد نے حسن سند کے ساتھ روایت کیا ہے ۔

´سیدہ عائشہ رضی اللہ عنہا سے مروی ہے کہ` نبی کریم صلی اللہ علیہ وسلم نے ان سے فرمایا کہ ” تیرا بیت اللہ کا طواف کر لینا صفا اور مروہ کے مابین سعی کر لینا حج اور عمرے کے لئے کافی ہے ۔ “ ( مسلم )

´سیدنا ابن عباس رضی اللہ عنہما سے روایت ہے کہ` نبی کریم صلی اللہ علیہ وسلم نے طواف افاضہ میں طواف کے سات چکروں ( پھیروں ) میں کسی چکر میں بھی رمل نہیں فرمایا ۔ اسے ترمذی کے علاوہ پانچوں نے روایت کیا ہے اور حاکم نے اسے صحیح قرار دیا ہے ۔

´سیدنا انس رضی اللہ عنہ سے مروی ہے کہ` نبی کریم صلی اللہ علیہ وسلم نے ( بالترتیب اپنے اپنے وقت میں ) ظہر اور عصر ‘ مغرب اور عشاء کی نمازیں پڑھیں اور پھر مقام محصب پر تھوڑا سو گئے پھر سوار ہو کر بیت اللہ کی جانب تشریف لے گئے اور طواف کیا ۔ ( بخاری )

´سیدہ عائشہ رضی اللہ عنہا سے مروی ہے کہ` وہ ابطح ( محصب ) میں فروکش ہونے کا عمل نہیں کرتی تھیں اور فرماتی تھیں کہ رسول اللہ صلی اللہ علیہ وسلم نے اس مقام پر اس لئے قیام فرمایا تھا کہ یہاں سے واپسی میں آسانی و سہولت زیادہ تھی ۔ ( مسلم )

´سیدنا ابن عباس رضی اللہ عنہما سے روایت ہے کہ` رسول اللہ صلی اللہ علیہ وسلم نے لوگوں کو حکم دیا کہ سب سے آخر میں تمہارا عمل بیت اللہ کا طواف ہو مگر ایام ماہواری والی عورتوں کے لئے تخفیف کر دی گئی ہے ۔ ( بخاری و مسلم )

´سیدنا ابن زبیر رضی اللہ عنہ سے روایت ہے کہ` رسول اللہ علیہ وسلم نے فرمایا کہ ” میری اس مسجد ( مسجدنبوی ) میں ایک نماز ادا کرنے کا ثواب دوسری مساجد میں نماز ادا کرنے کے مقابلہ میں ہزار گنا زیادہ ہے ۔ بجز مسجد الحرام کے اور مسجد الحرام میں ایک نماز کی ادائیگی میری اس مسجد میں سو نماز پڑھنے سے افضل ہے ۔ “ اسے احمد نے روایت کیا ہے اور ابن حبان نے صحیح قرار دیا ہے ۔