بلوغ المرام

´ابواسحٰق رحمہ اللہ سے مروی ہے کہ` عبداللہ بن یزید رضی اللہ عنہ نے میت کو اس کے پاؤں کی طرف سے قبر میں اتارا اور کہا کہ سنت طریقہ یہی ہے ۔ ( ابوداؤد )

´سیدنا ابن عمر رضی اللہ عنہما سے مروی ہے کہ` رسول اللہ صلی اللہ علیہ وسلم کا ارشاد ہے کہ ” جب اپنے مرنے والوں کو قبروں میں اتارو تو «بسم الله وعلى مله رسول الله» کہو ۔ “
اسے احمد ، ابوداؤد اور نسائی نے نکالا ہے ۔ ابن حبان نے اسے صحیح قرار دیا ہے اور دارقطنی نے اسے معلول قرار دیتے ہوئے اسے موقوف کہا ہے ۔

´سیدہ عائشہ رضی اللہ عنہا روایت کرتی ہیں کہ` رسول اللہ صلی اللہ علیہ وسلم نے فرمایا : ” کسی مردے کی ہڈی توڑنے ( کا گناہ ) زندہ انسان کی ہڈی توڑنے کے گناہ کی طرح ہے ۔ “
اسے ابوداؤد نے مسلم کی شرط کی سند سے روایت کیا ہے اور ابن ماجہ نے ام سلمہ رضی اللہ عنہا سے مروی روایت میں اتنا اضافہ نقل کیا ہے کہ ” گناہ میں ۔‏‏‏‏“

´سیدنا سعد بن ابی وقاص رضی اللہ عنہ روایت کرتے ہیں کہا کہ` میرے لیے بغلی لحد والی قبر بنانا اور مجھ پر کچی اینٹیں چننا جس طرح رسول اللہ صلی اللہ علیہ وسلم کے ساتھ کیا گیا ۔ ( مسلم ) اور بیہقی نے جابر رضی اللہ عنہ کے حوالے سے اسی طرح روایت کیا ہے اور اتنا اضافہ نقل کیا ہے کہ آپ صلی اللہ علیہ وسلم کی قبر زمین سے صرف ایک بالشت برابر اونچی بنائی گئی ۔
ابن حبان نے اسے صحیح قرار دیا ہے ۔ اور مسلم میں جابر رضی اللہ عنہ سے مروی ہے کہ نبی کریم صلی اللہ علیہ وسلم نے منع فرمایا کہ ” قبر کو پختہ کیا جائے اور اس پر بیٹھا جائے اور اس پر عمارت تعمیر کی جائے ۔ “

´سیدنا عامر بن ربیعہ رضی اللہ عنہ سے مروی ہے کہ` نبی کریم صلی اللہ علیہ وسلم نے عثمان بن مظعون رضی اللہ عنہ کی نماز جنازہ پڑھی اور ان کی قبر پر تشریف لائے اور کھڑے کھڑے تین لپ مٹی ڈالی ۔ ( سنن دارقطنی )

´سیدنا عثمان رضی اللہ عنہ سے مروی ہے کہ` رسول اللہ صلی اللہ علیہ وسلم جب میت کی تدفین سے فارغ ہو جاتے تو قبر پر کھڑے ہو جاتے اور فرماتے کہ ” اپنے بھائی کیلئے بخشش مانگو اور ثابت قدم رہنے کی دعا کرو کیونکہ اب اس سے بازپرس کی جائے گی ۔ “
اسے ابوداؤد نے روایت کیا ہے اور حاکم نے صحیح قرار دیا ہے ۔

´سیدنا ضمرہ بن حبیب رحمہ اللہ جو ایک تابعی ہیں ، سے مروی ہے کہ` لوگ مستحب سمجھتے تھے کہ جب میت کی قبر برابر و ہموار کر دی جاتی اور لوگ جب جانے لگتے تو قبر کے پاس کھڑے ہو کر میت کو مخاطب ہو کر یوں کہا جائے ” اے فلاں ! «لا إله إلا الله» کہو اللہ کے سوا کوئی معبود برحق نہیں “ اس کو تین مرتبہ کہے ” اے فلاں ! «ربي الله وديني الإسلام ونبيي محمد» کہو میرا رب اللہ ہے ، میرا دین اسلام ہے اور محمد صلی اللہ علیہ وسلم میرے نبی ہیں ۔“
سعید بن منصور نے اسے موقوف بیان کیا ہے اور طبرانی نے اسی طرح کی ابوامامہ رضی اللہ عنہ کی لمبی مرفوع حدیث بیان کی ہے ۔

´سیدنا بریدہ بن حصیب اسلمی رضی اللہ عنہ سے روایت ہے کہ` رسول اللہ صلی اللہ علیہ وسلم نے فرمایا : ” میں نے تمہیں قبروں کی زیارت سے منع کیا تھا ۔ اب ان کی زیارت کرو ۔“ ( مسلم )
ترمذی نے اتنا اضافہ کیا ہے کہ ” قبروں کی زیارت آخرت کی یاد دلاتی ہے ۔ “ اور ابن ماجہ نے ابن مسعود رضی اللہ عنہما کی روایت میں اتنا اضافہ کیا ہے کہ ” یہ زیارت دنیا سے بے رغبت بنا دیتی ہے ۔ “

´سیدنا ابوہریرہ رضی اللہ عنہ سے مروی ہے کہ` رسول اللہ صلی اللہ علیہ وسلم نے قبروں کی زیارت کرنے والی جانے والی خواتین پر لعنت فرمائی ہے ۔
اسے ترمذی نے نکالا ہے اور ابن حبان نے صحیح قرار دیا ہے ۔

´سیدنا ابوسعید خدری رضی اللہ عنہ سے روایت ہے کہ` رسول اللہ صلی اللہ علیہ وسلم نے نوحہ کرنے اور سننے والی پر لعنت فرمائی ہے ۔ ( ابوداؤد )

´سیدہ ام عطیہ رضی اللہ عنہا سے مروی ہے کہ` رسول اللہ صلی اللہ علیہ وسلم نے ہم سے بیعت کے موقع پر یہ عہد لیا تھا کہ ہم میت پر نوحہ نہیں کریں گی ۔ ( بخاری و مسلم )

´سیدنا ابن عمر رضی اللہ عنہما سے مروی ہے کہ` نبی کریم صلی اللہ علیہ وسلم نے فرمایا ” مرنے والے کو اس پر نوحہ کرنے والوں کے سبب سے قبر میں عذاب دیا جاتا ہے ۔ “ ( بخاری و مسلم )
نیز ان دونوں نے مغیرہ بن شعبہ رضی اللہ عنہ کے واسطہ سے اسی طرح روایت بیان کی ہے ۔

´سیدنا انس رضی اللہ عنہ کا بیان ہے کہ` میں نبی کریم صلی اللہ علیہ وسلم کی ایک صاحبزادی کی تدفین کے موقع پر حاضر تھا ۔ رسول اللہ صلی اللہ علیہ وسلم قبر کے پاس بیٹھے ہوئے تھے کہ میں نے دیکھا آپ صلی اللہ علیہ وسلم کی دونوں آنکھوں سے آنسو جاری تھے ۔ ( بخاری )

´سیدنا جابر رضی اللہ عنہ سے مروی ہے کہ` نبی کریم صلی اللہ علیہ وسلم نے فرمایا کہ ” اپنے مرنے والوں کو رات کے اوقات میں دفن نہ کرو الایہ کہ تم اس کے لئے مجبور ہو جاؤ ۔ “ ( ابن ماجہ ) اس کی اصل مسلم میں ہے لیکن اسی میں ہے کہ آپ صلی اللہ علیہ وسلم نے رات کو دفن کرنے پر ڈانٹا الایہ کہ نماز جنازہ پڑھ لی جائے ۔

´سیدنا عبداللہ بن جعفر رضی اللہ عنہ سے روایت ہے کہ` جب جعفر بن ابی طالب رضی اللہ عنہ کی شہادت کی خبر موصول ہوئی تو رسول اللہ صلی اللہ علیہ وسلم نے فرمایا کہ ” جعفر کے گھر والوں کے لئے کھانا تیار کرو ۔ ان کو ایسی تکلیف دہ اطلاع ملی ہے جو ان کو کھانا پکانے سے مشغول رکھے گی ۔ “ نسائی کے علاوہ اسے پانچوں نے روایت کیا ہے ۔

´سیدنا سلیمان بن بریدہ رحمہ اللہ اپنے والد سے روایت کرتے ہیں کہ` صحابہ کرام رضی اللہ عنہم اجمعین جب قبرستان جاتے تو رسول اللہ صلی اللہ علیہ وسلم ان کو سکھلاتے کہ یوں کہو «السلام على أهل الديار من المؤمنين والمسلمين وإنا إن شاء الله بكم للاحقون أسأل الله لنا ولكم العافية» ” اہل دیار مومنوں اور مسلمانوں پر سلام ہو ! یقیناً ، انشاء اللہ ہم بھی آپ کے ساتھ ملنے والے ہیں اور ہم اپنے لیے اور آپ کے لیے اللہ سے عافیت مانگتے ہیں ۔ “ ( مسلم )

´سیدنا ابن عباس رضی اللہ عنہما سے مروی ہے کہ` رسول اللہ صلی اللہ علیہ وسلم کا گزر مدینہ کے قبرستان سے ہوا ۔ آپ صلی اللہ علیہ وسلم ان کی طرف متوجہ ہوئے اور فرمایا «السلام عليكم يا أهل القبور يغفر الله لنا ولكم ، ‏‏‏‏‏‏‏‏ أنتم سلفنا ، ‏‏‏‏‏‏‏‏ ونحن بالأثر» ” اے اہل قبور ! تم پر سلام ہو ! اللہ ہماری اور تمہاری مغفرت فرمائے ! تم ہمارے پیش رو ہو ہم تمہارے پیچھے چلے آ رہے ہیں ۔ “ اسے ترمذی نے روایت کیا اور حسن قرار دیا ہے ۔

´سیدہ عائشہ رضی اللہ عنہا سے مروی ہے کہ` رسول اللہ صلی اللہ علیہ وسلم نے فرمایا ’’ مردوں کو گالی مت دو کیونکہ وہ اس تک پہنچ چکے ہیں جو انہوں نے آگے بھیجا ۔ ‘‘ ( بخاری )
ترمذی نے مغیرہ کے حوالہ سے اسی طرح روایت کیا ہے لیکن اس میں «فتؤذوا الأحياء » ہے یعنی تم ( گالی دے کر ) زندہ لوگوں کو تکلیف دیتے ہو ۔